Virelay 74 : Fuions tuit courroux, tristesse (DCCLVIII)
Autre Virelay
Fuions tuit courroux, tri[s]tesse, 201b
Lascheté, toute peresse,
Orgueil, tout mal et envie,
Soions liéz et menons vie
5 En paix, en joye, en leesse.
Servons Dieu, n’oublions mie
Que la mort est ennemie
De tous et que nul ne lesse,
Tant soit grant, que ne desvie.
10 A ce pas passer n’obvie
Nulz pour senz, ne pour richesse.
Faisons bien, honeur, largesse.
Convoitise ne nous blesse,
Foyons toute villenie,
15 Soyons amis et amie.
Qui a mal fait si l’adresse.
Fuions tuit [courroux, tristesse.]
Souffisance soit cherie
De tous, senz merencolie,
20 Et honneur noz cuers radresse
Si c’on n’y voye folie.
L’un de l’autre ne mesdie,
Ayons tous cuer de noblesse,
Courons le temps par prouesse
25 De nostre exil qui ne cesse.
Que l’ame soit departie
Du corps tant qu’elle ait partie
Avec Dieu en sa haultesse.
Fuyons tuit [courroux, tristesse.]