Virelay 51 : Les Bretons ont fait campaigne (DCCXXXV)

Virelay

[1375]

            Les Bretons ont fait campaigne[1]
            Pour aler en Alemengne
            O le seigneur de Coucy.
            Maiz puis se sont averty
5          Qu’il fait plus doulx en Chempaigne.

            Les trives nous ont honny,
            Car chascun s’est departy
            Pour le traittié de Bretaigne.
            Loire s’en est biensenty,
10        Et Aucerroys autrecy.
            N’est pais qui ne s’en plaigne.

            Il n’est mauvaiz qui remaigne,
            Qui ne pille et qui ne prengne.
            Le bien commun est ravy.
15        Defendre ses biens ne ly
            N’ose nulz. Dieux en vonciengne !
            Les Bretons [ont fait campaigne.]

            Sages sont nostre ennemy,
            Qu’eulz estans en dur party
20        Ont trieves, quoy qu’il aviengne,
            Et vivent en nom d’amy,
            Dont pluseurs seront pery,
            A descouvrir leur ensengne.

            Helas ! tout li cuers me seigne.
25        Je ne say qui leur ensaingne
            A eulz gouverner ainsi.
            Se Dieu n’a de nous mercy,
            Nous devendrons ceulx d’Espaigne.         195d
            Les Bretons [ont fait campaigne.]

30        Oncques tel chose ne vy.
            Car il ont, a Saint Thierry,
            Faicte la foire brehaingne,
            Qui est de Saint Bertremy.
            Maint marchant on amary
35        Et robé sa propre gaigne,

            Mercerie, draps de layne,
            Chevaulx, c’est chose certaine.
            Fiertre, bras et crucefix
            De l’eglise ont sans deffy
40        Appliqué a leur demayne.
            Les Bretons [ont fait campaigne.]

[1] Ms. compaignie