Virelay 22 : Par ma foy, cilz pert sa payne (DCCIII)

Virelay

            Par ma foy, cilz pert sa payne
            Qui me dit chose villayne
            De celui que j’aime tant.
            Plus lameray que devant,
5          Avaingne quoy qui avaingne.

            Cuidéz vous dont que je craingne,
            Ne que pour faulx parler faingne
            Que je hee mon amant,
            Ne qu’autre a amer empraingne ?
10        Cil convient que loyng se teingne
            Pour pluseurs qui vont jenglant.

            Plus est loing, plus me demaine
            S’amour et plus est certaine
            Que de le veoir souvent.
15        Parlent arrier et avant
            Mesdisans, je seray sayne.
            Par ma foy, [cilz pert sa payne.]

            Il est d’oneur la fontaine,
            Sa vie est de douceur playne,
20        Il est hardy et vaillant.
            Prouesse partout le maune,
            Large est con fu Charlemaine,
            Bien densant et bien chantant.

            De faire plaisir se payne,
25        A touz Noblesse l’ensaingne.
            Il a bon corps, bel et grant,
            Il est de bien faire engrant,
            C’est m’amour tressouverayne.
            Par ma foy, [cilz pert sa payne.]