Virelay 12 : Il n’est avoir ne monnoye (DLXVI)

Autre Virelay

            Il n’est avoir ne monnoye
            Qui vaille senté et joye
            Et le bien faire toudiz,
            Estréz liéz, gays et joliz,
5          Et que tousjours se resjoye.

            Car qui s’esjoit, ce m’est vis,
            Juene chiere a et doulx vis,
            Et semble que vivre doye
            Longuement, maiz esperis
10        Tristes est tantost p[e]ris,
            C’est de mort la droite voye.

            Tristesse seche et desvoye
            Les tristes cuers et avoye
            A la mort : rop sont chetis,
15        Qui pour ses faulx biens fuitis
            Perdent tout : que vous diroye ?
            Il n’est [avoir ne monnoye].

            Soit homs courtoys en ses dys,
            De souffisance garnys,
20        Et qu’envieux ne se voye.
            Honnestes en ses habis,
            C’on l’aime et qu’il soit amis,
            Et qu’en orgueil ne desvoye.

            Preigne en gré, noyant ne doye
25        En labourant, et s’esjoye
            De son labeur. Soit nourris
            Soubz toit couvert et fourniz.
            Mieulx conseillier ne saroye :
            Il n’est [avoir ne monnoye].