Virelay 10 : Bien devéz faire grant joye (DLXIV)

Virelay

            Bien devéz faire grant joye
            Comme le roy se resjoye
            De vostre fruit a venir,
            Lequel il voudra tenir :        175d
5          Or pri Dieu qu’a bien l’avoye.

            Toudiz l’en veult souvenir,
            Et le desire a veir,
            En disant : ― Se le tenoye,
            Tant me feroit esjoir
10        Que nulz ne porroit oir
            La feste que j’en feroye.

            Car s’en mes mains le tenoye,
            Moult volentiers le verroye.
            C’est la rien que plus desir :
15        Or veille Dieux mon desir
            Accomplir que brief le voye.
            Bien devéz [faire grant joye].

            Et pour vostre enffant nourrir,
            Faictes nourrice querir
20        Qui soit nette, simple et coye,
            Dont tresbon lait puist yssir,
            Et en biaux linges tenir
            Le faictes : ainsi feroye.

            Puis faictes mettre a la voye
25        Aucuns, si que le roy voye
            Et sache vostre agesir.
            Ce le fera resjoir.
            Mieulx conseillier ne saroye.
            Bien devéz [faire grant joye].

30        Lors y prendréz grant plesir.
            Si [ne] vous doit souvenir
            De chose qui vous avoye
            Fors de joye maintenir
            Et du nom Dieu conjoir
35        Qui lignie vous envoye.

            De lui loer ne recroye
            Vostre cuer. Tous jours diroye :
            Dieu m’a ce fait avenir         176a
            Pour la terre soustenir.
40        Et ainsi m’esjoiroye.
            Bien devéz [faire grant joye].