Rondeau 104 : Dame que j’ain plus que le corps de my (DCLXVII)
Rondel
Dame que j’ain plus que le corps de my,
Ne m’oubliéz, pour ce se je suis hors,
Pour mesdisans et par felons rappors.
Car tous vostres sui sans point de demy,
5 Et vous estes mes precieux tresors,
Dame que j’ain [plus que le corps de my,
Ne m’oubliéz, pour ce se je suis hors.]
Mais par grace me donnéz nom d’amy,
Et si sera riches[1] mes reconfors,
10 Si chanteray a present et pour lors.
Dame que j’aim plus que le corps de my,
[Ne m’oubliéz, pour ce se je suis hors,
Pour mesdisans et par felons rappors.]
[1] Ms. tresriches