Rondeau 15 : Juenes d’aage, vieux de science (DLXXIII)
Rondel
Juenes d’aage, vieux de science,
Expers en tout ce c’om puet dire,
Vo mort fait maint cueur plorer d’ire,
Preudons de bonne conscience,
5 Larges, sans nul homme escondire,
Juenes d’aage, [vieux de science,
Expers en tout ce c’om puet dire.]
Homs plains de toute sapience,
Vaillans pour garder un empire,
10 Par vo mort mainte chose empire,
Juenes d’aage, [vieux de science,
Expers en tout ce c’om puet dire,
Vo mort fait maint cuer plorer d’ire.]