Pièce 1 : Demoustracions contre sortileges (MCCCLXI)[1]
Demoustracions contre sortileges
Comment nul prince terrien ne nul vray crestien ne doivent user ne enquerir les choses qui cy aprés s’ensuivent
Demoustracions qu princes terriens ne nulz vrayz crestiens ne doivent enquerir, ouvrer ne user des choses advenir, mucees, occultes et secretes, ou qui a ce puelent estre appliquees par astrologie, par goemancie, par nygromancie, par ydromancie, par pyromancie, par cyromancie, par experimens, supersticions d’auspices, des encontres discerner, d’auguremens par le chant et volement des oiseaulx, par les membres des bestes mortes, par art magique, par invocacions, interpretacions de songes et pluseirs autres vanitéz qui ne sont pas sciences, fors a parler improprement. 380d
Comment Zozastres qui trouva ces ars fut tué par Nynus
Zozastres, qui regnoit en Batrie, et trova ces ars magiques, fut par Nynus tué, qui lui osta la vie et le royaume, et ardit partie de ces faulx livres. Et ce recite monseigneur Saint Victor ou second livre de la Vanité du monde, et ja soit ce que Nynus ne fust pas juste, Dieux lui voult donner victoire sur plus mauvés, afin que plus grant mauvestié ne regnast.
Comment Athlas perdit son royaume
Athlas, jadis roy d’Espaingne, fut chacié et bouté hors de son royaume, et s’en fuy en une montaigne en Grece, qui pour ce est encore appelee Athlas. Et si faingnent les poetes que pour sa grant astronomie il porte et tourne le ciel.
Comment Neptanabus fut tué par Alixandre
Neptanabus, roy d’Egipte, qui tousjours avoit ses recours aux ars mathematiques et aux divineurs, fut entreprins de.xiiii. nascions de Barbarie et ainsi comme de tout Orient. S’en fuy honteusement en Macedoine en habit de phillosophe, et en la fin Alixandre le bouta en une fosse et lui rompit le coul. Et ainsi fina mauvaisement. 381a
Comment Tallés chut en une fosse
Tullés[2] Millesius, ja viellart, voult regarder ou ciel, et se fist admener hors d’une ville par une vielle, et en regardant aux estoilles, il chut en une fosse et se tua. Adonc lui dist la vielle : ― O Tullés[3], tu ne sces veoir a tes piéz. Et comment pourroies tu cognoistre les choses du ciel ?
Comment le roy Mitridatés fut vaincu par Pompeius
Mitridatés, ce dit Plinius, fut un tresgrant roy a son temps, moult ententis et curiaulx[4] es choses ou sciences dessus dictes. Et fut vaincu et confus par Pompeyus, qui lui osta ses livres, et puis les fist translater en latin.
Comment Jaques, roy de Maillorgues, perdit son royaume
Jaques, roy de Maillorgues, qui estoit moult enclin a telles divinacions et a eslire heures et jours pour son partement et autres besongnes siennes, eslut heure par astrologie de partir d’Avignon, ou il ala, et perdit et la vie et le royaume.
Ferrant, ponce[5] de Flandres, fut deceu par divinacion, quant il vint en France pour combatre, car le respons lui fut donné de l’ydole a qui il ala, qu’il entreroit a grant joye a Paris. Et par ce il entendit avoir la victoire. Mais il fut desconfit et prins honteusement, et admenéz lié et enferréz a Paris, dont tout le peuple o tresgrant joye. Et quant l’ydole fut reprinse de son respons, elle respondit que a grant joye estoit entréz Ferrans a Paris, mais on ne lui avoit pas demandé au commencement a qui la joye seroit, ou a ceuls de Paris, ou au dit Ferrant, qui mourut prinsonniers honteusement. 381b
Comment Pompee fu deceu par les sors en Delphos[6]
Item ainsi sont finéz, et est mal venu a tous les princes et autres qui par telles divinacions ont voulu enquerir les choses et fortunes advenir, et de ce il appert en Lucan du filz Pompeius, qui ala enquerir de par son pere aux sors en Delphos, qui vaincroit la bataille de Thessalle, en laquelle a la fin de trois jours il fut sibjugué de Julius Cesar, et s’en fuy devers Tolomee, roy d’Egipte, cuidant estre son grant ami, mais en la fin Tolome lui fist tranchier la teste, et l’envoya en present a JuliusCesar, pour avoir sa grace.
D’Amphyoroys
Amphyoraus en l’ystoire de Thes en fu destruit.
Exemple de Noiron
Noiron l’empereur, ce dit Plinius, pareillement fut occis de ses sergens 381c
Du roy Xersés
De Se[r]xés, roy de Perse, recite le dit Plinius que, comme pour ses divinacions et mauvais sors fust subjuguez en bataille avec tout son ost de ses adversaires, un de ses chevaliers lui reproucha, quant il mouroit, que ses mauvés ars estoient cause de la desconfiture de lui et de son ost.
D’autres qui userent de telz ars
Item a esté semblablement de ceuls qui se confient es paroules des ydoles, ou de ceulx qui ont esperit phitonique ou telz divinemens.
Autre exemple de pluseurs roys
Li roy Cresus, ly roys Pyrus, Agathoclés, les deux freres roys de Thebes, Polinicés et Ethioclés, le roy Apius, le roy Saul et pluseurs autres, furent destruiz pour semblables divinemens.
Comment Pierre de Bloys parle contre telz auguremens
Pierre de Bloys recite en son Pistre contre auguremens que pluseurs princes et autres ont esté deceus et mis a perdicion par telz divinemens.
Comment Fortune se combat contre ceuls qui veulent sçavoir les secréz
Item ce n’est pas veritable seulement quant aux roys et aux princes, mais communement tous ceuls qui par telz ars s’esforcent de sçavoir les fortunes advenir, sont infortunéz, et Fortune se combat aigrement contre ceuls qui folement s’esforcent de sçavoir les secréz. Et c’est bien raison que Dieux fasse punicion de telz gens. 381d
Cy parle Moyse
Moyse, au xviiie chapitreDeuteronomi, desfent au peuple d’Israel que, quant ilz venrront en la terre de Promission, ilz n’ensuient point la mahommerie des gens d’icelle terre, c’est a dire qu’ilz n’aient entre eulx nulle maniere de divinemens.
Encores de ce mesmes.
Item Dieux donna celle terre au peupe d’Israhel, non pas pour leur justice, si comme contenu est ou ixe chapitre, mais pour la pugnicion de l’iniquité des habitans de la terre, divineurs et sortileges.
Comment on doit avoir grant paour de user de telz choses.
Item [qui] considere ceste escripture si anciennement approuvee de Sarrazins, Juifs et Crestiens par tout le monde, doit avoir grant paour de user de telz ars, etc.. car autre principal cause n’est assignee de la vengence temporele de la destruction des royaumes et des gens.
Autre exemple par Ysaie.
Item Ysaie, ou iie chapitre de son livre, dist a Nostre Seigneur : ― Tu as getté hors[7] ton temple de[8] la mesgnie de Jacob ! Et ce fut interpreté, quant Nabugodonosor jetta jors les Juis de Jherusamel et de Judee, et les mena prinsonniers en Babiloine. Et pour ce ceste fin du royaume de Jherusalem est appellee en l’Euvangile la transmigracion de Babiloine. Et tout pour ce qu’ilé furent rempliz d’art magique. 382a
Item ou xviie chapitre du Quart livre des Rois dit, quant il parle de la destruction du royaume d’Israel et du peuple : entre les autres causes il assigne ceste, et dit qu’ilz servoient a divinacions et a auguremens. Et puet l’en conclure que ainsi que les autres royaumes et peuples furent destruis par telz divinemens et mauvais ars, le royaume de Juda, cellui d’Israel et la cité de Jherusalem alerent semblablement a destruction.
D’un autre exemple que met Ysaie
Item, Isaie ou xliie chapitre, reprouche Nostre Seigneur a la cité de Jherusalem Babilonne aprés sa destruction, en disant : ― Ou sont tes divineurs ? Pour quoy ne te sauvent ilz, qui regardoient aux estoilles et les consideroient, et comptoient les moys et circuloient et gettoient pour sçavoir le temps, afin qu’ilz canonizassent les choses qui estoient advenir ? Ce dist Dieux par son prophete et veult dire que leurs consaulx furent mauvais et dommageux.
Comment toutes divinacions sont deveees en la Saincte Escripture
Item toutes teles divinacionssont dev[e]ées en la Sainte Escripture en pluseurs lieux, et es commandé que ceulx qui s’en entremettent soyent occis.
[1] Titre restitué d’après la table du manuscrit
[2] Raynaud corrige en Tallès
[3] Raynaud corrige en Tallès
[4] Raynaud corrige en curieux
[5] Raynaud corrige en prince
[6] Titre placé dans le manuscrit après en Lucan
[7] Raynaud corrige en de hors
[8] Raynaud supprime ce mot
