Dit 35 : Pour vostre santé maintenir (MCCCCXCVI)
D’un notable enseignement pour continuer santé en corps d’omme
1 Pour vostre santé maintenir,
2 Vueilléz ceste regle tenir :
3 Buvéz vin soutil, rouge et cler,
4 Et le faictes d’eaue temprer
5 De courant riviere ou fontaine,
6 Non marcageuse, clere et saine,
7 Sobrement et sanz exceder.
8 De boire vous vueilléz garder
9 Ypocras, claré et garnache,
10 Gros vin vermeil trouble, qui saiche
11 La fumee de la doleur
12 Au chief et fait au cuer ardeur,
13 Es[1] costéz et en la vessie,
14 Et es reins gendre maladie
15 Souvent de pierre ou de gravelle.
16 Et pour plus vivre et garder d’elle,
17 [De] choux, [de] pois, de[2] gros potaige[3]
18 Ne mangez ne de viéz frommaige ;
19 Viel lart[4], chars, beufs, vache ne chievre.
20 Pourceaulx privéz visqueux ne lievre,
21 Biches, cerfs ne telz animaulx,
22 Fortes sausses, oignons et aulx,
23 Civéz aguz, poivre ne graigne
24 N’uséz[5], car trop font mal et paine ;
25 Ne mangez d’annette ne d’oe
26 Ne de nul autre oisel qui noe,
27 De gros et vielz poissons visqueux
28 De douce eaue, eschuez ceulx
29 De mer qui ont bestiaulx noms,
30 Chiens de mer, marsouins, saumons,
31 Congres, tourboz et leurs semblables,
32 Qui sans escailles sont nuisables ;
33 Chars salees, quelque friture
34 Ne donnéz a vostre nature.
35 Pain de froment a tout la flour, 485c
36 Bien cuit, d’une nuit et d’un jour,
37 Qui sante un petit son levain
38 Ou le sel, user soir et main,
39 L’escaille du dit pain ostee,
40 Se gravelle vous est notee.
41 Gardéz vous de replection
42 De viande et de pocion,
43 Et de traveil aprés mangier,
44 Car nature en seufre dangier.
45 Chastaignes, pommes, nefles, poires,
46 Blanches prunes, grosses ou noires,
47 Ne mangiéz ne semblables fruis,
48 Car ilz nusent e t crus et cuis.
49 Exercitéz vous au matin,
50 Se l’air est cler et enterin,
51 et soit voz mouvemens trempéz,
52 par les camps, es boys et es prez.
53 Et se le temps n’est de saison,
54 Prenéz l’esbat en vo maison
55 Ou autre part en lieux plaisans.
56 Vivéz tousjours liéz et joyans ;
57 Gardéz vous en yver de froit ;
58 Vestéz vous et fourréz a droit
59 De rove et de bon garnement ;
60 et si vous couhiéz molement,
61 En vous faisant si bien couvrir
62 Que le vent ne puisse courir
63 Ne demourer en vostre chambre ;
64 Faictes bon feu ; d’encens et d’ambre,
65 De[6] genevre faictes fumee
66 Par l’air gros en vo[7] cheminee.
67 et en este tout le contraire
68 Pour le souleil vous[8] couvient faire :
69 Avoir haulte chambre et joieuse, 485d
70 Le may et heerbe gracieuse,
71 L’eaue rose a vous refreschir,
72 Lit de coton pour vous gesir ;
73 pour courvrir, garder des cincelles[9] ;
74 Et si devéz toudis voz selles
75 Evacuer, quant l’apetit
76 Vous vient[10], tant y faciéz petit.
77 Robe de fin drap ou de soye
78 Legiere avoir et sanz courroye,
79 Double de cendal, qui l’ara,
80 Ou d’autre, qui mieulx ne pourra ;
81 Eaue de chiches bien souvent
82 user, car je vous ay couvent
83 Que profitable est a tout homme ;
84 Et s’aprés disner vous prand somme,
85 Incontinent dormir raléz ;
86 Avans, un pou vous esbatéz,
87 Et tout pour la replection
88 Qui engendre indigestion,
89 Reume, fleume et maint autre mal ;
90 Et s’aller vous fault a cheval,
91 Chevauchiéz a la matinee
92 Asséz fort, mais puis la disnee,
93 Devéz chevauchier doucement.
94 Gardéz vous especialment
95 De faire l’euvre naturele
96 Trop souvent, car elle est mortele.
97 D’autres viandes, exceptees
98 Celles qui sont dessus touchees,
99 Dont les autres gens ont usaige,
100 Pouéz user sanz vo dommaige,
101 Comme de cerfs jeunes faons[11],
102 De cabriz, faisans et moutons ;
103 De poucins, perdriz, teurterelles, 486a
104 Connins, plouviers, de poules vieilles,
105 Vuidecoqs, semblables oyseaulx,
106 Et aucune foiz chars de veaulx
107 Qui aient plus d’un moys passé,
108 Qui soient gras et entassé,
109 Nourriz de let de bonne mere,
110 De poussons ou l’escaille pere,
111 Comme brochez, bresmes et perches ;
112 Dars et[12] roces pour mangier cerches,
113 Car ceuls ne quierent pas le fons
114 De l’eau, si en sont plus bons,
115 Combien que touz soient visqueux :
116 Carpes, barbeaux sont lymonneux ;
117 tanches, aanguilles et bourrees
118 Sont ou fons de l’eaue boutees,
119 Perilleuses pour leur venin ;
120 Crevices que on[13] cuit en vin
121 Mangue en[14] pour leur dure escaille ;
122 Et combien que pou tout ce vaille,
123 Du poisson de mer pran les soles,
124 Plaiz, rogéz, a briés paroles
125 Et touz autres qui ont escame ;
126 La queue et la teste en entame
127 Et de touz telz poissons nouans,
128 Car ces deux sont plus remuans
129 Et moins visqueux, queue et la[15] teste ;
130 Du purcel, qui est orde beste,
131 Les oreilles, queue et le groin
132 Et les piéz, qui de mouvoir soing
133 Ont tousjours, pour leur mouvement
134 Se[16] manguent communement ;
135 Le doumrant est deffendu
136 Pour le porc qui est corrumpu.
137 Canelle, gingembre et safran 486b
138 Pour ces sauses communes pran ;
139 Use de verjus pour vinaigre ;
140 Mangu char entre gras et maigre :
141 Use du maigre par dedens,
142 Car la gresse pourrist les dens
143 Et si fait trasce qui fistule ;
144 Use souvent, pour ta nature,
145 De persil, bettes et bourraches,
146 Violiers ; et vueil que tu saiches
147 Que le cresson pour les porees
148 Est le meilleur ; use[17] porees
149 Qui soient faictes au persil,
150 Pour ce qu’il est de pierre essil
151 Et qu’il descombre les conduis.
152 Et si te pri tant com je puis
153 Que toutes chosess laxatives
154 Et qui seront asperatives
155 Vueilléz user communement :
156 Si en vivras plus longuement.
157 Le lait, le maton et la craime
158 Redoubte qui [sa] santé aime,
159 Et le burre en grant quantité,
160 Qui plus ont nuit que profité
161 A chascun en sa maladie ;
162 Pour ce fault[18] que je le[19] te die
163 Que d’en user te garderas
164 Si chier que ta santé aras.
165 Et certes, qui user vouldroit
166 D’un bon més faire le pourroit
167 Et en eslongeroit[20] sa vie,
168 Car deux choses sont en partie
169 A toute nature contraire
170 C’est assavoir : a table faire
171 Trop long disner et divers mes, 486c
172 Dont l’on[21] ne deust user jamés,
173 Car nature a au digerer
174 Trop de mal, ce puet l’en[22] prouver,
175 Par la diversité d’iceulx :
176 Si grievent[23] plus c’un mes tous seulx,
177 Et si en siet on plus aux tables,
178 Quant on sent telz mes delectables ;
179 Si ne puet viandre descendre
180 Lors pour sa digestion prendre
181 N’aller au fons de l’estomac.
182 Mains sont mort d’mplire leur sac,
183 Qui eussent duré longuement,
184 S’ilz eussent vescu sobrement ;
185 Mais pluseurs veulent abregier
186 leur vie et vivre pour mangier,
187 Comme les glouz et les chetis
188 Qui ne scevent leurs appetis
189 ne que font le chiens ou les leux.
190 Mais [il] y en a moult de ceulx
191 Qui pou manguent pour plus vivre :
192 Des phisiciens sont delivre,
193 Car ilz n’ont fievre ne accés,
194 Pour ce qu’ilz ne font nul escés.
195 Ceuls mainent leur eage a droit temps
196 Qui sont d’ainsi vivre contens ;
197 Saiges[24] est cilz qui y resgarde
198 et qui de faire excés se garde.
199 Si vou pri, tuit y resgardons,
200 Et d’excés faire nous gardons ;
201 Retenons petit a petit,
202 Sanztrop mangier, nostre appetit,
203 Tant que nous aions un lieu vuit,
204 Sanz trop emplire le conduit
205 Pour aspirer et respirer. 486d
206 Et s’on sent son corps empirer,
207 Aller fault aux praticiens,
208 Qui soient bons phisiciens,
209 Pour seingier ou pour vantouser
210 Ou pour medicine donner.
211 Quant est du dormir, je conseille
212 Qu’omme[25] nul, qui dorme ou qui veille,
213 Ne couche le ventre dessus
214 Ne dorme, car plsueurs deçus
215 En ont esté, sont et seront
216 Qui de ce ne se garderont.
217 Dorméz premier au costé destre,
218 Et puis aprés sur le senestre ;
219 Souppez pou et legierement :
220 S’en dormiréz plus doulcement
221 Et avréz mieulx[26] vos esperis.
222 Maintes gens ont[27] esté peris
223 Et suffoquéz par trop soupper,
224 par trop boire et par trop laper
225 D’ypocras, de viande et vin.
226 Si faiz a ma diette fin.
[1] Ms. BNF 6221 Et
[2] Ms. ne
[3] Ms. BNF 6221 Choux pois ne gros potaige
[4] Ms. Viellars ; ms. BNF 6221 Viellars
[5] Ms. Ne usez ; ms. BNF 6221 Ne usez
[6] Ms. Ou de ; ms. BNF 6221 Ou de
[7] Ms. vostre
[8] Ms. BNF 6221 vo
[9] Ms. crucelles ; ms. BNF 6221 crucelles
[10] Ms. faciez
[11] Ms. moutons ; ms. BNF 6221 moutons
[12] Ms. BNF 6221 et mq.
[13] Ms. BNF 6221 Escreviches quon
[14] Ms. len
[15] Ms. BNF 6221 la mq.
[16] Ms. BNF 6221 Sy
[17] Ms. BNF 6221 user
[18] Ms. BNF 6221 fault il
[19] Ms. BNF 6221 jel
[20] Ms. BNF 6221 alongeroit
[21] Ms. lun ; ms. BNF 6221 on
[22] Ms. BNF 6221 on
[23] Ms. BNF 6221 friefve
[24] Ms. BNF 6221 Saige
[25] Ms. BNF 6221 que home
[26] Ms. BNF 6221 mieulx mq.
[27] Ms. BNF 6221 en ont
