Dit 16 : Treschiers et tresamé cousin (MCCCCIX)
Autres lettres envoiees a un serviteur du duc Philippe d’Orliens
1 Treschiers et tresamé cousin, 420d
2 Tant avéz pincé le raisin
3 Et la puree de Bourgoingne,
4 Que mal a alé vo besoingne.
5 Souffert en avéz maladie,
6 Et s’avéz a chiere hardie,
7 Dont vous avéz fait vostre honneur,
8 Bien acompaignié Monseigneur
9 De puis qu’il a esté malade.
10 Vous sçavéz bien faire le sade,
11 Le gracieus et le joli
12 Et respasser plus tost que li,
13 Qui fort contrefaictes le saige.
14 En bonne foy c’est grant dommaige
15 Que ne vous tient encor la toux.
16 Bien est mal emploiéz en vous,
17 Ne sçavons pour quoy il s’en part,
18 Car en chambre buvéz a part,
19 Et en faisant la Magdelaine,
20 Y demouréz une sepmaine
21 Ou vous n’avéz doleur ne mal,
22 Ainçois mangiéz comme un cheval
23 Et buvéz com fait un Normant.
24 Bien aléz le monde endormant
25 Afin que ma dame vous deuille :
26 Mais ce fait le vin qui vous mueille
27 Et qui vous assault le cervel.
28 Ce vous[1] dit Eustace Morel
29 Qui moult a vous se recommende.
30 Sausset et Poinsinet vous mande
31 Que vous trempéz fort vostre vin
32 Pour mieulx endurer le chemin
33 Au retourner de par de ça.
34 Quant aux nouvelles de dela,
35 En tant que de certain sçavons 421a
36 Et que par escript veu avons
37 Que Monseigneur est en bon point,
38 Laquelle chose Dieux vous doint,
39 Sommes nous [tous] tresliéz de cuer,
40 En priant a Nostre Seigneur
41 Qu’il le ramaint prouchainement
42 Saint et sauf, car joieusement
43 Le desrient tuit a veoir
44 Devers Monseigneur et sçavoir
45 Tousjours son estat et santé.
46 Si nous en soit par vous mandé
47 De[2] belle tante, et par ces vers
48 Au gentil conte de Nevers
49 Et a tous nous recommendons.
50 Et par ces lettres vous mandons
51 Que vous nous y recommendéz,
52 Et Pierre aussi nous saluez
53 Et touz les autres compaignons.
54 Au surplus sçavoir vous faisons
55 Que Monseigneur en bon point est,
56 Berry [et] moy et Valoys prest
57 D’aler chevauchier sur les champs.
58 Tenéz vous gay, qu’il est meschans
59 Qui trop prant de mal et de paine.
60 Ma dame a encor sa tiersaine
61 Qui l’a tenue cinq accés,
62 Mais les medicins qui sont pres,
63 Dient que tost sera guarie.
64 Nous prions la vierge Marie
65 Qu’elle vous doit sancté et paix
66 Sanz estre malade jamais,
67 Et vous doint vin froit et lit mol !
68 Escript en l’ostel de Saint Pol
69 Sur les genoulz et sur le coutte, 421b
70 Le droit jour de la Panthecouste,
71 Au coing de l’autel en grant presse,
72 Que que l’en chantoit la grant messe.
[1] Ms. nous
[2] Ms. De ma
