Chançon royal 103 : Un ordre sçay de nouvel establie (DCCCCXXVIII)

Autre Balade

            Un ordre sçay de nouvel establie,
            Dont maintes gens se doivent fort loer,
            Et ou l’en doit boire jusqu’a la lie
            Tant qu’es henaps ne doit riens demourer.
5          Et si doit on toudis du pot verser
            Vin es vaisseaulx, l’un l’autre requerir :
            Les requerans y doivent obeir,      241b
            Sanz refuser tout boire, et sanz escroe :
            Ainsi se doit cest ordre maintenir
10        Qui s’appelle l’ordre de la baboe.

            Siffrevast est abbéz de l’abbaie.
            De son convent vueil les moines nommer :
            Rocherousse, le Flament ne s’oublie,
            Robert tesson et Enfernet le ber,
15        De Poquieres le borgne bachelier.
            Pierre vous vueil de la Tremoille offrir,
            Les Bouciquaux qui ce puelent souffrir,
            Harmanville, Regnier Pot, que je loe,
            Car bien se font en l’eglise servir
20        Qui s’appelle l’ordre de la baboe.

            De Jehan Augier convient que je vous die,
            De Saint Germain, Montagu au vis cler,
            Et d’Uguenin a la chiere hardie,
            De Chevenon qui bien se scet huver.
25        Messire Arnoul y scet boire et humer.
            Sempy et Sync s’i scevent contenir :
            Et d’Angenes font la Regnaut venir.
            Le Barrois fait a Thorigny la moe :
            En la maison se scevent bien chevir
30        Qui s’appelle l’ordre de la baboe.

            De ceste ordre qui vient de Normandie
            Ne doy Pierre de la Haie oublier,
            Ne Guillaume de l’Aigle, a ceste fie,
            Jehan y doit d’Estouteville aler,
35        Robinet doy de Boulongne apperler.
            Car puissans est pour l’ordre soustenir
            Ou l’en ne doit nul homme retenir,
            Se tant ne boit que son cuer en vin noe :
            Lors en l’ostel puet moines devenir
40        Qui s’appelle l’ordre de la baboe.

            Car, par ma foy, c’est noble compaignie
            Ou l’en oit bien tabourer et hurter.          241c
            On y sert Dieu du main jusqu’a complie.
            Nulz malades n’y puent demourer.
45        L’un a l’autre fait le vin presenter
            Tant qu’a boire font touz les poz tarir.
            Qui malade est, la se face garir.
            Car maint y ont gros nés et grosse joe,
            Qui ne scevent de l’ostel departir
50        Qui s’appelle l’ordre de la baboe.

            L’envoy

            Princes, qui veult rire et soy esjoir,
            De biaus parlers et de bons moz oir
            Et de chascun la maniere et la roe,
            Voise veoir ces gens au departir
55        De la maison, ou maint son vray martir,
            Qui s’appelle l’ordre de la baboe.