Balade 1006 : Compains, ne vueilliéz marier (MCCCCLXXXV)
Response en balade par un sien amy de soy non marier
Compains, ne vueilliéz marier :
Cilz est trop fouls qui se marie,
Car telle print un mari hier,
Qui en est ja toute marrie.
5 […][1]
Tant soit simple au commencement,
Qui ne traicte trop durement
Son mari, quant prinse a sa proye.
Souffrir lui fault paine et tourment :
10 Pour ce l’appell’on rabatjoye.
Il couvient trop droit charier,
Qui en mariage charie.
Tout son bon temps fault varier
Par femme qui tousjours varie :
15 Une heure brait, autre heure crie,
En ce monde n’a tel tourment.
Pour un voir dire cent foiz ment,
Et veult pour jurer qu’om la croye,
Ja soit ce qu’il soit autrement :
20 Pour ce l’appell’on rabatjoye.
Femme ne fait que tarier
Son mari, mais j’a n’iert tarie
D’a lui joindre et apparier
Ou a autre, s’aucuns la prie.
25 De la vient toute jalousie.
Qui ne fait les nopces souvent,
L’en a pis qu’escommunement :
Et quoy ? Toute dolour sanz joye, 452c
Et ce scet homs certainement :
30 Pour l’appell’on rabatjoie.
L’envoy
Princes, Job, Ulixés, Thobie,
Sanson, Herculés et Urie,
Le roy Priant, Hector de Troye
Eurent trop de mal en leur vie
35 Par femme, qui trop est hardie :
Pour ce l’appell’on rabatjoie.
[1] Vers manquant
