Balade 1004 : Las ! Franchise, je me confesse (MCCCCLXXXIII)
Balade comment homme franc avant mariage, plaint sa franchise, lui marié, s’en confesse et repent a Venus, la deesse d’Amours
Las ! Franchise, je me confesse 451d
A vous et Venus la deesse
De voz biens que j’ay deguerpy,
Que je receus en ma juenesse
5 Par vostre don en grant largesse,
Qui me sont de tous poins failli,
Qu’[un]e vieille m’a assailli
Qui est Couvoitise nommee
Et m’a fait marier a li :
10 De male heure fust elle nee !
Car trop la treuve felonnesse :
En tout veult estre ma maistresse,
Maint mal m’a fait, maint dueil, maint cry.
Serf suy, c’es ce qui plus me blesse.
15 Jamais n’aray fors que tristesse :
Mariage m’a fait cecy.
Franchise, je vous cri mercy.
Je me repens de la journee
Que femme espousay : je langui !
20 De male heure fust elle nee !
Car Franche Voulenté me lesse.
Pour avoir fait fole promesse,
Mariage m’a asservi.
Tous frans cuers, je vous suis l’adresse
25 De vivre, en joie et en leesse
Gardéz vous, car je suy honni,
Foulé, debouté, escharni,
Par moi marier ceste annee
A femme : estre vouldroye occy !
30 De male heure fust elle nee !
L’envoy
Juenes et vieulx cuers de noblesse,
Franches personnes, chascuns cesse
De prandre et avoir espousee,
Pour vivre en paix ! Car je possesse
35 Par femme plour, langour, destresse ! 452a
De male heure fust elle nee !
