Balade 1003 : Tu qui deffendoies jadis (MCCCCLXXXII)
Balade de aucuns qui blament[1] prendre femme autr foiz mariee, qui la prennent eulx mesmes
Tu qui deffendoies jadis
Comme docteur de femme prandre,
Par escripture et par tes dis
Moustrans les perilz d’y descendre,
5 Te voy celle doleur emprandre
En redarguant ta parole,
Qui a toi est honteuse et fole : 451c
Vieille poule a juene cochet
Ne sont pas les diz de l’escole!
10 Or es tu prins au trebuchet !
Tu sera appeléz maris
Desormais, et te fault entendre
Mains durs mos dont seras marris,
Taire, souffrir, veoir, apprandre
15 Les meurs femenins [et] comprandre
Le chant de l’oisel qui parole
Aux mariéz ou temps qu’il vole
Es moys d’avril, juing et juillet ;
Bouté te voy en sa geole :
20 Or es tu prins au trebuchet !
Adieu juenes, gays et jolis!
A nous te fault tes armes randre.
Ren toy, car tu es desconfis.
Dy le mot, plus ne puéz attendre.
25 Adieu le beau, le doulz, le tendre !
Adieu filles, adieu carole,
Adieu Amours qui se rigole
De toy, qu’elle tient pour deffet,
Puis que mariages t’acole :
30 Or tu es[2] prins au trebuchet !
L’envoy
Compains, trop as esté hardis,
Car jamais tant que soye vie,
N’aras fors que riote et plet.
Pour ton devancier, doulz amis,
35 Te fault dire de profundis :
Or es tu prins au trebuchet !
[1] Raynaud corrige en blamoient
[2] Raynaud corrige en es tu
