Balade 1001 : Pluseurs parolent du dangier (MCCCCLXXX)
Balade d’escoliers[1] d’Orliens
Pluseurs parolent du dangier
Qu’il faut souffrir en mariage,
Et ce qu’il fault a mesnagier,
Quant il entre en nouvel mesnage,
5 Mais ce n’est rien contre la rage
Qu’ont ceuls qui mettent leurs enfans
A l’estude a apprandre sens !
Robes leur fault, liz, vaisseaulx, pos,
Livres, hostel, et en touz temps
10 Mandent salutem et nummos.
Et si fault pour estudier
Buche, charbon, char et potaige,
Pain et vin, tant se vende chier,
Dont les peres paient l’outraige,
15 Les despens de la beste en caige,
Poree, lart, poisson, harrens,
Lumiere. Et tousjours sont querrens
En leurs lettres par piteux mos :
A pere, a mere et a parens 451a
20 Mandent salutem et nummos.
Et quant vient au licencier,
Bien scevent envoier message
Pour les droiz des docteurs paier,
Escripre grant foison langage
25 Qu’ilz ont mis leurs livres en gage,
Qu’ilz sont povres et indigens.
Paier fault bediaux et sergens,
Robes avoir et mantiaux clos,
Faire leur feste, a toutes gens
30 Mandent salutem et nummos.
L’envoy
Princes, trop coustent escolier :
Tousjours dient qu’ilz n’ont denier.
Qui plus leur baille, plus est fols,
Leurs noms est de vuide grenier,
35 Car, pour guerre et hurtebillier,
Mandent salutem et nummos.
[1] Raynaud corrige en des escoliers
