Balade 994 : Ce n’est pas tousjours saine vie (MCCCCLXXI)
Balade qu’il n’est pas le meilleur toudis couchier avecque sa femme
Ce n’est pas tousjours saine vie
D’homme[1] et femme en un lit couchier :
La coustume de Lombardie
Fait mieulx, ce me semble, a prisier[2],
5 Car combien qu’omme ait femme chier,
[…][3]
Chascun a son lit, c’est l’usaige,
En une chambre, et gist tous seulx,
Dont je prise[4] bien tel mesnaige :
10 Plus aise couche un seul que deux.
Car deux ensemble la nuitie
Est soufrir froidure et dangier.
L’un sue, l’autre tousse ou crie. 448c
L’un veult dormir, l’autre veillier.
15 L’un veult sa robe entourtillier
Pour le froit, l’autre contregaige
Et tire a soy, lors vient buvraige
De mauvais vent qui fiert entre eulx
Reume, toux et puour sauvaige :
20 Plus aise couche un seul que deux.
Et s’on veult avoir sa partie,
Il ne la fault fors que huchier
Ou aler ou elle est couchie
Faire avec lui ce qu’om a chier.
25 Ce fait, s’en retourner arrier
En son lit : ainsis font li saige.
Couchier seul est grant advantaige
De bien dormir. Je suis de ceulx
Qui le veult faire et du linaige :
30 Plus aise couche un seul que deux.
L’envoy
Prince, j’ay veu en maint voyage
Que gens, gesir en un fardage
Deux, rois ou quatre rioteux,
Avoient maint divers langage,
35 Mauvais repos, froidure et rage :
Plus aise couche un seul que deux.
[1] Ms. De homme
[2] Ms. perisier
[3] Vers manquant
[4] Ms. perise
