Balade 957 : Des .vi. poins dont Romme regna (MCCCCXXIV)
Balade comment .vi. poins firent regner Romme moult longuement
Des .vi. poins dont Romme regna,
Qui dame fut de tout le monde,
En nostre empire un tout seul n’a,
Mais tout le contraire y habonde :
5 Loy, justice y est vacabonde.
L’estude y fault. Chevalerie[1]
Et congnoissance y est perie.
Au bien commun n’est nul enclin,
Dont la chose publique crie :
10 Nostre empire va a sa fin.
Combien a il qu’om ne fina
De myner par myne parfonde 431d
Or et argent[2] ? Et tout s’en va
En divers lieux sanz tenir bonde :
15 Estat et orgueil qui seuronde,
Inimistéz et flaterie,
Les foulz levéz ont en partie
Fait mainte vesve et orphenin.
Guerre destruict la monarchie :
20 Nostre empire va a sa fin.
Volenté pour droit regné a.
Conseillier n’ont pas esté monde.
Division queurt ça et la,
Grant peché : si fault que tout fonde.
25 Pugnicion pour ce redunde
En peuple et en la baronnie,
Car nulz vers Dieu ne s’umilie
Ne reprent pour signe divin
Qu’il voye. Pour ce, quoy qu’om die,
30 Nostre empire va a sa fin.
L’envoy
Princes, bien eureux sera
Qui saigement gouvernera
Son regne et tendra droit chemin,
Car Dieux vengence reserva.
35 Bien le nous moustre de pieça :
Nostre empire va a sa fin.
[1] Ms. et chevalerie
[2] Ms. Or nargent
