Balade 857 : Je voy pluseurs parler improprement (MCCLIV)
Autre Balade contre ceuls qui dient que le temps est mauvais
Je voy pluseurs parler improprement, 341b
Le temps blamer, dire qu’il est mauvais
Et que meilleur fut anciennement,
Mais a leur dit ne m’acorde jamais.
5 Car puis li jours que le monde fu fais,
Li element, le ciel et les planettes,
Et les choses par les signes complettes,
En conjoingnant selon leur mocion,
Le temps tousjours a ensuy ses mettes,
10 Ne pas ne fait des gens mutacion.
L’air, la terre, le feu, mer ensement,
Lune et souleil ne se deffaillent mais
D’eulx gouverner selon leur mouvement,
Faires les fruiz, courir a grans eslais
15 Par les climas. Sanz changer font leurs trais
Boys, herbes, blez, froit et chaut, les herbettes,
Feves et poys, cholz, porrees et bettes,
Et au surplus tient sa conclusion :
Le temps tousjours a ensuy ses mettes
20 Ne pas ne fait des gens mutacion.
Mais les homms de foul gouvernement,
Plains de vices et de [tresgrans] meffais,
Luxurieus, convoiteux sur argent,
Qui ne veulent que riotes et plays
25 Pour seignourir, sont devers Dieu meffais.
Ceuls se changent, le temps non. Imparfaictes
Sont leurs euvres, qui seront tantost blettes
Pour recevoir de Dieu pugnicion :
Le temps tousjours a ensuy ses mettes,
30 Ne pas ne fait des gens mutacion.
L’envoy
Princes, le temps ne change aucunement,
Ce font les gens par leur triboulement.
Donc le temps es dit mauvais sanz raison, 341c
Qui en ce cas n’a coulpe nullement
35 Et qui tousjours ensuit le firmament
Et obeist a ses choses subjettes.
Sanz retourner fait s’opperacion :
Le temps tousjours a ensuy ses mettes
Ne par ne fait des gens mutacion.
