Balade 730 : Des guerres, des mortalitéz (MCV)
Autre Balade
Des guerres, des mortalitéz, 293a
Du mal de non argent avoir,
D’estre en pluseurs lieux endebtéz
Et qu’om n’a de paier pouoir,
5 Du tempest de gens esmouvoir,
D’estre sanz cause prinsonnier,
A ce ne comtasse un denier,
Ne d’aquerir tous autres biens,
Mais fusse riche a souhaidier
10 Se j’eusse mon vit d’Orliens,
Pour lequel je fu tant améz,
Pour ce qu’il fist bien son devoir,
Qu’amoureux et amis claméz
Estoie de toutes. Pour voir,
15 Jamais ne vouldroie autre avoir,
Richesce, vin, blef en grenier.
Par tout m’aloie esbanoier,
Chascuns m’estoit saint Juliens :
Mais tele me hait, qui m’eust chier
20 Se j’eusse mon vit d’Orliens,
Qui grant fu et roide[1] enhantéz,
Gros et nervus, au dire voir,
Bien venuz et bien hosteléz
En mais lieux. Or faiz [a] sçavoir
25 Qu’il est muéz de rouge en noir,
Pale et destaint, sanz lui drecier,
N’il ne sert mais que de picier,
Dont je suis huéz comme uns chiens.
Par Dieu, encor fusse escolier
30 Se j’eusse mon vit d’Orliens!
L’envoy
Princes, de mes maulx confortéz
Fusse du tout et depportéz,
Riches, jolis, gais et riens, 293b
Bien venuz et bien honouréz
35 Et entre les dames louéz,
Se j’eusse mon vit d’Orliens.
[1] Ms. roides
