Balade 728 : Toute chose se trait a sa nature (MCII)
Autre balade
Toute chose se trait a sa nature 292a
Des corps humains et de tous animaulx,
Mais li homs plus en tout se desnature
Que les bestes ne font ne les chevaulx.
5 La cahuans, les aigles, les corbaulx
Tiennent entr’eulx leur nature ordonnee,
Mais ce ne fait pas creature nee
Qui raison a et ne fait que folie,
Sanz bien user de sa grace donnee.
10 Pour ce est homs foulz appeléz qui folie.
Lievres couars, venans de sa pasture,
Son giste quiert es montaignes, es vaulx,
Les yeulx ouvers se dort soubz la verdure,
Et, en dormant, congnoist asséz ses maulx.
15 S’il sent les chiens, lors s’en fuit sur les haulx,
Dont sa vie est par son aguet sauvee.
Mais homs qui voit s’aveugle et se desree
Quant a touz maulx par son vouloir se lie :
Et puis qu’ainsi a la veue troublee,
20 Pour ce est homs foulz appeléz qui folie.
Homs a deux oeulx, mais sa clarté s’obscure
Quant il ne voit les cas especiaulx,
La deshoneur, le pechié et l’ordure
Qui lui viennent par ses meurs bestiaulx.
25 Leur bien quierent brebis, chievres et veaulx
[…]
[…][1]
Et homs se nuit par sa merancolie,
Et quant pour lui est sa vie blasmee :
30 Pour ce est homs foulz appeléz qui folie.
L’envoy
Princes, li homs souvent se desnature
Quant il suit mal et qu’il n’a du bien cure.
Plus que beste se nuist et contralie
Quant en son cuer les vertus ne figure, 292b
35 Fuians le mal, Dieu et son corps injure :
Pour ce est homs foulz appeléz qui folie.
[1] Vers manquants laissés en blanc dans le ms.
