Balade 727 : Ja homs qui vueille faire bien (MCI)

Autre balade

                        Ja homs qui vueille faire bien,                                                           291d
                        Justice, equité et raison,
                        N’aura en ce monde ci rien,
                        Grace ne joie, une saison,
5                      Ainçois sera par traison
                        Des mauvais qui heent justice
                        Accuséz a po d’achoison :
                        Au monde ne regne que vice.

                        Mais au fort saveure et retien
10                    Que cil qui fait mal n’est pas hom.
                        Pour ce du mal faire t’absien,
                        Car en l’Escripture treuve on
                        Que Dieu qui tout puet en son nom
                        N’est pas a mal faire propice.
15                    Mal est hors du nombre de bon.
                        Au monde ne regne que vice.

                        Car le mal n’a point de loien.
                        Puet il loier Franc Vouloir ? Non.
                        Si fait. Pour quoy ? C’est le moyen
20                    Qui sauve ou dampne sanz pardon.
                        Pour ce fist Dieux a homme don
                        Que chascun du droit benefice
                        De bien usast, mais regardon :
                        Au jour d’uy ne regne que vice !

                        L’envoy

25                    Princes, puis que tous homs puet bien
                        Laissier le mal, ainsis le tien,
                        S’il le fait, il fault qu’il perice.
                        Mais tant est de foible merrien
                        Qu’il suist le secle terrien :
30                    Au jour d’ui ne regne que vice.