Balade 655 : Com plus est grans en ce monde li homs (MXVI)

Autre Balade

                        Com plus est grans en ce monde li homs,                                        268a
                        Et com plus a richesce et habondance,
                        Tant doit il moins estre fiers[1] et felons
                        Et tant doit mieulx avoir la congnoissance
5                      D’umilité, non monstrer sa puissance
                        Aux soufraiteux, foibles et indigens :
                        Humilité attrait le cuer des gens.

                        Quant aux vertus, c’est uns tresnobles dons
                        Que Dieux eslut en celle et prinst plaisance,
10                    Que sainte Vierge et sa mere appellons,
                        Dont nostre foy vient et nostre creance.
                        Si nous devons bien tuit mirer en ce
                        Pour acquerir l’amour de noz sergens :
                        Humilité attrait le cuer des gens.

15                    Rigour non pas, qui eslonge les bons,
                        Orgueil aussi, qui mettent en balance
                        Ceuls qui usent seulement de leurs noms.
                        Chascuns les fuit et het et desavance.
                        Avise cy tout homme et toute enfance,
20                    Et d’estre humble soit chascuns diligens :
                        Humilité attrait le cuer des gens.

                        L’envoy

                        Prince royaulx doit avoir congnoissance
                        D’orgueil fuir, d’umblesce avoir le sens.
                        Par orgueil pert, et l’autre point l’advance :
25                    Humilité attrait les chers[2] des gens.

[1] Ms. moins fiers

[2] Saint Hilair corrige en le cuer