Balade 631 : Bien vesquirent nostre pere premier (DCCCCLXXXVI)
Bien vesquirent nostre pere premier 259a
Des fruis des champs, du raport de la terre,
D’yaue courant, sans char ne sang mangier.
Soubz les hauls pins aloient logeis querre
5 Paisiblement, l’un contre l’autre n’erre,
Sans tainture vestirent layne et peaulx.
En mer n’avoit onques couru vaisseaulx
Pour marchander, ne terre esté ouverte,
Miniere d’or ne d’argent descouverte,
10 Chascun vivoit en liberal franchise,
Sanz convoiter. Or va cest aage a perte :
Tout est fondé sur pure convoitise.
Vé a celui qui la terre escorchier
Voult le premier pour seignorie acquerre,
15 Pour prenre avoir, metail, fer et acier,
Or et argent ! De la vint toute guerre,
Chasteaux fermer. L’un voult l’autre requerre,
Armes forgier, espees et coustiaux.
Discencion pour seignorie entr’aux
20 Fu a ce temps et est encore apere,
Dissimuler et envier couverte
Que traison par faux semblant atise.
En ce monde, qui est plain de poverte[1],
Tout est fondé sur pure convoitise,
25 Sur grant estat, sur soy enorgueillir,
Sur grans tresors, sur viandes pourquerre,
Sur luxure, sur boire, sur veillier,
Sur gieux mauvais, sur langue qui desserre
Mos perilleux et vilains de sa serre,
30 Sur tous pechiés et vices desloyaux,
Sur parjurer, sur hair cuers loyaux
Sans rendre au bon n’au mauvais sa desserte.
[…]
Mentir leve, droit fault, justice est chise,
35 Je voy la fin par ce du monde certe :
Tout est fondé sur pure convoitise.
L’envoy 259b
Princes, chascuns veult avoir tresorier,
Estat royal et argent mannyer
Tant que partout est la monnoye exquise.
40 Le pueple n’a plus maille ne denier.
Prengne chascun l’estat son devancier :
Tout est fondé sur pure convoitise.
[1] Ms. povrete
