Balade 629 : Doulz Zephirus qui faiz naistre les flours (DCCCCLXXXIV)
Autre Balade comment les flours naissent
Doulz Zephirus qui faiz naistre les flours,
Printemps, Esté, Autompne, et Aurora,
Plouréz o moy mes dolentes dolours
Et le jardin que jadis laboura
5 Fons Cireus, ou Galiope ouvra,
Qui de ses fleurs avoit fait un chapel 258c
Si odorant, si precieus, si bel
Que de l’odour pouoit guarir touz maulx,
Quant un fort vent le print par cas isnel :
10 S’ainsi le pers, c’est trespovres consaulx.
Continuelz fut vint ans mes labours
Aux fleurs semer ou Ovides planta
De Socrates et Seneque les mours,
Et Virgiles mains beaus mos y dicta
15 Et Orpheus ses doulz chans y nota.
Poeterie fut au tour de sercel,
Rhetorique le fist ront comme annel,
Lettres y mist et les noms des plus haulx
Si plaisamment que maleureus m’appel :
20 S’ainsi le pers, c’est trespovres consaulx.
Si pri Juno la deesse d’amours
Et a ce vent qui mon fruit ravi a,
Aux Dieux de l’air qu’ilz me facent secours,
Ou autrement tout mon fait perira.
25 Car mon las cuer jamés rien n’escripra
Et ne vouldra riens faire de nouvel.
Conseilliéz vous a Eustace Morel,
Si me rendéz mes choses principaulx,
Ou me bailliéz copie du jouel.
30 S’ainsis le pers, c’est trespovres consaulx.
L’envoy
Prince, aviséz mes piteuses clamours
Et faictes tant que mes chapeaulx soit saulx,
Car moult y a de diverses coulours :
S’ainsis le pers, c’est trespovres consaulx.
