Balade 467 : Puisqu’il me faut aler au guet de nuit (DCCCI)

Autre Balade

                        Puisqu’il me faut aler au guet de nuit
                        Et des Gantoys atendre la bataille,
                        Arméz entier, est [bien] droiz qu’il m’enuit
                        Emmy les champs ou il faut que je saille
5                      Avec le roy, sanz mantel et sanz paille,
                        La lance ou poing, la visiere levee,
                        Au froit, au vent, a la pluye qui taille,
                        Pour Dieu me soit houppelande donnee.                                          211a

                        Car ce n’est pas en yver grant deduit
10                    D’ainsi dancer ne d’y prendre la caille.
                        Lances, panons et banieres font bruit,
                        Et j’ay toudiz paour que gens ne saille
                        Qui par devant ou par derrier[1] m’assaille.
                        Mon bassinet m’a la teste afolee
15                    Par trop cheoir, par mauvaise pieraille :
                        Pour Dieu me soit houppelande donnee.

                        Des estoilles veoir chascun se duit,
                        Du point du jour font maint la devinaille,
                        Et la pluie les escoutes conduit.
20                    La ne baill’on ne pain ne vin en taille.
                        L’un couche bas, l’autre est droit, l’autre baille.
                        La pourroit on veoir mainte fumee.
                        Mon ventre bruit, destre[…][2] ay l’entraille :
                        Pour dieu me soit houppelande donnee.

                        L’envoy

25                    Je muir [de froit] et n’ay chose qui vaille
                        Pour moy couvrir au guet de vostre armee.
                        J’aray toudiz asséz pain et vitaille :
                        Pour Dieu me soit houppelande donnee.

[1] Ms. derriere

[2] Mot resté inachevé