Balade 457 : Sausset, amis, veulléz moy conseillier (DCCXCI)
Autre Balade
Sausset, amis, veulléz moy conseillier :
J’ay affaire contre une taverniere
Qui mes chevaulx veult prendre et essiller.
Plus ne me veult livrer […][1]
5 Par despit m’a dit : ― Est ce la maniere
De delivrer troys chevaux la sepmaine,
Sans croix avoir ? Vuidéz, alléz arriere.
Vous n’aréz plus de moy ne foing n’aveine.
Or me puellent plus mes chevaux mangier,
10 Grain ne voyent, si perdent la lumiere,
Et les veult on de moy faire estrangier
Pour leurs despens, s’en faiz dolente chiere,
Car s’on les vent a cris ou a enchiere,
A piet seray. Tel vente n’est pas saine.
15 Trop bien m’a dit l’ostesse qui est fiere :
« Vous n’aréz plus de moy ne foyng n’aveine. »
Et vous m’avéz fait jusqu’a cy tailler
Le moys de Mars, a trop male lodiere,
Six solz pour jour, sans maille et sans denier.
20 Pour ce convient que le commun requiere :
Faictes pour moy, a ma humble priere,
D’apaisenter celle qui mal me mayne,
Car juré m’a par le sanc de bruiere :
« Vous n’aréz plus de moy ne foing n’avoyne ! »[2] 209a
L’envoy
25 Sausset, pour Dieu, veilliéz cy aviser,
Ou mes chevaux aront la malestraine,
Car aussy m’a juré le tavernier :
« Vous n’aréz plus de moy ne foing n’avoyne ! »[3]
[1] La fin du vers manque
[2] Saint Hilaire corrige en aveyne
[3] Saint Hilaire corrige en aveyne
