Balade 300 : Ja pour mesdit, barat ne janglerie (CCCCIX)

Autre Balade Amoureuse [141a] comment l’amant respont a sa dame par amours que pour mesdit, barat, ne janglerie, il ne cessera de la craindre et amer chascun jour.

                        Ja pour mesdit, barat ne janglerie
                        Qui chascun jour ne finent de jangler
                        Et pourchacier d’Amour la departie,
                        Ne cessera[i] de vous craindre et amer
5                      De plus en plus, chiere dame sanz per,
                        A qui je doing cuer et corps, quanque j’ay.
                        Or ne vueillés, pour leur folour parler,
                        Moy deguerpir. tous temps vous aymeray.

                        Car vous estes mon confort et ma vie,
10                    Mon bien, m’onneur, sanz autre demander,
                        Bonne et belle, jeune, gente et jolie,
                        Qui me pouéz en tous cas commander
                        Vo doulz plaisir, et je vueil labourer
                        A vous servir, et toudis le feray.
15                    Mais ne vueillés, par mauvais raporter,
                        Moy deguerpir, tous temps vous aymeray.

                        Or ne vueillés, flour de pitié garnie,
                        De loyal cuer qui ne saroit fausser,
                        Ne[1] pour autrui ne pour mauvaise envie
20                    Entrelaissier le doulx perseverer
                        D’amer celui qui vous veult honnorer :
                        C’est mon las cuer que tout donné vous ay.
                        Ne vueillés donc, par nul felon penser,
                        Moy deguerpir, tous temps vous aymeray.

[1] Ms. Que