Balade 265 : Se Dieu feist pardurable esperit (CCLXVIII)
Autre Balade
Se Dieu feist pardurable esperit
Aux animaulx si comme a creature,
Consideré qu’a chascun d’eulx souffit
Tele forme que lui donna nature,
5 Et que l’un n’a de l’autre forme cure :
Au cerf souffist son poil et au cenglier,
Ne li corbeaulx ne veult pas ressembler
Au coulom blanc, mieulx gardassent leur loy
Que les hommes qu’om voit desmesurer :
10 A grant paine congnoist on qui est Roy.
Mieulx congnoissent li oiselet petit,
Ceuls qui vivent de proie et de pasture
Leur souverain. Nul d’eulx ne s’agrandit,
Mais tient chascun sa forme et sa mesure.
15 Bestes aussi : nulle n’en desnature,
L’aigle les fait et le lïon trambler.
Mais les hommes veulent l’estat embler
Et des princes prandre forme et arroy,
Dont au jour d’ui, a tout considerer,
20 A grant paine congnoist on qui est Roy,
Prince ou baron. car chascun s’enhardit
D’estat lever et de porter brodure,
Perles, joyaulx et estat en habit
Et d’ensuir toute contrefaiture.
25 Il n’est ouvrier qui de son mestier cure.
L’aigle et lÿon veult chascun d’eulx sembler : 58a
C’est ce qui fait mains d’iceulx estrangler
Que d’exceder son estat par desroy.
Souffise leur ce qu’ilz doivent porter :
30 A grant paine congnoist on qui est Roy.
L’envoy
Prince, chascun doit son corps ordonner
Selon raison, sanz lui desordonner,
Ne par orgueil ainsi cuidier de soy,
Sanz ce qu’a vous se doie comparer
35 Homs quel qu’il soit, or y vueilléz penser :
A grant paine congnoist on qui est Roy.
