Balade 263 : Trop de gens voy, qui servent a la court (CCLXVI)
Autre Balade
Trop de gens voy, qui servent a la court,
Qui se plaignent de boire et de manger,
Qui povres sont, meschant, chetif et lourt
Et qui dient qu’ilz vivent a danger.
5 Mais Dieu scet bien, qui est bon mesnager,
Qu’en leurs hostelz n’ont qui vaille un tournois,
Et font semblant de la court estranger.
Pour ce a telz gens dy adieu trop de fois.
Pour un perdu, une .xiine. en sourt.
10 On ne s’i fait souvent qu’entrechanger,
Car damps Lopins chascun jour y a court,
Qui de l’ostel fait maint homme approucher
Que l’on pourroit aussi tost escorchier,
Se l’un s’en va, qu’il n’en reviengne trois
15 Et quant je voy par eulx la court vuider
Pour ce a telz gens di adieu trop de fois
Et s’en y a qui scevent tant de hourt,
Pour entrer enz, qui ne veullent denier
Gaiges avoir, ce dient, brief et court,
20 Fors pour honeur. Lors font que li premier
Sont boutéz hors et sont fait derrenier,
Et se mettent ou service du moys.
Quant ilz s’en vont et ilz font tel danger[1],
Pour ce a telz gens dy adieu trop de fois. 57c
L’envoy
25 Princes, l’en doit telz servens estranger[2],
Amer les bons, s’ilz sont doulz et courtois,
Quant les autres veulent aler arrier.
Pour ce a telz gens di adieu trop de fois.
[1] Saint Hilaire corrige en dangier
[2] Saint Hilaire corrige en estrangier
