Balade 262 : L’amant mis a sa fiance en ami (CCLXV)
Balade amoureuse
L’amant qui[1] a sa fiance en ami,
Et qui d’amours scet toute sa pensee,
Et va souvent a sa dame pour lui
Ou il ne puet pour honeur faire entr’e.
5 Amant partit en estrange contree,
Le blame fort, et veult la dame amer
Du vray amant, le doit on bien blamer.
Et quant il fit que ne l’amera mie,
Fausses lettres faint pour la diffamer :
10 Telz faulx amis doit bien perdre la vie.
Car trois maulx fait et traïson aussi :
Le premier mal, qu’amour est relevee,
Et le second, se la dame a mari,
En peril est d’estre deshonouree.
15 Pis vault le tiers, car a la retournee
D’amant, pourroit dame fausse esperer,
Si pourroient ambedeux desesperer
Par tel ami et par sa menterie,
Ou il n’aroit fort tout doulz sanz amer :
20 Telz [faulz] amis doit bien perdre la vie.
Qui contrefait ou nom de dame ainsi
Lettre a autre, non a elle, envoiee,
Disant qu’amé ne fut onques cellui
Qu’om dit amant, mais est enamouree
25 De tel auquel la lettre est presentee
Ou nom de lui, que puet on cy notter ? 57b
C’est traison pour bon renom oster,
C’est fausseté, desloyauté, envie,
A tout le moins, hors le pendre et trainer,
30 Telz faulx amis doit bien perdre la vie.
L’envoy
Prince d’amours, jugiéz, je vous en pri,
Ce mauvais cuer ou li amans se fie,
Et lors diréz que sanz grace et merci
Telz faulx amis doit bien perdre la vie.
[1] Saint Hilaire corrige en mis
