Balade 252 : Je plain et plour le temps que j’ay perdu (CCLV)

Balade

Complainte du pays de France

                        Je plain et plour le temps que j’ay perdu,
                        Vaillance, Honeur, Sens et Chevalerie,
                        Congnoissance, Force, Bonté, Vertu[1],
                        Largesce, Amour, doulz Maintien, Courtoisie,
5                      Humilité, Deduit, joieuse Vie,
                        Et le bon nom que je souloie avoir,
                        Le hardement, la noble baronnie :
                        Quant l’un ne veult fors l’autre decevoir.

                        J’ay veu partout honourer mon escu,
10                    Et en tous lieux doubter ma seignourie,
                        Comme puissant, et richement vescu.
                        Terre conquis par ma Bachelerie.
                        Lasse ! or me voy au jour d’ui si perie
                        Que nul ne fait envers moy son devoir.
15                    Bien doy estre deboutee, esbahie[2],
                        Quant l’un ne veult fors l’autre decepvoir.

                        Adieu, helas ! que m’est il advenu ?
                        Orgueil me suist, Lascheté, Villenie,
                        Trop convoiter, Honte, que me fais tu ?
20                    Dissimuler, Barat et Tricherie.                                                             55a
                        Mon nom s’i pert et tourne en moquerie,
                        Et chascun veult par force estre mon hoir.
                        Je periray, c’est ce pour quoy je crie :
                        Quant nulz ne veult fors l’autre decevoir.

[1] Ms. et vertu

[2] Ms. et esbahie