Balade 183 : S’Adam, Noe, Abraham, Ysaie (CLXXXV)

Autre Balade

                        S’Hadam[1], Noe, Abraham, Ysaie
                        Ysac, Jacob, Moyses et Aron,
                        Jonas, Esdras, Daniel, Ezechie,
                        Gad et Joseph, David et Salemon,
5                      Qui tuit eurent de prophete le nom,
                        Retournoient en ce monde au jour d’ui,
                        Ne sçauroient prenostiquer l’enuy,
                        Destruction, plaies, procés et maulx
                        Qui doit venir ou royaume des Gaulx.

10                    Zozaistres[2], Daires n’escriproit mie,
                        Ne Josephus, Valere Maximon,
                        Bede, Augustin, Jheremie ne[3] Helie,
                        Gregoire, Luc, Jehan, Marc et Matheon,
                        Pierres et Polz, Aristote et Platon,
15                    Tant par leur sens com l’aide d’autrui,
                        Les griefs tourmens et maleurs que je trui,
                        Rebellion des petis aux plus haulx
                        Qui doit venir ou royaume des Gaulx.

                        Enclins y sont selon astronomie :
20                    Les cours du ciel mouvens ceste tençon
                        Et les pechiéz suians la seignourie,
                        Sanz resister ne fair riens de bon.
                        En Egipte n’ot dessoubz Pharaon
                        Que dix plaies, si com[me] je le lui.
25                    Mais plus de mil descendront [des]sur lui :
                        Plouréz, povres, la fin sanz les travaulx
                        Qui doit venir ou royaume des Gaulx.                                                40c

[1] Saint Hilaire corrige en Adam

[2] Saint Hilaire corrige en Zoroastres

[3] Saint Hilaire corrige en n’