Balade 182 : Roys, princes, ducs, chevaliers et barons (CLXXXIV)

Autre Balade

                        Roys, princes, ducs, chevaliers et barons,
                        Pappe, clergié, legalz et cardinaulx,
                        Ausquelz pueples communs obeissons
                        Ou temporel et en foy, de noz maulx
5                      Ont plus de mal que[1] leurs povres vassaulx,
                        Et vivent moins. Et dont puet ce venir,
                        C’une povres homs qui maine ses chevaulx
                        Voit .iiii. roys et leur regne fenir ?

                        Je m’en merveil, car ilz ont tous leurs bons,
10                    Et se tiennent moistes, fourréz et chaulx.
                        Et un ouvrier et uns povres chartons
                        Va mauvestuz, deschiréz et deschaulx.
                        Mais en ouvrant prant en gre ses travaulx
                        Et liement fait son euvre fenir,
15                    Par nuit dort bien. Pour ce uns telz cuers loiaulx
                        Voit .iiii. roys et leur regne fenir.

                        Les roys pensent plus que nous ne faisons,
                        Et les prelaz ont souvent moult d’assaulx                                         40b
                        Pour leurs estaz, pour maintenir leurs noms,
20                    Et leur convient avoir pluseurs consaulx.
                        Leurs grans avoirs ne les font mie saulx,
                        Ainçois les font souventefoiz languir.
                        Et uns povres qui vit joyeus et baulx
                        Voit .iiii. roys et leur regne fenir.

[1] Ms. car