Balade 129 : Princes d’enfer, o ta forsennerie (CXXIX)

Balade sur Poeterie

                        Princes d’enfer, o ta forsennerie
                        Au monde voit on porter Cerberus
                        O ses .iii. chiefs monstrant ta seignourie.
                        Des trois Raiges y est fait tes escus :
5                      C’est d’Aletho, Thesiphone et Megus.
                        Trois suers sont qui monstrent le chemin
                        A touz humains en ce monde ça jus
                        De l’ame avoir en enfer dure fin.

                        Car en pluseurs y voy Ypocrisie
10                    Et autres maulx venans de Titius.
                        Par Yxion, pechié de lecherie.
                        En convoitant y regne Tantalus.
                        Cuer orgueilleus y est Persisiphus[1]
                        Qui sa roche porte soir et matin,
15                    Eulx efforçans chascun de plus en plus
                        De l’ame avoir en enfer dure fin.

                        Mais qui sçauroit bien que ce signifie
                        Et les tourmens que fera Eacus,
                        Il penseroit tost d’amender sa vie.
20                    Pour ce te pri, piteables Jhesus,
                        De Flegiton et de Radamencus
                        Deffen mon corps, et fay mon cuer enclin
                        A toy servir, en moy gardant tout sus
                        De l’ame avoir en enfer dure fin.

[1] Saint Hilaire corrige en par Sisiphus