Balade 45 : Puis que je voy Malebouche regner (XLV)

Balade

                   Puis que je voy Malebouche regner
                   Qui Jalousie a attrait de sa part,
                   Dangier aussi en amours gouverner,
                   Honte et Paour qui tous maulx me depart,
5                 Et Fortune qui en maint lieu s’espart
                   Encontre amant, je feray deux ou quitte,
                   Quant je ne puis avoir un doulz regart :
                   Se ce temps tient, je devendray hermite.

                   Car chascun jour ne fait que destourner :
10               Malebouche le bien de mon cuer art.
                   Jalousie fait contre moy tourner
                   Honte et Paour, par son dolereus art.
                   Et aprés, Danger vient, qui ne se part
                   D’avecques eulx, et Fortune en leur guite
15                Qui verse tout : amer n’est que hasart :
                   Si ce temps tient, je devandray hermite.

                   Qu’amours ne puet amans guerredonner
                   […][1]
                   Et en musant lui fait son temps finer.
20               Et, entre deux, fait Fortune un coquart,
                   Sanz estre amant, avoir le doulz espart
                   Non desservi de dame qui profite.
                   Je muir de dueil, estre vueil papelart :
                   Si ce temps tient, je devendray hermite.

                   L’envoy

25               Princes, s’Amours me veult ainsi mener,
                   Je le regni, ne le prise une mite,
                   Mais de touz poins delaisseray l’amer :
                   Se ce temps tient, je devendray hermite.

[1] Vers manquant