Balade 17 : Li uns se plaint de sa grant povreté (XVII)

Autre Balade

                   Li uns se plaint de sa grant povreté,
                   Et li autres de pluseurs maulx qu’il a.
                   L’autre se plaint qu’il a riches esté
                   Et voit trop bien que plus ne le sera.
5                 Li uns se plaint quant il se maria
                   Onques encor. L’autres[1] qui est trop tendres
                   Se plaint du froit qui trop le refroida.
                   Mais ne me plaing fors du pais de Flandres.

                   Deux fois y fu d’iver, et deux d’esté :
10                La premiere, quant li Roys les mata
                   A Rosebech, a Bourbouc apresté.
                   Seconde foiz, quant li Royz l’assiega.
                   Adonc aprés des Gantoys se venga.
                   A l’Escluse ne fut pas ses faiz mendres
15                Quant passer dubt. Maint plaignent pour cela :
                   Mais ne me plaing fors du pais de Flandres.

                   Car g’i ay eu toute chetiveté.
                   En cheminant la boe m’afubla
                   D’un ort mantel. Je fu dedenz bouté,
20               Et mon sommier jusqu’au coul se plunga.
                   Bahu et tout long temps y demoura.
                   Quant g’issi hors et lui, nous semblions cendres.
                   Complaigne soy des Flamens qui vouldra,
                   Mais ne me plaing fors du pais de Flandres.

                   L’envoy

25               Princes, jamais mes cuers ne l’amera,
                   C’est uns drois lieux pour atendrir les ventres.
                   De leurs piques se plaingne qui vouldra.
                   Mais ne me plaing fors du pais de Flandres.

[1] Ms. Li autres