Balade 1 : Mauditte soit condicion de chien (I)
Mauditte soit condicion de chien 1a
Et de lion en homme de puissance.
Car destruit sont tuit li bon et li bien,
Qui de ces deux a bien la congnoissance.
5 Convoiteus est, envieux sanz doubtance,
Chiens. Et lyons de sa propre figure
Est orgueilleus et crueulx par nature.
Qui ces quatre a, s’il est prince mondain,
Met son honnour et terre en aventure,
10 Pour estre tout perdu d’uy a demain.
Car ou li chiens n’a defaulte de rien,
Et qui est saoul, convoite il et s’avance
D’autri mangier ravir. On le scet bien,
Par l’envie qu’il a d’autri substance.
15 Orgueilleus est lyons d’oultrecuidance
Et trescrueux. Toute beste queurt sure,
Chascun le craint pour sa cruauté dure :
Mais de l’amer[1] l’a chascun en desdaing,
S’il lui venoit une mesaventure,
20 Pour estre tout perdu d’uy a demain.
Princes, qui a ces.iiii., or le tien,
N’est pas seigneur a qui on ait plaisance.
Car Convoitier, qui est vice ancien, 1b
Le fait haïr. Envie desavance
25 Honnour en li. Son orgueil, sa bobance
Le destruira : Cruauté li procure
A ces subgiéz haine et murmure,
Et, en la fin, com le poisson a l’ain,
Le lasse et prant a dolente pasture,
30 Pour estre tout perdu d’uy a demain.
L’envoy
Princes, qui tient ces poins de nourreture
Ou de naiscent, si les delaisse a plain :
Car c’est uns maulx et une pourreture,
Pour estre tout perdu d’uy a demain.
[1] Saint Hilaire corrige en aider.
