Virelay 49 : Cent mille foys vous doy remerchier (DCCXXXIII)

Autre Virelay

            Cent mille foys vous doy remerchier,
            Chere dame, de vostre doulx octroy,
            Car vous m’avéz fait plus riche d’un roy
            Et plus d’onneur que je ne puis souhaidier.

5          Car maint seigneur garny de noble arroy,
            Riche et vaillant, vers vous poursuir voy
            Pour vostre bien et vostre honour traictier,
            Qui mieulx valent en tous estas de moy.
            Maiz je vous ain tellement, par ma foy,

10        Que nullement ne vous puis oublier.
            Et quant vous plaist de tant humilier
            Que la douçour de vo parler reçoy,
            Vous me tenéz en si amoureux ploy
            Qu’autre apréz vous jamaiz avoir ne quier.
15        Cent mille foys [vous doy remercier.]

            Or ne veulléz, dame que j’aim et croy,
            Moy oublier, ne pour riche conrroy          195b
            Autre prendre pour mon fait delaissier,
            Car en ce cas aroye trop d’anoy.
20        Je languiroye, et bien savéz pourquoy.

            Vers vous aray tousjours le cuer entier :
            Faictes autel, ame, je vous requier,
            Soyéz loyal en l’amoureuse loy.
            Mon corps vous doing et le cuer vous envoy :
25        Je ne vous say autre chose bailler,
            Cent mille foys vous doy remercier etc.