Dit 18 : Treschiers sires et vrais amis (MCCCCXI)
Autres lettres envoyes par Eustace lui estant malade et la maniere de son testament par esbatement
1 Treschiers sires et vrais amis,
2 Voz bonnes prieres m’ont mis
3 En estat de convalescence
4 Et de santé, si com je pence,
5 Du mal qui m’a griefment tenu,
6 Ou de vous m’est moult souvenu
7 Comme cil qui vous desiroie
8 En languissant, ou je mouroie,
9 Se me sambloit, d’une tiersaine
10 Qui ne m’a pas esté tressaine ;
11 Car destraint m’a trop malement,
12 Tant que j’ay fait mon testament 421d
13 En la forme et en la maniere
14 Qui s’ensuit : J’ay esleu ma biere
15 En l’air, pour doubte de perir ;
16 Talent n’avoie de mouri.
17 Je commenday a Dieu le Pere,
18 A jesucrist et a sa mere
19 Mon ame, qu’il la voulsist prandre
20 Et en son saint paradis rendre.
21 Je laisse cent soulz de deniers
22 A ceuls qui boivent voluntiers ;
23 Et s’ay lessié a mon curé
24 Ma pucelle, quant je mourré.
25 J’ay laissié a son chapellain
26 Un chaperon et mon villain,
27 Toute la penne et le drap hors ;
28 Et s’ay voulu que tous mes tors
29 Soient tenuz comme biens fais.
30 Item j’ay fait un autre lais
31 Qu’om croie mes hoirs et mes debtes
32 Et les paies qui en sont fectes.
33 je lesse aux Ordres Mendiens
34 Mont grant escrin ou il n’a riens,
35 Excepté le bois et le fer,
36 Car ilz gettent les gens d’enfer
37 Et font aller en purgatoire
38 Des leur vivant qui les veult croire.
39 item je lesse a l’ordre Grise
40 Ma viéz braie et ma viéz chamise,
41 Et a l’ordre de Premontré
42 L’esbatement dedanz mon pré,
43 Puis que l’erbe en sera ostee.
44 Et s’ay laissié une donnee
45 A chascun povre qui vendra :
46 S’il a un franc, on lui rendra 422a
47 .Xvi. soulx de bons parisis.
48 Et s’ay laissié en Cambresis
49 Le Nuef Chastel, bonne forteresce,
50 Et aussi j’ay laissié Gonnesse
51 Au lieu ou elle soulait estre.
52 Et s’ay laissé a chascun prebstre
53 Qui chantera aprés ma mort,
54 Une bonne couronne et fort.
55 J’ay laissié aux Champs trop de biens,
56 Car je n’en pance aporter riens
57 C’un linceul pour moy estuver :
58 Autrement[1] ne me vueil huver.
59 Et si vous laisse vers Beaumont
60 La riviere qui va amont,
61 Pour prandre l’eau a vostre usaige.
62 je n’ay mais c’un povre frommaige
63 Que je doing maistre Nicolas.
64 Et si laisse joie et soulas
65 A ceuls qui la vouldrons avoir.
66 Et le surplus de mon avoir
67 Retien et ne le donne point,
68 Pour ce que je suis en bon point,
69 [Et] ne me vueil jamais defrire,
70 Car on y a trop de martire :
71 Qui se defrit, il est honnis.
72 Le Lendit laisse a Saint denis
73 Chascun an perpetuelment
74 Et s’ay laissié pareillement
75 Au Roy le Louvre et le Palays
76 Et la Tour du Bois, c’est beau lays,
77 Et a messire Maturin
78 Une queue de vin de Ryn
79 A prandre et lever sur sa rente
80 De l’isle, quant [ele] yert en vente. 422b
81 Plus ne vueil plaissier a present ;
82 [Et] je vous encoie un present
83 Que j’ay fait en ma maladie
84 Ou chant a de merancolie,
85 Et croy qu’il vous sera plaisans,
86 Car je ne fis depuis dix ans
87 Meilleur vir[e]lay, ce me semble.
88 Et comme nous soyons ensemble,
89 Vous le pourréz vir[2] chanter.
90 Ma femme vous fait enhorter
91 De lui apporter deux cofrés,
92 Et que de ce vous prenéz pres ;
93 Et dictes a Denis le Riche,
94 Se il ne veult que je le triche,
95 Qu’il m’envoye le manteau de gris
96 Dont je le priay et le pris,
97 A Chasteau Thierry a la foire
98 Ou je seray, c’est chose voire,
99 L’endemain de la Saint Jehan.
100 je pense de cueillir l’ahan
101 Des moissons ou vous avréz part.
102 Le benoist filz de Dieu vous gart !
103 Escript a Vitri en grant soing.
104 Le.xviiie. jour de joing.
[1] Ms. Car autrement
[2] Raynaud corrige en oir
