Dit 2 : Belle, juesne et douce l’a prise (MCCCLVI)
Cy commence un notable dictié de nostre seigneur Jhesu Crist et de la benoite Vierge Marie, sa douce mere
Belle, juesne et douce l’a prise
Li biaux, li doulz qui tant la prise,
Et certes a droit la prisa,
Quant si noble prise pris a.
5 Nulz ne pourroit fors que prisier
La grant beauté qui fut prise hier.
Onques si belle forme humaine
Ne fut en France ne ou Maine,
Ne qui eust si douce parole :
10 Tout resjouit quant elle parole.
Mais elle est de nobles parens,
Et si croy qu’il ne soit par ens
Plus humble ne dehors plus saige,
Ne plus loial. Encor plus sçay ge,
15 Qu’elle n’a d’oneur sa pareille :
A toutes vertus s’apareille,
C’est la rose et la flour de lis
Qui fuit et gait mondains delis.
Mais elle est vierge, et s’a mari
20 Qui pour nous ot le cuer mari,
Tant qu’a sa mere se marie
Le filz Dieu en Vierge Marie,
Pour oster d’Enfer nostre mort
Ou Eve et Adam nous ont mort.
25 Par un homme vint mort au monde.
Pour ce dist Dieux : ― Va ! et si monde,
A son filz pour nostre amour fine,
Ce pechié, et ceste mort fine.
Et pour ceste amour qui fin n’a
30 De no redempcion fina 369b
Cilz qui tant ot douce l’alaine
Qu’il se tapit dessoubz la laine
De nostre humaine et fraile forme,
Jhesu Crist, que no pitéz forme
35 En l’arbre de la croix sanz cause,
Qui la nostre humain rachat cause
Par le sang de son digne corps.
La fut sonnéz li dignes cors,
Dont Enfer despouilla sa proye,
40 Que li vraiz Dieux par sa mort proye,
Quant il cria : ― Hely ! Hely !
Souvenir vous en doit. He ! ly
Dolent pecheur plain de folie
Qui ne l’aime, et sert il folie.
45 En recordant sa mort amere,
De Jehan dist humblement a mere :
― Vez cy ton filz, sa[1] mere soies !
Lors de la dolour de deux soies
Furent jusques a l’ame point,
50 N’autre mort ne soufrirent point.
Li vierges la vierge[2] garda.
He ! Dieux ! com tresdigne garde a
Jehan li doulz et li secréz,
Qui de Cieu sceut tous les secréz,
55 Et tant l’ama com son affin
Qu’il le suy jusques a fin
Avec la douce compaignie
Mere a Dieu, de lui comapignie,
Ausquelz de dueil les cuers partirent,
60 Quant pour la mort Dieu se partirent,
Qu’ilz virent en la croix tendu
Qui a no gloire avoit tendu !
Mais trois jours s’endormit li homs, 369c
Comme victorieus lyons,
65 Ressuscitans par sa puissance,
Car il ne fut si fors puis sans ce[3].
Au tiers jour, qui fut le derrain,
Brisa porte et verroulx d’arain,
Enfer des ames despuilla.
70 Ha ! com cy saincte despoille a,
Qui en Paradis fut menee
Par son cor et par sa menee
Qu’il print en la douce unicorne,
Dont nostre redempcion corne
75 Contre le venimeux serpent,
Qui le premier homme ser pent
Et Eve, qui sont despendu
Par le sang de Dieu despendu
Et par Marie qui la print
80 Puis qu’il fu nez, et qui l’aprint
Pour despecier, et par contraire,
Leur pechié par vertu contraire.
Mort vint par homme, et par eulx touz
Trespasse Mort avec sa toux.
85 Par eulx sommes remis en vie,
Ou Mors nous ot mis par envie.
Par hommme fut nostre mort trecte,
Et Jhesu [Crist] nostre paix trecte,
Homme, a appaisié a son pere :
90 Jamais n’yert heure qu’il n’y pere.
Aprés ce que d’esperit saint
Furent tuit si disciple saint,
.xl. jours aprés monta
Ou saint ciel ou joie moult a,
95 Couronnéz du Pere a la destre,
Ou bien avoit desservi d’estre.
Sa mere et saint Jehan appella 369d
En ame et corps, et a pel la
Ou ilz regnent et regneront,
100 Et verront en ce regne ront
Dieu pour jugier [et] vis et mors.
O Vierge, de ce crueulz mors
Et de perilleux jugement,
[…][4]
105 Quant ciel et terre faurra fendre,
Nous vueillés garder et deffendre,
Que no ligne ne soit dampnee
Qui d’Eve fut et d’Adam nee.
Aiéz pité du povre peuple.
110 A ce jour de grace nous peuple
Ou greifment serons empeschiéz.
Requier pardon de noz pechiéz,
[Et] Dieu prie pour noz meffais,
Car trop sommes vers lui meffais.
115 De nostre vie es li secours,
Douce Vierge, alors nous secours.
Fay que nous puissons desservir
La grace de ton filz[5] servir,
Et nous deffen, protege et garde.
120 Si navons de l’Ennemi garde.
Met en noz bouches tes louenges,
Tant que, nous mors, avec les angels[6]
Tes fils ceste bonté nous face
Que nous le puissons face a face
125 Regracier avec ses sains,
Et que moy qui pas ne suis sains
Mais griefs pechierre de pieça,
Que l’Enemi me depieça,
Vueillés refaire et rapiecer,
130 Sanz ma povre ame depiecer,
Et que mes noms soit mis ou livre
Des esleus : pour ce te livre, 370a
Vierge, ma plourable complainte,
Dont m’ame s’est a toy compalinte
135 [Et] complaindra par pluseurs fois.
Fay qu’en moy soit pitéz et fois,
Amour, charité et justice,
Tant que li Roys, qui tout justice,
Me prangne o lui par mon bien fait.
140 Amen ! Amen ! Ainsi soit fait !
[1] Ms. et sa
[2] Ms. vierges
[3] Ms. sance
[4] Vers manquant
[5] Ms. filz de
[6] Raynaud corrige en anges
