Balade 967 : Helas ! je voy la dicision nee (MCCCCXXXVI)
Balade comment les royaymes sont destruis par la division des princes qui tout couvoitent au jour d’ui
Helas ! je voy la division nee
A .iii. branches qui les regnes destruit :
La pemiere est couvoitise dampnee
En noble cuer. La seconde, qui ruit[1],
5 Orgueil, de qui s’approchent presque tuit.
Default d’amour au bien commun garder
Ou nul n’a l’œil fors au particuler.
Et par ces opins perdirent seignourie,
Que tous princes doivent forment noter,
10 Rome la Grant, Troye, Grece, Armenie.
Mais tant qu’amour fut vraie entr’eulx gardee
Au commun bien, et qu’ilz eurent le fruit
D’umilité, que justice excercee
[Fust] sanz faveur, [et] qu’a ce furent duit,
15 Et couvoiter fut hors de leur conduit,
Ce les maintint et fist vivre et regner
Terres, pais et leurs villes peupler,
Tant qu’union fut entr’eulx bien unie :
Le contraire fist perdre et deserter
20 Rome la Grant, Troye, Grece, Armenie[2].
Encor est [bien] ceste chose prouvee
Par nostre loy, dont l’euvangile instruit
De tost perir region divisee,
Car c’est celle qui tous regnes destruit :
25 Or y pensons, et ne soyons seduit
Ne endormi pour finance amasser,
Car au derrain nous fault tous trespasser.
Faisons tresor de bonne et juste vie,
Et ne vueillons en perte ressembler
30 Rome la Grant, Troye, Grece, Armenie[3].
L’envoy
Prince, tendéz a bonne renommee
En bien faisent, et que vostre contree
Ne soit de nul par vo coulpe perie : 436a
Pouoir, avoir, richesse est reservee
35 Du peuple a vous, et toute est desertee
Rome la Grant, Troye, Grece, Aremenie[4].
[1] Ms. ravit
[2] Ms. et ermenie
[3] Ms. et ermenie
[4] Ms. et ermenie
