Balade 8 : De Nepturnus et de Glaucus me plain (VIII)

Autre Balade

                   De Nepturnus et de Glaucus me plain
                   Qui contre moy font la mer felonnesse,
                   Et d’Eolus, dieu des vens, le villain,
                   Qui par Eurus m’a empeschié l’adresse
5                 De mon propos, et passer ne me lesse.
                   Par ses souffléz fait l’eaue tempester
                   En escriant, quant mon passage cesse :
                   Contre les vens ne puet nulz de la mer.

                   Li dieux de l’air fait plouvoir soir et main,
10                L’air obscurcir. Jupiter me courresce,                           3a
                   Aux dieux de mer a estandu sa main.
                   Saturne o eulx son froit yver m’adresse,
                   Et chascuns d’eulx de sejourner me presse.
                   Mon navire font par leur force encrer.
15                Mouvoir ne puis, c’est ce qui trop me blesse :
                   Contre les vens ne puet nulz de la mer.

                   J’ay du dieu Mars, en guerre souverain,
                   Tout le pouoir. De Cerés la deesse,
                   Du dieu Bachus, vin, fleur, becuit et grain,
20               Chars salees. De Juno la richesce
                   Pour bien paier. De Venus la proesce
                   Qui jeunes gens fait par amours amer.
                   Cause ne sçay se mon fait se delesse :
                   Contre les vens ne puet nulz de la mer.

                   L’envoy

25               Dieux Mars, j’atten printemps de douçour plain,
                   Que l’en pourra paisiblement rymer.
                   Lors y fait bon, en yver n’y fait sain :
                   Contre les vens ne puet nulz de la mer.