[81r]
sent a la mettre entre les mains de leur souverain le roy de Navarre & quil les prendroit a mercy, et les laisseroit aller leurs vies & bagues saufves, autrement silz estoient pris dassault seroient mis en pieces. Ceulx de l forteresse estoient gens de guerre que le duc de Nagere et lacado de las donzelles lieutenant oudit royaulme pour le roy despaigne y avoient mis eet estoient tous bons et loyaulx serviteurs a leur maistre, firent responce quilz ne rendroient point la placeet eulx encores moins. Le trompete en vint faire son rapport, lequel ouy par le bon chevalier ne fist autre delau sinon de faire asseoir qutre grosses pieces dartillerie quilz avoit et bien canonner la place et vivement. Ceulx de dedans qui estoient environ cent hommes avoient force hacquebutes a croc et deux faulconneaux qui firent tresbien leur devoir de tirer a leurs ennemys, mais si bien ne sceurent jouer leur roolle quen moins dune heure ny eust berche a leir place assez grandete, mais mal aysee pource quil failloit monter. Or en telles matieres fault autre chose que souhaiter. Si fist le bon chevalier sonner lassault, & vint aux lansquenetz les enhortant dy aller. Leur truchement parla pour eulx et dist que cestoit leur ordonnance que toutesfois quil se prenoit place dassault quilz devoient avoir double paye, et que si on leu vouloit promettre yroient audit assault, autrement non. Le bon chevalier nentendoit point ses ordonnances, toutesfois il leur fist responce que sans nulle faulte silz prenoient la place quilz auroient ce quilz demandoient et leur en respondoit pource quil ne vouloit pas demourer longuement la. Il eut beau promettre, mais au dyable le lansquenet qui monta jamais a la berche. Les adventuriers y allerent gaillardement, mais ilz furent lourdement repoussez par deux ou trois fois, et de fait ceulx qui deffendoient monstroient bien quilz estoient gens de guerre. Quant le bon chevalier congneut leur cueur pensa bien quil ne les auroit jamais de ceste lute. Si fist sonner la retraicte, laquelle faicte fist encores tirer dix ou douze coups dartillerie faisant myne quil vouloit agrandir la berche, mais il avoit autre chose en pensee, car ce pendant quon tiroit lartillerie vint a ung de ses hommes darmes fort gentil compaignon quon nommoit petit Jehan de la vergne, auquel il dist. La vergne si vous voulez ferez ung bon service et qui vous sera remunere. Voyez vous bien ceste grosse tour qui est au coing de ce chasteau, quant vous verrez que je feray recommencer lassault prenez deux ou trois eschelles, et avecques trente ou quarante hommes essayez de monter en ceste tour car sur ma vie ny trouverez personne pour la deffendre, et si vous nentrez en la place par la dictes mal de moy. Lautre entendit tresbien le commandement. Si ne demoura gueres que lassault ne feust commence plusapre que devant ou tous ceulx de la place vindrent pour deffendre la berche et navoient regard ailleurs, car ilz neussent jamais pense quon eust entre par autre lieu dont ilz furent trompez, car la vergne fist tresbien sa charge et sans estre deulx apperceu dressa ses
[81v]
eschelles par lesquelles il monta dedans ceste tour et plus de cinquante compaignons avecques luy lesquelz ne furent jamais veuz des ennemys quilz ne feussent dedans la place ou ilz crierent, france, france, navarre, navarre, et cindrent ruer par le derriere sur ceulx qui estoient a deffendre la berche, qiu pour estre surpris furent estonnez a merveilles Toutesfois ilz se misrent en deffence et firent devoir de bien combatre, mais leur prouesse ne leur servit de gueres, car les assaillans entrerent dedans qui misrent tout en pieces ou peu sen faillit, & fut toute la place courue & pillee. Ce fait le bon chevalier y laissa ung des gentilz hommes du roy de Navarre avecques quelques compaignons, puis se mist au retour droit au camp. Ainsi quil vouloit partir deux ou trois cappitaines de ses lansquenetz vindrent devers luy, et par leur truchement luy firent dire quil leur tiensist sa promesse de leur faire bailler double paye et que la place avoit este prise. De ce propos fut le bon chevalier fort fasche que merveilles, et respondit tout courrouce au truchement. Dictes a voz coquins de lansquenetz que je leur ferois plustost bailler chascun ung licol pour les pendre, les meschans quilz sont non jamais voulu aller a lassault et ilz demandent double paye, jen parlerau a monseigneur de la Palisse & a monseigneur de Suffoc leur cappitaine general, mais ce sera pour les faire casser, ilz ne vallent pas putains. Le truchement leur dist le propos, et incontinent commencerent ung bruit merveilleux, mais le bon chevalier fist sonner a lestandart et assembla ses gens darmes et adventuriers, de facon que silz eussent fait semblant de rien estoit delibere de les mettre en pieces. Ilz sappaiserent petit a petit, et sen vindrent au camp devant Pampelune en troppe comme les autres. Il fault faire icy ung petit discours pour rire. Quant le bon chevalier fut arrive eu grant chere du roy de Navarre, du seigneur de la Palisse, du duc de Suffoc et de tous les cappitaines, auquelz il compta la maniere de faire des lansquentz qui estoient au camp dont il avoit six ou sept mille. Ainsi quilz achevoient de soupper va arriver ung lansquenet qui avoit assez bien beu, et quant il entre ne scavoit quil devoit dire, sinon quil cherchoit le cappitaine Bayart pour le tuer pource quil ne leur vouloit point faire bailler dargent. Il parloit quelque peu de francois et assez mauvais. Le cappitaine Pierrepont lentendit qui dist au bon chevalier en ryant. Monseigneur vecy ung lansquenet qui vous cherche pour vous tuer. Cestoit la plus joyeuse & recreative personne quon eust sceu trouver. Si se leva de table lespee au poing, et sadressa au lansquenet en luy disant. Esse vous qui voulez tuer le cappitaine Bayart, le vecy deffendez vous. Le povre lansquenet quelque yvre quil feust eut belle paour, et respondit en assez mauvais langaige. Ce nest pas moy qui veulx tuer le cappitaine Bayart tout seul,
[82r]
mais ce sont tous les lansquenetz. Ha sur mo name dist le bon chevalier qui pasmoit de rire, je le quicte, et ne suis pont delibere moy seul de combatre sept mille lansquenetz, appoinctement compaignon pour lamour de dieu. Toute la compaignie se print si tresfort a rire du propos que merveilles, et fut assis a table le lansquenet viz a viz du bon chevalier qui le fist achever dabiller comme il estoit commence, de sortque que avant quil partist de la promist que tant quil vivroit deffendroit le cappitaine Bayart envers et contre tous, et jura quil estoit homme de bien et qui avoit bon vin. Le roy de Navarre et le seigneur de la Palisse le sceurent le soir qui en rirent comme les autres. Le lendemain de larrivee du bon chevalier commencea lartillerie a tirer contre la ville de Pampelune qui fut batue assez bien, et y voulut on donner lassault qui fut essaye, mais si bien se deffendirent ceulx de dedans quon la laissa la, et y eurent les francois grosse perte. Dedans estoit ce gentil chevalier espaignol que lon nommoit Lalcado de las donzelles. Ce fut ung coyage assez malheureux, car les francois a leur entree en Navarre gasterent et dissiperent tous les biens, rompirent les moulins, et firent beaucoup dautres choses dont ilz eurent depuis grande indigence, car la famine y fut si grosse que plusieurs gens en moururent, et si ny eust jamais en armee si grande necessite de souliers, car une meschante paire pour ung lavaiz coustoit ung escu. Brief tous ses malheurs assemblez, & aussi que le duc de Nagere estoit arrive au pont la royne pres de Pampelune avecques ung secours de huyt ou dix mille hommes fut le roy de Navarre conseille par le seigneur de la Palisse et tous les cappitaines de se retirer jusques a une autre saison. Si fut leve le siege en plain jour de devant Pampelune et lartillerie mise a chemin mais peu de journees fut conduicte, car les montaignes par ou elle devoit passer estoient trop estranges. Si furent contrainctz les francois apres que a force de gens & dargent leurent menee trois journees la laisser au pied dune montaigne ou ilz la rompirent, aumoins la misrent en sorte que leurs ennemys ne sen feussent sceu ayder. Il fault entendre que au repasser des montaignes pizenees y eut de grandes povretez par le deffault des vivres, & si nestoit heure au jour quil ny eust alarme chault et aspre. Le duc de Suffoc dit la blanche roze cappitaine general des lansquenetz y estoit qui grande et parfaicte amytie avoit avecques le bon chevalier, ung jour quil avoit tant travaille que plus nen povoit, car toute ceste journee navoit beu ne mange, ainsi quon se vouloit retirer dune escarmouche sur le soir bien tard vint trouver icelluy bon chevalier, auquel il dist. Cappitaine bayart mon amy je meurs de fain, je vous prie donnez moy au jourdhuy a soupper, car mes gens mont dit quil nya riens a mon logis. Le bon chevalier qui ne sestonna jamais de riens respondit. Ouy vrayement monseigneur & si serez bien tracite. Puis devant luy appella son maistre dhostel auquel il dist. Monseigneur de Mylieu, allez devant faire haster le soupper et que nous soyons ayses comme dedans paris. De laquelle
[82v]
parolle le duc de Suffort rist ung quart dheure, car desja y avoit deux jours quilz ne mangeoient que pain de milet. Bien cous asseure que sans perdre gens que de famyne les Francois firent une aussi belle retraicte que gens de guerre firent oncques. Et sut tous y acquist ung merveilleux honneur le bon chevalier qui tousjours demoura sur la queue tant que le dangier fust passe, car voulentiers luy a lon tousjours fait cest honneur aux affaires quen allant a tousjours este mis des premiers et aux retraictes des derniers. Bien joyeulx furent les francois quant par leurs journees eurent gaigne Bayonne, car ilz mangerent a leur aise : mais plusieurs gens de pied qui estoient affamez mangerent tant quil en mourut tout plain : ce fut ung assez fascheux vouage. En ceste annee mourut le pape Julles ce bon francois, et fut esleu en son lieu le cardinal de medicis pape Leon nomme. Il vint aussi en la coste de Bretaigne quelque armee des angloys qui ne firent pas grant chose. Ung jour entre les autres ung gros navire Dangleterre dicte la Regente et une nef de la royne de France duchesse de Bretaigne nomme La cordeliere se trouverent et sacrocherent pour combatre. Durant le combat quelcun gecta du feu dedans lune des nefz, mais finablement furent toutes deux bruslees. Les anglois y firent grosse et lourde perte, car sur ladicte Regente y avoit gros nombre de gentilz hommes qui y moururent sans leur estre possible trouver le moyen deschapper.
¶ Comment le roy henry dangleterre descendit en France, et comment il mist le siege devant Therouenne, dune btaille dicte la journee des esperons ou le bon chevalier fist merveilles darmes et gros service en France.
¶Chapitre .lviie.
EN lan mil cinq cens et treize vers le commencement le roy de France renvoya une armee en ytalie soubz la charge de la trimoille. Ja avoit este fait lappoinctement entre le roy de France et les Veniciens qui y portoient faveur, toutesfois le cas alla assez mal pour les francois, car ilz perdirent journee contre les suysses. Et y furent les enfans de messire Robert de la marche qui avoient charge de Lansquenetz quasi laissez pour mors, et les alla querir leur pere dedans ung fosse. Si convint encores aux francoys habandonner la Lombardie pour ceste anne. A leur retour fut advertu le roy de France comment Henry rou Dangleterre alye de lempereur maximilian estoit descendu a Calays avecques grosse puissance pour entrer en son pays de Picardie. Ouquel pour y resister envoya incontinent grosse puissance, et fist son lieutenant general le seigneur de Pyennes gouverner oudit pays
[83r]
Les Anglois entrez quilz feussent en la campaigne de pleine arrivee allerent planter le siege devant la ville de Theroenne qui estoit bonne et forte, ou pour icelle garder estoient commis deux treshardiz et gaillars gentilz hommes, Lung le seigneur de Theligny seneschal de Rovergne cappitaine saige et asseure, et ung autre du pays mesmes appelle le seigneur de Pontdormy avecques leurs compaignies, quelques aventuriers francoys avecques aucuns lansquenetz soubz la charge dung cappitaine Brandec. Ilz estoient tous gens de guerre, et pour bien garder la ville longuement silz eussent eu vivres Mais ordinairement en France ne se font pas voulentiers les provisions de saison ne de raison. Le siege assis par les anglois devant ladicte ville de Theroenne commencerent a la canonner, encores ny estoit pas la personne du Roy dangleterre : ains pour ses lieutenans y estoient le duc de Suffoc, messire Charles brandon et le cappitaine Tablot : mais peu de jours apres y arriva qui ne fut pas sans avoir une grosse frayeur entre Calays et son siege de Theroenne aupres dung village dit Tournehan, car bien cuyda la estre combatu par les francois qui estoient en nombre de douze cens hommes darmes tous bien deliberez, mais avecques eulx navoient pour lheure nulz de leurs gens de pied qui leur fut gros malheur, et luy par le contraire navoit nulz gens de cheval : mais environ douze mille hommes de pied, duquel nombre estoient quatre mille Lansquenetz. Si sapprocherent les deux armees a une portee de canon lune de lautre. Quoy voyant par le roy Dangleterre eut paour destre trahy, si descendit a pied et se mist au meillieu des Lansquenetz. Les francois vouloient honner dedans, et mesmement le bon chevalier qui dist au seigneur de PIennes plusieurs fois. Monseigneur chargeons les, il ne nous en peult advenir dommage sinon bien peu, car si a la premiere charge les ouvrons ilz sont rompus : silz nous repoussent nous nous retirerons tousjours, ilz sont a pied et nous a cheval. Quasi tous les francois furent de ceste oppinion, mais ledit seigneur de PIennes disoit, messeigneurs Jay charge sur ma vie du roy nostre maistre de ne riens hazarder mais seullement garder son pays, faictes ce quil vous plaira : mais de ma part je ne my consentiray point. Ainsi demoura ceste chose et passa le roy Dangleterre et sa bende au nez des Francois. Le bon chevalier qui envys eust laisse departir la chose en ceste sorte va donner sur la queue avecques sa compaignie, et les fist serrer si bien quil leur convint habandonner une piece dartillerie dicte sainct Jehan, et en avoit le roy Dangleterre encores unze autres de ceste facon & les appelloit ses douze apostres, ceste piece fut gaignee et amenee au camp des francois. Quant le roy Dangleterre fut arrive au siege de Theroenne avecques ses gens ne fault pas deamander sil y eut djoye demenee : car il estoit gaillart prince & assez liberal Trois ou quatre jours apres arriva lempereur maximiliant avecques quelque nombre
[83v]
de hennuyers et bourguignons, si se firent les princes grant chere lung a lautre. Apres ce furent faictes les approuches devant la ville, & icelle canonnee furieusement, ceulx de dedans respondoient de mesmes et faisoient leurs rampars au mieulx quilz povoient, mais sans doubte ilz avoient necessite de vivres. Le roy de france estoit marche jusques a mayens, lequel mandoit tous les jours a son lieutenant general le seigneur de pIennes, que a quelque peril que ce feust on advitaillast Theroennet Cela ne se povoit faire sans grant hazart, car lle estoit toute enclose dennemys, toutesfois pour complaire au maistre fut connclud quon yroit avecques toute la gendarmerie dresser ung alarme au campt, et ce pendant que quelque ungs ordonnez a porter des lartz pour mettre dedans la ville les yroient gecter dedans les fossez. & que apres ceulx de la garnison les retireroient assez. SI fut pris le jour dexecuter ceste entreprinse dont le roy dangleterre & lempereur furent advertis, comme povez entendre par quelques espies dont assez sen trouve parmy les armees, & y en avoit alors de doubles qui faignoient estre bons francois, et ilz estoient du contraire party. Le jour ainsi ordonne daller advitailler la ville de theroenne, monterent les cappitaines du roy de france a cheval avecques leurs gensdarmes. Des le ponct du jour le roy Dangleterre qui scavoit ceste entreprinse avoit fait mectre au hault dung tertre dix ou douze mille archiers anglois, et quatre ou cinq mille lansquentz, avecques huyt ou dix pieces dartillerie affin que quant les francois seroient passez oultre ils descendissent et leur coupassent chemin, et par le devant avoit ordonne tous les gens de cheval, tant anglois, bourguignons que hennuyers pour les assaillir. Il fault entendre une chose que peu de gens ont sceu, et qui ont donne blasme de ceste journee aux gentilz hommes de france a grant tort, cest que tous les cappitaines francois declarerent a leurs gensdarmes que ceste course quilz faisoient estoit seulement pour refreschir ceulx de theroenne, & quilz ne vouloient aucunement combatre de sorte que silz rencontroient les ennemys en grosse troppe, ilz vouloient quilz retournassent au pas, et silz estoient pressez du pas au troit, et du trot au galop, car ilz ne vouloient riens hazarder. Or commencerent a marcher les francois et approcherent la ville de theroenne dune lieue pres et plus ou commenca lescarmouche forte er rudde, et tresbien fist son devoir la gendarmerie francoise jusques a ce quilz vont veoir sur le coustau ceste grosse troppe de gens de pied en deux bendes qui estoient marchez plus avant quilz nestoient, et vouloient descendre pour les enclorre, quoy voyant fut la retraict sonnee par les trompettes des francois. Les gensdarmes qui avoient leur lecon de leurs cappitaines se misrent le grant pas au retour, ilz furent pressez & allerent le trot & puis au grant galop, tellement que les premiers se vindrent gecter sur le seigneur de la palisse qui estoit en la bataille avec le duc de longueville en si grande fureur quilz misrent tout en desordre, les chassans qui tresbien poursuyvoient leur pointe voyant si povre
[84r]
conduyte pousserent tousjours oultre tellement quilz firent du tout tourner le doz aux francois. Le seigneur de la Palice & plusieurs autres y firent plus que leur debvoir et cryoient a haulte voix Tourne homme darmes tourne ce nest riens : mais cela ne servoit de riens, ains chascun taschoit de venir gaigner leur camp ou estoit demouree lartillerie et les gens de pied. En ce grant desordre fut prins prisonnier le duc de Longueville et plusieurs autres : comme le seigneur de l Palice, mais il eschappa des mains de ceulx qui lavoient pris. Le bon chvalier sans paour et sans reporche se retiroit a grant regret & tousjours tournoit sur ses ennemys menu et souvent avecques quatorze ou qinze hommes darmes qui estoient demourez aupres de luy. Si vint en se retirant a trouver ung petit pont ou il ne povoit passer que deux hommes a cheval de fonc, et y avoit ung gros fosse plain deaue qui venoit de plus de demye lieue loing & alloit a bien demy quart de lieue plus bas faire mouldre ung moulin. Quant il fut sur ce pont il dist a ceulx qui estoient avecques luy. Messeigneurs arrestons nous icy, car dune heure noz ennemys ne gaigneront ce pont sur nous. Et puis il appella ung de ses archiers auquel il dist. Allez vistement a nostre camp, et dictes a monseigneur de la Palice que jay arreste les ennemus sur le cul pour le moins dicy a demye heure et que ce pendant il face chascun mettre en bataille et quon ne sespouvente point, ains quil me semble qui doibt tout bellement marcher enca, car si les gens ainsi desroyez poussoient jusques la ilz se trouveroient deffaictz. Larcher va droit au camp et laissa le bon chevalier avecques si peu de gens quil avoit gardant ce petit pont, ou il faist farmes le possible. Les bourguignons et Hennuyers y vindrent, mais la convint il combatre : car bonnement ne povoient passer a leur aise : et larrest quilz firent la donna loysir aux francois qui estoient retournez en leur camp deulx mettre en ordre et en deffence si besoing en eust este. Quant les bourguignons veirent que si peu de gens leur faisoient barbe commencerent a crier quon fist venir des archiers a diligence, & aucuns deulx les allerent haster. Ce pendant plus de deux cens chevaulx chevaucherent le long de ce ruysseau & allerent trouver le moulin ou ilz passerent. Ainsi fut encloz le bon chevalier de deux costez : lequel dist a ses gens. Messeigneurs rendonns nous a ces gentilz hommes, car nostre prouesse ne nous serviroit de riens. Noz chevaulx sont recreuz, ilz sont dix contre ung : noz gens sont a trois lieues dicy : et si nous attendons encores ung peu, et les archiers anglois arrivent ilz nous mettront en pieces. Sur ces parolles vont arriver ces bourguignonns & Hennuyers crians Bourgongne bourgongne, & firent grosse envahye sur les francois : qui pour navoir moyen deulx plus deffendre se rendoient lung ca & lautre la aux plus apparens. Et ainsi que chascun taschoit a prendre son prisonnier le bon chevalier va adviser ung gentil homme bien en ordre soubz de petits arbres lequel pour la grande et extreme chaleur quil avoit de facon quil nen povoit plus avoit oste
[84v]
son armet, et estoit tellement afflige et travaille quil ne se daignoit amuser aux prisonniers. Si picque son cheval droit a luy lespee au poing quil luy vient mettre sur la gorge en luy disant. Renz toy homme darmes ou tu es mort. Qui fut bien esbahy ce fut le gentil homme, car il pensoit bien que tout feust prins : toutesfois il eut paour de mourir, et dist. Je me rends doncques puis que prins suis en ceste sorte. Qui estes vous. Je suis dist le bon chevalier le cappitaine Bayard qui me rends a vous, et tenez mon espee : vous supliant que vostre plaisir soit moy emmener avecques vous, mais une courtoysir me ferez si nous trouvons des anglois en chemin qui nous voulsissent tuer vous me la rendrez. Ce que le gentil homme luy promist et le luy tint, car en tirant au camp convint a tous deux jouer des cousteaulx contre aucuns anglois qui vouloient tuer les prisonniers, ou ilz ne gaignerent riens. Or fut le bon chevalier mene au camp du roy dangleterre en la tente de ce gentil homme qui luy fist tresbonne chere pour trois ou quatre jours, au cinquiesme le bon chevalier luy dist. Mon gentil homme je vouldrois bien que me voulsissiez faire mener seurement au camp du roy mon maistre, car il mennuye desja icy. Comment dist lautre, encres navons nous point advise de vostre rancon. De ma rancon dist le bon chevalier, mais a moy de la vostre, car vous estes mon prisonnier, et si depuis que jeuz vostre foy me sus rendu a vous, ce a este pour me sauver la vie et non autrement. Qui fut bien estonne ce fut le gentil homme, car encores luy dist plus le bon chevalier. Ce fut mon gentil homme, ou ne me tiendrez promesse. Je suis asseure quen quelque sorte que ce soit jeschapperay, mais croyez apres que jauray le combat a vous. Ce gentil homme ne scavoit que respondre, car il avoit assez ouy parler du cappitaine Bayart, et de combat nen vouloit point Toutesfois il estoit assez courtoys chevalier, et en fin dist. Monseigneur de Bayart, je ne vous veulx faire que la raison, jen croyray les cappitaines. Il fault entendre quon ne sceut si bien celer le bon chevalier quil ne feust sceu parmy le camp, et sembloit advis a ouyr parler les ennemys quilz eussent gaigne une btaille. Lempereur lenvoya querir, et fut mene a son logis qui luy fist une grande & merveilleuse chere, en luy disant. Cappitaine Bayart mon amy jay tresgrant joye de vous veoir, que pleust a dieu que jeusse beaucoup de telz hommes que vous je croy que avant quil feust gueres de temps je me scaurois bien venger des bons tours que le roy vostre maistre et les francois mont faiz par le passe. Encores luy dist il en riant. Il me semble monseigneur de Bayart que autresfois avons este a la guerre ensemble, et mest advis quon disoit en ce temps la que Bayard ne fuyoit jamais. A quoy le bon chevalier respondit. Sire si jeusse fuy ne ne feusse pas icy. En ces entrefaictes arriva le roy dangleterre a qui fist congnoistre le bon chevalier, qui luy fist fort bonne chere, et il luy fist la reverence comme a atel prince appartenoit. Si commencerent a parler de ceste retraicte, et disoit
[85r]
le roy dangleterre que jamais navoit veu gens si bien fuyr & en si gros nombre que les francois qui nestoient chassez que de quatre a cinq cens chevault, et en parloient en assez povre facon lempereur & luy. Sur mo name dist le bon chevalier la gendarmerie de france nen doit aucunement estre baslmee, car ilz avoient expres commandement de leurs cappitaines de ne combatre point par ce quon se doubtoit bien si veniez au combat ameneriez toute voster puissance comme avez fait, et nous navions ne gens de pied ny artillerie, et ja scavez haulx & puissans seigneurs que la noblesse de france est renommee par tout le monde. Je ne dis pas que je doive estre du nombre. Vrayement dist le roy dangleterre monseigneur de Bayart si tous estoient voz semblables le siege que jay mis devant ceste ville me seroit bien tost leve, mais quoy que ce soit vous estes prisonnier. Sire dist le bon chevalier je ne le confesse pas, et en vouldrois bien croire lempereur et vous. La present estoit le gentil homme qui lavoit amene et a qui il sestoit rendu depuis quil avoit eu sa foy. Si compta tout le faict ainsi que cy desus est recite A quoy le gentil homme ne contredit riens, ains dist. Il est vray ainsi que le seigneur de Bayart le compte. Lempereur et le roy dangleterre se regarderent lung lautre. Puis commenca a parler lempereur, et dist que a son oppinion le cappitaine Bayart nestoit point prisonnier, mais plustost le seroit le gentil homme de luy. Toutesfois pour la courtoysie quil luy avoit faicte demourerent quictes lung envers laure de leur foy, & le bon chevalier sen pourroit aller quant bon sembleroit au roy dangleterre, lequel dist quil estoit bien de son oppinion, et que sil vouloit demourer six sepmaines sur sa foy sans porter armes que apres luy donnoit conge de sen retourner, et que ce pendant il allast veoir les villes de flandres. De ceste gracieusete remercia le bon chevalier treshumblement lempereur et le roy dangleterre, et puis sen alla esbatre par le pays jusques au jour quil avoit promis. Le roy dangleterre durant ce temps le fist praticquer pour estre a son service luy faisant presenter beaucoup de biens, mais il perdit sa peine, car son cueur estoit du tout francois. Or fault entendre une chose, que combien que le bon chevalier neust pas de grans biens homme son pareil ne sest trouve de son temps qui ait tenu meilleure maison que luy, & tant quil fut es pays de lempereur la tin opulentement aux hennuyers et bougongnons. Et neant moins que le vin y soit fort cher si ne leur failloit il riens quant ilz falloient coucher Et fut tel jour quil despendit vingt escus en vin. Plusieurs eussent bien voulu quil nen feust jamais party, toutesfois il sen retourna en france quant il eu acheve son terme, et fut conduit & tresbien acompaigne jusques a trois lieues des pays de son maistre. Quelques jours deourerent lempereur et le roy dangleterre devant Theroenne qui en fin se rendit par faulte de vivres, et fut la composition que les cappitaines & gens de guerre sortiroient vies et bagues sauves et que mal ne seroit fait aux habitans de la ville ne icelle desmolie. Ce quon
[85v]
promist aux gens de guerre fut bien tenu : mais non pas a ceulx de la ville, car le roy Dangleterre fist abatre les murailles et mettre le feu en plusieurs lieux qui fut grosse pitie : toutesfois depuis les francois la remisrent en bonne ordre et plus forte que jamais. De la leverent leur siege lempereur & le roy Dangleterre et lallerent planter devant la ville de Tournay qui se feust assez deffendue si les habitans eussent voulu accepter le secours des francois quon leur vouloit bailler, mais ilz dirent quilz se deffendroient bien deulx mesmes dont malleur en print : car leur ville fut prinse & mise es mains du roy Dangleterre qui la fortifia a merveilles. Lyver estoit desja avance, parquoy fut larmee rompue Et se retira le roy Dangleterre en son royaulme, et lempereur en Almaigne. Pareillement le camp du roy de france se deffist, et se logea lon par les garnisons sur les frontieres de Picardie. Il fault scavoir une chose qui est digne destre mis par escript. Cest que durant le camp du roy Dangleterre & de lempereur en Picardie, les suysses ennemys pour lors du roy de france, le seigneur du vergy et plusieurs lansquenetz en nombre de bien trente mille hommes de guerre descendirent en Bourgongne ou gouverneur estoit le vertueux seigneur de la trimoille qui pour lheure estoit au pays Et pour navoir puissance a les combattre aux champs fut contrainct se retirer dedans Dyjon, devant laquelle ville il esperoit arrester ceste grosse armee qui peu apres y vint mettre le siege en deux lieux, et icelluy assis la canonnerent furieusement. Le bon seigneur de la Trimoille faisoit son debvoir en ce qui estoit possible, et luy mesmes jour et nuyt estoit aux rampars, mais quant il veit les berches faictes et si mal garny de gens de guerre quil estoit congneut a loeil que la ville sen alloit perdue et par consequent le royaulme de france en gros dangier, car si Dyjon eust este prins ilz feussent allez jusques a Paris. Si fist secretement traicter avecques les suysses, et leur fist faire pluseiurs belles remonstrances des biens et honneurs quilz avoient receuz de la maison de france et quil esperoit quen brief seroient encores mays plus que jamais, et que quant ilz entendroient bien leurs affaires la ruyne de la maison de france estoit a leur grant desavantage. Ilz entendirent a ces propos, et encores sur saufconduit durent daccord quil allast parler a eulx, ce quil fist. Et si bien les mena et de si belles parolles, aussi moyennant certaine grosse somme de deniers quil leur promist. Pour seurete de laquelle leur bailla pour hostaiges son nepveu le seigneur de Maizieres, le seigneur de Rochefort filz du chancelier de france et plusieurs bourgeois de la ville quilz sen retournerent. De ceste composition fut blasme ledit seigneur de la Trimoille de plusieurs, mais ce fut a grant tort, car jamais homme ne fist si grant service en france pour ung jour que quant il fist retourner les suysses devant Dyjon, et depuis la on bien congneu en plusieurs manieres. Le bon roys Loys douziesme en ceste annee Mil cinq cens et treize eut de terribles affaires, et de ses alliez aussi dont lung des
[86r]
plus apparans estoit le roy descosse, qui en une bataille cuydant entrer en angleterre fut deffaict par le duc de Norfort lieutenant du roy dangleterre, et luy mesmes y fut tue. Or quelque chose quil y eust le roy de france estoit tant ayme de ses subjectz que a leur requeste dieu luy ayda. Et combien que la pluspart des princes Deurope eussent jure sa ruyne, et mesmement tous ses voisins garda tresbien son royaulme. Du partement de picardie sen retourna par ses petites tournees en sa ville de Bloys quil aymoit fort par ce quil y avoit prins sa naissance, mais gueres ny sejourna que ung grant & irreparable malheur luy advint comme vous orrez.
¶ Du trespas de la magnanyme et vertueuse princesse Anne royne de france & duchesse de bretaigne. Du mariage du roy Loys .xiie. avecques Marie dangleterre, et de la mort dudit roy Loys.
¶Chapitre .lviiie.
LE bon roy de france Loys .xiie. apres avoir passe toutes ses fortunes en ceste annee Mil cinq cens et treize, et quil eut fait asseoir ses garnisons en picardie sen retourna en sa ville de Bloys ou il se vouloit resjouyr quelque peu, mais le plaisir quil y pensoit prendre luy tourna en grande douleur & tristesse, car environ le commencement de Janvier sa bonne compaigne et espouse Anne royne de france et duchesse de Bretaigne tumba malade fort griefvement, car quelques medicins que le roy son mary ny elle eusent pour luy ayder a recouvrer sante en moins de huyt jours rendit lame a dieu qui fut dommage nompareil pour le royaulme de france, et dueil perpetuel pour les bretons. La noblesse des deux pays & fist perte inestimable, car de plus magnanyme, plus vertueuse, plus sage, plus liberalle ne plus acomplie princesse navoit porte couronne en france depuis quil ya eu tiltre de royne. Les francois et bretons ne plaignirent pas seullement son trespas, mais es Almaignes, Espaignes, Angleterre, Escosse et en tout le reste de Laurope fut plaincte et ploree. Le roy son mary ne donnoit pas les grans sommes de deniers de paour de fouller son peuple, mais ceste bonne dame y satisfaisoit, et y avoit peu de gens de vertus en ses pays a qui une fois en sa vie neust fait quelque present. Pas navoit trente & huyt ans acomplis la gentille princesse quant cruelle mort en fist si grant dommage a toute noblesse. Et qui vouldroit ses vertus et sa vie descripre comme elle a merite il fauldroit que dieu fist ressisciter Cicero pour le latin, et maistre Jehan de Meung pour le francois, car les modernes ny scauroient attaindre. De ce tant lamentable et trespiteux trespas en fut le
[86r]
bon roy Loys si afflige que huyt jours durant ne faisoit que larmoyer souhaitant a toute heure que le plaisir de nostre seigneur feust luy aller tenir compaignie. Toute le reconfort qui luy demoura cestoit que de luy et de la bonne trespossee estoient demourees deux bonns et belles princesses Claude & Renee qui avoit environ trois ans. Elle fut menee a sainct Denys et la enterre, et luy fut fait sont service tant audit Bloys que audit lieu de sainct Denus autant seollempnel quil fut possible plus de trois moys entiers par tout le royaulme de france. Et par la duche de Bretaigne neust on oy parler dautre chose que de ce lacrymable trespas, et croy certainement quil en souvient encores a plusieurs : car les grans dons, le doulx recueil, et gracieulx parler quelle faisoit a chascun la rendront immortelle. Environ le moys de May apres quon disoit mil cenq cens & quatorze espousa monseigneur Francois duc de Valois et Dangolesme prochain heritier de la couronne madame Claude aisnee fille de france et duchesse de Bretaigne au lieu de sainct germain en Laye. En ladicte annee & environ le moys Doctobre par le moyen du seigneur de Longueville luy estant prisonnier qui avoit traicte le mariage en angleterre du roy Loys et de madame Marie seur audit roy Dangleterre fut icelle dame amenee a Abbeville ou ledit seigneur lespousa. Il navoit pas grant besoing destre marie pour beaucoup de raisons, et aussi nen avoit il pas grant vouloir : mais par ce quil se voyoit en guerre de tous costez quil neust peu soustenir sans grandement fouller son peuple ressembla au Pellican, car apres que la royne Marie eut fait son entree a Paris qui fut fort triumphante, et que plusieurs joustes et tournois furent achevez qui durerent plus de six sepmaines, Le bon roy qui a acause de sa femme avoit change toute maniere de vivre, car ou il souloit disner a huyt heures convenoit quil disnast a midy : ou ils se souloit coucher a six heures du soir souvent se couchoit a a minuyt, tumba malade a la fin du moys de Decembre de laquelle maladie tout remede humain ne le peult garantir quil ne rendist son ame a dieu le premier de Janvier ensuyvant apres la mi nuyct. Ce fut en son vivant ung bon prince, saige et vertueux qui maintint son peuple en paix sans le fouller aucunement fors que par contraincte. Il eut en son temps du bien et du mal beaucoup, parquoy il avoit ample congnoissance du monde : plusieurs victoires obtint sur ses ennemys, mais sur la fin de ses jours fortune luy tourna ung peu son effraye visaige. Le bon prince fut plainct et plore e tous ses subjectz et non sans cause, car il les avoit tenuz en paix et en grande justice de facon que apres sa mort et toutes louenges dictes de luy fut appelle Pere du peuple, ce tiltre luy fut donne a bonne raison. Il navoit pas encores cinquante six ans quant il paya le tribut de nature. On le porta enterrer a sainct Denys avecques ses bons predecesseurs en grans pleurs et cris et au grant regret de ses subjectz. Apres luy succeda a la couronne Fran
[87r]
coys premier de ce nom en laage de vingt ans beau prince autant quil en y eust point au monde Lequel avoit espouse madame Claude de france fille aisnee du roy son predecesseur et duchesse de Bretaigne. Jamais navoit este veu roy en France de ui la noblesse sesjouyst autant, et fut mene sacrer a Reims acompaigne de tous ses princes, gentilz hommes et officiers dont il y avoit si grant nombre que cest quasi chose incroyable : et fault dire que les logis estoient pressez, car il ny avoit grant moyen ne petit quilz ne voulsissent estre de la feste.
¶Comment le roy de France Francoys premier de ce nom passa les montz, et comment il envoya devant le bon chevalier sans paour et sans reprouche, & de la prinse du seigneur Prospre coulonne par sa subtilite.
¶Chapitre .lixe.
APres le sacre du roy francois premier de ce nom et sa couronne prinse a sainct denys sen revint faire son entree a Paris qui fut la plus gorgiase & triumphante quon ait jamais veu en france, car de princes, ducz, contes et gentilz hommes en armes y avoit plus de mille ou douze cens. Lentree faicte y eut plusieurs joustes & tournoiz en la rue sainct anthoine ou chascun fist le mieulx quil peut.Ledit seigneur si tint jusques apres pasques ou ce pendant se traicta lappoinctement de luy et de larcheduc conte de flandres moyentnant le mariage de luy et de madame Renee de france belle seur du roy. Il y fut aussi fait daultres mariages, comme de madame Marie dangleterre lors vefve du feu roy Loys douziesme et douairiere de france, avec le duc de suffort messire charles brandon qui estoit fort ayme du roy dangleterre son mastre, et du conte de nansso a la seur du prince dorenge. Le duc de bourbon fut faict connestable de france, et environ le mois de may partirent de paris en lan mil cinq cens .xv. & sen vindrent leurs belles petites journees a amboise ou le gentil duc de Lorraine espousa la aseur germaine dudict duc de bourbon. Durant toutes ces choses faisoit le roy de france secretement preparer son voyage pour la conqueste de sa duche de Milan & peu a peu envoyoit son armee vers le Lyonnois et daulphine ou desja estoit le bon chevalier lors son lieutenant au pays, ouquel il estoit autant ayme que sil eust este leur naturel seigneur. Or comme par cy devant avez entendu en plusieurs passaiges tousjours en allant sur les ennemys estoit voulentiers le bon chevaloer mis devant, et au retourner derriere comme encores il fut en ce voyage, car il fut envoye avecques sa compaignie et troys ou quatre mille hommes de pied sur les confins du Daulphine et des terres du
[87v]
marquis de Saluces lesquelles il avoit toutes perdues : excepte ung chasteau appelle Ravel assez fort. Es places du marquis de saluces y avoit gros nombre de suysses en garnison : & mesmement y faisoit residence le seigneur Prospre coulonne lors lieutenant general du pape qui tenoit tout le pays en apatis, & en faisoit ce quil vouloit. Fort bien estoit acompaigne comme de trois cens hommesdarmes deslite mntez commme sainct George, & si avoit quelques chevaulx legiers. Le bon chevalier secretement sentoit par ses espies ouquel lieu ce seigneur Propsre repairoit le plus souvent : & tant en enquist quil congneut a la verite que sil avoit puissance pareille a la sienne quant aux gens de cheval il luy feroit une mauvaise compaignie. Si en advertit le duc de Bourbon connestable de france qui esoit a Brianson ou daulphine, lequel le fist entendre au roy qui desja estoit a Grenoble pour parachever son voyage. Et selon la demande que faisoit le bon chevalier furent soubdainement envoyez trois cappitaines triumphans avec leurs bendes, les seigneurs de la Palisse, Dymbercourt & daubigny. Il estoit venu quelques bonnes nouvelles au bon chevalier, parquoy par ung lieu appelle Dronyez descendit en la plaine du Pyemont, dont fut adverty ce seigneur Prospre, mais par ce quil entendit quil navoit que sa compaignie nen fist pas grosse estime Et disoit souvent en son langaige. Quoesto Bayardo a passato gly monte ynanee poco de lauro como uno pipione in la gabia. De toutes ces parolles estoit bien adverty le bon chevalier, et aussi estoit acertene comment les bons cappitaines marchoient pour parachever lentreprise Le seigneur de morete de la maison du solier et ung sien cousin pymontois sen mesloient dune grande ruse, & en faisoient tresbien leur debvoir, de sorte que la chose fut conclute que lon yroit trouver le seigneur Prospre dedans la ville de Carmaignolle, en laquelle de nuyt on entroit par le chasteau ouquel on avoit intelligence : mais que les cappitaines francois feusent arrivez qui ne sejournerent gueres, et se vindrent tous rendre en la plaine du Pymont en une petite ville dicte Saveillan, en laquelle ilz trouverent le bon chevalier qui les receut au mieulx quil peut. Bien leur dist : messeigneurs il ne nous fault pas reposer icy : car si le seigneur Prospre scet vostre arrivee nostre entreprise sen va rompue : car il se retirera ou bien il appellera les suysses a son secours dont il ya bon nombre a Pynerol & a Saluces. Je suis dadvis que nous facions bien repaistre noz chevaulx ceste nuyt, et puis au point du jour nous paracheverons nostre affaire. Il ya grosse eaue a passer : mais le seigneur de Morete que vecy present scet ung gue ou il nous menera sans dangier. Ainsi fut la chose conclute et sen alla chascun reposer ung petit : mais on regarda premier si riens failloit aux chevaulx. Et quant se vint deux ou trois heures pares la mynuyt tout homme monta a cheval sans grant bruyt. Le seigneur Propsre estoit dedans Carmaignolle, et avoit bien entendu par ses espies que les francois estoient a la compaigne Il ne sen effrayoit gueres, car pas ne cuydoit quil y eust autre compai
[88r]
gnie en la plaine que celle du bon chevalier : & nestoit point delibere de desloger de Carmaignolle neust este que le soit dont les francois luy cuydoient trouver le matin. Il eut des nouvelles pour se retirer a Pynerol affin dentendre aux affaires par ce quon scavoit au vray que les francois estoient aux passages. Si deslogea non pas trop matin et se mist a chemin tresbien en ordre pour sen aller disner a une petite villette a sept ou huyt mille de la appelle Villefranche. Quant les francois furent arrivez devant le chasteau de Carmaignolle parlerent au castelan qui leur dist Comment il ny avoit pas ung quart dheure que le seigneur Propsre & ses gens estoient deslogez : dont ilz furent si tresmarriz quon ne pourroit penser, & se misrent en conseil quilz devoient faire. Les ungs vouloient aller apres : autres faisoient des doubtes : mais quand chascun eut parle le bon chevalier dist. Messeigneurs puis que nous comme si avant, je suis dadvis que nous poursuyvons. Si nous les rencontrons a la campaigne il y aura beau butin sil ne nous en demoure quelcun Par dieu dist le seigneur Dymbercourt oncques homme ne dist mieulx. Les seigneurs de la Palisse & Daubigny nallerent pas a lencontre & commencerent a marcher : mais devant envoyerent en habit dissimule le seigneur de Morete pour entendre en quel estat seroient leurs ennemys. Si fist si bonne diligence quil sceut au vray que le seigneur Prospre & sa bende disnoient a Villefranche. Ilz furent bien aises & conclurent en leur affaire qui fut tel Cest quue le seigneur Dymebercourt marcheroit devant avec cent archiers, & ung gect darc apres le suyvroit le bon chevalier avec cent hommes darmes : & les seigneurs de la Palisse & Daubigny yroient apres avec tout le reste de leurs gens. Or entendez quil advint. Le seigneur Prospre avoit bonnes espies et fut adverty en allant a la messe dedans ceste petite ville de Villefranche que les francois estoient aux champs en gros nombre. Il fist response en son langage quil scavoit bien quil ny avoit que le cappitaine Bayart & sa bende si les autres ne sont vollez par dessus les montaignes. Ainsi quil retournoit de la messe vindrent encores dautres espies quil luy dirent. Seigneur je vous adverty que jay laisse pres dicy plus de mille chevaulx des francois & vous viennent trouver icy. Il fut ung peu esbahy. Si regarda ung gentil homme des siens auquel il dist. Prenez vingt chevaulx et allez le chemin de Carmaignolle jusques a deux ou trois mille dicy : et regardez si verrez riens qui puisse nuyre. Ce pendant il commanda au mareschal des logis de ses bendes quil fist sonner la trompette et quil allast faire le logis a Pynerol ou il le suyvroit, mais quil eust mange ung morceau. Il fist son commandement sur lheure. Les francois marchoient tousjours selon lordonnance cy devantdicte et approcherent Villefranche denviron mill & demy, ou en sortant dung petit tailliz vont rencontrer ceulx que le seigneur Prospre envoyoit pour les descouvrir. Lesquelz quant il les adviserent commenserent a tourner le doz et a bride abatue retourner devers Villefranche. Le gentil seigneur Dymbercourt leur donna la chasse a tire de cheval, et manda au bon chevalier par ung archer quil
[88v]
se hastast. Il ne luy convint pas dire eux fois, avant que les gens du seigneur propsre eussent gaigne Villefranche, ou a tout le moins ainsi quilz vouloient rentrer en la porte les atignit le seigneur Dymbercourt qui commenca a crier france, france. On voulut serrer la porte, mais il les en garda tant quil peut, et y fist darmes le possible sans estre blesse fors ung peu au visaige. Ce pendant va arriver le bon chevalier qui fist ung bruyt merveilleux, en sorte quilz gaignerent la porte. Ce mareschal des logis qui ja estoit monte a cheval avecques aucuns gensdarmes et sen cuydoit aller a Pynerol ouyt le bruyt. Si se va gecter en la place et se voulut mettre en deffence, mais tout cela fut pousse par terre et en fut tue une partie. Les seigneurs de la Palisse et Daubigny arriverent qui misrent garde a la premiere porte et en allerent garder une autre affin que personne neschappast, car il nu en avoit que ses deux en la ville Mais il ne fut possible de si bien les garder que par dessus la petite planchete qui est joignant du pont leviz ne se sauvassent deux albanoys, qui comme se tous les dyables les eussent emportez coururent dire a une troppe de quatre mille suysses qui nestoient que a trois mille de la le meschief qui estoit advenu au seigneur Prospre lequel ce pendant fut assailly en son logis ou il disnoit, et se voulut deffendre comme homme de guerre quil estoit, mais quant il congneut que peu luy vauldroit son effort et quil entendit les noms des cappitaines qui estoient la assemblez se rendit au plus grant regret du monde mauldissant sa fortune davoir ainsi este surpris et que dieu ne luy avoit fait ceste grace davoir trouve les francois aux champs. Le bon chevalier oyans ces parolles le reconfortoit le mieulx quil povoit en luy disant. Seigneur prospre cest lheur de la guerre une fois perdre et lautre gaigner, mais tousjours y avoit il mesle quelque mot joyeulx,et disoit encores. Seigneur Prospre vous souhaitez nous avoir trouvez a la campaigne, je vous prometz ma foy que ne le deveriez pas vouloir pour la moytie de vostre bien, car a la fureur et ou talent de bien combatre questoient noz gens eust este bien difficile que vous ne nulz des vostres feussiez eschappez vifz. Le seigneur Prospre repsondoit froidement. Jeusse bien voulu sil eust pleu a nostre seigneur prendre sur ce hazart ladventure. Quant et le seigneur Prospre furent pris le conte Policastre, Petre morgant et Carles cadamosto lesquelz estoient cappitaines des gens de guerre estans la qui furent aussi prisonniers, et puis chascun se mist au pillage qui fut fort grant pour si petite compaignie, car sil eust este bien mene on en eust tire cent cinquante mille ducatz.Et entre autres choses cestoit ung tresor des chevaulx qui y furent gaignez ou il y en avoit six ou sept cens dont les quatre cens estoient de pris tous coursiers ou chevaulx despaigne. Et a lon depuis ouy dire au seigneur Prospre que ceste prise luy cousta cinquante mille escus, tant en vaisselle dor et dargent (argent monnoye que autres meubles). Les francois neurent pas moysir de tout emporter,
[89r]
car nouvelles vindrent que les suysses devers lesquelz ses deux albanoys estoient allez marchoient le grant trot et estoient desja bien pres. Si furent entre eulx mesmes conseillez deulx mettre au retour, et sonna la trompette a ceste fin Chascun prist le meilleur de son butin, misrent leurs prisonniers devant eulx, puis sen retournerent. Et comme ilz sortoient par une porte les suysses entroient par lautre, mais les ungs estoient a pied et les autres a cheval qui ne sen soucyoient gueres. Ce fut une des belles entreprinses qui deux cens ans devant eust este faicte. Et le seigneur Prospre qui se ventoit quil prendroit le bon chevalier comme le pyjon dedans la caige eut le contraire sur luy mesmes et tout par la vigilance dicelluy bon chevalier. Le roy de france estoit desja par les montaignes ou jamais navoit passe armee, et eut les nouvelles de ceste belle deffaicte a la montaigne de sainct Pol dont i lfut joyeulx a merveilles si fut toute sa compaignie. Or nest il riens si certain que la prinse de Prospre coulonne fist moult de service aux francois, car sans cela se feust trouve a la bataille qui fut quelque temps apres, et par son moyeu si feussent trouvez tous les espaignolz et le reste de larmee du pape, qui eulx assemblez eusent fait nombre de mille hommes darmes qui estoient pour faire de lennuy & de la fascherie dont on se passa bien.
¶De la bataille que le roy de france Francois premier de ce nom eut contre les suysses a la conqueste de sa duche de Milan ou il demoura victorieux, et comment apres la bataille gaignee voulut estre fait chevalier de la main du bon chevalier sans paour et sans reprouche.
¶Chapitre .lxe.
LE roy de france qui fut bien joyeulx de la prinse du seigneur Prospre aussi avoit il raison marcha avecques so narmee le plus legierement quil peut, et vint par dedans le pymont a Thurin ou le duc de Savoye so noncle le receut honnestement. Les suysses qui sestoient mis sur les passages quant ilz sceurent la prinse du seigneur Prospre & la rotte de sa bende les habandonnerent et se retirerent vers Milan ou ilz furent tousjours poursuyviz. Quelque propos dappoinctement se mist sus, et le tenoit lon quasi conclud, parquoy le duc de Gueldres alye et tousjours loyal serviteur de la maison de france lequel avoit amene une troppe de dix mille lansquenetz au service du roy sen retourna en ses pays, mais il laissa ses gens a son nepveu le seigneur de Guyse frere de ce gentil prince le duc de Lorraine et a ung sien lieutenant quon appelloit le cappitaine Miquel. Ce propos continua tousjours que lappoinctement se feroit, tant que larmee du roy approcha a douze ou quinze mille de Milan ou sestoient retirez les suysses avecques se bon prophete le car
[89v]
dinal de Syon qui toute sa vie a este ennemy mortel des francois comme encores bien le monstra a ceste fois. Car neantmoins que le seingeur de Lautrec feust alle porter les deniers a Galezas pour satisfaire au pourparle appoinctement ung jeudy au soit prescha si bien ses suysses & leur remonstra tant de choses, que comme gens desesperez sortirent de Milan et vindrent ruer sur le camp du roy de france. Le connestable duc de Bourbon qui menoit lavantgarde se mist en ordre incontinent, et advertit le roy qui se vouloit mettre au soupper, mais il le laissa la et sen vint groit vers ses ennemys qui estoient desja meslez a lescarmouche qui dura longuement devant quilz fuessent au grant jeu. Le roy de france avoit gros nombre de lansquenetz, et voulurent faire une hardiesse de passer ung fosse pour aller trouver les suysses qui el laisserent passer sept ou huyt rencs, puis les vous pousserent, de sorte que tout ce qui estoit passe fut gecte dedans le fosse & furent fort effrayez lesditz lansuqenetz. Et neust este le seigneur de Guyse qui resista a merveilles, et en fin fut laisse pour mort. Le duc de Bourbon connestable, le gentil conte de sainct Pol, le bon chevalier et pusieurs autres qui donnerent au travers des ceste bende de suysses ilz eussent fait grosse fascherie, car il estoit ja nuyt & la nuyt na point de honte. Par la gendarmerie de lavantgarde dut le soir rompue ceste bende de suysses ou une partie denviron deux mille vint passer viz a viz du roy qui gaillardement les chargea, et y eut loirt combat, de sorte quil fut en gros dangier de sa personne, car sa grant buffe y fut percee a jour dung coup de picque. Il estoit desja si tard que lon ne voyoit pas lung lautre, et furent contrainctz pour ce soir les suysses se retirer dung coste et les francois dung autre et se logerent comme ilz peurent, mais je croy bien que chascun ne reposa pas a son ayse, et y prist aussi bien en gre la fortune le roy de france que le moindre de ses souldars, car il demoura toute la nuyt a cheval comme les autres Il fault scavoir une chose du bon chevalier sans paour et sans reprouche qui fut bien estrange & tresdangereuse pour luy. A la derniere charge quon fist sur les suysses le soir il estoit monte sur ung gaillart coursier qui estoit le second, car a la premiere charge luy en fut tue ung entre ses jambes. Ainsi quil voulut donner dedans fut tout enferre de picques, de facon que sondit cheval fut desbride Quant il se sentit sans frain se mist a la course, et en despit de tous els suysses ne de leur ordre passa tout oultre, et emportoit le bon chevalier droit en une autre troppe de suysses neust este quil rencontra en ung champ des seps de vigne qui tiennent darbre en arbre ou il par force sarresta. Le bon chevalier fut bien effraye et non sans cause, car il estoit mort sans nul remede sil feust tumbe entre les mains des ennemys. Il ne perdit toutesvoyes point le sens, mais tout doulcement se descendit, et gecta son armet et ses cuyssotz, et puis le long des fossez a quatre beaulx piedz se retira a son oppinion vers le camp des francois
[90r]
et ou il oyoit crier france. Dieu luy fist la grace quil y parvint sans dangier, et encores qui mieulx fut pour luy, cest que le premier homme quil trouva fut le gentil duc de Lorraine lung de ses maistres qui fut bien esbahy de le veoir ainsi a pied. Si luy dist ledit duc incontinent bailler ung gaillart cheval quon nommoit le Carnian dont luy mesmes autresfois luy avoit fait present, et fut gaigne a la prinse de Bresse, et a la journee de Ravenne fut laisse pour mort, et en descendit le bon chevalier par ce que il avoit deux coups de picque aux flancs, et en la teste plus de vingtz coups despee Mais le lendemain quelcun le trouva quil paissoit, et commenca a hannir parquoy fut remane au logis du bon chevalier qui le fist guarir, mais cestoit une chose non croyable que de son faict, car comme une personne se laissoit coucher et mettres tentes en ses playes sans remuer aucunement. Et depuis quant il voyoit une espee couroit lempoigner a belles dens, ne jamais ne fut veu ung plus hardy cheval, et y feust Bucifal celluy de Alexandre. Quoy que ce soit le bon chevalier fut bien joyeulx de se veoir eschappe de si gros dangier et remonte sur ung si bon cheval, mais il luy faschoit quil navoit point darmet, car en telz affaires fait moult fort dangereux avoir la teste nue. Il advisa ung gentil homme fort son amy qui faisoit porter le sien a son paige, auquel il dist Jay paour de me morfondre pource qu jay sue davoir si longuement este a pied, je vous prie faictes moy bailler vostre armet que vostre homme porte pour une heure ou deux. Le gentil homme qui ne pensoit pas a ce que le bon chevalier entendoit le luy fist bailler dont il fut bien ayse, car depuis ne le laissa que la bataille ne feust finye qui fut le vendredy environ dix ou unze heures, car des le point du jour les suysses voulurent recommencer, et vindrent droit a lartillerie des francois dont ilz furent bien serviz. Toutesfois jamais gens ne combatirent mieulx, et dura laffaire trois ou quatre bonnes heures. En fin furent rompus et deffaictz, et en mourut sur la camp dix ou douze mille. Le demourant en assez bon ordre le long dung grant chemin se retirerent a Milan ou ilz furent conduytz a coups despee, tant par les francois que par le cappitaine general de la seigneurie de Venise messire Barthelome daluyano qui peu devant estoit arrive avecques le secours des veniciens, et y perdit en une charge quil fist deux ou trois cappitaines, entre lesquelz fut le filz du conte Petilano. Les francois y firent grosse perte, car du jeudy ou du vendredy moururent Francois monsieur de bourbon, le gentil cappitaine ymbercourt, le conte de Sanxerre et le seigneur de Mouy, et y furent blessez le prince de Talmont et le seigneur de Bucy dont depuis moururent. Le roy se mist en conseil pour veoir si lon poursuyvroit les Suysses ou non. Plusieurs furent de diverses oppinions. En fin il fut advise pour le mieulx que on les laisseroit aller,
[90v]
car on ne pourroit bien avoit a faire le temps advenir. Le jour quilz deslogerent du camp demourerent a Milan, & le lendemain en partirent tirans en leurs pays Ilz furent poursuyviz de quelques gens, mais non pas a lextremite : car si le roy eust voulu ne sen feust pas sauve ung. Le soir du vendredy dont fina la bataille a lhonneur du roy de france fut joye demenee parmy le camp, & en parla lon en plusieurs manieres et se trouva de mieulx faisans les ungs que les autres : mais sur tous fut trouve que le bon chevalier : par toutes les deux journees sestoit monstre tel qui lavoit acoustume es autres lieux ou il avoit este en pareil cas. Le roy le voulut grandement honnorer, car il print lordre de chevalierie de sa main. Il avoit bien raison, car de meilleur ne leust sceu prendre. Le seigneur Maximilian sforce qui occupoit la duche comme son pere le seigneur Ludovic avoit fait autresfois demoura ou chasteau de Milan ou on mist le siege : mais gueres ne demoura quil ne se rendist, & luy fut faicte composition dont il se contenta : & sen allerent ceulx qui estoient dedans leurs bagues saufves. Je laisseray a parler de tout ce qui advint en deux moys : mais ou moys de decembre alla le roy de france visiter le pape en la cite de Boulongne quil luy fist gros recueil. Ilz eurent devis ensemble de plusieurs choses dont je nempescheray aucunement ceste histoire.
¶De plsueirus incidences qui advindrent en france, ytalie et espaigne durant trois ou quatre ans.
¶Chapitre .lxie.
AU retour de Boulongne le roy de france vint a Milan ou apres avoir laisse le duc de Bourbon connestable de france son lieutenant general sen retourna en ses pays et alla droit en Prouvence ou il trouva sa bonne et loyalle espouse et madame sa mere quil avoit a son partement laissee regente en son royaulme. Vers ceste saison trespassa Ferrande roy darragon qui en son vivant a eu de belles et grosses victoires. Il estoit vigilant, cault et subtil : & ne trouve lon gueres dhistoires qui facent mention quon laye trompe en sa vie, ains durant icelle augmenta merveilleusement les biens son successeur le seigneur Julian de medicis quon appella duc de Modene frere du pape Leon alla aussi de vie a trespas. Il eut espouse la duchesse de Nemours fille de Savoye & tante du roy de France. Lempereur Maximilian desplaisant de la belle victoire quavoit eue le roy de france seu les suysses, et de ce quil avoit conqueste sa duche de Milan assembla gros nombre de lansquenetz et quelques suysses des canton de zuric et de la ligue grise, et sen vint en personne oudit duche de Milan, ou pour la grosse puissance quil avoit le connestable ne fut pas conseille de lattendre a la campaigne, et se retira avecques son armee dedans la ville de Milan, ou peu de ours apres luy vindrent huyt ou dix mille suysses de se
