[71r]
avecques luy feussent mors a sa requeste. Entre tous les cappitaines francois ny en avoit nul que le cappitaine Jacob aymast tant quil faisoit le bon chevalier Et commencea ceste amour des le premier voyage de lempereur devant Padoue en lan mil cinq cens & neuf ou le roy de France luy envoya cinq ou six cens hommes darmes de secours. Quant il eu veu la lettre, & quil eut sceu la venue du bon chevalier, le vint vinsiter a son logis avecques son truchement seulement : car de tout ce quil scavoit de francois cestoit bon jour monseigneur. ilz se firent grant chere lung a lautre comme la raison vouloit et que chascun cherche son semblable, & deviserent de plusieurs choses sans ce que personne les ouyst. En fin le cappitaine Jacob declaira au bon chevalier ce que lempereur leur avoit mande, & quil avoit encores les lettres que personne navoit veues que luy & ne les vouloit monstrer a nul de ses compaignons : car il scavoit bien que si leurs lansquenetz en estoient advertis, la pluspart ne vouldroit point combatre & se retireroient : mais que de luy il avoit le serment au roy de france et sa soulde, & que pour mourir de cent mille mors ne feroit jamais ceste meschansete quoi ne combatist, mais quil se falloit haster : car il estoit impossible que lempereur ne renvoyast bien tost autres lettres, lesquelles pourroient venir a la notice des compaignons de guerre, et que par ce moyen les francois pourroient avoir trop de dommage, car lesditz lansquenetz estoit la tierce part de leur force pour y en avoir environ cinq mille. Le bon chevalier qui bien congnoissoit le gentil cueur du cappitaine Jacob le loua merveilleusement Et luy dist par la bouche de son truchement. Mon compaignon mon amy jamais vostre cueur ne pensa une meschansete, vous mavez autresfois dit quen Almaigne navez pas de grans biens, nostre maistre est riche et puissant comme assez entendez, et en ung jour vous en peult faire dont serez riche et opulent toute vostre vie : car il vous ayme fort et je le scay bien, lamour croistra davantage quant il sera informe de lhonneste tour que vous luy faictes a present, & il le scaura aydant dieu quant moy mesmes le luy debveroys dire. Vela monseigneur de Nemours nostre chef qui a mande a son logis tous les cappitaines au conseil, allons y vous et moy et a part luy declairons ce que mavez dit. Cest bien advise dist le cappitaine Jacob, allons y. Quant ilz furent au logis dudit duc de Nemours se misrent en conseil qui dura longuement & y eut de diverses oppinions : car les ungs ne conseilloient point le combatre, & avoient de bonnes raisons disans que silz perdoient ceste bataille toute Lytalie estoit perdue pour le roy leur maistre, & que dentre eulx nul nen eschapperoit par ce quilz avoient trois ou quatre rivieres a passer que tout le monde estoit contre eulx, pape, roy despaigne, veniciens et suysses, et que de lempereur nestoient pas trop asseurez : parquoy vauldroit mieulx temporiser que se hazarder en ceste maniere. Autres disoient quil convenoit combatre ou mourir de fain comme meschans et lasches, & que desja estoient trop avant
[71v]
pour se retirer sinon honteusement et en desordre. Bref chascun en dist son oppinion. Le bon duc de Nemours qui avoit desja parle au bon chevalier et au cappitaine Jacob avoit bien au long entendu ce que lempereur avoit mande & scavoit bien quil estoit force de ocmbatre, aussi quil ne venoit poste que le roy de France son oncle ne luy mandast de donner la bataille et quil nattendoit lheure destre assailly en son royaulme par deux ou trois endroitz. Il demanda toutesfois encores loppinion du bon chevalier Lequel dist, monseigneur vous scavez que je vins encores hier je ne scay riens de lestat des ennemys. messeigneurs mes compaignons les ont veuz et escarmouchez tous les jours qui si congnoissent mieulx que moy, je les ay ouyz, les ungs louer la btaille, les autres la blasmer : et puis quil vous plaist men demander mon oppinion sauf vostre reverence et de messeigneurs qui cy sont je la vous diray, quil ne soit vray que toutes batailles sont perilleuses si est & qui ne faille bien regarder les choses avant que venir a ce point si fait, mais a congnoistre presentement laffaire des ennemys & de nous il semble quasi difficielle que nous puissions departir sans bataille, la raison que desja avez fait voz approuches devant ceste ville de ravenne laquelle demain matin voulez canonner et la berche faicte y faire donner lassault. Ja estes vous adverty que le seigneur marc anthoine colonne qui est dedans puis huyt ou dux jours y est entre soubz la promesse & foy juree de domp Raymon de cardonne visroy de naples et chief de larmee de noz ennemus de son oncle le seigneur frabricio colonne ensemble du conte pedro navarre & de tous les cappitaines que sil peult tenir jusques a demain ou pour le plustard au jour de pasques quilz le viendront secourir, or lesditz ennemus le luy monstrent bien : car ilz sont aux faulxbours de nostre amee, dautre coste tant plus sejournerez et plus maleureux deviendrons, car nos gens nont nulz vivres et fault que noz chevaulx vivent de ce que les saulles gectent a present & puis vous voyez le roy nostre maistre qui chascun jour vous escript de donner la bataille et que non seulement en vos mains repose la seurete de son duche de milan, mais aussi tout son estat de france veu les ennemys quil a au jourdhuy, parquoy quant a moy je suis dadvis quon la doibt donner & y aller saigement : car nous avons faire a gens cauteleux et bons combatans, quelle ne soit dangereuse si est : mais une chose me reconforte : les esespaignolz ont este depuis ung an en ceste rommaigne tousjours nourriz comme le poisson en leaue & sont gras & repletz noz gens ont eu et ont encores grant faulte de vivres : parquoy ilz en auront pluslongue alayne et nous navons mestier dautre chose : car qui plus longuement combatra le camp luy demourera, chascun commenca a rire du propos, car si bien luy advenoit a dire ce quil vouloit que tout homme y prenoit plaisir. Les seigneurs de lautrec de la palisse le grant seneschal de normandie, le seigneur de crussol et out ou la pluspart des cappitaines se tindrent a loppinion du bon chevalier qui estoit de donner la bataille & des lheure en furent advertiz tous les cappitaines de gens de cheval et
[72r]
de pied. Le lendemain matin qui fut le vendredy sainct fut canonnee la ville de Ravenne bien asprement, de sorte que les ennemus de leur camp entendoient bien a cler les coups de canon. Si delibererent selon la promesse quilz avoient faicte de secourir le seigneur Marc anthoine coulonne dedans le jour de pasques. Durant la baterie furent blessez deux gaillars cappitaines francois, lung le seigneur Despy maistre de lartillerie & lautre le seigneur de Chastillon prevost de Paris de coupz de gacquebute, lung au bras lautre a la cuysse dont depuis ilz moururent a Ferrare qui fut fort gros dommage. La berche faicte a la ville ceulx qui avoient este ordonnez pour lassault qui esoient deux cens bommes darmes et trois mille hommes de pied sapprocherent. Le reste de larmee se mist en velle & triumphante ordonnance de bataille, laquelle desireement ilz attendoient & mille ans avoit que gens ne furent plus deliberez quilz estoient Et a leurs gestes sembloit quilz allassent aux nopces. Si tindrent escorte trois ou quatre grosses heures a leurs gens ordonnez pour assaillir : lesquelz firent a la ville de lours & divers assaulx, et y fist tresbien son debvoir le viconte destoges lors lieutenant de messire Robert de la marche & le seigneur Federic de bazolo car plusieurs fois furent ectez du hault du fosse au bas. Si les assaillans faisoient bien leur debvoir, ceulx de la ville ne se faignoient pas Et la estoit en personne le seigneur Marc anthoine coulonne qui disoit a ses gens.Messeigneurs tenonns bons nous serons secouruz dedans demain au dimenche je vous en asseure sur mon honneur. La berche est fort petite, si nous sommes pris il nours tournera a grande laschete, & davantage il est fait de nous. Tant bien les confortoit ce seigneur Marc anthoine que le cueur leur croissoit de plus en plus. Et a dire aussi la verite la berche nestoit pas fort raisonnable. Quant les francois eurent donne cinq ou six assaulx quilz veirent quent ceste sorte nemporteroient pas la ville firent sonner la retraicte, et dieu leur en ayda bien : car silz leussent prise jamais nen eussent retire les aventuriers pour le pillage qui eust este peult estre occasion de perdre la bataille. Quant le duc de Nemous sceut que ses gens se retiroient de lassault il fist pareillement retirer larmee pour le soir affin deulx reposer, car dheure e n autre estoit attendu le combat pour estre leurs ennemys a deux mille ou environ deulx. Le soir apres soupper plusieurs cappitaines estoient au logis dudict duc de Nemours devisans de plusieurs choses, mesmement de l abataille. Si adressa sa parolle au bon chevalier sans paour & sans reproche icelluy seigneur de nemours & luy dist. onseigneur de Bayart avant vostre venue les espaignolz par de noz gens quilz ont prins prisonniers demandoient tousjours si estiez point en ce camp, & a ce que jen ay entendu font grosse estime de vostre personne. Je serois dadvis sil vous semble bon : car ja de long temps congnoissez leur maniere de faire que demain au matin ilz eussent de par vous quelque escarmouche, de sorte que les puissez faire mettre en bataille & que voyez leur contenance. Le bon chevalier qui
[72v]
pas mieulx ne demandoit respondit. Monseigneur je vous prometz ma foy que dieu aydant devant quil soit demain midy je les verray de si pres que je vous en rapporteray des nouvelles. La estoit presnt le baron de Bearn lieutenant du duc de Nemours lequel estoit advantureux chevalier et tousjours prest a lescarmouche. Si pensa en soy mesmes que le bon chevalier seroit bien matin leve sil la dressoit plustost que luy, et assambla aucuns de ses plus privez ausquelz il declaire son vouloir a ce que ilz se tiensissent prestz au jour poignant. Vous orrez ce quil en advint.
¶Dune merveilleuse escarmouche qui fut entre les francois et les espaignolz le jour devant la bataille de Ravenne ou le bon chevalier fist merveilles darmes.
¶Chapitre .liiie.
SUyvant la promesse que le bon chevalier avoit faicte au duc de Nemours, luy arrive a son logis appella son lieutenant le cappitaine Pierrepont, son enseigne, son guydon & plusieurs autres de la compaignie, ausquelz il dist. Messeigneurs jay promis a monseigneur daller demain veoir les ennemys et luy en apporter des nouvelles bien en vray, il fault adviser comment nous ferons a ce que nous y avons honneur. Je suis delibere de mener toute la compaignie et demain desployer les enseignes de monseigneur de Lorraine qui nont encores point este veues. Jespere quelles nous porteront bon heur, ilz resjouyront beaucoup plus que les cornetes. Vous bastard du Fay dist il a son guydon prendrez cinquante archiers & passerez le canal au dessoubz de lartillerie des espaignolz et yrez faire lalarme dedans leur camp le plus avant que vous pourrez, et quant vous verrez quil sera temps de vous retirer sans riens hazarder le ferez jusques a ce que trouvez le cappitaine Pierrepont qui sera a vostre queue avecques trente hommes darmes et le reste des archiers, et si tous deux estiez pressez je seray apres vous a tout le reste de la compaignie pour vous secourir. Et si laffaire est conduit comme je lentends je vous asseure sur ma foy qye nous y aurons honneur. Chascun entendit bien ce quil avoit a faire, car non pas seullement les cappitaines de la compaignie, mais il ny avoit homme darmes en icelle qui ne meritast bien avoir charge soubz luy. Tout homme sen alla reposer jusques a ce quilz ouyssent la trompette qui les esveilla u point du jour que chascun sarma et mist en ordre comme pour faire telle entreprise quilz avoient en pensee. Si furent desployees et mises au vent les enseignes du gentil duc de Lorraine quil faisoit fort beau veoir, et cela resjouyssoit les cueurs des gentilz hommes de la compaignie qui commencerent a marcher ainsi que ordon
[73r]
ne avoit este le soir precedent en trois bendes a trois gectz darc lune de lautre. Riens ne scavoit le bon chevalier de lentreprise du baron de Bearn qui desja sestoit mis aux champs et avoit dresse ung chault alarme au campd des ennemys tant quil lavoit quasi tout mis en armes, et y fist ledit baron tresbien son devoir, mais en fin donna de la part des ennemys deux ou trois coups de canon dedans sa troppe, dont de lung fut emporte le bras droit dung fort gaillart gentil homme appelle Bazillac, et dung autre fut tue le cheval du seigneur de Berssac galant homme darmes et tous deux de la compaignie du duc de Nemours lequel fut bien desplaisant de linconvenient de Bazillac, car il laymoit a merveilles. Apres ces coups dartillerie tout dune flote vont donner cent ou six vingtz hommes darmes espaignolz et neapolitains sur le baron qui contrainct fut de reculler le pas du pas au trot, et du trot au galop tant que les premiers se vindrent embatre sur le bastard du Fay qui sarresta, et en advertit le bon chevalier lequel luy manda incontinent quil se gectast en la tropppe du cappitaine Pierrepont, et luy mesmes savanca tant quil mist toute sa compaignie ensemble. Si veit retourner le baron de Bearn et ses gens quasi desconfitz, et les suyvoient espaignolz et neapolitains hardiement & fierement, lesquelz repasserent le canal apres luy. Quant le bon chevalier les veit de son coste nen eust pas voulu tenir cent mille escus. Si commenca a cryer. Avant compaignonns secourons noz gens, et dist aceulx qui fuyoient. Demourez, demourez hommes darmes vous avez bon secours. Si se mect le beau premier en une troppe des ennemys de cent a six vingtz hommes darmes. Il estoit trop ayme, et fut bien suivy. De la premiere pinte en fut porte par terre cinq ou six. Toutesfois les autres se misrent en deffense fort honnestement, mais en fin tournenrent le dos, et se misrent au grant galop droit au canal lequel ilz rapasserent a grosse diligence. Lalarme estoit desja en leur camp, de sorte que tout estoit en bataille gens de pied et de cheval. Ce nonbstant le bon chevalier les mena batant & chassant jusques bien avant en leurdit camp ou il fist et ceulx de sa compaignie merveilles darmes, car ilz abatirent tentes et pavillons et pousserent par terre ce quilz trouverent. Le bon chevalier qui avoit tousjours loeil au bous va adviser une troppe de deux ou trois cens hommes darmes qui venoient le grant trot serrez en gens de guerre Si dist au cappitaine Pierrepont. Retirons nous, car vecy trop gros effort. La trompette sonna la retraicte qui fut faicte sans perdre ung homme et repasserent le canal marchans deoit en leur camp. Quant les espaignolz veirent quilz estoient repassez et quilz perdoient leur peine daller apres se retirerent. Bien en passa cinq ou six qui demanderent a rompre leur lance, mais le bon chevalier ne voulut jamais que hommetournast, combien que de plusieurs de ses gens en feust assez requis, mais il doubtoit que par la se levast nouvelle escarmouche, et ses gens estoient assez travaillez pour le jour. Le bon duc de Nemours avoit desja
[73v]
sceu comment tout laffaire estoit alle avant que le bon chevalier arrivast, auquel quant il lapperceut combien que tresdolent feust de linconvenient de Bazillac le vint embrasser et luy dist, cest vous et voz semblables monseigneur de Bayart mon amy qui doivent aller aux escarmouches, car bien sagement scavez aller et retourner. Tous ceulx qui furent en ceste dure escarmouche disoient quoncques navoient veu homme faire tant darmes ne qui mieulx entendist la guerre que le bon chevalier. Le lendemain y en eut une bien plus aspre et cruelle et dont francois et espaignolz mauldiront la journne toute leur vie.
¶De la cruelle & furieuse bataille de Ravenne ou les espaignolz & neapolitains furent desconfitz, et de la mort du gentil duc de Nemours.
¶Chapitre .liiiie.
AU retour de ceste chaulde ecarmouche quavoit faicte le bon chevalier sans paour et sans reprouche, et apres le disner furent assemblez tous les cappitaines tant de cheval que de pied au logis du vertueux duc de Nemours le passepreux de tous ceulx qui furent deux mille ans a, car on ne lyra point en cronicque ne hystoire dempereur, roy, prince ne autre seigneur qui en si peu de temps ait fait de si belles choses que luy, mais cruelle mort le print en laage de vingt et quatre ans qui fut abaisseme,t et dommage irreparable a toute noblesse. Or les cappitaines assemblez commenca sa parolle le gentil duc de Nemours, et leur dist. Messeigneurs vous voyez le pays ou nous sommes et comment vivvres nous deffaillent, et tant plus demourerions en ceste sorte et tant plus languirions. Ceste grosse ville de Ravenne nous fait barbe dung coste, les ennemys sont a la portee dung canon de nous, les veniciens et suysses ainsi que mescript le seigneur Jehan jacques font myne de descendre ou duche de Milan ou vous scavez que nous navons laisse gens sinon bien peu. Davantage le roy mon oncle me presse tous les jours de donner la bataille, et croy quil men presseroit encores plus sil scavoit comment nous sommes astrainctz de vivres, parquoy ayant regard a toutes ces choses me semble plus le prouffit de nostre maistre et pour le nostre que plus ne devons delayer, mais avecques layde de dieu qui y peult le tout aillons trouver noz ennemys, si la fortune nous est bonne len louerons et remercierons, si elle nous est contraire sa voulente soit faicte. De ma part et a mon souhait povez asse penser que jen desire le gaing pour nous, mais jaymerois mieulx y mourir quelle feust perdue. Et si tant dieu me veult oublier que je la perde les ennemys seront bien laschez de me laisser vif car je ne leur en donneray pas les occasions, je vous ay icy tous assemblez affin den prendre une accoasion. Le seigneur de la Palisse dist quil nestoit riens plus certains quil failloit donner la bataille et plustost se gecteroit hors de peril. De
[74r]
ceste mesme oppinion furent les seigneur de Lautre grant seneschal de normandie grant escuyer de france, le seigneur de Crussol cappitaine, Loys dars & plusieurs autres lesquelz preindrent conclusion que le lendemain qui estoit le jour de pasques yroient trouver leurs ennemys. Si fut dresse ung pont de bateaulx sur ung petit canal qui estoit entre les deux armees pour passer lartillerie et les gens de pied, car des gens de cheval ilz traversoient le canal bien a leur aise par ce que aux deux bortz on avoit fait des esplanades. Le bon chevalier sans paour et sans reprouche dist present toute la compaignie quil seroit bon de faire lordonnance de la bataille sur lheure affin que chascun sceust ou il deveroit estre, et quil avoit entendu par tout plain de prisonniers qui avoient este au camp des espaignolz quilz ne faisoient que une troppe de tous leurs gens de pied, et deux de leurs gens de cheval, et que sur cela se failloit renger. Les plus apparans de la compaignie dirent que cestoit fort bien parle et quil y failloit adviser sur lheure, ce qui fut fait en ceste sorte. Cest que les lansquenetz & les gens de pied des cappitaines Molart, Bonnet, Maugiron baron de grantmont, Bardassan et autres cappitaines jusques au nombre de dix mille hommes marcheroient tous en une flote, et les deux mille gascons du cappitaine Odet et du Capdet de Duras a leur coste, lesquelz tous ensemble yroient eulx parquer a la portee dung canon des ennemus, et devant eulx seroit mise lartillerie, et puis a coup de canon les ungs conntre les autres a qui premier sortiroit de son fort, car les espaignolz se logeoient tousjours en lieu avantageux comme assez entendrez. Joignant les gens de pied seroient le duc de Ferrare et seigneur de la Palisse chez de lavantgarde avecques leurs compaignons, et quant et eulx les gentilz hommes soubz le grant seneschal de normandie, le grant escuyer, le seigneur Dymbercourt, la crote, le seigneur Theode de trevolz et autres cappitaines jusques au nombre de huyt cens hommes darmes. Et ung peu au dessus et viz a viz deulx seroit le duc de Nemours avecques sa compaignie, le seigneur de Lautrec son cousin qui fist merveilles darmes ce jour, le seigneur Dalegre, le cappitaine Loys dars, le bon chevalier et autres jusques au nombre de quatre a cinq cens hommes darmes. Et les gens de pied ytaliens dont il y avoit quatre mille ou environ soubz la charge de deux freres gentilz hommes de Plaisance, les contes Nicolle & Francisque scot du marquis Malespine & autres cappitaines ytaliens demoureroient deca le canal pour donner seurete au bagaige de paour que ceulx de Ravenne ne sortissent, et fut ordonne chief de tous les guydons le bastard du Fay qui passeroit le pont & sen donneroit garde jusques a ce quil feust mande. Les choses ainsi ordonnees et le lendemain matin venu commencerent premier a passer les lansquenetz. Quoy voyant par le gentil seigneur de Molart dist a ses rustres. Comment compaignons nous sera il reprouche que les lansquenetz soient passez du coste des ennemys plustost que nous jaymerois mieulx quant a moy avoir
[74v]
perdu ung œil. SI commencea par ce que les Lansquenetz occupoient le pont a se mettre tout chausse et vestu au beau gue dedans leaue & ses gens apres. Et fault scavoir que leaue nestoit point si peu profonde quilz ny feussent jusques au dessus du cul, et firent si bonne diligence quilz furent plus tost passez que lesditz Lansquenetz. Ce fait fut toute lartillerie passee & mise devant lesditz gens de pied qui tantost se misrent en bataille. Apres passa lavantgarde des gens de cheval et puis la bataille. Sur ces entrefaictes fault que je vous face ung incident. Le gentil duc de Nemour partit assez matin de son logis arme de toutes pieces excepte de larmet. Il avoit ung fort gorgias acoustrement de broderie aux armes de Navarre & de Foix, mais il estoit fort pesant. En sortant de sondit logis ragarda le soleil ja leve qui estoit fort rouge. Si commencea a dire a la compaignie qui estoit autour de luy. Regardez messeigneurs comme le soleil est rouge. La estoit ung gentil homme quil aymoit a merveilles fort gentil compaignon qui sappelloit Haubourdin qui luy respondit. Scavez vous bie nque cest a dire monseigneur Il mourra au jourdhuy quelque prince ou grant cappitaine Il faut que ce soit vous le visroy. Le duc de Nemous se print a rire de ce propos : car il prenoit en jeu toutes les parolles dudit Haubourdin : si sen alla jusques au pont veoir achever de passer son armee laquelle faisoit merveilleuse diligence. Ce pendant le bon chevalier le vint trouver qui luy dist. Monsiegneur allons nous esbatre ung peu le long de ce canal en attendant que tout soit passe. A quoy saccorda le duc de Nemours, & mena en sa compaignie le seigneur de Lautrec, le seigneur Salegre & quelques autres jusques au nombre de vingt chevaulx. Lalarme estoit gros au camp des Espaignolz comme gens qui sattendoient davoir la bataille en ce jour, & se mettoient en ordre comme pour recevoir leurs mortelz ennemys. Le duc de Nemours allant ainsi a lesbat commencea a dire au bon chevalier. Monseigneur de Bayart noussommes icy en bute fort belle sil y avoit des hacquebutiers du coste de dela cachez ilz nous escarmoucheroient a leur aise. Et sur ces parolles vont adviser une troppe de vingt ou trente gentilz hommes Espaignolz, entre lesquelz estoit le cappitaine Pedro de pas chef de tous leurs genetaires Et estoient lesditz gentilz hommes a cheval. Si savanca le bon chevalier cingt ou trente pas, et les salua en leur disant. Messeigneurs vous vous esbatez comme nous en attendant que le beau jeu se commence Je vous prie que lon ne tire point de coups de hacquebute de vostre coste et on ne vous tirera point du nostre. Le cappitaine Pedro de pas luy demanda quil estoit, et il se nomme par son nom. Quant il entendit que cestoit la cappitaine Bayart qui tant avoit eu de renommee au royaulme de Naples fut joyeulx a merveilles. Si luy dist en son langage. Sur ma foy mon seigneur de Bayart encores que je soye tout asseure que nous navois riens gaigne en vostre arrivee, mais par le contraire jen tiens vostre camp enforcy de deux mille hommes : si
[75r]
suis je bien aise de vous veoir Et pleust a dieu quil eust bonne paix entre vostre maistre & le mien, a ce que peussions deviser quelque peu ensemble, car tout le temps de ma vie vous ay ayme par vostre grande prouesse. Le bon chevalier qui tant courtois estoit que nul plus luy rendit son change au double. Si regardoit Pedro de pas que chascun honnoroit le duc de Nemours qui demanda. Seigneur de Bayart qui est ce seigneur tant bie nen ordre et a qui voz gens portent tant dhonneur. Le bon chevalier luy respondit. Cest nostre chef le duc de Nemours nepveu de nostre prince et frer vostre royne. A grant peine il eut acheve son propos que le cappitaine Pedro de pas & tous ceulx qui estoient avecques luy misrent pied a terre & commencerent a dire adressans leurs parolles au noble prince. Seigneur sauf lhonneur et le service du roy nostre maistre vous declairons que nous sommes et voulons estre et demourer a jamais voz serviteurs. Le duc de Nemours comme plein de courtoisie les remercia : et puis leur dist. Messeigneurs je voy bien que dedans au jourdhuy nous scaurons a qui demourera la campaigne a vous ou a nous : mais a grant peine se desmelera cest affaire sans grande effusion de sang. Si vostre visroy vouloit vuyder ce different de sa personne a la mienne, je ferois bien que tous mes amys & compaignons qui sont avecques moy sy consentiront Et si je suis vaincu sen retourneront ou duche de Milan & vous laisseront paisibles par deca. Aussi sil est vaincu que tous vous en retourniez au royaulme de Naples. Quant il eut acheve son dire, luy fut incontinent respondu par ung dit le marquis de la Padule. Seigneur je croy que vostre gentil cueur vous feroit voulentiers faire ce que vous dictes : mais a mon advis que nostre visroy ne se fiera point tant en sa personne quil accorde a vostre dire. Or a dieu doncques messeigneurs dist le gentil prince, je men vois passer leaue et prometz a dieu de ne la repasser de ma vie que le camp ne soit vostre ou nostre. Ainsi se departit des Espaignolz le duc de Nemours. Allant et venant veoient tout acier les ennemys, et comment ilz se mettoient en bataille, mesmement leur avantgarde de gens de cheval : dont estoit chef le seigneur Fabricio coulonne se monstroit en velle veue & toute descouverte. Si en parlerent le seigneur Dalegre et le bon chevalier au duc de Nemours & luy dirent. Monseigneur vous voyez bien ceste troppe de gens de cheval. Ouy dist il, ilz sont en belle veue. Par ma foy dist le seigneur Dalegre qui vouldra amener icy deux pieces dartillerie seulement on leur fera ung merveilleux dommage. Cela fut trouve tresbon, & luy mesmes alla faire amener ung canon & une longue coulevrine. Desja les espaignolz avoient commence a tirer de leur camp qui estoit fort a merveilles, car ilz avoient ung bon fosse devant eulx : derriere estoient tous leeurs gens de pied couchez sur le ventre pour doubte de lartillerie des francois. Devant eulx estoit toute la leur en nombre de vingt pieces que canons que longues coulevrines & environ deux cens hacquebutes a croc : & entre deux hacquebutes
[75v]
avoient sur petites charretes a roues de grans pieces de fer acere & trenchant en maniere dung roncon pour faire rooller dedans les gens de pied quant ilz vouldroient entrer entrer parmy eulx. A leur esle estoit leur avantgarde que conduysoit le seigneur Fabricio coulonne ou il y avoit environ buyt cens hommes darmes, et ung peu plus hault estoit la bataille en laquelle avoit plus de quatre cens hommes darmes que moenoit le visroy domp Raymon de cardonne : et joignant de luy avoit seulement deux mille ytaliens que menoit Ramassot, mais quant a la gendarmerie on nen ouyt jamais parler de mieulx en ordre ne mieulx montez. Le duc de Nemours passe quil eust la riviere commanda que chascun marchast. Les espaignolz tiroient en la troppe des gens de pied francois comme en une bute & en tuerent avant que venir au combat plus de deux mille. Ilz tuerent aussi deux triumphans hommes darmes lung appelle Jasses & lautre Lherisson : aussi moururent ensemble dung mesme coup de canon ces deux vaillans cappitaine le seigneur de Molart & Philippes de fribourg qui fut ung gros dommage et grant desavantage pour les francois : car tous ses gens se feussent faitz mourir pour luy. Il fault entendre que nonbstant toute lartillerie tiree par les espaignolz, les francois marchoient tousjours. Les deux pieces que le seigneur Dalegre & le bon chevalier avoient fait retourner deca le canal tiroient incessamment en la tropp du seigneur Fabrizio, qui luy faisoient ung dommage non croyable, car il luy fut tue trois cens hommes darmes Et dist depuis luy estant prisonnier a Ferrare que dung coup de canon luy avoit este emporte trente trois hommes darmes. Cela faschoit fort aux espaignolz, car ilz se veoyent tuer et ne scavoient de qui : mais le cappitaine Pedro navarre avoit si bien conclud en leur conseil quil estoit ordonne quon ne sortiroit point du fort jusques a ce que les francois les y allassent assaillir, et quilz se defferoient deulx mesmes. Il nestoit triens si vray, mais il ne fut plus possible au seigneur Fabricio de tenir ses gens qui disoient en leur langage. Coerpo de dios sommos matados del cielo vamos combater los umbres, & commencerent pour evader ces coups dartillerie a sortir de leur fort & entrer en ung beau champ pour aller combatre Ilz ne prindrent pas le chemin droit a lavantgarde : mais adviserent la bataille ou estoit ce vertueux prince duc de nemours avec petite troppe de gendarmerie, si tirerent ceste part. Les francois de la bataille joyeulx davoir le premier combat baisserent la veue, & dung hardy courage marchèrent droit a leurs ennemys, lesquelz se misrent en deux troppes pour par ce moyen enclorre ceste petite bataille. De ceste ruse sapperceut bien le bon chevalier qui dist au duc de Nemours. Monseigneur mectons nous en deux partiers jusques a ce quayons passe le fosse : car ilz nous veullent enclorre. Cela fut incontinent fait & se departirent. Les espaignolz firent ung bruyt & ung cry merveilleux a laborder Espaigne espaigne Santyago, aux canaills aux canailles fu
[76r]
rieusement venoient : mais plus furieusement durent receuz des francois qui cryoient aussi France france, aux chevaulx aux chevaulx : car les espaignolz ne taschoient a autre chose sinon darrivee tuer les chevaulx pource quilz ont ung proverbe qui dit Moerto el canaillo perdido lumbre darmes. Depuis que dieu crea ciel et terre ne fut veu ung plus cruel ne dur assault que francois & espaignolz se livrerent les ungz aux autres & dura plus dune grande demye heure ce combat Ilz se reposoient les ungs devant, les autres pour reprendre leur alayne, puis baissoient la veue et recommencoient de plus celle criant France & Espaigne le plus empetueusement du monde. Les espaignolz estoient la moytie plus que les francois. Si sen courut le seigneur dalegre droit a son avantgarde, & de loing advisa la bende de messire Rovert de la marche qui portoient en devise blanc & noir : si leur escria blanc & noir marchez marchez, & aussi les archiers de la garde. Le duc de ferrare & seigneur de l apalisse penserent bien que sans grant besoing le seigneur dalegre ne les estoit pas venu querir Si les firent incontinent desloger, et a bride abatue vindrent secourir le duc de nemours et sa bende laquelle combien quelle feust de peu de nombre reculloient tousjours peu a peu les espaignolz. A larrivee de ceste fresche bende y eut ung terrible hutin : car espaignolz furent vivement assaillis. Les archiers de la garde avoient de petites coignees dont ilz faisoient leurs loges qui estoient pendues a larson de la selle des chevaulx. Ils les misrent en besongne et donnoient de grans & rudes coups sur larmet de ses espaignolz, qui les estonnoit merveilleusement. Oncques si furieux combat ne fut veu : mais en fin convint aux espaignolz habandonner le camp sur lequel et entre deux fossez moururent trois ou quatre cens hommes darmes. Aucuns princes du royaulme de Naples y furent prins prisonniers ausquelz on sauva la vie. Chascun se vouloit mettre a la chasse, mais le bon chevalier sans paour et sans reprouche dist au vaillant duc de Nemours qui estoit tout plein de sang & de cervelle dung de ses hommes dames qui avoit este emporte dune piece dartillerie. Monseigneur estes vous blesse ? Non dist il dieu mercy : mais jen ay bien blesse dautres. Or dieu soit loue dist le bon chevalier, vous avez gaigne la bataille & demourrez au jourdhuy le phone honnore prince du monde : mais ne tirez plus avant & rassemblez vostre gendarmerie en ce lieu quon ne se mecte point au pillage encores : car il nest pas temps. Le cappitaine Loys dars et moy allons apres ses fuyans a ce quilz ne se retirent derriere leurs gens de pied : & pour homme vivant ne departez point dicy que ledit cappitaine Loys dars ou moy ne vous viengnons querir : ce quil promist faire, mais il ne le tint pas : dont mal luy en prit. Vous avez entendu comment les gens de pied des espaignolz estoient couchez sur le ventre en ung fort merveilleux & dangereux a assaillir : car on ne les voyoit point. Si fut ordonne que les deux mille gascons yroient sur la queue deslacher leur traict, qui seroit cause de les faire lever. Or les gens de pied Francois nen estoient pas loing de deux picques, mais le fort estoit trop desavantageux Car pour
[76v]
ne veoir point leurs ennemys ilz ne scavoient par ou ilz devoient entrer. Le cappitaine Odet et le Capdet de Duras dirent quilz estoient tous prestz daller faire lever les espaignolz, mais quon leur baillast quelques gens de picque, a ce que apres que leurs gens auroient tire sil soirtoit quelques enseignes sur eulx ilz feussent soustenuz. Cela estoit raisonnable, et y alla avecques eulx le seigneur de Moncaure qui avoit mille picars. Les gascons deslacherent tresbien leur traict et navrerent plusieurs espaignolz a qui il ne pleut gueres comme ilz monstrerent, car tout soubdainement se leverent en belle ordonnance de bataille. Et du derriere sortirent deux enseignes de mille ou douze cens hommes qui vindrent donner dedans ses gascons. Je ne scay de qui fut la faulte ou deulx ou des picars, mais ilz furent rompue des espaignolz, et y fut tue le seigneur de Montcaure. Le chevalier Desbories lieutenant du cappitaine Odet, le lieutenant du capdet de Duras et plusieurs autres a qui il ne pleut gueres, ce fut a leurs amys, mais les espaignous en firent une grant huee comme silz eussent gaigne entierement la bataille, toutesfois ilz cngnoissoient bien quelle estoit perdue pour eulx. Et ne voulurent pas retourner en derriere ses deux enseignes qui avoient rompu les gascons, mais se delibererebt daller gaigner Ravenne, et se misrent sur la chaussee du Canal ou ilz marchoient trois ou quatre de fronc. Je laisseray ung peu a parler deulx, & retournerau a la grosse flote des gens de pied francois et espaignolz. Cest que quant lesditz espaignolz furent levez se vont presenter sur le bort de leur fosse ou les francois livrerent fier, dur et aspre assault, mais ilz furent serviz de hacquebutes a merveilles, de sorte quil en fut beaucoup tue. Mesmement le gentil cappitaine Jacob eut ung coup au travers du corps dont il tumba, mais soubdain se releva, et dist a ses gens en almant. Messeigneurs servons au jourdhuy le roy de france aussi vien quil nous a traictez. Le bon gentil homme ne parla depuis, car incontinent tumba mort Il avoit ung cappitaine soubz luy nomme Fabien ung des beaulx & grans hommes quon veit jamais, lequel quant il apperceut son bon maistre mort ne voulut plus vivre, mais bien fist une des grandes hardiesses quoncques homme sceut faire, car ainsi que les espaignolz avoient un gros hoc de picques croysees au bort de leur fosse qui gardoit que les francois ne pouvoient entrer, ce cappitaine Fabien voulut plustost mourir quil ne vengeast la mort de son gentil cappitaine print sa picque par le travers. Il estoit g rant a merveilles, et tenant ainsi sa picque la mist dessus celles des espaignolz qui estoient couchees, et de sa grande puissance leur fist mettre le fer en terre. Quoy voyant par les francois pousserent roidement & entrerent dedans le fosse, mais pour le passer y eut ung meurdre merveilleux, car oncques ens ne firent plus de deffense que les espaignolz qui encores nayant plus bras n e jambe entiere mordoient leurs ennemys Sur ceste entree y eut plusieurs cappitaines francois mors, comme le baron de
[77r]
Grantmont le cappitaine Maugiron qui y fist darmes le possible, le seigneur de Bardassan, le cappitaine Bonnet eut ung coup de picque dedans le front dont le fer luy demoura en la teste. Brief les francois y receurent gros dommage, mais plus les espaignolz, car la gendarmerie de lavantgarde francoise leur vint donner sur le coste qui les rompit du tout, et durent tous mors et mis en pieces, excepte le conte Pedro navarre qui fut prisonnier et quelques autres cappitaines. Il fault retourner a ses deux enseignes qui senfuyoient pour cuyder gaigner Ravenne, mais en chemin rencontrerent le bastard du Fay et les guydons & archiers qui leur firent retourner le visage le long de la chaussee. Gueres ne les suyvot le bastard du Fay, mais retourna droit au gros affaire ou il servit merveilleusement bien. Entendre devez que quant ces deux enseignes sortirent de la troppe et quilz eurent deffaictz les gascons plusieurs sen fuyrent, et aucuns jusques au lieu ou estoit le vertueux duc de Nemours, lequel venant au devant deulx demanda que cestoit. Ung paillart respondit. Ce sont les espaignolz qui nous ont deffaictz. Le povre prince cuydant que ce feust la troppe de ses gens de pied fut desespere, et sans regarder qui le suyvoit se va gecter sur ceste chaussee par laquelle se retiroient ses deux enseignes qui le vont rencontrer en leur chemin, et bien quatorze ou quinze hommes darmes. Ilz avoient encores recharge quelques hacquebutes qui vont deslacher, & puis a coups de picque sur ce gentil duc de Nemors et sur ceulx qui estoient avecques luy lesquelz ne se povoient gueres bien remuer, car la chaussee estoit estroicte, et dung coste le canal ou on ne povoit descendre, de lautre y avoit ung merveilleux fosse que lon ne povoit passer. Brief tous ceulx qui estoient avecques le duc de Nemous furent gectez en leaue ou tumbez dedans le fasse. Le bon duc eut les jarretz de son cheval couppez. SI se mist a pied lespee au poing, et oncques Rolant ne fist a Ronceveaulx tant darmes quil en fist la, ne pareillement son cousin le seigneur de Lautrec lequel veit bien le grant dangier ou il estoit, et cryoit tant quil povoit aux espaignolz, ne le tuez pas, cest nostre visroy le frere de vostre royne. Quoy que ce feust le povre seigneur y demoura apres avoir eu plusieurs playes, car depuis le menton jusques au fronc en avoit quatorze ou quinze, et par la monstroit bien le gentil prince quil navoit pas tourne le doz. Dedans le canal fut noye le filz du seigneur Dalegre nomme Viverolz, et son pere tue a la deffaicte des gens de pied. Le seigneur de Lautrec y fut laisse pour mort et assez dautres. Sex deux enseignes se sauverent le long de la chaussee qui duroit plus de dix mille. Et quant ilz furent a cinq ou six mille du camp rencontrerent le bon chevalier qui venoit de la cahsse avecques environ trente ou quarante hommes darmes tant las et travaillez que merveilles Toutesfois il se delibera de charger ses ennemys, mais ung cappitaine sortit de la troppe qui commenca a dire en son langaige. Seigneur que vous vous faire, assez con
[77v]
gnoissez nestre pas puissant pour nous deffaire. Vous avez gaigne la bataille et tue tous noz gens, suffise vous de lhonneur que vous avez eu & nous laissez aller la vie sauve, car par la voulente de dieu sommes eschappez. Le bon chevalier congneut bien que lespaignol disoit vray : aussi navoit il cheval qui se peust soustenir Toutesfois il demanda les enseignes qui luy furent baillees, et puis ilz souvrirent et il passa parmy eulx et les laissa aller. Las ile ne scavoit pas que le bon duc de Nemours feust mort ne que ce feussent ceulx qui lavoient tue, car il feust avant mort de dix mille mors quil ne leust venge sil leust sceu. Durant la bataille et avant la totalle deffaiste sen fuyt domp Raymon de cardonne visroy de Naples environ trois cens hommes darmes, & le capitaine Ramassot avecques ses gens de pied, le demourant fut mort ou pris. Le bon chevalier et tous les francois retourenerent de la chasse environ quatre heures apres midy, et la bataille estoit commencee environ huyt heures de matin. Chascun fut adverty de la mort de e vertueux et noble prince le gentil duc de Nemours dont ung dueil commenca au camp des francois si merveilleux que je ne cuyde point sil feust arrive deux mille hommes de pied fraiz et deux cens hommes darmes quilz neussent tout deffaict, tant de la peine & fatigue que tout au long du jour avoient souffert, car nul ne fut exempte de combatre sil voulut, que aussi la grande et extreme douleur quilz portoient en leur cueur de la mort de leur chef lequel par ses gentilz hommes en grans pleurs et plains fut porte a son logis. Il ya eu plusieurs btailles depuis que dieu crea ciel et terre, mais jamais nen fut veu pour le nombre quil y avoit de si cruelle, si furieuse ne mieulx combatue de toutes les deux parties que la bataille de Ravenne.
¶Des nobles hommes qui moururent a la cruelle bataille de Ravenne, tant du coste des francois que des espaignolz, et des prisonniers. La prinse de la ville de Ravenne. Comment les francois furent chassez deux moys apres dytalie en Lan mil cinq cens & douze De la griefve maladie du bon chevalier. Dune fort grande courtoysie quil fist. Du voyage fait au royaulme de Navarre, et de tout ce qui advint en ladicte annee.
¶Chapitre .lve.
EN ceste cruelle bataille fist le royaulme de france grosse perte, car le nompareil en prouesse qui feust au monde pour son aage y mourut. Ce fut le gentil duc de Nemours, dont tant que le monde aura duree sera memoire. Il y avoit quelque intelligence secrete pour le faire roy de Naples sil eust vescu et sen fut trouve pape Julles mauvais marchant, mais il ne pleut pas a dieu le laisser plusavant vivre, je croy que les neuf preux luy avoient
[78a]
fait ceste requeste, car sil eust vescu aage competant les eust tous passez. Le gentil seigneur Dalegre et son filz le seigneur de Viverolz y finerent leurs jours aussi firent le cappitaine la croche, le lieutenant du seigneur Dymbercourt, les cappitaines Molart, Jacob, Philippes de Fribourg, Maugiron baron de grantmont, Bardassan, et plusieurs autres cappitaines. Des gens de pied environ trois mille hommes, et quatre vingtz hommes darmes des ordonnances du roy de france, avecques sept de ses gentilz hommes et neuf archiers de sa garde, et de ce qui en demoura la pluspart estoient blecez. les espaignolz y eurent perte dont de cent ans ne seront reparez, car ilz perdirent vingt cappitaines de gens de pied, dix mille hommes ou peu sen faillit, et leur cappitaine general le conte Pedro de cardonne, domp Pedro de coignes prieur de Messine, domp Diego de guynonnes, le cappitaine Alnarade, le cappitaine Alonce de lesteille & plus de trente cappitaines ou chefz denseignes et bien huyt cens hommes darmes sans les prisonniers, qui furent domp Jehan de cardonne qui mourut en prison, le marquis de Betonte, le marquis de Licite, le marquis de la Padule, le marquis de Pescare, le duc de Trayete, le conte de Conche, le conte de Populo et ung cent dautres gros seigneurs et cappitaines, avecques le cardinal de Medicis qui estoit legat du pape en leur camp. Ilz perdirent toute leur artillerie hacquebutes et cariage. Brief de bien vingt mille hommes quilz estoient a cheval et a pied nen eschappa jamais quatre mille quetous ne feussent mors ou pris. Le lendemain les adventuriers francois et lansquenetz pillerent la ville de Ravenne, et se retira le seigneur Marc anthoine coulonne dedans la cytadelle qui estoit bonne et forte. Le cappitaine Jacquyn qui avoit si bien parle a lastrologue de Carpy en fut cause par desse la deffence qui estoit faicte, a loccasion dequoy le seigneur de la Palisse le fist pendre & estrangler. Il y avoit bien entreprise daller plus avant si le bon duc de Nemours feust deoure vif, mais par son trespas tout cessa. Combien que Petre morgant et le seigneur Robert ursin avoient tresbien fait leur devoir de ce quilz avoient promis. Aussi que le seigneur Jehan jacques escripvoit chascun jour que les veniciens et suysses sassembloient et vouloient descendre en la duche de Milan, et lempereur Maximiliant commencoit desja secretement a se revolter, parquoy larmee des francois se mist au retour vers ladicte duche de Milan ou tous les cappitaines se trouverent en la ville, lesquelz firent enterrer dedans le Dosme le gentil duc de Nemours en plusgrant triumphe que jamais avoit este enterre prince, car il y avoit plus de dix mille personnes portans le dueil la pluspart a cheval, quarante enseignes prises sur ses ennemys que lon portoit devant son corps traynans en terre, & ses enseigne & guydon apres & prochains de sa personne en demonstrant que cestoient ceulx qui avoient abatu lorgueil des autres En ce doloreux obseque y eut grans pleurs & gemissemens. Apres sa mort tous les
[78v]
cappitaines avoient esleur le seigneur de la palisse pour leur chef comme tresvertueulx chevalier, aussi que le seigneur de lautrec estoit blesse a la mort et avoit este mene a ferrare pour se faire garir ou il eust sibon & gracieulx traictement du duc et de la duchesse qui revint en assez bonne sante. Le pape Julles voulant tousjours continuer en son charitable vouloir fist du tout declarer lempereur ennemy des francois lequel manda a si peu de lansquenetz qui estoient demourez apres la journee de ravenne avecques les francois quilz eussent a se retirer dont le principal cappitaine estoit le frere du cappitaine Jacob lequel a son mandement sen retourna et les emmena tous excepte sept ou huyt cens que ung jeune cappitaine aventurier qui navoit que perdre en allemaigne retint, en ceste saison ainsi que les francois cuydoient emmener le cardinal de medicis en france fut recoux a Petre de qua qui luy fut bonne fortune et en fut bien tenu a messire Mathe de becarya de pavye qui fist cest exploit, car depuis il fut pape. Peu apres larmee des veniciens suysses et gens de par le pape descendirent en gros nombre qui trouverent celle des francois deffaicte et ruy,ee, et combien quilz feissent resistance en pusieurs passaiges, toutesfois en fin furent contrainctz eulx venir retirer a pavye qui delibererent garder, et furent ordonnez les cappitaines par les portes a fortiffier chascun son quartier ce quilz commencerent tresbien, mais peu y demourerent, car les ennemys y furent deux jours apres Les francois avoient fait faire ung pont sur bateaulx combien quil y en eust ung de pierre audit pavye, mais cestoit a fin que si aucun inconvenient leur advenoit eussent meilleure retraicte ce quil advint bien tost, car une journee je ne scay par quel moyen ce fut les suysses entrerent en la ville par le chasteau et vinfrent jusques sur la place oudesja au moyen de lalarme estoient les gens de pied et plusieurs gens de cheval comme le cappitaine luys dars qui en estoit lors gouverneur et y fist merveilles darmes si fist aussi le seigneur de la palisse et le gentil seigneur dymbercourt, mais sur tous le bon chevalier fist choses non croyables, car il arresta avecques vingt ou trente de ses hommes darmes Les suysses sur le cul plus de deulx heures tousjours combatant & durant ce temps luy fut tue deux chevaulx entre ses jambes. Ce pendant se retiroit lartillerie pour passer le pont, et sur ses entrefaictes le cappitaine perrepont qui alloit visitant les ennemys dung coste et dautre vint dire a la compaignie qui combatoit en la place : messeigneurs retirez vous, car au dessus de nostre pont de boys en force petiz bateaulx passent les suysses dix a dix, et si une fois passent quelque nombre compectant ilz gaigneront le bout de nostre pont et nous serons enclos en ceste ville & tous mis en pieces cestoit ung saige & vaillant cappitaine parquoy a sa parolle tousjours combatant se retirerent les francois jusques a leur pont ou pour estre vivement poursuyvis y eut lourt et dur escarmouche toutesfois les gens de cheval passerent et demoura environ troys cens
[79r]
lansquentetz derriere pour garder le bort dudit point, mais ung grant malleur y advint, car ainsi que lon achevoit de passer la derniere piece dartillerie qui estoit une longue coulevryne nommee ma dame de fourly et avoit este regaignee sur les espaignolz a ravenne, elle enfondra la premiere barque parquoy les povres lansquenetz voyant quilz estoient perduz se saulverent au mieulx quilz peurent toutesfois y en eut aucuns tuez et dautres qui se noyerent au tezin. Quant les francois eurent passe le point ilz le rompirent parquoy ne furent plus poursuiviz, maus ung grant malleur advint au bon chevalier, ce fut quainsy quil estoit au bout du pont pour le garder fut tire ung coup de faulconneau de la ville qui luy fraya entre lespaule et le col de sorte que toute la chair luy fut emportee jusques a loz, ceulx qui virent le coup cuydoient bien quil feust mort, mais luy qui ne seffraya jamais de chose quil veist combien quil se sentist merveilleusement blese et par ce auss quil congnoissoit bien nestre pas a lheure saison de faire lestonne, dist a ses compaignons messeigneurs ce nest riens, on mist paine de lestancher le mieulx quon peut avec mousse quon print aux arbres & linge que auvuns de ses souldars prindrent a leurs chemises, car il ny avoit nul cyrurgien la a loccasion du mauvais temps, ainsi se retira larmee des francois jusques a alexandrie ou le seigneur Jehan jacques estoit alle devant leur faire ung pont gueres ny sejournerent, mais leur convint du tout habandonner la lombardie excepte les chasteaulx de milan et cremonne, lugan, lucarne la ville et le chasteau de bresse ou estoit demoure le seigneur daubignu & quelques autres places en la vautelyne. Les francois repasserent les mons & se logerent quelque temps es garnisons que leur avoient este ordonnees, Le bon chevalier sen retira droit a grenoble pour visiter levesque son bon oncle lequel long temps a navoit veu, cestoit ung aussi vertueux et bien vivant prelat quil en feust pour lors ou monde, il receut son nepveu tant honnestement que merveilles et le fist loger en levesche ou chascun jour estoit traice comme la pierre en lor & le venoient veoir les dames dalentour grenoble mesmement celles de la ville qui toutes ensemble ne se povoient saouller de le louer, dont il avoit grant honte. Or en ces entrefaictes ne scay si ce fut par le grant labeur que pour le bon chevalier avoit souffert par plusieurs annees ou si ce fut par le coup du faulconneau quil eut a la retraicte de pavye, mais une grosse fiebvre continue le va empoigner qui luy dura dix sept jours de sorte que lon ny esperoit plus de vie. Le povre gentil homme qui de maladie se voyoit ainsi abatu faisoit les plus piteuses complainctes quon ouyt jamais, & a louyr parler il eust eu bien dur cueur a qui les larmes ne feussent tumbees des yeulx. Las disoit il mon dieu puis que cestoit ton bon plaisir moster de ce monde si tost que ne fiz tu ceste grace de me faire mourir en la compaignie de ce gentil prince le duc de Nemours & avecques mes autres compaignons a la journee de ravenne ou quil ne te pleut consentir que je finasse a lassault de bresse
[79v]
ou je fus si greifvement blesse, Helas jen feusse beaucoup port plus joyeulx : car aumoins jeusse ensuivy mes bons predecesseurs qui sont tousjours demourez aux batailles. Mon dieu et jay passe tant de gros dangiers dartilleries en batailles, en assaulx, et en rencontres dont tu mas faict la grace destre eschappe et il fault que presentement je meure en mon lict comme une pucelle : toutesfois combien que je le desirasse autrement ta saincte voulente soit faicte. Je suis ung grant pecher, mais jay espoir en ton infinie misericorde. Helas mon createur je tay par le passe grandement offence, mais si plus longuement euse vescu, javoys bon espoir avecques ta grace de bien tost amender ma mauvaise vie. Ainsi faisoit ses regretz le bon chevalier sans paour et sans reprouche, et puis par ce quil brusloit de chaleur pour la grande fiebvre qui le tenoit sadressoit a monseigneur saint anthoine en disant. He glorieux confesseur et vray amy de dieu sainct anthoine toute ma vie je tay tant ayme et tant eu de fiance en toy, & tu me laisses icy brusler en si extreme challeur que je ne desire fors que briefve mort me prengne. Helas et as tu point de souvenance que durant la guerre contre le pape en ytalie moy estant loge a Rubere en une de tes maisons je la garday de brusler, et sans moy y eust este mis le feu : mais en commemoration de ton sainct nom je me loge dedans, combien quelle feust hors de la forteresse et ou dangier des ennemys qui nuyt et jour me povoient venir visiter sans trouver chose qui les en eust sceu garder : et toutesfois jayme mieulx demourer ung moys en ceste facon que ta maison feust destuicte, Aumoins je te supplie maleger de ceste grande challeur & faire requeste a dieu pour moy, ou que bien tost il me oste de ce miserable monde, ou quil me donne sante. Tant piteusement se dolosoit le bon chevalier quil ny avoit personne autour de luy qui ne fondist en larmes. Mesmement son bon oncle levesque qui sans cesse estoit en oraison pour luy, et nest possible quen tant de peuple ny eust quelque bonne personne que nostre seigneur voulut ouyr comme assez apparut, car sa fiebvre le laissa peu a peu et commenca a reposer et donner goust aux viandes, de sorte quen quinze jours ou trois sepmaines avecques le bon traictement, quil en fut fu tout guery et aussi gaillart quil avoit jamais este : et se print a aller ung peu a lesbat pres de la ville visitant ses amys et les dames de maison en maison a qui il faisoit force bancquetz pour se resjouyr, et tellement que comme assez povez entendre quil lestoit pas sainct, ung jour luy print voulente davoir compaignie francoyse. Si dist a ung sien varlet de chambre quon ommoit le bastard cordon, Bastard. Je te prie que aujourdhuy a coucher avecques moy jaye quelque belle fille, je croy que je ne men trouverau que mieulx. Le bastard qui estoit diligent et vouloit bein complaire a son maistre
[80r]
salla adresser a une povre gentil femme qui voit une belle fille de laage de quinze ans laquelle pour la grande povrete en quoy elle estoit consentit sa fille estre baillee quelque temps au bon chevalier, esperant aussi que apres il la marieroit. Si fut la fille langagee par la mere qui luy fist tant de remonstrances que nonbstant le bon vouloir quelle avoit, se condescendit au marche moytie par amour et moytie par force. Si fut emmenee secrettement par le bastard au logis du bon chevalier et mise en une sienne garderobbe. Le temps fut venu de se retirer pour dormir : si sen retourna a son logis ledit bon chevalier lequel avoit souppe en ung bancquet en la ville. Arrive quil feust le bastard luy dist quil avoit une des belles jeunes filles du monde et estoit comme ung ange, mais tant avoit plore que tous les yeulx luy en estoient enflez. Quant le bon chevalier la veit en ceste sorte luy dist. Comment mamye quavez vous, ne scavez vous pas bien pourqyoy vous estes venue icy. La povre fille se mist a genoulx et dist. Helas ouy mon seigneur, ma emre ma dit que je feisse ce que vous vouldriez : toutesfois je suis vierge et ne feiz jamais mal de mon corps ne navoys pas voulente den faire si je ny feusse contraincte, mais nous sommes si povres ma mere et moy que nous mourons de fain : et pleust adieu que je feusse bien morte, aumoins ne seroye point au nombre des malheureuses filles, et en deshonneur toute ma vie : et disant ces parolles ploroit si tresfort quon ne la povoit appaiser. Quant le bon chevalier apperceut son noble courage quasi larmoyant luy dist. Vrayement mamye je ne seray pas si meschant que je vous oste de vostre bon vouloir : et changeant vice a vertu la prist par la main et luy fist affubler ung manteau, et au bastard prendre une torche et la mena luy mesmes coucher sur une gentil femme sa parente qui se tenoit pres de son logis, et le lendemain matin envoya querir la mere a laquelle il dist. Venez ca mamye ne me mentez pint, vostre fille elle pucelle, qui respondit : sur ma foy monseigneur quant le bastard la vint hier querir jamais navoit eu congnoissance dhomme. Et nestes vous doncques bien malheureuse dist le bon chevalier de la vouloir faire meschante. La povre femme eut honte & paour et ne sceut que respondre sinonn quelles estoient si povres que riens plus. Or dist le bon chevalier, ne faictes jamais ung si lasche tour que de vendre vostre fille qui estes gentil femme, on vous en debveroit plus griefvement pugnir. Venez ca avez vous personne qui la vous ait jamais demandee en mariage : ouy bien dist elle, ung mien voisin honneste homme, mais il demande six cens florins & je nen au pas vaillant la moytie. Et sil avoit cela lespouseroit il dist le bon chevalier : ouy seurement dist elle. Alors il prist une bourse quil avoit fait prendre au bastard & luy bailla trois cens florins de ce pays & mieulx pour marier vostre fille & cent escus pour labiller & puis fist encores cent autres escus quil donna a la mere & commanda
[80v]
au bastard quil ne les perdist jamais de veue quil neust veu la fille espousee, ce quelle fut trois jours apres, et a fait depuis ung treshonnourable mesnage. Elle retira sa mere en sa maison, et ainsi par la grande courtoysie & liberalite du bon chevalier la chose fut ainsi menee quil est cy dessus recite. Je croy que vous navez gueres leu en cronicque ny hystoire dune plus grande honnestete. Icelluy bon chevalier fut encores quelque temps apres ou daulphine faisant grosse chere jusques a ce que le roy de france son maistre envoya une armee en guyenne soubz la charge du duc de Longueville pour cuyder recouvrer le royaulme de Navarre que depuis ung peu avoit usurpe par force le roy Darragon sur celluy qui le tenoit a juste tiltre, et ny trouva occasion sinon quil estoit du party du roy de france. Je ne scay comment il alla de ce beau voyage, mais apres y avoir longuement este sans riens executer la grosse armee sen retourna et firent passer les montz pizerenees a une partie dicelle dont fut chief le seigneur de la Palisse. Et puis aucun temps apres luy fut envoye de renfort le bon chevalier sans paour et sans reprouche qui luy mena quelques pieces de grosse artillerie. Le roy de Navarre deschasse estoit avecques eulx. Ilz prindrent quelques petis fortz, puis vindrent mettre le siege devant Pampelune. Ce pendant le bon chevalier alla prendre ung chasteau ou il eut gros honneur comme vous entendrez.
¶ Comment le bon chevalier prist ung chasteau dassault ou royaulme de Navarre ce pendant quon assist le siege devant la ville de Pampelune ou il fist ung tour de sage et apper chevalier.
¶Chapitre .lvie.
CE pendant que le gentil seigneur de la Palisse plantoit avecques le roy de Navarre le siege devant la ville de Pampelune fut advise quil seroit bon daller prendre ung chasteau q quatre lieues de la qui nuysoit merveilleusement au camp des francois. Je croy bien quen la place ny povoit pas avoir grosse force, toutesfois par ce que lon se doubtoit que dedans une petite ville pres de la appelleee le pont la royne y pourroient estre quelques gens qui peult estre la vouldroient secourir fut advise quon meneroit assez bonne bende de gens de cheval et de pied. Le roy de Navarre & seigneur de la Palisse prierent au bon chevalier quil voulsist prendre ceste entreprinse en main, et luy qui jamais ne fut las de travail quon luy sceust bailler laccorda icontinent. Il prist sa compaignie et celle du cappitaine Bonneval hardy chevalier quelque nombre davanturiers (et deux enseignes de lansquenetz qui estoient de chascune quatre cens hommes, et ainsi sen alla tout de plain jour devant ceste place. Il envoya ung trompette pour faire entendre a ceulx qui estoient dedans quilz eus
