[61r]
De Sept Isle a Gaudester, six veues.
De Sept Isle a Dodmen, sept veues.
De Grenoise a l’Isle d’Ouhic, v. veues.
De Quasquet a l’Isle d’Ouhic, quattre grandes veues.
De Grenoise a Porlant, quattre veues.
De Grenoise a Quasquet, une veue.
De Grenoise a l’Isle de Bas, troys veues.
De Grenoise au Four, cinq veues.
De Porlans au Four, neuf veues.
De Gaudester au Four, sept petites veues.
De Lomelyen a Gaudester, six veues.
De Roquedoue a Grenoise, deux veues.
Chasteau Langloys et le Chief de la Grue de Grenoise gisent nordest et siroest.
De Porlans a l’Isle de Bas, y a sept veues.
De Grenoise a Porlans, troys veues.
De Grenoise a la Pierre de Plemue, quattre veues.
De la Houcque a Grede, six veues.
De Porlans a Cap de Caux, six veues.
De Quasquet a Porlant, troys grans veues.
De Aissent a Sorlingue, quattre veues.
Du Port de Sorlingue jusques au Four, y a trante lieues.
De Lissart au Four, y a xxv. lieues.
Sache que le plus large lieu qui soit en la Couste de Angleterre des l’Isle d’Ouhic en amont, c’est Chouran et la Fousse de Coulleville ;et gisent nort et su ;et prens du noroest et du suest.
CHAPITRE 50 – S’ensuyvent les routes de Sorlingues et d’Angleterre en Galles, le long de la Couste de Galles
Sorlingue et Loudaye gisent nordest et siroest ; et il y a entre eulx .xxviij. lieues.
Cap de Cornouaille et Loudaye gisent nordest et syroest ung quart de nort et su ; et y a entre eulx .xxv. lieues
[61v]
Londaye et Calday gisent nort et su ; et y a entre eulx .x. lieux.
Cap de Cornouaille et Conquerre gisent nort et su ung quart de noroest et de suest ; et y a entre eulx .xxxiii. lieues.
Cap de Cornouaille et Masquyngoalles gisent nort et su ; et y a entre eulx .xxxiii. lieues.
Masquyngoalles et Grashormes gisent est nordest et oest siroest.
Grashormes et l’Isle de Fer gisent est oest ; et y a entre eulx .ii. lieues.
L’Isle de Fer et Nulledefort gisent est oest ung quart de nordest et ung quart de suest ; et y a entre eulx deux lieues.
CHAPITRE 51 – S’ensuyt le cours des marees du Cap de Cornoaille jusques en Galles, le long de la couste
Au Cap de Cornouaille, vient le flaux du su et le jusant vient du nort ; mais dehors, a deux ou a troys lieues, vient la maree du siroest.
Et du Cap de Cornouaille jusques a Londaye, vient le jusent de nordest et le flaux de siroest.
Et dehors l’Isle de Londaye, vient le flaux de oest et le jusant de l’est.
Et entre Londoye et Caldaye, vient le flaux de l’oest nordest et le jusent de l’est suest.
Et de Caldaye es Escamaye, vient le flaux de nordest et le jusent de suest.
Entr’ Escamaye et Grashormes, vient le flaux de su et le jusent de nort.
Et de Grashormes par toute la couste jusques a Houlyphet, vient le flaux de su et le jusent a l’encontre. Et dehors en la route, prens du nordest et du siroest.
De Houlyphet jusques a l’Isle de Man, vient le flaux de siroest et le jusent vient de nordest.
Et le long de l’Isle de Man jusques dehors, vient le flaux de siroest et le jusent en l’encontre.
[62r]
Entre l’Isle de Man et Escosse vient le flaux de l’oest.
Et le Couste d’Escosse jusques es Mons de Galuay[1], vient le flaux de l’oest noroest et le jusant de l’est nordest.
De Meurs de Galuay jusques a la Poincte de Loquestan, vient le flaux de nort noroest et le jusent a l’encontre.
Et d’icelle poincte jusques a Tarc, vient le flaux de syroest et le jusant de nort nordo(e)st.
CHAPITRE 52 – S’ensuyvent les routtes de Sorlingues et d’Angleterre jusques en Hyrlande, tout le long de la coste et quantes lieues a de l’ung a l’autre.
Sorlingues et Cap de Clare gisent est suest et oest noroest ; et y a entre eulx cinquante lieues.
Cap de Cornouaille et Cap de Veil gisent noroest et suest ung quart de l’est et de l’oest ; et y a entre eulx .xxxiij. lieues.
Cap de Veil et Cap de Clare gisent est nordest et oest syroest ; et y a entre eulx .xiiij. lieues.
Cap de Clare et Musenes gisent est et oest ; et y a entre eulx .vii. lieues.
Musenes et Dulfaye gisent est suest et oest noroest ; et ya entre eulx sept lieues.
Dulfaye et la Sonde de Blasquaye gisent nort et su, un quart de noroest et de suest – et te donne bien garde des aguillons ; et ya entre eulx .xviij. lieues.
Blasquaye et les Isles d’Areu gisent nort nordest et su siroest ; et y a entre eulx .xviij. lieues.
Blasquaye et Blacroc gisent nort et su ; et y a entre eulx .xl. lieues.
Du Blacroc, seigle et va la vie de nort, tu iras hors de toute Hyrlande.
Du Blacroc au Cantier, il y a six veues.
CHAPITRE 53 – S’ensuyvent les cours du Cap de Veil jusques au Cantier et comment les marees devers Hyrlande portent
Du Cap de Veil iusques aux Isles de Saltaye, vient le flaux de siroest ; et prens de l’oest ; et dehors en la routte, vient le flaux de l’oest siroest et le jusant de l’est nordest.
[62v]
Et de Saltaye jusques a Uquelo, vient le flaux de syroest et le jusent a l’encontre.
Et de Uquelo jusques a Lambaye, vient le flaux du nort et le jusant vient du su.
Et de l’Isle de Lambaye part toute la couste, vient le flaux de su suest et le jusent a l’encontre ; et de malignes, jusques a la Poincte d’Arglas, vient le flaux du su siroest et le jusent a l’encontre.
Et de la Poincte d’Arglas jusques au Cantier, vient le flaux de nort noroest et[2] le jusent de su est.
CHAPITRE 54 – S’ensuyvent les routtes du cap d’Angleterre jusques en Hirlande
Le Cap d’Angleterre et Sorlingues gisent est nordest et oest siroest.
De Sorlingue a Londay, tu iras au nordest ung quart au nort de terre a terre.
De Sorlingues a Batisco, tu iras gisent nordest et siroest.
Sorlingue et Nullefort en Galles gisent nort nordest et su syroest.
Londay et Nullefort gisent nort et su.
Loudaye et Teneby gisent nort nordest et su siroest.
De Londay a Remeze, tu iras au nort ung quart au noroest.
Londay et la Malle gisent est suest et oest noroest.
De la Malle es Isles de Saltays, tu iras au noroest ung quart a l’oest.
Le Chief d’Angleterre et la Malle gisent nort et su.
De Sorlingues, si tu va au nort ung quart au nordest, tu iras es Isles de Saltays.
Les Isles de Saltays et Remeze et Olle gisent nort et su.
Olle et l’Isle Man gisent nort et su.
Entre Remeze et Olle, y a troys bons havres, sçavoir est Cardinal, Sainct David et Primant.
Saltay et Olle gisent est nordest et oest siroest.
Sorlingues et Domelian gisent nort et su.
Sorlingues et Hyet gisent noroest et suest ; et prens ung quart [63r] du nort et ung quart du su.
Sorlingue et Ongnatefforde gisent nort noroest et su suest.
Sorlingue et Cap de Clare gisent noroest et suest.
De Londay va au noroest ung quart a l’oest, tu iras querir Corlondays.
Corlaudays et le Pointaux de Cansalle gisent est et oest.
Cap de Clare et les Isles de Saltays gisent est nordest et oest siroest.
Dacher et Turquerez gisent nort nordest et su siroest.
Et gist la Couste d’Irlande nort nordest et su siroest des la Poincte de Dachier jusques a Turqueres, si n’est a Mangue Sainct George.
CHAPITRE 55 – S’ensuyt la routte et traversye de Sorlingues et d’Espaigne
Sorlingues et Rybedoe gisent nort et su.
Sorlingues et Langues gisent nort et su ; et prens ung quart du norest et ung quart du suest.
De Sorlingues, va au su ung quart au siroest et tu iras querir Syderes ; et est Syderes deux lieux aval d’Ortigueres.
La Tour de Ongnatefforde et la Tour de Fer gisent nort et su ; et te gardes de Sorlingues.
La Tour de Ongnatefforde et le Cap de Fineterre gisent nort et su ; et prens ung quart de nordest et ung quart de syroest.
Cher et Cap de Priour gisent nort et su.
Quinsalle et la Tour de Fer gisent nort et su.
CHAPITRE 56 – S’ensuyt la vraye routte pour aller en la ryviere tresdangereuse de Loyre jusques a la noble et puissante ville de Nantes
Sache que si tu veulx aller en Loyre, desque seras au Pillier duquel te ay faict mention et de la routte par cy devant – mais de rechief te veulx enseigner comment en pillotant auchun navyre tu pourras avoir honneur en ton faict, et premier il te fault sçavoir que l’Isle du [63v] Pillier et la Poincte de Chemoulin gisent nort nordest et su siroest.
La Poincte de Chemoulin est au bas de Sainct Lesayres ; et y a dessus une chappelle ; et est une poincte noyre. Et pour bien chenollier et toy garder d’une basse qui te demourra de babort, qui est en su siroest de Pierre Persee et des Cherpentiers, il fault que tu mectez ung moulin qui est en terre le travers d’icelle poincte noire de Chemoulin par my l’ance du sable qui est au bas de Chemoulin, entre Chemoulin et une autre grosse poincte noyre qui est aval.
Et pour toy garder de la basse que l’on appelle la Lamberte, sache que, quant tu auras le clochier de la Grant Guerrande et celluy du Bourc de bas l’ung par my l’autre, tu seras droit le travers d’elle ; et si tu alloye cestes merques, iroys droit dessus.
Sache que ceste poincte desusdite est la poincte qui est aval de la chappelle, excepté la roiste, car la chappelle et le Pillier gisent nort nordest ; mais les merques sont a l’autre poincte au bas. Et, par ce, pour toy garder des Cherpentiers, quant seras a demye lieux de terre, mectz icelluy moulin dessusdit par my la poincte qui est aval de la chappelle ; et que le moulin soit sus la poincte la largeur de deux trefz, pour estre et aller seurement devers l’est des Cherpentiers. Et aussi pour toy garder de la basse qui est au su siroest des Cherpentiers, qui s’appelle la Lamberte, ne mectz point celluy moulin hors de l’ance du sable devers bas qui est aval de ceste poincte noire susdite. Pour toy garder d’elle et quant auras les clochiers de Guerrande l’ung par my l’autre, tu seras le travers d’elle comme dit est dessus. Et, par ce, si tu veulx aller sus terre, mectz celluy moulin dedans la poincte la largeur de deux trefz. Et si tu veulx courre ou aller le bas, il fault mectre les deux clochiers devantditz de Guerrande a ouvert l’ung de l’autre de la largeur d’ung trefz. Et pour sçavoir quant seras le travers des Cherpentiers, tu auras le clochier [64r] du Bourc de bas de Guerrande par my Pierre Persee ou la poincte de Gu(e)rrande, que l’on appelle Port Hayrault. Mais si tu veulx aller sus terre, pour toy garder d’eulx et passer devers l’est d’eulx, va aux merques devantdictes, le moulin dedans la poincte la largeur de .ij. trefz ; et va ainsi seurement sus terre jusques aye aporté le clochier de Sainct Lesayres rangent la poincte ; et le tiens a ouvert de ladite poincte, car si tu le fermoys dedans la poincte en allant cestes merques, tu iroys sus ung banc que l’on appelle le Raure, qui te demourra de babort et en terre en allant querir Sainct Lesayres ; et est ce banc soubme, car il n’y demure de basse mer come rien d’eaue, et de plainne mer brasse et demye de mortes eaux. Et en terre de luy, y a une chenaux tout du long de terre et pres de terre de vent qui arryme – mais donne ryn a chascune poincte ; et y a en ceste chenaulx en terre d’icelluy banc deux brasses et demye ou troys de basse mer ; et sont les meilleures merques et les plus seures.
Mais il vault beaucop mieulx et le plus seur d’aller la grant chenal, car elle est plus seure. Et des ques voyrras ung grant village qui est au bas de Sainct Lesayres, bien loing de la mer en terre ; et n’est pas le prochain village de Sainct Lesayres mais c’est le second ; et y a entre cestuy village et Sainct Lesayres deux moulins ; et y a grant planté d’arbres entour celluy village tellement qu’il resemble estre ung boys ; et y a au bout d’amont du village une grant arbre hault ; et au bout de bas du villaige, y a ung arbre ront et auprés du village ; quant[3] voyrras cestuy village, il fault que tu le mectez par my la poincte ou est ladicte chappelle qui est pres du Chemoulin pour aller la bonne chenal. Et, par ce, mectz celluy villaige par my celle poincte qui est en l’hault de ladicte chappelle ou la chappelle est au dessus ; et va ainsi contre celle poincte et cestes esmes ; et ne aye paour dudict Banc de Raure ny d’autre ; et aussi ne ferme point le clochier de Sainct Lesayres dedans les poinctes, car, quant il sera pres d’elles et ouvert d’elles, tu seras en chenal ; et ne va plus a terre.
[64v]
Et aussi pour toy garder du banc qui te demourra destrebort en entrant, que l’on appelle la Verme, ne ouvre poinct l’arbre ront que voyrras, qui est au bout devers bas du village dessusdict hors de la poincte qui est en l’hault de ladite chappelle.
Pour toy garder de ladicte Basse de la Verme, faictz tant qu’il soit tousjours par my le gros de ladicte poincte ; et va cestes esmes jusques a bort de terre le travers d’icelle poincte ; et donne ryn a chascune poincte.
Et pareillement, en amont d’icelluy village et pres de la mer, voyrras ung autre arbre et ung moulyn – le moulin amont de l’arbre –, lequel, si tu veulx, tu puys porter par my la grosse poincte du rochoys dessusdite, qui est en l’hault de la chappelle ; et va ces esmes jusques a terre ; et tien le clochier de Sainct Lesayres ouvert de la poincte de Sainct Lesayres ; et ne trouveras point moyns de six brasses ou de cinq du plain de la mer et du grant de l’eaue, et de basse mer deux brasses ou deux et demye – et est bien seur et approuvé – et ledit moulin et l’arbre susdit le travers d’une ance qui est en amont d’iceste poincte ou est la chappelle la prouchainne le travers d’ung grant chemin charraux.
Et quant seras en terre le travers d’icelle poincte, il fauldra que mectez le cap sus l’est et a l’est nordest le meilleur, pour aller le long de terre et le chenal et[4] passer en terre des Morees. Sache que suest est trop escart du flaux, s’il n’est amourable. Et quant auras passé celle grosse poincte, tu trouveras cinq brasses en chenal et sept brasses. Et quant seras plus avant amont en chenal le travers de l’autre baye, la prouchainne de Sainct Lesayres, et tu trouveras neuf et dix brasses et vase ; et la tu pourras bien pauser le travers d’ung moulin et d’ung arbre ou il y a ung chemin entre deux. Et, par ce, si veulx pauser pour attendre la maree, pouse la.
Sache que au su du moulin et d’icelle ance en la mer et bien a demye lieux en la mer, y a une basse en su quart de suest ; et en y a une autre qui est sur le Banc du Verme, lequel sera pres de toy au dehors et en mer qui demourra a sec.
[65r]
Si veulx pauser en bonne ance qui est une ance de sable qui est en amont de la Chappelle a l’Ane ou de la poincte du rochois qui est en amont de la chappelle qui est a l’entree de Sainct Lesayre en amont des Charpentiers bien loing, sache que si tu veulx pauser en ceste ance pour actendre la maree ou par vent contraire, tu auras abris de oest, de nordoest, de nort et de nordest ; et y aura beau fond vase et bonne tenue ; et trouveras sept et huit brasses du plain de la mer et de grans eaux ; et de basse mer, y aura quatre ou trois brasses du moins.
Et pour savoir quant seras a terre pour pauser, tiens les deux poinctes qui seront aval de toy l’une par my l’autre ou bien pres ouvertes ; et metz ton ancre, car tu es assés en terre ; et pause le travers du chemyn ou tu auras ung arbre ront et hault au bas de luy ; et voirras ung moulin pres de l’arbre et en l’est, le chemyn entre deux ; pause ce travers et plus en amont si tu puys et si tu veulx ; mais il y a bon paux et bon lieu ; et la chenal gist dela pour passer en terre des Morees est nordest et oest siroest et quart de suest dudit chemyn, et non pas loing a la mer. Mais sus le banc du sable nommé la Verme qui sera au dehors de toy et pres, y a une basse qui couvre demy flaux et paroist demy jusant ; et du plain de la mer, n’y aura dessus que deux brasses ou deux et demye et de grans eaux, car il demoure a sec bien hault.
Et sache que en su du chemyn et de ceste ance de sable bien dimye lieux en la mer, en y a ung autre pierre bien haulte qui aseiche pareillement demy esbe et couvret demy flaux. Et, par ce, si tu bordoye, donne toy garde de ces pierres quant auras ce chemyn charraux entre l’arbre et le moulin ; et entre ces deux pierres et les Charpentiers est le chenal. Et quant tu apporteras le moulin dessusdit et l’arbre par my la poincte qui est aval de toy et qu’il seroit sus la poincte, va hardiment le grant chenal de Sainct Lesayres dehors, car tu es en chenal. Et trouveras cinq et six brasses de plaine mer et d’eaux mortes et de basse mer. ii. brasses.
[65v]
Le Banc du Verme demourra en l’est de toy ; et va de ceste ance de sable et de ce paux susdit pour le su siroest ; et iras querir l’Isle du Pillier.
Le Pillier et l’Isle d’Ieux, savoir est le bout des Chiens Poyrinnes, gisent nort et su.
Et quant le moulin susdit sera au dehors d’icelle poincte devers bas et qu’il sera au dehors du rochois et au sable le travers d’une petite maison – et tu seras pres d’elles et amont d’elles, lors garde toy du receil de la maree. Et si tu bordoye pour aller amont, il est temps que tu changes pour aller a l’autre bort.
Et si tu vouloys[5] aller hors, sache que, quant tu auras icelluy moulin par mi ladicte maison, que tu es au bas d’elle ; et lors tu peuz courre le bas seurement, car tu es passé.
Sache pareillement que, quant tu auras une grant maison d’ardoyse qui est amont d’icelle poincte par my une ance de sable et tu auras une itelle maison d’icelledicte poincte la largeur de deux trefz, et quant auras ledit moulin qui est turquoys a ouvert d’icelle poincte devers l’est la largeur de deux trefz, lors tu seras l’avant d’elles. Et sache que icelluy moulin turquoys est le prochain moulin de la mer.
Donne bon ryn a la poincte de Sainct Lesayres, car elle va bien hors ; et au dehors d’elle, y a une petite basse qui ne descouvre sinon du bas de la mer et de grans eaux. Et par ce, garde toy d’elle.
Item plus, sache que plus avant en la chenal, y a une autre basse au dehors de ladite Poincte de Sainct Lesayres devers l’est qui ne descouvre jamais, laquelle est dangereuse pour les grans navyres et parfondiers. Mais pour toy garder d’elle, si tu es en grans navyres, ne va point querir le paux de Sainct Lesayres jusques ad ce que ayes ung grant arbre ouvert de l’eglise hault qui est en nort de ladite eglise de Sainct Lesayres. Et puys va seurement au paux, lequel est meilleur pour avoir la chemynee du priouré par my une fuye qui est au pres dudit priou|ré [66r]. Et tu trouveras six brasses de plaine mer ; et auras abris de syroest d’oest de noroest et de nort.
Si tu veulx aller de Sainct Lesayres a Pain Beuf pour antrer en chenal, et pour toy garder du banc lequel te demourra de babort, qui est de sable, il fault que tu apporte deux moulins que voyrras amont en terre devers le noroest de Sainct Lesayres, que les portes jusques a bort de l’eglise et que lesditz moulins soient devers le noroest la largeur d’ung tref ; et tu seras en bon chenal. Et va cestes esmes jusques a ung isle que voirras qui te demourra devers l’est destrebort en allant amont. Et pour toy garder d’une basse, laquelle est aval de l’isle susdite nommé Sainct Nicolas et est bien avant en chenal, et de plusieurs autres, qui sont d’icelluy costé devers le su, entre Sainct Lesayres et ledite Isle Sainct Nicolas, mectz les moulins susdits devers le noroest de l’eglise la largeur d’un tref ; et tu ne craindras rien celle Couste de Raix et en especial la basse qui est en chenal jusque a iceluy Isle de Sainct Nicolas.
Si tu vouloye aucunement courre au large de la chenal devers le nort ou le noroest, ne fermes point les deux moulins susdictz par my une maison blanche et haulte qui fut d’ung nommé George ; et y a rangent elle une paree de sable rangent elle. Et, par ce, ne ferme pas les susdits moulins de[6] ladite maison. Si tu te metz l’avant de Donges loing, tu ne crains rien les bancs devers le nort.
Et pour savoir quant seras le travers de la basse susdite, tu auras ung moulin qui demoure au su par my ung boys et l’essye du bois devers le nor nordest ; et aussi voirras la maison qui est audit boys a overt ; et lors tu seras le travers de ladite basse qui est aval de Sainct Nicolas. Et quant seras en amont de Sainct Nicolas, tu pourras bien ranger la terre de Raix jusques a Pain Beuf, dont est le paux au dessus ung moulin turquoys que voirras sus une poincte. Et le travers d’icelle poincte devers le nort sont deux dangiers de pierre que l’on appelle les Monstons, qui sont en chenal et sont le plus devers le nort et devers Donges et demeurant hault a sec de basse mer et couvrant du plain de la mer.
[66v]
Tien le clochier de Sainct Lesayres par my la poincte du Pain Beuf et tu es en chenal Sainct Lesayres – sus la Poincte de Pain est la meilleure chenal qui soit. Et la puys pauser et mettre l’ancre, car il y a beau et bon fons ; et tu auras abris de su suest, de syroest et de oest siroest.
Sache que le prochain clochier amont de Sainct Lesayres du cousté devers Raix, reservé celuy qui est en hault sus la poincte du passage, sera le clochier de Sainct Nicolas de Corset ; et est en amont de l’isle que l’on appelle l’Isle de Sainct Nicolas. Et tu pourras pauser en amont de luy ung petit, savoir est du clochier ; et auras abri de suest, de su et de siroest. Et en amont, la prochaine poincte que voirras sera Pain Beuf, la ou il y a ung moulin dessus la poincte. Et en amont du moulin, y a une brosse de boys ront. Et si veulx pauser, il y a bon lieu pour grans navyres ; et pause amont d’icelle poincte le travers du boys ung bien petit ; et mectz Sainct Lesayres sus la poincte a ouvert ung petit, pour mieulx estre en chenal, car au dehors de toy demourra ung banc de sable qui demourra a sec de basse mer.
Et si veulx aller plus amont, le prochain clochier que tu voirras devers le nordest de la riviere sera le clochier de Lavaux ; et aussi fault il que tu passes de l’autre cousté de la riviere pour aller amont devers Lavaux. Et sache que il te demourra ung grant dangier de pierre destrebort en l’hault et en amont, que l’on appelle Perauges qui couvret de plaine mer et aussi demy flaux. Et pour passer devers l’oest de luy et pres de luy a ton honneur et aller a bon chenal, tu voirras en l’oest de Lavaux ung clochier bien loing en terre. Et quant auras aporté ce clochier par my ung moulin de Lavaux et le prochain moulin de Lavaux, tu seras en l’oest de Perauges et pres d’elle ; et ne te sarre plus a elle. Et quant auras apporté ledit clochier a ung arbre ront qui est en amont[7] dudit moulin, lors tu seras le travers d’elle. Et quant ledit clochier sera par my les maisons [67r] de Lavaux, d’icelles devers l’oest, lors tu seras amont d’elle devers l’est et l’auras passee. Elle est bien en meillieu de chenal, mais sache que le chenal est devers Lavaux, qui est devers le nort de ladicte Perauges, car elle est au su de la chenal. Mais pour toy garder d’elle en allent amont et aller la bonne chenal, mectz le clochier de Cordemyers au bout devers le su d’ung grant village que l’on appelle le village de Cordemyers ; et est le second village en amont de Lavaux, mais le clochier est bien loing en terre et hault, car (est) le prochain village en amont de Lavaux ; et resemble estre une brosse de boys. Et, par ce, mectz celluy clochier de Cordemyers par my le bout d’icelluy village, le second en amont de Lavaux nommé Cordemyers, au bout devers le su ; et tu ne crains rien Perauges ; et aussi es en chenal ; va cestes esmes et merques ; et ne range point devers le nort, car ilz ne sont que dangiers et roches qui vont hors ; et va ainsi jusques le travers d’icelluy grant village ; et tu pourras pauser le travers ; et il est sus la riviere bort a bort. Et pour toy garder des dangiers qui sont devant Lavaux et speciallement d’une basse que l’on appelle Barge Horry, qui est devant Lavaux le travers de l’eglise, et demure a sec bien hault. Et, par ce, mectz le clochier de Cordemyers par my le meillieu du village de Cordemyers et non plus en terre, pour toy garder d’elle et de plusieurs autres dangiers ; et fault que aye tiers de flaux au my flaux pour passer et aller de Pain Beuf a Lavaux et plus en amont pour les bancs qui sont soubmes de sable. Et si veulx pauser devant Lavaux, pause hors et aval de luy le travers d’une grosse poincte noyre qui est aval. Et garde que pause si hors que aye le clochier de Cordemyers par my le meillieu du village de Cordemyers devant nommé, qui est le second en amont de Lavaux et bort a bort de la riviere, car en terre ne sont que rochiers.
De Sainct Lesayres a Lavaux, y a quarttre lieues.
De Lavaux au Pelerins, y a quattre lieues.
[67v]
Sache que pour toy garder de la Basse Aurry qui est pierre et devant Lavaux, ne ferme point une porte qui est en une maison au bout du bourc de Lavaux devers l’est ; et gist ladite maison nort et su ; et ne la ferme point par my ung coing de meur que tu voyrras en mer d’elle, qui est au meillieu d’ung vergier. Sache que des Lavaux jusques au village de Cordemiers, du cousté devers le nort, ne sont que dangiers et rochiers des le travers d’icelluy village devantdit.
Devant que preigne merques au clochier a icelluy village, des le travers dudit village, va requerir le bout de l’isle que voyrras en amont de toy, qui te demourra devers le su ; et le range pour ton honneur, car il est bien seur, et devers le nort ne vault rien. Et y a en ceste isle au bout d’amont deux ou .iii. grans arbres haulx ; et va tout le long de ceste isle au nort de luy, jusques soye a ung grant village, la ou y a deux ou troys grans arbres haulx. Et quant seras le travers de ces deux ou troys arbres, va du cousté devers le village et devers les arbres, qui sera devers le certain et devers le nort ; et aussi tu pourras bien pauser la, car il y a bon paux ; et va tout le long de terre devers le nort, car il est seur jusques a la poincte que voyrras devant toy, la ou y a de grans arbres haulx et plusieurs. Et quant seras a icelle poincte et tu voyrras de l’autre bort de la riviere ung grant village que l’on appelle la Martiniere, qui est en aval du Clochier du Pelerin et pres et au dessus ledit village, voyrras ung moulin turquoys ; il fault que tu mectez icelluy moulin par my une grant maison et la plus haulte dudit village de la Martiniere. Et puys va cestes esmes et merques en traversant la riviere devers le su, pour toy garder d’ung banc de sable qui te demourra devers l’est, jusques soye du cousté devers le su a la Martiniere ; et va tout le long a honneur de toy, car il y a une maulvaise basse au bout d’amont du village, qui demoure bien hault a sec, et une autre au bout de bas. Et, par ce, ne range pas trop ledit village de la Martiniere ; [68r] et tu puys pauser audict village au bout d’aval ; et le travers du village, il y a bon paux. Et aussi tu pourras pauser au Pelerin et devant et en amont ung petit, car il y a bon paux.
Du Pelerin, il fault que traverses devers le port de Lonayes, qui est de l’autre cousté de la riviere et pres devers le nort au noroest ; et puys va le long de terre jusques le travers de Coayron, qui est pres du port de Lonays. Et si tu veulx pauser la, pause au bout d’amont de Coayron le travers de la montaigne qui est rangent la ville, car il[8] y a bon paux.
Et si tu veulx aller plus amont, va tout du long du cousté devers le nort, devers Coayron, car c’est la meillieure chenal ; et aussi tu laisseras l’isle devers le su, jusques a la grosse montaigne, nonobstant qu’il y ayt bonne passee devers l’est de l’isle.
Mais, pour toy garder d’ung rochier bien grant, qui est au bout d’une autre isle, ouquel est la maison du duc, tiens les moulins qui sont au port de Lonays en hault ; et au bas de luy, tiens les rangent la chappelle dudit port de Lonays et a ouvert[9] devers le nort ung petit ; et laisseras l’isle devers terre et devers le nort ; et passeras en nort du rochoys ; et demourra ledit rochoys en mer de toy devers le su ; et aussi laisseras ladite isle devers le nort, en laquelle isle y a deux grans arbres ; et aussi la meillieure chenal est en terre de luy, du long de terre, devers le nort par grans navyres, jusques a une grosse poincte haulte, en laquelle poincte y a dessus une chappelle ; et en mer d’icelle poincte est l’isle en laquelle est la maison du duc qui est une grant maison haulte ; et est la seconde isle en amont de Coayron ; et passeras au nort de luy et a bon ryn, car au bout d’aval de luy est le rochoys devantdit, ou il fault prendre merques au moulin du port de Lonays.
De Coayron au Port de la Vigne, qui est au bas de Lonays, y a une grant .lieue. Et quant seras a ceste grosse poincte, il fault traverser devers le su devers ung village.
[68v]
Et au bas de luy, y a ung port que l’on appelle le Port de Lavigne. Et la tu puys pauser, car il y a bon paux le travers dudit village et au bout de bas d’icelluy, car au bout d’amont dudit village, y a ung rochier bien dangereux ; et est ledit village devers le su de la riviere et en amont de l’isle ou est la maison du duc.
Et sache que ce rochier est amont du village et pres, et commance le travers de la poincte de l’isle, laquelle isle est auprés dudit village bort a bort ; et est cestedicte isle toute plainne de saulles.
Et sache que icelluy rochier devantdit est la et commance au bout de ladite isle le travers du bout d’aval ; et va en amont bien loing, et va le travers de la riviere bien ung tret d’arc. Mais il y a une brosse de boys ront aval d’icelluy village et en le hault sus terre ; tien icelle brosse de boys a ouvert de deux ou troys grans arbres qui sont en celluy village et au bout de bas ; et que le voye a ouvert desdits arbres devers le noroest ; et tu ne crains ryen ledit rochier ; et te garde de luy, car il est dangereux. Et, pour toy garder d’icelluy rochier, ferme le clochier de Coayron par my la grosse poincte et dedans elle, qui est en amont dudict Coayron, ou est la chappelle dessus, qui est d’icelluy cousté devers le nort ; et tu ne crains rien ledict rochier ; et passeras en nort de luy ; et demourra ung banc de sable en nort et en noroest de toy. Et, par ce, donne toy garde de luy et sonde souvent.
Du Port de Lavigne jusques a Nantes, y a deux lieues.
Des le Port de Lavigne amont, mais que aye passé celluy rochier, la chenal demoure et est devers le su jusques soye a la montaigne, et aussi au grant chaisgne que l’on appelle le Chaisgne Vert ou l’on tire la pierre ; et la y a bon paux.
Et puys, va par le meillieu on le meillieu[10] devers le su a la sonde, jusques devant les faubours de la ville que l’on appelle Sainct Julian ou bien la Fousse de Nantes. Si pause a la Fousse, pause au de bas de la chappelle de Sainct [69r] Julian ou bien au dessus, car le travers d’elle y a maulvais lieux et s’i pert plusieurs ancres.
La Sulsaye de Nantes est en amont de Sainct Julian, devers le su le travers de la foterne qui est rangent les Pons de Nantes.
Si tu es a Sainct Lesayres et tu veulx aller par le Chenal Poictevine, ne ferme point ung grant arbre hault que voyrras en nort dudict Sainct Lesayres, sus une poincte de roc qui est par my l’eglise dudit lieu ; et qu’il soit a ouvert la largeur d’ung tref de l’eglise ; et va cestes esmes ; et tu ne crains rien ung dangier qui te demourra devers l’oest destrebort de toy, que l’on appelle la True ; et aussi ne crains rien les autres dangiers. Et pour sçavoir quant seras le travers de la True, il y a ung moulin devers Sainct Lesaires en hault le travers d’une ance, lequel sera par my ung grant chemin charraux ; et tu seras le travers d’elle.
Et, pour toy garder d’une autre pierre que l’on appelle la Coronee, prens tes merques a deux clochiers qui sont en l’Isle de Noirmoustier.
Sache que au nort du Pillier, y a une pierre ou il y a .xij. brasses au pied d’elle.
Sache que, quant la terre de Guerande sera par my Pierre Parsee la poincte que l’on appelle Port Hairault, et par especial le clochier du Bourc de Bas par my ladicte Pierre Persee, lors tu seras le travers des Cherpentiers.
CHAPITRE 57 – S’ensuyt pour aller a Bourneuf.
Si viens de Sainct Lesayres et tu veille aller a Bourneuf par le chenal qui est le long de la terre de Raix, devers le su, dont on appelle icelle poincte la Poincte de Chevesche, et donne ryn a ladicte poincte, car elle va hors ; et, par ce, ne la range point devers l’oest.
Et, quant seras a icelle poincte et l’auras doublé devers le suest, au su d’elle, va tout le long de terre, car la terre est bien saine et seure. Mais il y a ung banc de sable qui va tout de long [69v] de terre, par dehors du chenal, jusques le travers du premier clochier que tu voirras, que l’on appelle Nostre Dame des Motiers. Et, par ce, va tout du long de terre, jusques le travers d’une autre eglise et clochier, qui est a Pornic et est le prochain ; et y a ung havre dont la meilleure antree est ranger devers l’oest, car la poincte devers l’est est soubme ; et y a ung chasteau a icelluy lieu de Pornic sur la poincte. Et quant seras le travers de luy, tu voirras deux arbres, dont le plus bas est ung pignier et est ront. Et, par ce, mectz icelluy pignier a ouvert du chasteau devers bas. Et puis metz le cap sur la mer, jusques ad ce que aye aporté ung arbre ront que voirras en l’Isle de Noirmonstier par my trois gros puys de sable noirs que tu voirras devers l’est, au bout de l’isle et amont de la tour. Puis metz celluy arbre par my le puys qui est le plus devers le suest, sus le plus hault de luy. Et quant seras a cestes esmes ledit arbre par my le puys, va ainsi cestes esmes. Et metz le darriere de ton navire contre le puys et arbre ; et ne ouvre point ledit arbre dehors du puys devers le suest ; et tu iras querir Longue Serre, qui n’est pas loing du collet devers le suest. Et par toy garder d’elle, tu voirras en terre de Bourneuf et en amont en l’est, ung grant boys et hault ; et par my ce boys, tu voirras une eglise ou il n’y a point de clochier, que l’on appelle Sainct Sire en Raix.
CHAPITRE 58 – S’ensuit de la Chese de Noirmonstier.
Si tu veulx pauser a la Chese de Noirmonstier, pause a trois brasses ou a deux et demye a tout le plus pres ; et tu auras abris de su, de siroest, de oest et de oest noroest. Noroest te viendra du coureau ; et Pierre Moyne te demourra au nort pres d’une lieux ; et seras assés pres des soubmieres devers le suest ; mais metz l’arbre ront sus le plus hault du puys.
Et si tu veulx, de la Chese, aller querir le Partuys du Rochoix, prens merches a ung arbre ront que voirras en l’Isle de Noirmonstier, qui est en suest de la Chese et pres de la mer ; et y a trois puys rons. Et pour aller querir ledit Partuys du Rochaix ou l’autre du Collet, metz icelluy arbre ront devantdit par my le puys le plus amont de .iii puys ; et le metz sus le plus hault du puys ; et va cestes merques [70r] et tu iras tout du long des dangiers devers le su – et y a ryn de eulx ; et aussi sont cestes merches pour pauser a la Chese – ; et va ainsi jusques aye aporté les deux clochiers de Beauvoir l’un par my l’autre les deux prochains qui sont devers le nort, dont le plus dougié est le plus hault devers le nort des trois ; et le segond est le plus gros et se nomme Sainct Philibert. Et quant ilz seront l’ung par my l’autre, tu seras en chenal pour aller querir le Partuys du Rochais. Va seurement contre Beauvoir, et tu trouveras six et huyt brasses ; et tiens tousjours les deux clochiers l’un par my l’autre, jusques ad ce que aye apporté le clochier de Nostre Dame de Mons par my une brosse de boys que voirras devers mons, qui est pres du Courceau de la Barre et en su du molin et le plus en amont d’eux, qui sont en la plus clere de bois, et le moulin au bout du bois devers l’oest et dedans luy de celluy qui est le plus claret qui est en l’est des deux ; et tu seras en chenal pour aller querir Belles Esves ou Beauvoir.
CHAPITRE 59 – S’ensuyt du Collet de Bourneuf
Si tu veulx aller de la Chese querir le Collet, prens tes merches au puys et a l’arbre, come t’ay dit davant. Et quant auras le puys audit arbre, baille adonc le cul a l’arbre ; et va tousjours l’arbre sus le plus hault du puys, jusques ad ce que aye apporté une chappelle qui est au bas de Bourneuf et au bas d’une brosse de boys qui est rangent Bourneuf et au bas de luy – et a nom ceste chappelle Sainct Sebastian – par my la poincte dudict bois, par my celle devers l’oest, et la chappelle par my la poincte du bois ; et tu seras en chenal pour aller querir le Collet.
Et pour toy garder de Longue Surre, va celles merches et tu ne trouveras point moins de .v. et .vi. brasses de pleine mer ; et va ainsi jusques aye aporté l’eglise Sainct Sire rangent d’une eglise qui est en amont de Bourneuf, et est rangent ung bois, et n’a point de clochier, jusques l’aye aporté au veil chasteau de Bourneuf, qui est une motte noire qui est rangent la poincte du Courceau du Collet ; et n’aye doubte de Longue Surre ; et puis va pauser, et pause assés pres de terre et a cestes merches, savoir est ladite chapelle de Sainct Sebastian par my la pointe du bois.
[70v]
Si tu veulx aller en Dayn ou en venir hors, ne va point querir le Courceau ny ne sortys de hors de luy, jusques aye Sainct Sire au vieil chasteau ; et range devers Bourneuf, car la Poincte de Boing va bien loing.
CHAPITRE 60 – S’ensuyt du Collet de Bourneuf
Si tu veulx aller au Collet ou au Collet par le chenal qui est le long de terre de Raix – et l’on appelle celle Poincte de Chevesche ainsi que ay dit dessus – pour aller a Borneuf, et iras querir Longue Serre qui n’est pas loing du Collet et est dehors de l’Isle de Boing. Et pour toy garder d’elle, tu voyrras en terre de Borneuf ung grant boys et hault. Et par my le boys, tu voyrras une eglise ou il n’y a poinct de clochier, qui est Sainct Sire en Raix comme dit est ; et prens ainsi tes merques devantdictes de ladite chappelle et du boys, car elles sont les plus seures ; et mectz Sainct Sebastian au bout dudict boys devers l’oest.
Emprés, mectz celle eglise par my une motte ronde que voyrras a l’entree du Courceau de Borneuf devers l’oest, que l’on apelle le Vieil Chasteau du Collet. Et quant celle eglise de Sainct Sire sera par my celluy puys ou motte qui est noyre, au bas d’elle, va droit a la motte, car tu ne crains rien, il te demourra troys rochiers destrebort. Et aussi tu auras le clochier de Bourneuf par my ung puys de sable qui est au bas de la motte. Et quant seras a cestes esmes, va sus terre ; et Longue Serre te demourra destrebort devers l’est.
CHAPITRE 61 – Pour la Coste de Bretaigne
Et premier : du Four et de la Banche.
Si tu veulx aller au bas, le long de la Coste de Bretaigne, mectz le clochier de la Grant Guerrande et l’autre petit clochier que voyrras pres de luy, mectz les a ouvert l’ung de l’autre, le petit devers bas du grant ; et n’aye doubte d’aller hors et passer entre le Four et la Banche ; et tu trouveras. xij., .xiiii. et. xvi. brasses ; et y a plus de demye lieue de large entre le Four et la Banche.
La poincte qui est le travers de Guerrande, que l’on appelle le Port Hairault et l’Isle de Dumet gisent nort noroest et su suest.
[71r]
La Poincte de Guerrande et la Poincte du Bon Sainct gisent noroest et suest – et appelle l’on celle pointe la Croix de Guerrande. Le prochain clochier en amont, c’est Sainct Grimoloys. Et la prochainne boye est le Poleguyen. La prochainne poincte en amont du Dumet devers l’est, c’est Pyriac ; et est celle poincte dangereuse, car elle va moult hors des dangiers qui la sont.
La Croix de Guerrande et Pierre Percee gisent est et oest ; et prans ung quart du suest et du noroest.
CHAPITRE 62 – S’ensuyt de Morbien
Si tu veulx entrer en Morbien, range la poincte devers l’est ; et te garde d’une basse qui est en terre d’elle, devers l’est en venant vers le Bon Sainct.
Et quant seras aussi avant dedans comme celle grosse poincte qui est devers l’est, qui faict l’antree, range devers l’oest a la sonde si tu veux, car il y est plat, si n’estoye en meillieu de chenal jusques a la poincte, qui est plus dedans, qui est le travers d’une monjoye de pierre haulte et grande come ung monceau de sel, laquelle te demourra devers l’oest.
Et quant seras le travers d’icelle poincte, donne luy bon ryn, car elle est et va bien hors en chenal et au dehors d’elle ; et de ce qui paroist est soubme jusques bien avant. Et en amont d’elle et pres d’elle, y a ung banc de rochier qui est soubme et sus lequel ne demoure guaisre d’eaue de basse mer – n’y a que brasse et basses. Et par ce, donne luy bon ryn, car en chenal est parfond assés et puys que c’est basse mer. Et pour toy garder d’elle et d’icelluy banc, quant seras le travers d’elle, va en requerant une boyee de sable que voyrras sus le nort d’elle, l’autre bort du chenal, jusques que trouves parfond ; et il y aura .xiiii. brasses et .xviij. en chenal et vase ; et te garde de l’Isle des Chevres, qui est presque en meillieu de chenal et est le travers de la grosse poincte qui fait le Partuis de la Jument devers le nort, par lon va a Vanes, et icelle Isle de Chevres couvret de plainne mer ; et te demourra destrebort pour aller en la Chenal du Raix et pour passer a Lomaria. Mais pour sçavoir quant seras le travers de luy ou d’icelle [71v] grosse poincte, il y a ung village en su de l’eglise de Lomaria, le prochain de luy, ou il y a de grans arbres et haultz. Et quant icelluy village sera par my la montjoye des pierres susdites qui sont devers l’oest et sont en su de l’eglise le village par my elle, et tu seras le travers de l’Isle es Chevres et a l’entree devers le su, et aussi pour toy garder d’icelluy Isle es Chevres, il fault que mette ung clochier que voirras en nort noroest de toy sus terre que l’on appelle Badan par my l’isle qui est en amont de l’Isle es Chevres, qui sera le segond isle que voirras si l’Isle es Chevres ne paroist, qui est en amont de la grosse poincte qui fait le Partuis de la Jument, qui te demourra devers le nordest. Et quant auras icelluy clochier dessusdit par my celuy isle et tu seras en mer de l’Isle es Chevres ; et a bon ryn de l’un devers l’oest ; mes si tu mectoys ledit clochier a ouvert de l’isle la largeur d’ung tref, tu seras bort a bort de luy, c’est le second isle en amont. Et par ce, quant seras le travers de luy et d’icelle grosse poincte, va droit a l’eglise ; et pourras pauser sus deux ancres ou trois ; et ne range pas trop devers l’oest, car il est soubme, mais c’est vase.
Pour antrer en Morbien, il fault que tu ranges sus le nort et sus le nort noroest. Il fault que tu aille le nort jusques a la poincte qui est soubme, qui est devers l’oest. Et aussi, pour toy garder de l’isle susdite et passer devers l’oest de luy, ne ferme poinct ung village que voirras devers le suest en terre de la poincte qui faict l’antree ; ne le ferme point dedans la terre et tu ne craindras rien l’Isle es Chevres[11].
Si tu veulx pauser a Lomaria, pause devant l’eglise a quatorze brasses, car le meilleur y est.
Mes sache que le meilleur paux qui soit en Morbien, et de tous temps, c’est pauser darriere le grant isle susdite et nommé, la on prent ses merches, qui est le segond isle quant l’on antre, excepté celluy des Chevres, lequel couvre, et l’on l’appelle l’Isle es Chevres, lequel est le premier quant il paroist de trois isles ; mes quant il ne paroist point ; il n’y a que deux isles ; et en est la meilleure passee devers le noroest de luy. Sache que il y a bon repox dedans, de tous temps et est parfond assés. [72r] Sache que davant Lomaria n’y a point de bonne tenue ; et par ce, si tu voys mauvais temps, va t’en de troys icelluy isle dessudite.
Si tu veulx entrer en Morbien, va nort et sus le nort noroest.
Si tu bouge de Morbien pour aller le bas la prochainne poincte de Morbien devers l’est, la on est la montjoye des pierres, dessus elle, et la Teignouse gisent nordest et siroest, et passeras en mer de la Tignouse. La Tignouse est une pierre bien haulte et ronde, laquelle est bien loing des autres deux petites isles et autres dangiers qui la sont, nonobstant qu’il n’y a point de passee antre elle et les autres deux petites isles a grant navyres ; et y a deux pierres bien haultes qui aseichant et couvrant de maree, qui ne sont pas si grant et sans conparaison comme ladite Tignouse, mais elles sont plus en chenal que la Tignouse. Et par ce, garde toy d’elle et prens merches a la poincte qui est en nort du Bon Sainct et ladicte Tignouse l’un par my l’autre.
Du Pertuys du Bessic, va a l’est nordest et tu iras querir la poincte du Bon Sainct.
Sache que du plain de mer, y a bonne passee en terre de Merbant devers l’oest, mais il fault ranger bort a bort Merbant a honneur de toy. Et aussi quant l’auras passé, que tu viennes requerre la Poincte de Morbien devers l’oest a la sonde, pour deux isles qui est en l’est nordest de Merbant – et ce puys bien faire en cas de necessité de mauvais temps.
Si tu veulx aller et passer par le Partuys de la Jument, metz les montjoyes de pierres que voirras en hault sus terre en nort nordest de toy, lesquelles te demourront de babort, qui resemblant estre deux petites montaignes au dessus l’autre terre ; metz les l’une par my l’autre, pour toy garder de la basse qui est en meilleu de chenal que l’on appelle la Jument et aussi des Montons. Et que la plus en terre soit ouverte de l’autre devers le suest, et tu seras en meilleu de chenal ; le cousté devers le nort est le plus sain bort a bor, et pareillement, quant auras le village dessusdit qui est en su de Lomaria, ou sont les arbres, et qu’il sera en su de la monjoye des pierres qui est en su de l’eglise, et tu seras le travers des Montons – [72v] mais il sont le plus devers terre et devers le suest ; ce sont les premieres pierres qui sont en entrant en Morbien, du cousté devers l’est ; et aussi n’aye point paour de ranger la poincte devers le nort du Partuys de la Jument, car c’est le plus seur.
L’Isle d’Ieux et Bellisle, come avons dit dessus, gisent noroest et suest.
Et sache que si tu aterres en suest de Belle Isle, que tu voyrras plus tost Bellisle et le congnoistras premier que ne feras Hudic ny Houhac, car il est plus hault qu’ilz ne sont ; et aussi il sont plus en terre que Bellisle de quattre lieues.
Sache que a Hudic, y a une chappelle plus pres du bout d’amont que l’autre. Et en une poincte qui est devers le su de l’isle, en amont de la chappelle, y a cinq ou six maisons. Et au bout de luy, devers le suest, y a deux ou .iii. petites isles. Et au bout de ces isles, y a une pierre haulte et ronde qui s’appelle le Cardinaulx. Et y a du Cardinaulx a Bellisle pres de cinq lieues.
Du Cardinaulx au Four, y a deux lieues.
Du Four a la Banche, une lieue ; et y a bonne chenal entre deux, mais il y fault mercques. Et sont les merques a mectre les deux clochiers de Guerrande a ouvert l’ung de l’autre la largeur d’ung tref le plus hault devers bas. Et sache que la Banche dure jusques a Pierre Persee qui pres est jusques a l’antree de Loyre, la chenal entre deux, entre la Banche et Pierre Parsee.
Entre les Cardinaulx et le Pillier y a une veue. Et ladicte Banche dure quattre lieues.
CHAPITRE 63 – S’ensuyt de Houhac
Sach(e) que si tu veulx pauser a Houhac, qui est la prochainne l’isle de Belle[12] Isle en terre devers l’est en amont, si tu pause a Hohac devers le nort noroest, tu auras bon abris de suest, de su, de siroest et de oest, car il te viendra dessus les Hoez qui sont au bout de bas devers le noroest de l’isle ; et te viendra noroest dessus l’Isle de Cabarain ; et n’y aura pas grant houlle ; et en paux, y aura dix brasses et gros sable et bonne tenue ; mais en aulcuns lieux, y a des pierres ; sonde souvent quant mecteras l’ancre, pour mettre en bon lieu ; [73r] et te viendra suest dessus, la Hoe du suest ; et y aura en l’est suest de toy une haulte pierre qui est bien seure devers mer.
Si veulx aller du cousté devers le suest de l’Isle de Hohac, tu auras abrys de noroest, de oest et de syroest ; et te demourra celle grant pierre dont dessus est dit devers le noroest.
Sache que si es pausé a la boye devers le nort de Hohac, va pour le noroest ; et iras querir le Poinctaux de l’Isle de Cabarain. Si tu vays par le nort ung quart[13] de nordest, tu iras querir Merbanc ; va par le nort nordest, tu iras querir l’entree de Morbien ; va pour le nordest, tu iras querir le Bon Sainct.
Si tu es pausé en la Chambre de Hohac qui est devers l’est suest de l’isle, et est une boyee de sable qui est au travers d’ung petit boys ou il y a une chappelle, tu auras abrys de nort, de noroest et de oest siroest ; et auras une petite isle devers le nort de la basse, ou il y demourra .iiii. brasses de plainne mer et mortes eaues ; et en terre est beau sable ; et y a bonne passee en terre ; et te donnera abrys de nort ; et y aura huyt brasses en paux et beau sable et si tu puys mectre a quattre brasses, car par toute la Chambre est beau font.
Du bout de Hudic d’amont, va par le noroest ; et iras querir la Houe qui est en nort de la Chambre de Hohac ; et n’aye doubte de la pierre qui est entre Hudic et Hohac, combien qu’elle est dangereuse, et est pres que my voye de l’ung a l’autre, et est pres que en rouste. Et par ce, va sus le noroest ou sus le suest.
Et doibz sçavoir que pour toy garder d’une basse qui est le travers du Bon Sainct, ne mectz pas la Montaigne de Cras par my la basse du Banc de Merbant, qui est devant Morbien, car tu iroys droit dessus. Par ce, mectz ladite Montaigne de Cras en terre de Merbant et tu iras en terre de la basse. Et si tu mectz ladicte montaigne en mer du Banc, tu iras en mer de ladite basse. Et pour sçavoir quant seras le travers d’elle, il fault que mecte une tounelle de moulin qui est la plus haulte des deux qui sont par my le pygnon de la baye du Bon Sainct ; et seras [73v] le travers d’elle.
Le Bon Sainct et le Partuys de Beysic gisent est nordest et oest syroest.
Sache que le Partuys de Beysic gist est nordest et oest syroest ; et y a en ce partuys le travers de la Tignouse .xij. brasses et crasoyz. Et du Partuys, va le siroest et iras dedans le Poinctaux de Bellisle devers le noroest ; va par le siroest ung quart d’oest et iras hors du Poinctaux de Bellisle.
Si tu passe par le Partuys de Beysic de vent contraire de bordage, pour toy garder des dangiers quant tu courras sus terre, si entre devers l’est nordest ; garde que ne coure tant sus terre devers le certain, que tu ferme la poincte qui est en noroest du Bon Sainct par my la poincte nommee la Teignose, qui est a l’entree dudit Partuys Beysic ; et elle te demourra destrebort. La Teignose est la premiere pierre de l’entree devers l’est. Et par ce, garde que ne ferme poinct celle poincte, qui est en terre du Bon Sainct, par my ladite Teignose, pour toy garder de deux ou troys pierres qui sont plus avant en Partuys et courant de plaine mer. Et par ce, tien la poincte qui est en nort du Bon Sainct a ouvert de la Teignose devers le su et la Teignose au nort ; et va seurement ; et n’aye doubte jusques aye aporté la Montaigne de Cras par my l’isle le prochain du Cabarain. Et puys mectz le Bon Sainct par my la Teignose, pour toy garder de Cherbon, qui est une maulvaise basse, car il est pres que le meillieu du partuys ; et ne descouvret point ; mais d’une grosse mer ou de vague, il ront merveilleusement et est dangereux. Par ce, mectz le Bon Sainct par my la Teignose comme devant est dit, car il est dangereux de coup de mer, et pour petits navires et pour grans, jusques ad ce que aye apporté la Montaigne de Cras par my le meillieu des deux isles qui sont entre Cabarain et ladite Teignose. Et quant celle Montaigne de Cras sera par my celle chenal qui (est) antre celles deux isles, tu seras le travers desidctes .iii. pierres. Quant la mointaigne sera dedans l’isle le prochain de Cabarain, tu seras passé celles pierres ; et pourras courre sus terre, jusques a ce que aye apporté le Bon Sainct par [74r] my la Tignose ; et n’aye doubte.
Et s’il avient que tu coures sus la mer, pour toy garder des dangiers devers mer, devers le bout de Houhac, devers bas, des que tu auras ladicte Montaigne de Cras par my l’isle le prochain de la Teignose, tu seras en plus destroict ; et seras aussi avant le bas comme la plus horainne poincte des dangiers devers Houhac. Et par ce, ne ferme pas une petite isle que tu voyrras au bout de Bellisle devers le noroest, dedans l’isle, pour toy garder d’icelle poincte devers Houhac.
Et sache que dehors du Partuys de Bessyc, devers l’oest, y a une basse qui ne asseiche point, si n’est de grans eaues[14] et non pas souvent, mais de grosse mer la mer ront dessus et est dangereuse pour grans navyres et parfons ; et est pres que en meilieu et le plus en siroest ; et se appelle le Cherbon ; et sont les merques traversainnes le mouilin de Cabarain par my la maison du duc, de laquelle est au bas de l’eglise de Cabarain. Et pour congnoistre Cabarain et Sarreson, il y a plusieurs maisons. Et pour toy garder d’elles et aller le long, tien le Bon Sainct a ouvert de la Teignouse devers le su ou le mectz bort a bort d’elle.
CHAPITRE 64 – S’ensuyt le paux de Bellisle qui est a notter
Si veulx pauser a Belle Isle devers Lomaria, qui est au bout devers le suest de Bellisle, pause le travers de l’esglise de Saincte Marie, car il y a belle boye de sable ; et auras abrys de nort et noroest et oest ; et y a beau font ; et y a une pierre le travers du poinctaux assez hors.
Si veulx pauser a Belisle devant Polayns, pause le travers de la croix ou de l’eglise qui est pres de l’autre ; et pause a six brasses ou a sept ; et tu auras abris de su, de siroest et de oest ; et te viendra noroest dessus la poincte et suest dessus l’autre poincte. Et de la, si tu vays sus le nort, tu iras querir la grosse Poincte de Cabarain.
Si tu veulx pauser a Bellisle devant Port Senson, qui est le prochain radde du bout de Bellisle devers bas en terre de l’isle, et y voyrras une eglise qui est tout bas rangeant l’eaue ; [74v] et est du cousté devers l’oest du havre par le dedans du havre ; et au dessus d’elle y a plusieurs maisons ; et l’on demoure dedans ledit Port Sanson a sec de basse mer. Et si tu veulx antrer dedans, range du cousté devers l’oest. Et si tu veulx pauser devant, pause a treze brasses et tu trouveras beau font de sable blanc comme coquilles ; et auras abrys de oest, de siroest, de su et de suest ; et te viendra oest noroest dessus le poinctaux ou sont les Poulains ; et au dehors de la prochainne poincte qui est aval du Port Sanson, y a une basse bien hors de terre ; et le travers d’elle en terre, y a une chappelle ; mais de vent de oest, tu auroys meilleur abris devant Polains, car il y a abrys jusques au noroest.
Sache que en terre de Bellisle, y a ung dangier bien loing, pres que my voye de Bellisle et de terre, et ront d’une grosse mer ; et est le travers de Port Sanson entre le Port Sanson et le certain, presque en meillieu. Et par ce, range d’ung bort ou d’autre et non pas le meillieu. Et sont les merques traversainnes au moulin qui est a Cabarain, quant il sera par my l’ance du sable qui est en la grosse terre au bout de bas ; et paroist ledit rochier de basse mer et de grans eaues troys pierres.
Et si tu venoye de la mer en fore et tu aterrasse entre Bellisle et Groye en terre des isles, le travers de Logoal, qui est deux lieues aval de Cabarain, et se montre Cabarain estre une isle et gist est et oest ; et le bout devers l’oest qui est devers terre est tout ront et gros ; et le bout devers l’est qui est devers la mer est long et dougié. Et puys voyrras en terre deux petites isles, de quoy la plus terrienne est le plus gros ; et est devers l’est. Et puys voyrras pres de la, aval, la Montaigne de Cras. Adoncques, tu scauras ou tu seras le travers de Logoal.
[75r]
CHAPITRE 65 – S’ensuyt de Groie
Groye gist est et oest ; et est une isle. A qui est au su de luy, se monstre estre entaillé au bout de bas et en amont est poinctu ; et paroist de loing par troys bosses.
Si tu veulx pauser a Groye, pause devers le nort a huyt brasses et tu troveras gros sable et caillosches ; et si aura abris de vent de su, et de siroest et oest ; et te viendra oest noroest du coureau d’entre les deux terres ; et seras pausé le travers d’une croix et d’une ance de sable ; et demourra la croix devers le su.
Et si tu pause devers le su de la croix, c’est rochier si tu n’es bien hors, mais tu auras meillieur abris d’oest et d’icelle poincte ou est ladicte croix. Va par le su pour doubler une autre poincte basse qui est devers le syroest de l’isle, car elle va bien ven lieuez hors de l’isle. Et par ce, fault que tu coure bien[15] deux lieues par le su, pour toy garder d’elle si vouloys aller le bas et passer hors l’isle devers le syroest.
Et sache qu’il y a une pierre devers l’oest de l’ance ou tu seras pausé le travers d’une poincte, la prochaine poincte de l’ance devers le noroest ; et y a ung moulin le travers d’icelle ance.
Et d’icelle poincte ou est la croix de Groye, va par le nort ; et iras querir le clochier de Nostre Dame de Nermor, qui est a l’entree de Blavet – tu pauseras devers l’oest des Errans.
Sache que en coureau entre Groye et le certain, y a en chenal seize brasses et vase.
CHAPITRE 66 – S’ensuyt de Blavet
Si veulx aller en Blavet en chenal devers l’oest, il fault que aille tant le bas sus terre que tu ayes deux gr(an)s arbres qui sont sus la pointe devers Nermor, qui fait la chenal d’ung cousté devers l’oest, les prochains arbres de la chenal ; mectz ces deux arbres devers l’oest de l’eglise de Nermor la largeur de deux trefz ; et ne aye doubte des Errans, car il te demouront destrebort ; et va sus terre a cestes esmes jusques [75v] voye l’eglise de Sainct Françoys par my la poincte de Lopediran, qui est la poincte devers l’est. Et quant auras l’eglise Sainct Françoys a ouverte de la poincte et rangent elle, va seurement et hardiment au poinctaux devers l’est, jusques voye les deux ruyaux de pierre qui sont sus le poinctal ; et les mectz l’ung par my l’autre ; et va cestes merques seurement au poinctal ; et la range bort a bort a ton honneur, pour la pierre qui est entre les Errans et terre, dont il fault prandre merques au village de Groie, qui resemble une brosse de boys a mectre par my les Errans ; et aussi auras la prouchaine maison du village, qui est en su de la poincte devers l’est ; tu auras celle maison la prouchainne devers le nort du village par my ung puys de sable ; et aussi seras le travers d’icelle basse. Et aussi ne ferme point les deux clochiers de Nermor l’ung par my l’autre ; et qu’il soient ouvert ung petit, pour toy garder d’une basse qui te demourra destrebort, qui est pres la chenal ; et tu ne crains rien ; et va ainsi. Mais prens tousjours merques en ruyas, et les mectz l’ung par my l’autre a cestes esmes, jusques a la poincte ; et n’aye doubte ; et te demourra[16] celle basse qui est par le meillieu de chenal de babort. Et quant[17] seras a la poincte, va jusques le travers du village devers l’est.
Sache que si tu es au Poinctaux de Groye devers suest, va par le noroest, tu iras querir le Poinctaux de Doellans ; et passeras pres d’une basse et en mer d’elle, que l’on appelle le Porc ; et est en nort de la Poyncte de Groye devers l’oest. Et sache que l’avant d’elle, en y a une autre. Et quant seras le travers d’elle, tu auras ung moulin qui est en l’hault de l’antree de Camperlé ; tu l’auras par my une brosse de boys ; et seras en nort du Poinctaux de Groye. Et pour toy garder d’elle et passer en mer, il y a ung petit isle au bas d’une grosse poincte noyre que voyrras aval de Nermor ; ne ouvre poinct celle isle de la poincte ; et tu va hors du dangier susdit.
De Nermor a Camperlé, y a troys lieues,
[76r]
De Camperllé a Doellans, y a une lieue.
La seconde poincte aval de Camperlé, c’est Doellans ; et peut l’on antrer dedans de toutes marees.
Et pour bien cognoistre Doellans, il y a une chappele en hault sus la falloyse, c’est a dire su le hault de la terre devers l’oest.
Pour toy garder du Porc, il y a une maison sus le Poinctaux de Campellé devers l’oest qu’il fault ouvrir d’une brosse de boys et en su du boys.
CHAPITRE 67 – S’ensuyt de Glenans.
Si tu veulx pauser a Glenans devers l’est, a une ance de sable qui est rangent la Poincte de Pain Froit, tu y auras abris de su, de syroest et de oest ; et y aura pres de terre quinze brasses et vase ; mais pause a dix brasses et te demourra la poincte a l’oest noroest. Si veulx pauser devers le nort le travers de la faulte de l’isle en une boyee qui la est, tu auras abris de vent de su, de syroest, de oest syroest ; et bort a bort de terre, y aura dix brasses de basse mer et vase ; et t(r)ouveras sus icelle vase comme coural ; et sera la chappelle de Sainct Nicollas en l’oest de toy et la Poincte de Pain Froit en su suest. Et d’icelle Poincte de Pain Froit, va par le noroest ; et iras querir l’Isle de Mouton, la poincte devers bas ; et va pour l’oest noroest d’icelle Poincte de Pain Froit, qui est devers le suest de l’Isle de Glenans, tu doubleras tretout Glenans ; mais va sus l’oest noroest bien une lieue pour doubler Glenans.
Et si veulx aller hors de Pemmarch, va l’oest ung quart de syroest, pour doubler Pemmarch.
Si veulx passer par dedans Glenans, passe pres de Glenans, car entre Glenans et l’Isle de Mouton, qui est en terre de Glenans, y a deux grans basses de rochiers qui sont my voye de Glenans et de l’Isle de Mouton ; et sont en route pour aller le haut ou le bas. Et par ce, si tu te veulx garder d’elles, si viens du bas, garde que ne ouvre point les Houes qui sont devers le suest de l’isle de Glenans, de la poincte de l’isle que l’on appelle Pain Froit ; et tu ne les crains rien.
[76v]
Et pour sçavoir quant seras le travers d’elles, tu auras la poincte qui est devers l’est de la Montaigne de Malhara par my la plus grosse poincte de l’Isle de Moton, qui est la poincte devers bas ; et est la plus haulte poincte. Et quant auras celle poincte de montaigne par my celluy bout de l’isle, tu seras en l’antree de la basse devers bas. Et quant auras la montaigne par my le meillieu de l’isle, tu seras sus le plus hault.
Et sache que en amont d’icelle, en y a encore une autre, qui ne paroist si n’est de basse mer. Et quant seras le travers d’elles, tu auras la chappelle qui est en l’Isle de Glenans par my une grosse houe qui est le travers de la poincte, la ou est assise la chappelle. Et quant auras celle houe par my la chappelle et qu’elle soit ung petit en l’hault devers l’est de la chappelle, tu seras par my le rochier ; mais pour te garder d’elles, ne ouvre point les houes qui sont devers le suest de l’Isle de Glenans ; et range Glenans, car il est sain bort a bort tout du long. Et par ce, n’aye paour de le rangier du cousté devers le nort.
Sache que aval de l’Isle de Mouton, y a une autre petite isle basse ; et est pres l’ung de l’autre ; et au bas d’icelle isle et plus en mer, y a une autre basse qui ne paroist si non demy jusant de grans eaues ; et par ce, garde toy d’elle.
Si tu veulx pauser a Glynans devers le noroest le travers de la chappelle, il te demourra une grosse houe en suest et la chappelle en su ; et te viendra suest dessus la houe et su dessus l’isle et syroest aussi ; et te demourront toutes les houes devers l’oest ; et trouveras beau font et six brasses et vase ; et si trouveras en la sonde tout le long de l’isle comme coural et desoubz cella est vase et bonne teneue.
De la Poincte de Pain Froit, va sus l’oest noroest ; et n’aye paour ne doubte de Glynans.
CHAPITRE 68 – S’ensuyt de Bonnaudet
[77r]
Si tu es au bout d’aval de l’Isle de Mouton qui est en terre de Glenans et pres de luy, et que le bout de Glenans, sçavoir est une grant houe fourchue qui est au bout d’aval de l’isle qui est fourcheue, te demoure au suest quart de su, va sus le noroest quart de nort ; et tu iras querir l’entree de Sainct Thomas de Bonandet, qui est havre de toutes marees et abris de tous temps, si non de su et de suest qui vient de l’antree ; touteffois il ne te peult nuyre, car il y a tres bon lieu.
Mais pour toy garder des dangiers qui y sont d’ung bort et d’autre, si tu le veulx aller querir, si viens devers Glenans ou de la mer en fore et que tu passe devers l’est de Glenans, il fault que tu mectez Sainct Nicolas de Glenans a overt dehors de la poincte de l’Isle de Mouton, de celle devers l’est aussi, tu passeras devers l’est de l’isle ; et va ainsi jusque aprouche de terre et que voye deux monceaulx de pierres qui sont comme deux hommes, que l’on appelle les Villains, qui sont sus la poincte devers l’est du havre ; mais prens merques a la tour, comme amprés trouveras en escript, car c’est pour passer au bout de l’Isle de Glenans et aller querir la droicte voye et toy garder des dangiers qui la sont.
Et quant voyrras lesdits Villains, pour toy garder de deux pierres qui sont a l’entree au dehors du havre, qui te demourront en antrant devers l’est de toy, qui seront destrebort, dont la plus horaine est la plus haulte et ront souvent la mer dessus de plaine mer, et l’autre est la plus avant et plus en terre d’une boutee d’arbaleste et couvre demy flaux, mais[18] pour toy garder d’elles, quant voyrras les Villains dessudits, qui sont sus la poincte devers l’est, mectz les l’ung par my l’autre ; et que tu voye le plus hault ung petit en terre devers l’oest du bassain ou du plus bas ; et puys va hardiment, car tu es en chenal ; et va ainsi ; mais garde toy d’une croix qui est pres des deux Villains et au dessus d’eulx, et est pres d’icelluy qui est le plus hault, car l’entree est moult bas, et est [77v] pres de la mer. Et par ce, garde bien que les voyes et que tu ne mectz pas ladite croix par my icelluy qui est le bassain, car tu iroys droit sus la pierre qui est la basse, laquelle est plus en terre ; mais mect les deux ruyas l’ung par my l’autre. Et puys qu’ilz seront ung petit a ouvert l’ung de l’autre devers l’oest, tu n’yras que mieulx ; et va ainsi jusques a la poincte devers l’est. Et quant seras de dedans elle, ne range point devers icelluy cousté, mais range devers l’oest a honneur de toy, car l’antree est estroicte, et aussi pour toy garder d’une basse qui est devers l’est, par le dedans de la poincte bien avant en chenal ; et couvre demy flaux ou plus toust. Et par ce, range l’oest quant seras dedans la poincte ; et est celle basse le travers d’une petite ance de sable qui est devers l’oest.
Et sache que le travers de la basse qui est la plus hors, dont dessus ay faict mention, qui te demourra devers l’est, le travers de elle et en terre devers l’oest, y a une basse, qui gist la et est bien hors, qui te demourra de babort en antrant, qui est moult haulte de basse mer. Et par ce, prens merques des royaux, esquelz ay faict devant mention, qui sont sus le poinctal devers l’est ; et n’aye doubte de ranger celle destrebort, si tu la voys, mais elle couvre et ront la mer dessus ; mais garde toy de l’autre qui est plus avant dedans elle, car elle couvre demy flaux.
Et sache que pour toy advertir et garder, qu’il y a troys ruyaux de pierre qui sont sus la poincte devers l’oest, dont il y a deux les plus bas et le tiers est le plus hault, et on y prent les mercques pour soy garder de deux basses qui sont en amont du havre et en amont des deux pierres devantdictes, qui sont a l’antree bien loing en l’est, qui sont le travers de la poincte. Et pour sçavoir quant tu seras le travers d’elles, quant tu auras le plus hault Villain parmy le plus bas et parmy celluy qui est devers le su et tu seras en la plus horaigne des pierres qui sont amont de la chenal, et quant tu auras le plus hault par my le plus bas a celluy qui est le plus devers le nort, et lors tu seras a la basse a [78r] celle qui est la plus en terre des deux ; mais tu ne les crains ryen si tu ne venoye d’amont ou en bordoient en amont du havre.
Item plus, sache que il en y a encore deux autres ruyaulx de pierres qui sont sus le poinctal devers l’oest, qui sont encores plus dedans que ne sont les autres troys devantdictz.
Et quant les auras l’ung parmy l’autre, et lors tu seras le travers de la basse, de laquelle avons premierement faict mention, qui est la prouchainne de terre des deux ou l’on prent merques esdits Villains devers l’est ; et couvre des my flaux ; et est par le dedans la hoe qui te demourra destrebort en antrant.
Pour bien congnoistre Bonaudet et l’antree du havre, sache que en amont de luy et pres du havre bort a bort, et aussi pres de la houe ou il y a une eglise, dedans laquelle eglise tu pourras bien voyr, et en amont y a une grant boyee de sable. Et aussi sache que voyras en aval le travers de Lautudic une grant eglise et une grant tour, que l’on appelle Pont l’Abbé ; et sus la pointe qui est aval, voyrras ung moulin. Et sache que entre celle boyee de sable qui est en amont de Lautudic et l’autre boyee de sable qui est plus amont le travers de la brosse de boys, n’y a pointe de rochiers que une qui faict l’antree de Bonaudet devers l’oest, car devers l’est est sable et la le congnoistras.
Sache que pour toy advertir et garde(r) de une basse qui est dehors de la poincte, qui te demourra devers l’oest, qui est la plus horaigne pointe devers l’oest, et aussi demourra celle basse ou houe devers l’oest bien loing devers la poincte, et y a sus celle poincte. iii. ruyaux. ; mais pour toy garder d’icelle basse, garde que ne te serre a terre d’icelluy costé jusques a ce que aye overte une poincte que voirras dedans le chenal bien avant du costé devers l’oest de la poincte qui faict l’antree de la goulle de la chenal, qui est pareillement devers l’oest ; ouvre celle poincte qui est la plus amont la largeur d’ung grant tref de l’autre poincte qui faict l’antree ou mectz la croix ouverte d’icelle devers l’est la croix devers le chenal de la poincte et tu ne crains rien, sçavoir est la basse qui te demourra devers l’oest qui est travers de la poincte.
[78v]
Et sache que si tu mettoye la croix par my le ruyaux Susain a celluy qui est le plus hault, tu laisseras toutes les houes devers l’oest et passeras par le chenal devers l’est. Mes pour toy garder des pierres qui te demourront devers l’est, qui sont le travers de la poincte, ne va pas tant en terre que fermes les ruyaux qui sont sus le pointal devers l’oest l’un par my l’autre, c’est a dire le plus hault des trois d’un des bassayns jusques ad ce que aye apporté les merches qui s’ensuyvent, savoir est la croix par my le ruyaux Susain comme aprés cy est escript.
Sache que si tu veulx mettre la croix par my le ruyau Susain, c’est a dire par my celuy qui est le plus hault des deux ruyaux qui sont devers l’est du chenal, tu laisseras toutes les houes davant escriptes de babort ; et passeras en terre d’elles devers l’est par icelle chenal ; mes garde toy bien que ne ouvre point la croix du ruyau Susain devers le nordest de luy, car tu iroye sus les houes qui sont dehors la poincte, qui te demourra destrebort ou l’on prent merches pour soy garder d’elles es ruyaux qui sont sus la poincte devers l’oest. Et par ce, si veulx antrer par icelle chenal, gardes bien que tiennes tousjours la croix droit par my le ruyau et qu’ilz soient l’un par my l’autre ; si ne les ouvre ung petit devers le su du ruyau ; et va ainsi hardiment jusques a l’antree de la chenal. Et te garde de la basse qui est en meilleu de la chenal par le dedans de la poincte devers l’est, dont davant est faict mension ; et n’aye paour, car tout vent qui te portera sus le noroest te mettra dedans Bonnaudet.
CHAPITRE 69 – S’ensuyvant les merches pour aller querir Bonnaudet et passer en amont de Glynans et de l’Isle de Mouton
Si es au Bonnaudet et tu veilles venir et aller querir l’Isle de Mouton qui est en terre de Glynans et aller dehors, quant tu seras dehors, il fault que tu ailles sus le suest quart de su. Mes pour mieulx chenoillier, regarde en hault sus terre, [79r] devers le nort tout en terre, sus le plus hault lieu qui soit, excepté sus la Montaigne de Malhara et tu voirras une grant tour et haulte, et ne voirras rien autre chose qu’elle, ny arbres ny autre chose, car la terre est egalle. Et par ce, quant voirras celle tour, mectz la et aporte par my la chappelle ou eglise qui est dedans le havre devers l’est, la ou passeras en travers ; et va ainsi a celles merches jusques my voye du certain et de l’Isle du Mouton jusques voye Glynans, la poincte d’amont que l’on appelle Pain Fret, come avons veu dessus ; ouvre la toute, de l’Isle de Mouton devers l’est ; et puis encore une autre bosse de terre la porchainne de Pain Fret et au bas ; et fault qu’elle soit aussi ouverte dudit Isle du Mouton devers l’est ; et il te demourra ung dangier assés pres de toy, qui te demourra de babort. Et puis quant passeras my voye de terre et ledit isle, apporte la chappelle qui est dedans Glynans ouverte de la poincte de l’Isle de Mouton devers l’est ; et va ainsi pour toy garder de deux ou trois pierres et dangiers qui te demourront pres de toy devers l’oest ; mes va ainsi la chappelle ouverte de l’isle ; et n’aye doubte ; et va ainsi jusques a la poincte de l’Isle de Mouton a honneur de toy.
De la Poincte de Pain Fret, va sus l’oest noroest ; et n’aye doubte de Glynans.
CHAPITRE 70 – S’ensuyt de Pemmarch.
Si veulx entrer en Pemmarch par le chenal devers l’est, laysses toutes les houes de Pemmarch devers l’oest. Et pour toy garder de toutes elles, si es au bas, va tant amont que apporte une brosse de bois, qui est la prochaine de la mer et est la prochaine brosse de la poincte qui est en amont de Pemmarc ; et y a le travers d’icelle poincte plusieurs dangiers en mer bien loing et l’on l’apelle la Forchee ; et te demourront tous ces dangiers destrebort en entrant bien loing. Et par ce, mectz la prochaine brosse de bois que voirras aval d’icelle poincte et la prochaine brosse de la mer bort a bort ; et est une brosse de bois courte et ronde ; et si en a une autre en terre d’icelle et plusieurs autres brosses de bois, [79v] mais cella est la prouchainne de la mer. Et par ce, pour toy garder de tous dangiers et speciallement d’iceulx devers l’oest, mectz celle brosse de boys susdite la prouchainne de la mer par my une grosse pierre haulte et ronde qui resemble estre ung pignon de maison ou une voille ; et est celle pierre bort a bort de la mer et le travers d’elle ; et est rochier ; et en amont entre celluy rochier et la poincte est sable ; et est en amont des houes pres de Pemmarch. Et par ce, pour toy garder de toutes les houes devers l’oest de l’antree en allant sus terre, mectz celle brosse de boys amont devers l’est de la grosse pierre devant nommee la largeur d’ung tref.
CHAPITRE 71 – S’ensuyt de Chenebourc
Si tu pause amont ville qui est la prouchainne aval de Chenebourc et pour bien la congnoistre, tu voyrras deux maisons en hault sus terre qui te demouront devers le suest.
Si pause au Caylloys a Chenebourc, tu auras abris de noroest, et de oest, et syroest, et de su et d’est. Et pauseras vis a vis d’ung village ou il y a une ance de sable bort a bort de la ville ; et si aura huyt brasses de plainne mer, et de basse mer quattre brasses ; il fauldra que tu amarres ung funayn en terre devers le su et l’autre de la mer ; le chasteau te demourra au su. Et sache que pres de la Poincte du Cailloys, pres de terre, y a unze brasses de plainne mer et beau font, gros sable et grosses cailloches. Et si tu es a celle poincte dangereuse, donne luy bon ryn. Et si tu pause aussi hors comme elle, tu ne trouveras que six brasses de basse mer ; et si n’y court nulle maree.
Sache que la Poincte de Cailloys de Chenebourc est une poincte de basse et va en apoinctant devers le nordest.
Si tu pause en l’est nordest de l’Isle Pellee, qui est devant Chenebourc en amont de luy, a unze brasses a beau font, c’est assavoir coquail et cailloches ; et desoubz l’isle, nulle maree n’y court ny de flaux ny de jusent ; et si auras abris de oest, syroest, et de syroest, et de su et de suest ; et te viendra oest dessus la poincte.
[80r]
CHAPITRE 72 – La meilleure cognoissan(c)e qui soit pour cougnoistre Capploit
Si viens de la mer en fore et tu arrives le travers de luy en amont, sache que voyrras en amont de luy une boyee de sable. Et la prouchainne poincte que voyrras a val d’icelle boye de sable, c’est Capploit ; tu y auras abris de siroest, de su, de suest et d’est ; et te viendra nordest dessus la poincte si es pausé a dix brasses ; et si tu pause a quinze brasses, n’auras poinct d’abris de nordest, mais tu seras plus paré.
Sache que la Poincte de Capploit va bien hors. Et par ce, garde toy bien d’elle et luy baille bon ryn ; il y a dehors bort a bort .x. brasses, et unze pres de terre. Et par ce, ne va point plus pres de douze brasses, ou de quinze, si tu ne scay bien comment. Et si tu es ung petit plus hors autant comme la routte de l’est et de l’oest, tu trouveras vingt huyt brasses ou trante ; et seras pres de terre ; et si trouveras rochier ou gros font. Et si c’est la nuyt, ne te aprouche point plus en terre, car tu ne en es point plus loing que a demye lieue de terre, car c’est assés pres de maulvais temps.
Et sache que le travers de la Poincte de Sainct Nicolas de Bareflour, tu trouveras vingt brasses bort a bort de terre. Et par ce, si c’est de nuyt, ne te aprouche point plus pres de .xxviii. ou .xxx. brasses.
S(i) tu depars de Capploit pour aller amont le long de terre et il soit de jour, pour toy garder des poinctes jusques a Sainct Nicollas si bouges dudict Capploit, des ce que tu auras passé la Poincte de Capploit en amont, tu voyrras en terre au dessus Chenebourc d’une poincte de terre roiste et la plus haulte ; ne ferme poinct celle pointe dedans le gros de la poincte de Capploit ;
et tu ne crains ryen ; baille ryn a chascune poincte.
Et sache plus que le travers de une ance de sable que voyrras aval de la Poincte de Barflour, et a une brosse de boys que voyrras aval de luy et pres de luy ; et est le boys pres de la mer ; [80v] et y a une pierre ronde et haulte qui ne descouvre de nul temps ; et ne demoure sus elle de basse mer poinct plus de demye brasse ou de troys quars de eaue. Et au pied d’elle, y a unze brasses et beau sable. Et par ce, garde toy d’elle si tu va le long terre ; et si c’est de nuyt, ne va point plus pres de douze ou quatorze brasses, car au pied d’elle en y a unze, comme ay dit. Et si tu pause, ne pause point plus pres si tu n’es bien avant, car en terre d’elle, y a beau font a huyt brasses ; mais que soye sçavant, et n’y aura point de cours.
Si tu veulx passer en terre d’elle, tu voyrras une petite poincte de rochier aval de l’ance susdicte, qui est aval de Bareflour ; metcz icelle petite poincte de rochier par my une eglise que voyrras aval d’elle et pres d’elle et pres de la mer ; et que l’eglise soit par my une basse qui est en my celle poincte en terre d’elle. Et va cestes esmes, et tu passeras en terre de la pierre susdicte ; mais sache que en amont d’icelle pierre, y a ung banc de rochier sus lequel ne demeure guaisres d’eaue. Et par ce, garde toy de luy : il est le travers de Barflour. L’antree de Barflour est amont de l’eglise ; et garde toy du Poinctaux de Barflour, car il gist hors et est dangereulx. Et sache que au dehors de l’eglise et aval, laquelle est aval de l’ance du sable dessusdit, y a une aultre poincte, laquelle va hors. Et au dehors d’elle, y a deux basses bien hors ; et est celle poincte entaillee dessus par havres. A qui est en terre en amont, donne ryn a chascune poincte.
CHAPITRE 73 – S’ensuyvent les merques pour antrer en Bareflour
Si aterres en noroest de la Houcque ou en l’oest le travers de Chenebourc, a troys ou a quattre lieues de terre, la terre se monstrera estre toute plange et esgalle ; et se monstrera estre deux poinctes basses et poinctues ; et le travers de toy, voyrras la terre tranchee comme une faulte ou comme ung havre, toute roiste et haulte ; et ira celle haulteur vers l’oest : se sera Chenebourb.
[1] galnay
[2] te
[3] Quaut
[4] est
[5] vuoloys
[6] de répété
[7] amoat
[8] je il
[9] ouveret
[10] meillieur
[11] chevers
[12] Imprimé bellee
[13] Imprimé qurrt
[14] Imprimé aeues
[15] cou rebin
[16] demouurra
[17] quant répété
[18] Imprimé mias
