[21r]
ancre a viii. brasses.
CHAPITRE 26 – Du Fier
Le Fier est ung cap, et a ceulx qui sont au bas de luy, il se monstre estre long et bas a la mer. Dehors de luy, y a ung petit isle pres du cap, qui se monstre comme ung farraillon. Et en amont du Fier la prochainne poincte est terre rouge.
[figure « Fier »]
Sache que en amont du Fier, toute la terre est esgalle et plange ; et ne verras plus de haulte terre que une montaigne qui est en terre, laquelle est roiste devers l’est. Et en l’hault d’elle, veoyras une autre montaigne poinctue dessus et non plus comme ceste montaigne.
[21v]
[figure sans légende]
Et la seconde poincte amont du Fier est terre blanche ; et le travers d’elle dehors, y a ung rochoys ; et en amont de celle poincte blanche est Sainct Jehan de Lux qui est havre de barr[e].
De Sainct Jehan de Lux a Fonterabye, y a deux lieu[e]s.
De Fonterabye a Sainct Sebastien, y a quatre lieues.
Sache que tu verras en su de Fonterabye une montaigne qui est haulte et a dessus quattre bosses, comme quattre cornes, qui a nom la Lune.
[figure « Lune »]
[22r]
Si tu veulx aller au passage qui est havre de toute maree, la meilleure congnoissance qui y soit emprés le Fier, c’est Mont Orgueilleux, qui est une grosse montaigne sus laquelle y a une tour assés haulte ; et est entre la Boye de Sainct Sebastian et le passage ; et l’havre de Sainct Sebastian est en l’hault de luy.
[figure « orgueilleux »]
Et puis quant seras pres, tu verras ung gros puys de sable qui est pres du havre en amont, c’est le passage ; il n’y a que une montaigne entre deux, qui a nom la Bataillere.
[22v]
[figure « Bataillere »]
Tu y auras abris de tout temps et pourras entrer de toutes marees, mais il y a une basse a l’entree qui te demourra devers l’oest ; et si ne paroist point mais va par le meillieu. Et a moins de vent que de oest ou oest quart de syroest, tu n’y sçauroys entrer s’il ne faict calme, car il y a grant revoc.
En aval de Mont Horgoilleux, y a une montaigne, laquelle est poinctue d’ung bout et basse et bossue ung petit ;et est bien longue ainssi que tu verras par ceste figure :
[figure sans légende]
L’Isle de Catharie est aval de Sainct Sebastian quattre lieues. Et quant on est au bas de luy, il se monstre estre tel comme cy dessoubz.
[23r]
[figure « Cattharie. »]
Si tu veulx pouser a Catharie, pouse en su suest de l’isle et pres ; et tu auras abris de nort noroest et de oest ; et te viendra oest syroest de entre l’isle et terre, et syroest desus la terre et su et suest aussi ; et il y aura douze brasses de parfond et bonne tenue.
Sache que le travers de Sommaye, y a une montaigne qui s’appelle Hyssaris ; et devers l’est, elle est roiste et bien a pic.
Et sache que entre Deve et Sommaye est terre blanche sus la couste.
De Catharie a Sommaye y a une lieux.
[23v]
[figure « Hyssaris »]
Quant tu seras le travers de Deve, tu veoirras une montaigne qui est bien grande, qui est semblable a cest figure :
[figure « Deve »]
Et quant tu seras pres de terre, tu pourras veoir la chappelle de Saincte Catherine, qui est dessus une montaigne devers l’est, auprés de la couste, en l’hault du havre.
[24r]
[figure « Catherine », « Est »]
Sache que au bas de Laquestyve, y a une montaigne[1] qui est pres de le havre et au bas de luy ; et en amont d’elle et pres de terre, y a une isle que l’on appelle Sainct Nicolas.
Et pour bien congnoistre Laquestive, la meilleure de toutes les congnoissances qui sont, c’est que verras une petite montaigne poinctue[2] qui est dedans, avant que voye Saincte Catherine ny avant que voye l’Isle de Sainct Nycolas.
Et sache que ladicte montaigne qui est au bas du havre se nomme Hogoingne ; et elle est roitte devers la mer et toute blanche et pellee ; et est rangent la mer et en l’hault de Vermeo et pres de luy. Et quant l’on est au bas d’elle, elle se monstre de tele figure :
[figure « Hogoingne. »]
[24v]
Sache que devant Vermeo, y a une isle qui se nomme l’Isle de Essayrault ; et se monstre tel :
[figure « Essayrault », « Hest »]
Sache que quant tu seras aval de Maschessac, il te aparoistra d’itelle manière :
[figure « Maschessac »]
Mais quant tu seras en amont, il se monstre estre plus ront et plus hault du bout d’amont.
[25r]
Si tu veulx pouser a Maschessac, pouse a douze brasses ou a quatorze, et tu auras bon abris de noroest, et de oest, et de syroest, et de su et de su[e]st.
Sache que en aval de Maschessac y a une montaigne roitte et haulte ; et est fourchue et cornue comme ceste figure. Et elle se nomme Zadde.
[figure « Zadde »]
Sache que en amont du Maillart et de l’antree de Plaisance, y a une montaigne bien grosse et bossue ung petit, et ung isle que l’on appelle l’Isle du Maillart, qui est amont.
[figure « Maillart »]
[25v]
Du Maillart a Machessac, y a quatre lieues ; et du Maillart a la Gallee, deux lieues — la Gallee, c’est une poincte longue et de telle manière.
[figure « La Poincte de la Gallee »]
Si tu veulx pouser au Maillart qui est devant l’entree de Plaisance devers le su, tu auras abris de oest, de syroest, de su, de suest, et d’est et de nordest ; et te viendra nort dessus la poincte et oest noroest ; dessus l’autre poincte, il y a bon font, c’est vase et bonne tenue.
Quant vouldras pouser, ne pouse poinct jusques tu aye fermé la terre du bas dedans la poincte qui faict l’entree devers l’oest noroest. Et quant tu l’auras fermé l’une par my l’autre, et tu verras ung petit chemin qui est en sable, rangent la poincte devers le nort par le dedans de la poincte, et icelluy chemin overt d’icelle poincte de rochoys, et la terre de bas fermee dedans l’autre poincte, mouille ton ancre pareement, car il est temps, par ce qu’il fault estre pres de terre ; et tu verras une isle blanche qui est dedans, en laquelle y a une croix dessus qui te demourra au suest ; et en terre de luy verras une poincte de boys, fermé icelle poincte dedans la grosse poincte qui est adroict l’isle ; et tu seras en bon lieu et seras pres de terre. Et il y a huyt brasses de basse mer et vase ; il te fauldra amarrer nort et su et le tiers ancre au noroest. Si tu veulx pouser dedans la Gallee en la Baye de Portegallet, ne pouse poinct jusques ad ce que aye fermé l’eglise de [26r] Sainct Anthon de Castro dedans l’autre terre ; et pouse devers le nordest par le dehors d’une petite poincte qui est la ; et pouse a douze brasses.
Tu doys sçavoir que auprés de Castro, paroist une grosse montaigne. Et quant l’on est au bas d’elle, elle semble estre double et qu’il en ayt deux ; et ce monstre de telle figure et maniere comme ceste figure cy aprés.
[figure « La montaigne de Castro. »]
Les esmes pour pouser a Castro sont telles : car quant tu vouldras pouser, il fault que aye ung arceau de pierre qui est entre l’eglise et une aultre chappelle a ouvert. Et quant tu les auras a ouvert, mectz ton ancre, car tu seras assés dedans. L’eglise te demourra au nort ; et fault que tu aye ung cable au rochoys qui est devers l’eglise [26v] et aussi a icelluy qui est devers l’arceau. Et s’il y a grosse mer, il fault mettre a l’ung et a l’autre si tu puis, et le meilleur devers l’arceau, car il y cheoit grant vague. Il fault que tu soye bien pres a la longueur d’ung cable. Et il te fault porter ung ancre ou deux au su, car la tenue est mauvaise ; et y a maulvais font, car ce n’est que sable et rochoys ; et auras abris de nort nordest, et de nort, et de noroest, de oest, de syroest et de su. Il te fault garnir tes cables de boys, car autrement ilz seront perduz et se mangeroient au fond.
Sache que a l’entree de la Conche de Larede, devers bas, y a une grosse montaigne, laquelle est roitte devers l’est. Et quant l’on est en l’hault d’elle, elle se monstre de telle maniere – et semble estre blanche – et s’appelle Saincte Hoingne.
[figure « Saincte Hoingne »]
Si tu veulx pauser a Larede, mectz le cap que l’on appelle Cavos de Queschos par my Saincte Hoingne, et l’ung par my l’autre ; c’est beau fond de sable. Et nonobstant que tu soye amont de la Conche de Larede, a ses merches tu trouveras bon fond, sa [27r]ble[3] ; et boute l’ancre. Et si puis avoir meillieu[4], il y aura quinze ou seze brasses. Et si tu pause plus hors, tu trouveras rochoys, enquel y a prou raix pour pescher.
Mais si tu veulx pauser a Saincte Hoigne en bon lieu, pause le Travers du Moynne, qui est une pierre qui resemble estre ung moynne ; et est quasi en meilleu de la montaigne de Saincte Hoingne. Et, par ce, si tu veulx pauser a Saincte Hoingne, pause le Travers du Moynne, et par le dedans de luy le travers d’une pierre qui est platte dessus ; et tu trouveras beau font, ardille et forte tenue ; mais que aye bon cable, n’aye paour. Tu auras abris de syroest, d’oest, de noroest, de nort noroest et jusques au nort. Et si nort te faict tort, tu puis bien aller en la Conche de Larede et pourras pauser jusques a troys brasses de basse mer ; et y a beau font et bonne tenue, vase et sable vasoux ; et tu auras abrys de nordest, d’est, de suest, de su et de syroest, mais que aye bon cable et bon ancre ; et amarre nort et su. Garde toy de la poincte devers le nordest, car elle va bien hors, presques au meilleu de la conche ; et est rochoys. Et si y a en terre d’elle et pour le dedans d’elle deux brasses bien maulvaises qui demourent a sec du grant de l’eaue ; et ne seront point plus loing de toy et de ton ancre, si tu pause a troys brasses de celuy devers le nort, des deux pars d’ung cable. Et, par ce, quant tu iras pauser, garde toy bien d’elles – elles sont dev(e)rs le nordest ; pause le plus devers le su, le travers d’une petite tour carree qui est sus une poincte de rochoys, bort a bort de la mer. Et en su d’elle et bien pres, y a une grant tour haulte et blanche et carree, laquelle est dehors de la ville devers le su. Il fault qu’elle soit ouverte devers le su de celle qui est sus le roc, pour toy garder de la basse qui est en la conche comme dit est. Et te fault passer ou su d’elle et en mer et aussi de ladicte poincte qui te demourra devers le nort.
Il y aura en poux dessoubz toy de basse mer deux brasses et dimye et beau font, sable et bonne tenue ; et tu seras en coustu[27v]mes, car pour ne mectre point en coustume, il faut que aye une poincte de rochoys que voirras a la poincte devers l’est, ouverte de la grosse poincte de l’est, qui est icelle poincte comme ung ferraillon ; et elle te demourra au nordest. Tu pourras pouser a troys ou a quatre ou a cinq brasses.
Quant tu seras au nort quart de nordest de Saincte Hoingne, tu voyrras ung groing de pierre qui est dedans Saincte Hoingne, que l’on appelle le Moynne. Elle est toute roitte devers l’est et terre blanche. Mais si tu attere au bas d’elle et tu soye pres de terre, tu ne la congnoisteras point, mais tu voyrras une itelle terre comme est ceste figure cy dessoubz.
Et au debas d’elle sont sables ; et y a plusieurs rochiers par my les sables qui resemblent une terre coute couppee sus la couste ; et est la terre basse entre Saincte Hoingne et l’autre montaigne qui est au bas.
Et entre ces deux grans montaignes et au bas de Saincte Hoingne est Noges,
[figure « Noges. »]
[28r]
la prochainne montaigne qui est aval de Saincte Hoingne sus la mer ; et aval de ceste montaigne, y a une arbre que l’on appelle Cavos de Queschos.
[figure « Cavos », « de Queschos »]
Pour toy garger des deux pierres qui sont dedans Saincte Hoingne, ne ferme poinct les deux tours l’une par my l’autre, car si tu les mectz l’une par my coyn par coyn, tu iras et seras droit dessus.
Sache que si tu atterre au bas de Saincte Hoingne comme le travers de Queschos, que tu voyrras troys itelles montaignes et ainsi figurees comme cy aprés, dont la plus grande et la plus roitte est icelle qui est ainsi detaillee ; et sera la plus en amont des troys et la plus grosse qui soit entre Saincte Hoingne et Sainct Ander ; et est la prochainne de Saincte Hoingne ; et sont toutes trois sus la mer. Et tu seras pres de terre quant les voyrras en ceste figure a moins de deux lieues.
[28v]
[figure sans légende]
De Larede a[5] Sainct Ander, y a six lieues
Sache que auprés de Sainct Ander, en amont, y a deux poinctes pres de la mer et devers la mer ; et s’appellent Cavos de Queschos ; et sont de telle maniere comme cy veoys.
[29r]
[figure « Cavos de Queschos »]
Aval de ces deux poinctes, voyrras l’isle qui est devant l’entree de Sainct Ander ; et y a passee d’ung bort et d’autre de luy, mais la meilleure est devers bas ; et y est le plus parfond. Si le vent te peult arrimer et aussi de grant vagues, est beaucoup meilleure ; il te fault aller sus le su suest ou a tout le moyns sus le su, quart de suest, pour entrer par icelle chenal et passer devers l’oest de l’isle. Et ne range pas trop l’isle du cousté devers l’oest, car il y a une basse bien loingnet de l’isle, jusques soye aussi avant comme la prochainne poincte qui a nom la Magdalenne, qui est la premiere poincte ; et puis iras sus le syroest. Si tu veulx passer devers le suest de l’isle, il fault que ailles sus le syroet pour entrer dedans, et tu pourras bien ranger l’isle du cousté devers le suest, car devers la terre il est soubme.
Pour congnoistre Sainct Ander, tu voyrras le Focqueroys qui est bas et pres de la mer, car la poincte en laquelle il est est basse et au bas de l’isle et au bas de l’ance du sable que l’on appelle Sardyneres. La meilleure congnoissance qui soit pour congnoistre Sainct [29v] Ander, c’est une montaigne poinctue qui est par le dedans, laquelle est couverte d’arbres. Si tu va en une ance de sable qui est au bas de l’Ance de Sainct Ander qui a nom Sardyneres, pause a huyt brasses et tu auras abrys de noroest, de oest, de syroest, et de su ; et te viendra nort noroest dessus la poincte ; et y a beau font de sable. Il y a deux poinctes au dehors d’icelle ance de sable devers le bas, lesquelles il fault fermer l’une par my l’autre pour estre assés dedans, c’est la Poincte du Foucqueroys et la Poincte de la Latte, qui est la prochainne poincte de l’Ance de Sardineres, et l’une par my l’autre ; et tu seras en bon radde ; elles sont au bas de l’ance.
Et sache que si la mer estoit si grosse qu’elle barrast a travers de la chanal entre l’isle et terre et que tu ne puisse entrer dedans, mectz ton ancre en ladicte Ance de Sardyneres et tu ne crainderas rien, mais que aye bon cable et bon ancre, car il y a forte tenue.
Item sache que il n’y a point de foucqueroys de Maschessac jusques a Sainct Ander, si n’est Castro. Et tu pourras congnoistre Sainct Ander au foucquerois et aussi a l’isle qui est devant Sainct Ander, qui est une isle bien haulte et ronde ; et n’est pas trop sainne devers l’oest siroest ; ne le range pas trop d’icelluy cousté, car il y a une basse qui paroist de basse mer ; mais devers le suest, il est bien bon et seur.
Si tu veulx aller et entrer en Sainct Ander, sache que tous vens qui te porteront sus le syroest te metteront dedans Sainct Ander certainement, car il fault aller au syroest. Qui veult passer en terre de l’isle devers le suest et qui veult passer devers l’oest de l’isle qui est la plus grande chenal et la meilleure de vagues et la plus seure, il fault aller au su suest, a tout le mains au su quart de suest, jusques tu soyes aussi avant comme la premiere poincte qui est au dedans de l’isle devers le syroest, laquelle poincte est bien seure ; et la puys bien renger. Et y a une chappelle par le dedans d’elle, que l’on appelle la Magdalenne. Et puys, d’icelle poincte, il fault aller au syroest et va jusques soye le travers de ladite [30r] chappelle, qui est sus une poincte de rochoys bort a bort de la mer, qui est bien loing l’avant de Pierre Percee en syroest ; et pause en l’est d’elle et de la chappelle que l’on appelle Sainct Martin ; et amarre nort et su, car il est assés parfond ;et y a bon font et bonne tenue ;et est la prochainne chappelle de la ville qui soit pres de la mer. Et ne pause point l’avant d’elle, car tu seroys en coustumes si n’as congé d’aller a la ville ; et mectz ton meilleur ancre au su ; et ne mectz pas a sec sans congié ne ne va pas avecques le navire a la ville sans congié, car tu seroys confisqué. Et si tu veulx aller a la ville, pour toy garder d’une pierre qui est dedans bien pres de la ville ou il y a voluntiers une croix de fer dessus et asseiche plus d’une brasse de hault de basse mer, pour toy garder d’elle et sçavoir quant seras en mer d’elle, il y a une montaigne poinctue dessus qui est au bas de la ville bien loing ; ouvre la de la ville et aussi de l’autre terre qui est entre la ville et elle ; et tu ne crains rien ladite basse ou est la croix de fer.
Et pour sçavoir le travers d’elle, tu auras une chappelle qui est en hault sus terre devers le nort de la ville que l’on appelle Sainct Sebastien, a ouvert des faubours et pecherie de Sainct Ander devers l’est, lors tu seras le travers d’elle. Mais quant tu auras ladicte chappelle par my le meur de la ville qui est l’avant de la pecherie, lors tu l’auras passee.
Si tu veulx pauser devant la ville a la meilleure merque qui soit, pour toy garder de la basse ou est ladicte croix, cy est mectre le clochier de l’eglise par my une tour carree qui est en ung veil chasteau et la plus grosse tour du chasteau, laquelle il fault mectre par my ledit clochier. Et lors tu auras passé ladite basse et toutes les autres ; et ne les crains rien, car elles te demourront toutes devers le nort.
Si tu pause devant la dicte ville, mectz les deux tours de la chaynne l’une par my l’autre ; et pause assés hors a dix ou a douze brasses ; et amarre nort et su, car su et syroest y battent [30v] fort. Et, par ce, amarre bien devers le su ; et mectz le meilleur ancre et cable, car il y a maulvays lieu de su.
Sache que devers le nordest de l’isle de Sainct Ander, y a une basse qui demeure bien une brasse a sec de hault.
La prochainne poincte aval de celle du Foucqueroys est soubme bien hors ; garde toy d’elle en allant le bas ou le hault.
Les deux prochainnes poinctes qui sont au bas de Sainct Ander et de l’Ance de Sardynieres se monstrent itelles.
[figure « Le Foucqueroys de Sainct Ander. », « La poincte de la Late. »]
Sache que la montaigne en laquelle est la Tour de Lyncres, quant tu seras au bas d’elle, elle se monstre estre telle et est forchue dessus comme ceste figure.
[figure « Oest », « La Tour de Lyncres. »
[31r]
En amont de ceste montaigne et pres, verras une montaigne poinctue dessus, qui est par le dedans de Sainct Ander.
Et aval de Lyncres, voirras une autre montaigne poinctue dessus, qui sera en l’amont de Sainct Martin des Aryngnes et est en terre dessus la couste. Et soubz le bout d’aval de la montaigne de Lyncres, voirras du sable bien hault sus terre, qui est bonne congnoissance de Sarresons, car le sable est hault.
Et aval d’icelle petite montaigne et du sable, tu voirras deux farraillons ou trois dont le plus hault des deux faraillons est itel et est rangent Lyncres ; et au bas voirras deux mottes de sable.
[figure « Troys ferraillons »]
Et aval de ces troys ferraillons, voirras une telle poincte et pres deux qui est devers l’est de l’entree de Sainct Martin la poincte est d’itelle manière :
[figure « entree de Sainct Martin »]
[31v]
Sus la poincte qui faict l’entree de Sainct Martin devers bas, y a une tour bort a bort de la mer ; et icelle poincte avecques la tour est d’itelle figure :
[figure sans légende]
Et aval de Sainct Martin et pres, veoyrras une poincte quant seras au bas de luy, laquelle poincte est semblable a ceste icy et est au bas de Sainct Martin :
[figure sans légende]
Et aval de ceste poincte, veoirras une petite ance de sable ; et au bas d’elle, sus la prochainne poincte, verras une chappelle. Et en terre, veoirras une tour devers l’oest sur la poincte. Et puis voirras une autre ance de sable plus grande et plus aval ; et la prochainne poincte au bas d’elle sera l’entree de Saint Vincent, celle devers l’hault, et la poincte devers l’hault qui est toute pellee et est soubme a la mer.
[32r]
Devant l’entree de Saint Vincent, y a une petite isle et asséz grandette et assés haulte ; et au bout d’amont est le plus gros et le plus hault ; et est ront ; et va en appoinctent devers bas et au bout d’amont ; et y a ung ferraillon ; et y a passee d’un bort et d’autre. La meilleure de gros temps et de grosse vague est devers l’oest de ceste isle, nonobstant que la passee est bonne en terre de luy de vent qui arrime et rengent de luy ; et est semblable a cest figure.
[figure sans légende]
Si atteres au bas de Sainct Vincent, tu voyrras les Tranchees de Sainct Vincent qui sont au bas du havre et pres de luy, qui est une terre qui est bien tranchee comme mourceaulx de sel par troys ou quattre lieux. Et si es au bas du havre, tu voyrras deux farraillons comme deux petites isles qui sont a l’entree devers bas ; et y a passee entre terre et eulx et d’ung bort et autre comme devant est dit.
Et si tu veulx entrer devers l’est, renge les ferraillons qui sont comme une isle et te demourront devers le nort, qui sera destrebort en entrant. Mais au dehors d’eulx, y a une basse bien hors au bout devers la mer. Et, par ce, baille leur bon ryn jusques soye par le dedans d’eux et le travers d’eulx ; et le travers d’eulx si tu passe devers l’est.
Si tu passe devers l’oest de ceste isle que l’on appelle l’Isle du Ferraillon et est, [32v] range devers l’oest, car il est le meilleur ; et y a revoc de vent d’oest. Sus la poincte devers l’oest du havre de Sainct Vincent, qui est bien grosse poincte, voyrras une chappelle.
Si atterres le Travers de Luerque qui est au bas de Pareux, et y a huyt lieues d’Abilles, tu veoyrras une chappelle blanche qui est bort a bort de la mer et amont d’elle et pres ; et voirras une poincte ; et ne veoirras point d’autre chappelle que celle entre Luerque et Ribedoe.
De Luerque a Ribedoe, y a huyt lieues.
Si tu atterres le travers de Rybedoe, et tu voirras Montegue, qui est une montaigne haulte. Et si tu es le travers d’elle, tu la veoirras haulte sus l’autre terre ; et voirras sur elle ung itel groingnault comme ceste figure :
[figure sans légende]
Et quant approcheras de terre, tu voirras une petite montaigne en amont de Montegue qui est poinctue et forchue dessus. Quant elle sera amont de Montegue et tu seras le travers de l’entree de Rybedoe ou bien pres, au bas et tantost veoirras la ville.
Sache que au bas de Rybedoe, tu verras une grant tour qui resemblera estre ung chasteau ; et est pres de la mer. Et puys voyrras plus bas une autre tour carree qui n’est pas si grande comme l’autre de grant chose.
[33r]
Et entre celle tour et l’Isle Sainct Cyprian qui est au bas de la, veoirras une grande boye que l’on appelle l’Avre de la Basme ; et en celle boye sont sables le long de coste.
De Rybedoe a Sainct Cyprian y a sept lieues.
Quant verras l’Isle Sainct Cyprian qui est a l’essye de l’Avre de la Basme devers bas et tu soye le travers de luy et pres, et il se monstrera estre tel comme iceste figure, quant seras le travers de luy. Et en terre de luy est sable.
[figure « L’Isle Sainct Cyprian »]
De Sainct Cyprian a Viveres, y a troys lieux ; et y a une poincte entre deux.
Si tu es le travers de l’Avre de la Basme, amont de l’Isle Sainct Cyprian, tu veoirras une poincte de terre qui semblera estre telle ; et est au bas de l’Isle Sainct Cyprian.
[33v]
[figure sans légende]
L’Isle de Sainct Cyprian et Cap de Voyres gisent noroest et suest.
Le cap dessus figuré, quant l’on est en l’hault de luy, il se monstre tel ; et est le prochain cap qui est au bas de l’Isle Sainct Cyprian ; et est pres de luy ; et est amont de l’entree de Viveres ; et est le farraillon dehors devers la mer. Et en terre de luy, est la terre basse ; et semble estre la terre decouppee en terre de luy comme une isle. Et quant aprocheras, il se monstrera estre itel.
Mais quant tu seras en l’est du Cap d’Hortigueres, tu voyrras une itelle poincte, laquelle est amont de Viveres et pres ; et est la poincte dessus figuree ; mais elle est contrefaicte a qui est au bas d’elle, et par especial quant l’on est entre le Cap de Voyres et Hortigueres et se monstre estre itelle.
[34r]
[figure « Le Cap de Voyres »]
En amont de ceste poincte et aussi de l’Isle Sainct Cyprian, quant tu seras pres d’elle, tu voyrras une poincte en amont de l’Avre de la Besme, laquelle se monstre estre telle comme tu voys ceste figure. Et ceste poincte est l’une des deux poinctes devantdictes et figurees ; et est poinctue devers la mer.
[figure sans légende]
Devers l’est de la Boye de Viveres, y a une itelle poincte et se monstre estre comme une isle comme tu voyrras cy aprés figuré :
[34v]
[figure sans légende]
Aval des poinctes devant escriptes et pres a troys lieues de l’Isle Sainct Cyprian et de la poincte devant figuree, la boye entre deux et au bas d’elle, tu verras une grosse isle qui est bien ronde et haulte et forcheue dessus, une baye entre deux, entre le cap devant escript et ceste isle qui est la boye de l’entree de Viveres, car iceste isle est au meilleu de l’entree et boye dudit lieu de Viveres ; et y passe l’on. Et quant l’on est amont de luy, il se monstre tel :
[figure sans légende]
Quant tu seras au bas de ceste isle devant figuree, il se contrefera par apparoissance et se monstera estre tel :
[35r]
[figure sans légende]
De Viveres a Cap de Vayres, y a. iiii. lieux.
Quant tu seras amont de Cap de Vayres, il se monstrera estre d’itelle maniere et figure :
[figure « Farraillon »]
Si tu veulx pauser a Cap de Vayres, pause devers l’est de luy par le dedans de la poincte.
De Cap de Vayres a Ortigueres, y a quattre lieux ; et gisent est et oest.
Amont de Ortigueres est Saincte Martre ; et y a ung havre de barre en amont d’elle, ou il y a une petite montaigne poinctue dessus pres du havre. Si tu es amont de Saincte Martre et du Cap d’Ortigueres, Hortigueres se monstrera estre d’itelle figure. Si tu veulx pouser a Hortigueres, il fault pauser devers l’est du cap.
[35v]
Et quant plus pres seras de luy, et plus roiste il se monstrera, et plus entaillé. Et puys que seras en l’est nordest de luy, il se monstrera itel. Et voyrras les Farraillons plus gros que par avant comme une isle ronde et noire au bout comme cy après.
[figure « Hortigueres. », « Farraillon »]
Quant tu seras en l’est nordest d’Ortigueres, tu voyrras amont du Cap de Vayres une terre basse sur la mer qui est longue pointue ; et est par petites bosses ou montaignes. Et tu voyrras une petite montaigne poinctue dessus, rangent l’antree de Saincte Martre et pres du havre en amont.
Quant l’on est au bas d’Hortigueres, et par especial quant on est le travers de Cyderes, Hortigueres se monstre estre itel cap, si tu es pres de terre :
[36r]
[figure « Aguilles ou Farraillons »]
Les Farraillons qui sont dehors d’Ortigueres, quant tu seras au bas d’eulx, ilz se monstreront teulx comme dessus.
Hortigueres[6] et Cap de Priour gisent nordest et siroest ; et y a de l’ung a l’autre six lieux[7].
Si tu es bien hors et tu soye au bas d’Ortigueres, Ortigueres et Cap de Vayres, les deux ensemble, l’ung par my l’autre, se monsterront une itelle poincte quant seras au bas d’eulx :
[figure sans légende]
Des Hortigueres a Cyderes y a deux lieux ; et est Cyderes au debas d’Ortigueres et la premiere grosse poincte que tu voirras au bas ; [36v] et elle se monstre itelle quant l’on est en l’hault d’elle le travers d’Ortigueres. C’est la poincte de Cyderes, celle qui demeure devers l’hault du havre.
[figure « Ce cap est devers la mer. »]
Aval de ceste poincte et rangent elle, est la boye et entree de Cyderes. Entre ceste poincte, y a une ance de sable que veoyrras aval de ceste poincte et le prochain sable ; et est pres de la poincte, car entre ceste poincte et Cap de Priour, y a deux ances de sable ou troys. Et, par ce, si tu veulx aller et entrer en Cyderes, va entre l’ance du sable la plus en amont de Cap de Priour et le cap devant escript ; et range le cap dessus escript a honneur de toy. Et tu pourras ranger de babort ou destrebort, car en meilleu y a une pierre ; mais range de babort en entrent, s’il t’est possible, si le vent te peult porter, car il te fault aller au suest, mais qu’on ayt doublé la poincte devant escripte.
Quant tu seras amont de Cap de Priour, il te semblera itel ; et semble estre une isle, mais c’est terre certainne. Et devers le noroest, y a deux farraillons en semblance d’isles ainsi que tu voys par ceste figure.
[37r]
[figure « Cap de Priour »]
Quant tu seras au bas de Cap de Priour, il te apparoistra estre d’itelle figure comme icy après :
[figure « Cap de priour »]
Entre Cap de Priour et rangent luy, est sable en terre ; y a une tour assés pres de la mer et pres des villages. Et, par ce, s’il faict cler, tu voyrras la Tour de Fer aval de toy, et pareillement elle est aval de l’entree de la Couloigne.
[37v]
Sache que au bas de Cap de Priour devers le su, tu veoirras une petite isle et assés grandette en su syroest de Cap de Priour. Et en terre de ceste petite isle devers le syroest, veoirras une ance de sable. Et la prochainne poincte que veoirras en syroest du sable sera la poincte qui faict l’entree de la Baye de Ferron, la poincte devers le nort de la baye. Et luy donne bon ryn, car, de grosse mer, elle est dangereuse et rompt dehors bien loing. Et y a de Cap de Priour a celle Poincte de Ferron deux lieues, sçavoir est une a la petite isle qui est entre deux et l’autre a ladicte Poincte de Ferron, et deux autres lieues a la Coloigne. Et, par ce, de Cap de Priour a la Coloingne, y a. iiii. lieues. Sache que en mer de Cap de Priour, si tu es au bas de luy, tu voirras une petite isle et deux farraillons. De Cap de Priour a la Coloigne, va au su suest ; et prens le meilleu[8] du su, car si tu voys au su suest, tu iroys et rangerois devers la terre de Betance. Et, par ce, prens du su.
La Poincte de Ferron, celle devers le nort, est terre rouge et est celle qui est la plus dougee devers le nort ; et aussi est celle devers la mer. Il te fault aller pres une lieues en terre dedans la baye pour estre en radde. Ladicte poincte se monstre itelle dev(e)rs le nort.
[figure « Ferron. »]
[38r]
La prochaine boye de sable que tu veoirras en su de la Baye de Ferron, c’est la Baye de Betances. Et tu veoirras devers le nort de la poincte une isle assez grandette ; et est celle poincte qui faict la baye du cousté devers l’oest ; et y a une petite isle encores plus pres de la poincte. Et iras pauser devers le su suest de celle poincte.
[figure « La Tour de Fer. »]
[38v]
Ceste tour est pres de l’entree et Conche de la Coloigne et au bas d’elle ; et elle te demourra destrebort en allant querir la Conche de la Coloigne ; et donne ryn a deux poinctes qui sont entre ceste tour et ladicte conche. Il y a ung rochier au dehors de ceste tour en mer, sus lequel la mer rompt d’une amarour de temps et d’une grant houlle. Mais nonobstant il y a dessus assés eaues ; et te demourra devers l’oest en antrant qui sera destrebort. Et ne te esbays point quant le voyrras rompre en allant querir ladicte Conche de la Coloigne.
Au bas de ceste tour, la seconde poincte que voyrras est une poincte de terre ronde qui resemble estre une isle ; et amont d’elle et de la tour, voyrras une terre basse a la mer qui resemble une poincte comme une isle ; et plus bas, voyrras une terre basse qui se monstrera comme une grande poincte qui est basse a la mer. Et au dehors d’icelle poincte, voyrras une isle que l’on appelle Syssergue.
An l’an mil quattre cens quattre. xx. et quattre,
Du moys de juing le jour le vingt quatre,
Pierre Ferrande, pour apprendre,
Escript par figures[9], pour entendre
Les figures et aussi le memoyre
Du pays d’Espaigne et de la terre,
Pour apprendre et introduyre
Ceulx qui de la mer voulent vivre.
Prions Dieu pour luy, roy de gloire,
Que en paradis ayt son repaire.
Amen
CHAPITRE 27 – S’ensuyt aulcune reddite et recordation des choses susdictes avecques demonstration tresnecessaires pour congnoistre plusieurs routes aprés
[39r]
Les Barges d’Olonne et les Pennes de Cousson gisent nordest et syroest. Les Pennes de Cousson, c’est une terre qui est bien longue et poinctue au dehors de l’autre terre ; et est terre blanche ; et au dehors d’elle, y a ung petite isle ront et deux farraillons.
Si tu veulx aller en Abilloys, qui est au bas des Pennes de Cousson, tu auras abrys de nordest et d’est, de suest et de su. Si tu veulx entrer en Abylloys, renge la poincte devers l’est tant pres que pourras, car la terre est sainne et sure ; et est roicheau qui est roiste. Et quant seras le travers d’une ance de sable, tu pourras bien pauser, car il y a bon paux.
Si tu veulx plus avant amont sans arrester, des que seras le travers de l’ance, tien toy par le meillieu de la chenaulx, pour une basse qui te demeure de babort, qui est a l’yssue de l’ance de sable ; et va sus jusques le travers d’une autre pierre qui te demourra destrebort, qui est bien seure et a nom la Cormarane ; et puys t’en va jusques soye le travers d’une montaigne dont la terre est rouge ; et ne la range point. Mais quant seras le travers d’elle, voyrras la Cormaranne hors de la poincte qui est a l’entree, la largeur d’ung tref ; et va sus jusques soye le travers d’une jonchere ; et la y a bon paux ; et pourras la prendre le pillot.
De Abilloys a Rybedoe, y a dix huyt lieues.
Si viens d’Abilloys a Ribedoe et tu veille atterrer dedans Rybedoe, seille tant avant que voye ung chasteau qui est dedans le chenal ; et te garde de la poincte devers l’est. Et quant veoirras celluy chasteau qui a nom Casteau Poul par my le meillieu de deux poinctes qui font le chenal, va sus dedans contre une ance de sable qui te demourra de babort, jusques fermez celluy chasteau dedans la poincte devers l’est ; et puys t’en va par le meilleu de la chenal, jusques devant la ville ; et il y a bon paux de six a sept brasses et vase.
Rybedoe et le Cap de Saincte Marie de Bellisle : nordest et [39v] syroest ; et prens ung quart du nort et du su. La meilleure congnoissance qui soit pour congnoistre Rybedoe si est Montegue. Montegue est une montaigne ronde qui est bien pres de la mer ; et est haulte ; et y a dessus des arbres ; et se monstre de loing comme u[n]g chappeau ; et est au bas de l’entree de Rybedoe. Et puis, quant seras pres, voirras une tour qui est sus une montaigne, au dessus de la ville devers bas, bien une lieue ; et sus la poincte devers l’est y a deux montjoyez de pierre.
Le travers de Sainct Cyprian qui est entre Rybedoe et Viverez, si tu sonde a cent brasses, tu seras a quattre lieues de terre.
De Rybedoe a Viveres, y a dix lieues.
En l’est de Viveres, y a une petite isle ront ; et pres au bas de d’icelle isle est la Poincte de Viveres, qui a nom la Poincte d’Amouras. Et puys au bas de Viveres est une isle plus grande qui te demourra devers l’oest bien loing, car la baye est large.
De Viveres a Cap de Vaires, y a. quattre grans lieues.
Cap de Vayres est ung cap qui se monstre long quant l’on vient de l’hault ; et est hault en terre ; et en meillieu, y a une petite montaigne dessus qui est poinctue.
Glenans et Cap de Vayres : nordest et syroest ; et prens ung quart du nort et du su.
De Cap de Vayres a Ortigueres, y a quattre lieues.
Ortygueres et Ridelles : est nordest et oest syroest. Ortigueres se monstre une grosse poincte haulte et roiste quant l’on vient de l’hault ; et sus le hault du cap, en terre, y a une petite montaigne forcheue dessus. En l’hault d’Ortigueres, y a ung havre qui a non Saincte Martre, qui est havre de barre ; et y a a l’entree une petite montaigne poinctue ; et y a au dehors dudict havre ung banc de rocheau plat ; et est le plus devers l’est nordest dudict havre. Quant l’on vient de la mer en fore Ortigueres se monstre ung cap roite qui est tout decouppé devers la mer ; et au pied [40r] de luy y a deux farraillons ou troys ; et puis au bas de luy, la prochainne poincte que l’on voirra, qui est pres dudict cap, c’est Cyderes.
Ortigueres et les Barges d’Olonne : nordest et syroest ; et prens ung quart de l’est et ung quart d’oest.
De Ortigueres a Cap de Priour, y a six lieues.
Cap de Priour est ung cap qui est ront devers la mer ; et si va en appoinctant a terre ; et si est entaillé dessus tout du long. Et au dehors de luy y a ung farraillon.
CHAPITRE 28 – S’ensuyvant les routtes de Cicille pour venir en Flandres
Sainct Lucas de Baremede et le Cap de Saincte Marie : est et oest.
Le Cap de Saincte Marie est ung cap de montaigne qui est hault et ront ; et y a en terre dudit cap une grant baye devers le nordest. La meilleure congnoissance qui soit pour congnoistre Sainct Lucas de Baremede si est Grenade, la montaigne qui est haulte et longue dessus l’autre terre.
Et y a de Sainct Lucas de Baremede au Cap de Saincte Marie .l. lieues.
Le Cap de Saincte Marie et le Cap Sainct Vincent sont est et oest.
Le Cap de Sainct Vincent est une poincte de terre longue a la mer ; et en terre d’elle est la terre haulte ; et y a de l’ung a l’autre cinquante lieues.
Du Cap de Sainct Vincent a la Berlingue y a cinquante six lieues ; et gisent nort et su.
Le Cap de Sainct Vincent et Rocque de Cyntez gisent nort et su ; et prens ung quart de norest et de suest.
Rocque de Cyntes et la Berlingue gisent nort noroest et su suest.
La Berlingue est une montaigne grosse haulte et ronde dessus ; et est roiste devers la mer ; et au pied d’elle y a deux farraillons ; et en terre d’elle y a abrys ; et est l’entree devers l’est la meilleure ; et auras abrys de su, de syroest, de oest et de noroest.
[40v]
La Berlingue et le Cap de Fineterre gisent nort et su ; et tu iras au dehors de la Berlingue quattre lieux ; et y a de l’ung a l’autre soixante deux lieux.
Le Cap de Fineterre et Lislart gisent nort nordest et su syroest ; et passeras dehors de Ayssans dix lieux ; et y a de l’ung a l’autre cent soixante lieux.
Si tu atterre le travers de Sorlingues et tu sondes a soixante brasses, tu trouveras sable blanc menu come orologe ; et en y a par my de long et plat comme balle d’orge ; et tu ne seras poinct loing de terre plus de dix lieues.
CHAPITRE 29 – S’ensuyt du Partuys d’Anthioche
Le Partuys d’Anthioche et le Cap de Fineterre sont est et oest ; et passeras au dehors de Fineterre six lieux.
Le Partuys d’Antioche gist est nordest et oest siroest.
Si tu viens de la mer querir le partuys et veillez entrer dedans et aller querir la Paillisse, pour toy garder de Lavardyn, il fault que tu mectez les deux tours de la chainne de la Rochelle a ouvert l’une de l’autre, et le clochier de Sainct Nicolas a ouvert de la tour devers le suest, la largeur d’ung tref ; et va telle voye jusques aye fermé les deux pointes qui sont au bas du plon, l’une dedans l’autre la largeur d’ung tref ou plus ; et n’aye doubte de Lavardyn.
Si tu veulx entrer par le partuys qui est nort et su, va sus le nort jusques aye le clochier de Sainct Maurice a la broce du bois qui est entre le plon et la leu.
Si tu entre par le Partuys Breton et tu veille aller amont, pour toy garder de Lavardyn, va tant avant que aye le clochier de Sainct[10] Ladre de la Rochelle une brasse a ouvert du clochier de Sainct Jehan du Perrot, devers le suest ; et ne trouveras point moins de troys brasses.
Le Partuys de Bretaigne gist noroest et suest.
Si veulx issir pour ledit Partuys, va sus l’oest noroest ; et iras devers mer a l’Isle d’Ieux.
[1] montaigae
[2] pionctue
[3] sa|sable
[4] meillieur
[5] a mq.
[6] A Hortigueres
[7] Imprimé liuex
[8] meilleur
[9] fignres
[10] tainct
