[11r]
luy, lequelle fut acompaigner jusques a la Breesle ou fut lleur disnee, et la prindrent congelung de lautre, mais il ny eut pas grant mistere, car dedans trois ou quatre jours apres faisoit son compte ledit Bellabre de suyvre son compaignon et nattendoit seullement que une couple de grans chevaulx qui luy venoient despaigne. Le bon chevalier sen alla tousjours a petites journees par ce quil faisoit mener grans chevaulx, toutesfois il fist tant quil arriva a trois petites lieues de la ville Dayre, ou de la envoya ung de ses gens pour avoir logis. Quant les gentilz hommes de la compaignie sceurent que Picquet estoit si pres monterent tous ou la pluspart a cheval pour luy aller au devant tant grant desir avoient de le veoir, car chacun estoit desja abreuve de ses vertus. Si estoient plus de six vingtz tous jeunes gentilz hommes qui trouverent leur compaignon a demye lieue de la ville. Il ne fault pas demander silz se firent grant chere et le menerent joyeusement devisans de plusieurs choses jusques dedans la ville ou aux senestres estoient les dames lesquelles avoient desja entendu la noblesse du cueur du bon chevalier Picquet, chascune desiroit a le congnoiste Ils le virent, mais non pas si a leur ayse quelles firent depuis. Icelluy bon chevalier fut mene par ses compaignons a son logis ou le soupper estoit desja prest, car ainsi lavoit ordonne a son homme quil avoit envoye devant. Si demourerent une partie de sesditz compaignons avecques luy qui menerent joyeuse vie luy demandant de son estat et comment il estoit bien heureux a son commencement davoir si bien fait contre messire Claude de vaudray et le louoient a merveilles Mais oncques le bon chevalier ne monstra semblant den avoir joye, ains respondoit courtoysement a leurs parolles, et disoit. Messeigneurs mes compaignons le los quon me donne est a grant tort, il nya pas encores tant de bien en moy que je sceusse monter a grant pris, mais sil plaist a nostre seigneur moyennant vostre bonne ayde je parviendray a estre ou nombre des gens de bien. Or fut ce propos laisse et parla on dautres matieres. Si commenca a dire lung des gentilz hommes de la compaignie appelle Tardieu homme joyeulx et facecieux adressant ses parolles au bon chevalier. Compaignon mon amy je ous advise quen toute la picardie nya poiunt de plus belles dames quen ceste ville, dont vostre hostesse que navez encores veue en est lune, elle est allee aux nopces dune sienne niepce, demain retournera si la verrez a vostre arrivee faire parler de vous, et par bien faire puissez acquerir la grace des dames de ceste contree, il ya long temps quil ny eut pris donne en ceste ville, je vous prie tant que je puis quen vueillez donner ung entre cy et huyt jours, et ne me reffusez pas sil vous plaist pour la premiere requeste que je vous a jamais faicte. A quoy respondit le bon chevalier. Sur ma foy monseigneur de Tardieu quant me demanderiez une beaucoup plus grosse chose croyez que nen seriez pas escon
[11v]
duyt, comment le seriez vous de ceste cy qui me plaist autant ou plus que a vous Et sil vous vient a plaisir menvoyer demain matin la trompette et que nous ayons conge de nostre cappitaine, je feray en sorte que serez content. Tardieu luy dist. Ne vous souciez de conge, le cappitaine Loys dars le nous a donne pour tousjours, car ce nest point pour mal faire. Il nest pas a present icy, mais il y sera dedans quatre jours : si mal ya jen prens la charge sur moy. Et bien doncques respondit le bon chevalier, demain sera execute vostre vouloir. Longuement demoura en propos la compaignie tant quilz ouyrent sonner mynuyt : si prindrent conge les ungs des autres jusques a lendemain matin que ledit Tardieu noublia pas a venir au logis du bon chevalier son nouveau compaignon et luy amena une trompette de la compaignie, et le premier bon jour quil luy donna ce fut. Compaignon ne vous excusez plus vecy vostre homme.
¶ Comment le bon chevalier fist crier dedans Ayre ung tournoy pour lamour des dames, ou il y avoit pour le mieulx faisant ung ung bracelet dor et ung bel dyament pour donner a sa dame.
¶Chapitre .xe.
COmbien que grant besoing eust de repos le bon chevalier sans paour & sans reprouche a cause du long travail, pour le propos que luy avoit tenu son compaignon Tardieu ne dormit pas trop la nuyt : ains pensa comment seroit fonde son tournoy, ce quil mist en son entendement : et delibera en soy mesmes de lexecuter comme vous orrez, car quant Tardieu le vint veoir le matin & luy amena la trompette trouva desja par escript lordonnance comme debvoit estre ledit tournoy, qui estoit telle. Cest que Pierre de Bayart jeune gentil homme, et aprenti des armes, natif du Daulphine, des ordonnances du roy de France, soubz la charge & conduicte de hault et puissant seigneur monseigneur de Ligny faisoit crier et publier ung tournoy au dehors de la ville Dayre, et joignant les murailles a tous venans au vingtiesme jour de Juillet, de trois coups de lance sans lice a fer esmolu et en harnoys de guerre, et douze coups despee le tout a cheval. Et au mieulx faisant donnoit ung brasselet dor esmaille de sa livree, & du prix de trente escuz. Le lendemain seroit combatu a pied apoux de lance a vrie barriere de la haulteur du nombril Et apres la lance rompue a coups de hache jusques a
[12r]
la discretion des juges et de ceulx qui garderoient le camp, et au mieulx faisant donnoit ung dyament du pris de quarante escus. Quant Tardieu eut veu lordonnance il dist. Par dieu compaignon jamais Lancelot, Tristant ne Gauvain ne firent mieulx. Trompette allez crier cela en ceste ville, et puis yrez de garnison en garnison dicy a trois jours pour en advertir tous noz amys. Il fault entendre quen la Picardie y avoit pour lors sept ou huyt cens hommes darmes : comme la compaignie du mareschal des Cordes, celles des Escossoys, du seigneur de la Palisse vertueux et triumphant cappitaine, et de plusieurs autres qui par ladicte trompeete furent informez du tournoy. Si se misrent en ordre ceulx qui si voulurent trouver : car le terme nestoit que de huyt ou dix jours : toutesfois il ne sen trouve pas si peu quilz ne feussent quarante ou cinquante hommes darmes sur les rencs. En ces entrefaictes et en attendant le destre jour arriva ce gentil chevalier le cappitaine Lors dars, lequel fut tresjoyeulx destre venu dheure pour en avoir so npassetemps. Sa venue sceue par le bon chevalier, luy alla faire la reverence & se firent grant chere lung a lautre. Encores pour mieulx renforcer la feste, le lendemain arriva son compaignon Bellabre qui donna grant esjouyssement a toute la compaignie. Si se delectoient tous les jours a essayer leurs chevaulx et faire bancquetz aux dames, ou entre autres le bon chevalier fist tresbien son debvoir, de sorte que les dames de la ville et plusieurs autres de alentour qui estoient venues pour estre au tournoy luy donnoient le los sur tous les autres, dont toutesfois ne se mettoit en orgueil. Or vint le jour ordonne pour commencer ledit tournoy que chascun se mist sur les rencs. Lung des juges estoit le bon cappitaine Loys dars, & le seigneur de sainct Quentin escossoys lautre. Si se trouverent les gentilz hommes sur les rencs qui furent nombrez a quarantesix, et par sort sans tromperie furent partis, vingt & trois dung coste et vingt & trois dung autre. Et eulx estans prestz pour commencer a bien faire la trompette va sonner Et apres declaira de point en point lordre du tournoy. Si convint au bon chevalier se presenter le premier sur les rencz, et contre luy vint ung sien voisin du Daulphine nomme Tartarin qui estoit fort rude homme darmes. Si laisserent courre lung a lautre, de sorte que ledit Tartarin rompit sa lance a demy pied du fer. Et le bon chevalier lassena au hault du grant gardebras, et mist sa lance en cinq ou six pieces, dont trompettes sonnerent impetueusement, car la jouste fut belle a merveilles. Et apres avoir parfourny leur poindre retournerent pour la seconde, & fut telle ladventure de Tartarin que de sa lance faulsa le gardebras du bon chevalier a lendroit du canon, et cuydoient tous ceulx de la compaignie quil eust le bras perce. Ledit bon chevalier luy donna au dessus d la veue & luy emporta ung petit chapelet plein de plumes. La tierce lance fut aussi bien ou mieulx rompue que les deux autres. Leurs courses
[12v]
faites vint Bellabre, et contre luy se prepara ung homme darmes Escossoys quon nommoit le capppitaine David de fougas qui pareillement firent de leurs trois lances ce quil estoit possible a gentilz hommes de faire, et ainsi deux contre deux jousterent jusques a ce que chascun eust parfourny ses courses. Apres convint combatre a lespee, et commencea selon la premiere ordonnance le bon chevalier, qui du troisiesme coup quil donna rompit son espee en deux pieces, et du reste fist si bien son debvoir jusques au nombre des coups ordonner que mieulx neust sceu faire. Apres vindrent les autres selon leur ordre, et pour ung jour au rapport de tous les voyans, mesmes ainsi que dirent les deux juges ne fut jamais mieulx couru de lance ne combatu a lespee. Et combien que chascun le cappitaine David, ung de la compaignie de monseigneur des cordes nomme le bastard de Chimay et Tardieu. Quant vint sur le soir que chascun eut fait son debvoir se retirerent tous au logis du bon chevalier qui avoit fait dresser le soupper triumphalement ou il y eut force dames : car de deix lieues a lentour toutes celles de Picardie ou la pluspart estoient venuz veoir ce beau tournoy, et y fut fait grande et triumphante chere. Apres le soupper eut dances & plusieurs autres esbatemens, tant quil fut si tard avant que personne se voulsiste ennuyer que une heur apres minuyt sonna. Alors sen allerent les ungs apres les autres aleurs logis menans les dames jusques au lieu ou ilz devoient reposer. Si fut assez tard le lendemain avant quelles feussent bien esveillees, & croyez quil ny en avoit nulles qui se lassassent de donner merveilleuse louenge audit bon chevalier tant des armes que de lhonnestete qui estoit en luy : car nul plus gracieux ne courtois gentil homme neust on sceu trouver en ce monde. Or pour parfaire ce qui estoit commence, le lendemain les souldars tous ensemble se trouverent au logis de leur cappitaine Loys dars ou estoit desja le bon chevalier qui lestoit venu prier de disner en son logis avecques le seigneur de sainct Quentin en la compaignie des dames du soir precedent, qui luy fut accorde. Il convint aller ouyr messe, laquelle echantee eussiez veu les jeunes gentilz hommes prendre les dames par dessoubz les bras, et icelles mener parlans damours et autres joyeulx devis jusques au logis dudit bon chevalier, ou silz avoient fait bonne chere le soir devant, a disner la firent encores meilleur. Gueres ne demourerent seigneurs ne dames au logis depuis le disner : car environ les deux heures chascun qui estoit du tournoy se tira sur les rencs pour achever lordonnance du second jour ou cellluy qui a son penser nestoit pas pour avoir le pris de la premiere tournee esperoit avoir la seconde. Les juges seigneurs & dames arrivez sur le lieu commencea le bon chevalier sans paour et sans reprouche le pas en la maniere acoustumee : et contre luy vint ung gentil homme de Haynault fort estime qui sappelloit Hanotin de sucre qui par dessus la barriere a poux
[13r]
de lance se ruerent de grans coups, et jusques a ce quilz feussent par pieces. Apres prindrent leurs haches quilz avoient chascun de leur coste et se ruerent de grans et reudes horions, tellement quil sembloit la bataille estre mortelle, toutesfois en fin le bon chevalier donna ung coup sur son adversaire a lendroit de loreille, de sorte qui le fist tout chanceler, et qui pis est agenouiller des deux genoulx, et en rechargeant par dessus la barriere luy fist baiser la terre voulsist ou non Quoy voyant par les juges cryerent, hola, hola, cest assez quon se retire. Apres ses deux vndrent Bellabre et Arnaulton de pierreforade ung gentil homme de gascongne, lesquelz firent merveilles aux lances qui furent incontinent rompues. Puis vindrent aux haches et se donnerent de grans coups, mais Bellabre rompit la sienne parquoy les juges les departirent. Apres ce deux vindrent sur les rencs Tardieu et David lescossoys qui firent tresbien leur devoir. Si fist chascun en son endroit de sorte quil estoit sept heures devant que chascun eust aceve, et pour ung petit tournoy ceulx qui y estoient veirent aussi bien faire quilz avoient veu de leur vie. Quant tout fut acheve chascun se retira a son logis pour soy desarmer. Puis apres vindrent tous a celluy du bon chevalier ou estoit le bancquet appreste, et ja y estoient les deux juges, les seigneurs Dars et de sainct Quentin et toutes les dames. Sil y eut devise des deux journees ne fault pas demander, chascun en disoit ce quil luy sembloit. Toutesfois apres le soupper convint en donner resolution & par les juges declairer qui devoit avoir les pris. Si en demanderent a plusieurs gentilz hommes experimentez aux armes en leur foy, et puis apres aux dames en leur conscience et sans favoriser lung plus que lautre. En fin tant par les gentilz hommes que par les dames fut dit, que combien que chascun eust fait si bien son devoir que mieulx ne pourroit, ce neantmoins a leur jugement de toutes les deux tournees le bon chevalier avoit este le mieulx faisant, parquoy remectoient a luy mesme comme celluy qui avoit gaigne les pris de donner ses presens ou bon luy sembloit. Si y eut grand altercation entre les deux juges a qui prononceroit la sentence, mais le bon cappitaine Loys dars pria tant le seigneur de sainct Quentin quen fin promist de le faire. Si sonna la trompette pour faire silence qui fut faicte. Si dict ledit seigneur de sainct Quentin. Messeigneurs qui estes icy tous assemblez, et mesmement ceulx qui ont este du tournoy dont messire Pierre de bayart a donne le pris par deux journees monseigneur Dars et moy juges deleguez par vous tous a donner sentence raisonnable ou seront lesditz pris mieulx employez, vous faisons assavoir que apres nous estre bien et deuement enquis a tous les vertueux et honnestes gentilz hommes qui ont este presens a veoir faire voz armes, et semblablement aux nobles dames que voyez cy en presence avons trouve que chascun a tresbien et honnestement fait son devoir, mais sur tous la commune voix est quele seigneur de Bayart sans blasmer
[13v]
les autres a este de toutes les deux journees le mieulx faisant : parquoy les seigneurs et dames luy remettent lhonner a donner le pris ou bon luy semblera : et sadressant au bon chevalier luy dist. Seigneur de Bayart advisez ou vous les delivrerez. Il en fut tout honteux et demoura ung peu pensif, puis apres dist. Monseigneur je ne scay parquelle faveur cest honneur mest fait : il me semble quil en ya qui lont trop mieulx merite que moy, mais puis quil plaist aux seigneurs & dames que jen soyes juge, suppliant a tous messeigneurs mes compaignons et qui ont mieulx fait que moy nen estre desplaisans Je donne le pris de la premiere journee a monseigneur deBellabre. Et de la seconde au cappitaine David lescossoys. Si leur fist incontinent delivrer les presens ny depuis homme ne femme nen murmura, ains commencerent les dances et apssetemps Et ne se povoient saouller les dames de bien dire du bon chevalier, qui tant fut ayme en la Picardie quoncques homme ne le fut plus. Il y fut deux ans, durant lequel temps se fist plusieurs tournois et esbatemens, ou en la plus part emporta tousjours le bruyt. Et la plus grande occasion pourquoy tout le monde laymoit, cestoit pource que de plus liberal ne gracieuse personne neust on sceu trouver sur la terre Car jamais nul de ses compaignons nestoit desmonte quil ne remontast. Sil avoit ung escu chascun y partissoit. Quelque jeunesse quil eust la premierechose quil faisoit quant il estoit leve, cestoit de servir dieu. Il estoit grant aulmonsnier : et ne se trouva durant sa vie homme qui sceust dire avoir este reffuse de luy en chose dont il ait este requis, sil a este en son posible. Au bout des deux ans le jeune roy de France Charles entreprint son voyage de Naples ou le seigneur de Ligny alla : parquoy envoya de bonne heure querir le bon chevalier, car congnoissant ses vertus et les honnestes propos quon tenoit de luy ne le vouloit pas laisser derriere.
¶Comment le roy de France Charles huytiesme fist son appareil pour aller a la conqueste du royaulme de Naples, lequel il gaigna par sa prouesse et vaillance sans grande effusion de sang.
¶Chapitre .xie.
DEux ans apres ou environ delibera le bon roy Charles daller conquester le royaulme de Naples. Les occasions & moyens pourquoy il entrprint le voyage sont assez contenuz en autres histoires et cronicques : parquoy den faire icy long recit ne seroit quee ennuyer les escoutans et gaster papier. Ce neantmoins comme chascun peult avoir clerement leu & entendu ledit bon roy Charles fist sondit voyage tant honnorablement que impossible
[14r]
seroit de plus. Planta ses justices dedans Romme, fist venir le pape a raison, et entierement gaigna le royaulme de Naples, et y laissa pour son lieutenant general et visroy le seigneur de Monpensier, puis se mist au retour pour venir en France et neut nul empeschement jusques en ung lieu appelle Fournoue ou il trouva bien soixante mille combatans tous Italiens et de plusieurs potentafz Comme du pape, des Veniciens, du duc deMilan & plusieurs autres seigneurs lesquelz estoient deliberez deffaire le bon roy a son retour & le prendre prisonnier par ce quilz estoient asseurez quil avoit laisse une partie de sa puissance ou royaulme quil venoit de conquerir, & navoit avecques luy point plus de dix mille hommes. Ce neantmoin le bon et gentil prince qui avoit cueur de Lyon, comme certain destre bien servy de si peu quil avoit de gens, se delibera les attendre et les combatre Ce quil fist avecques laude de nostre seigneur, & y eurent sesditz ennemys lourde honte et grosse perte Et luy gloire inestimable, car il ne perdit point sept cens de ses gens. Les ennemys en perdirent huyt ou dix milles, et des plus apparens, mesmement les plus grans cappitaines de la seigneurie de Venise y deourerent et plusieurs de la maison de Gonzague, dont est chiefle marquis de Mantoue qui pareillement y estoit, mais ses esprons luy ayderent bien, et le bon cheval surquoy il estoit monte Et neust este que une petite riviere creut merveilleusement, il y eust eu plus gros eschec. A la premiere charge le bon chevalier sans paour & sans reprouche se porta triumphamment par dessus tous en la compaignie du gentil seigneur de Ligny son bon maistre, et luy fut tue deux chevaulx soubz luy le jour. Le roy en fut adverty qui luy fist donner cinq cens escuz, mais en recompense le bon chealier luy presenta une enseigne de gens de cheval quil avoit gaignee a la chasse. De la le roy sen vint par ses journees jusques a Verseil ou il trouva une belle troppe de Suysses qui estoient descenduz pour le secourir sil en avoit besoing. Il demoura la quelques jours avecques son camp, car il vouloit secourir le duc Dorleans son beau frere que le duc de Milan Ludovic sforce et les Veniciens tenoient assiege dedans Novarre. Il y eut plusieurs allees et venues par gens qui se mesloient de faire la paix, de facon quen fin se traicta quelque appoinctement, parquoy le roy sen retourna par ses journees a Lyon, ou il trouva la bonne royne sa loyalle espouse, et en sa compaignie la duchesse de Bourbon sa seur. Il y eut plusieurs gentilz hommes qui napporterent pas de grans biens de ce voyage de Naples, aucuns aussi en apporterent quelque chose dont ilz se sentirent toute leur vie, ce fut une maniere de maladie qui eut plusieurs noms. Daucuns fut nommee le mal de Naples, la grosse verolle, les autres lont appellee le mal francois et plusieurs autres noms a eu ladicte maladie, mais de moy je lappelle le mal de celluy qui la. Le bon roy de France partit de Lyon pour sen aller a sainct denys en France visiter le bon patron ou ses predecesseurs sont ensepulturez & fut deux ans ou trois visitant son royaul
[14v]
me deca et dela menant tresbonne et saincte vie, & maintenant justice tant que tous ses subjectz en avoient contentement : car luy mesmes seoit en chaire de justice deux fois la sepmaine pour ouyr les palinctes & doleances dung chascun et les plus povres expedioit. Il eu nouvelles comment les Neapolitains cestoient revoltez pour Ferrand filz du roy Alphonse, et aussi de la port de son lieutenant general le conte de Monpensier, & que tous ses cappitaines sen retournoient en France. Si proposa y retourner luy mesmes en personne, mais qui veist le temps oportun. Cependant vesquit en son royaulme tresvertueusement, et de sa femme eut trois enfans, mais ilz moururent. Du moys de septemvre mil quatre cens quatre vingtz dixsept le bon prince partit de Tour pour tirer a Lyon cuydant faire son voyage de Naples : mais il se rompit ne scay a quelle occasion. IL sen retourna a Amboise, et le septiesme jour davril oudit an en une gallerie ou il regardoit jouer a la paulme luy print une foiblesse dont il mourut tantost apres, qui fut ung dommage irreparable pour le royaulme de France : car depuis quil ya eu roy ne sen est point trouve de meilleur nature plus doulx, plus gracieux, plus clement ne plus pitoyable Je croy que dieu la retire avec les bienheurez, car le bon prince nestoit tache dung tout seul villain vice. Je nay pas fait grant discours de sa vie, car elle est assez escripte ailleurs.
¶ Comment Loys duc dorleans vint a la couronne de France comme le plus prochain hoir, et fut appelle Loys douziesme.
¶Chapitre .xiie.
PAr le trespas d bon roy Charles et au moyen de ce quil navoit point dhoir masle, Loys duc dorleans plus prochain de la couronne succeda au royaulme, & fut sacre a Reims le .xxviiie jour de may Mil.cccc.iiii.xx.xviii. et print sa couronne a sainct Denys en France le premier jour de juillet ensuyvant Il avoit espouse madame Jehanne de France seur de son predecesseur : mais au moyen de ce quon tenoit que delle ne pourroit sortir lignee et que par force lavoit espousee, craignant la fureur du roy Louis unziesme son pere la fist appeler en jusice Et a ceste occasion le pape delegua juges qui firent et parfirent le proces, et en fin adjugerent quelle nestoit point sa femme : parquoy apres luy avoir laisse le duche de Berry pour son estat espousa la royne duchesse de Bretaigne veufve du feu roy Charles. Si ce fut bien ou mal fait, dieu est tout seul qui le congnoist. La bonne duchesse deBerry Jehanne de France a toute sa vie vescu en sainctete, et a lon voulu dire depuis son trspas que dieu a fait des miracles pour lamour delle. A ladvenement du roy Loys .xiie. voulut vendre toutes les offices royaulx qui nestoient point de judicature, et
[15r]
en retira plusieurs deniers : car il craignoit a merveilles de fouller son peuple par tailles ne autres subsides. Il avoit tousjours son vouloir sur toutes choses de recouvrer sa duche de Milan qui luy appartenoit a cause de madame Valentine sa grant mere, que pour lors luy detenoit Ludovic sforce & paravant son pere : mais ceulx de la maison Dorleans au moyen des guerres qui si longuement ont dure en France contre les Anglois, & aussi la querelle de la mort tant du duc Dorleans que du duc de Bourgongne ny avoient jamais peu entendre. Or a present se voyoit il en estat davoir la raison de son ennemy. Il alla faire son entree a Lyon le dixiesme jour de Juillet Mil.cccc.iiii.xx.xix. puis fist passer son armee en Lastizanne soubz la conduicte du seigneur Jehan jacques de trevolz, et du seigneur Daubigny qui estoient deux sages et vaillans chevaliers : lesquelz dentree prindrent et misrent a sac deux petites places appellees Non et la Rocque. De la tirerent a Alexandrie et assiegerent ceulx qui estoient dedans pour le seigneur Ludovic qui fort bien se deffendirent, mais en fin elle fut prinse. Ceulx de Pavye de ce advertis se misrent en lobeyssance du roy de France. Ledit seigneur Ludovic se voyant en ce party, ainsi delaisse de ses subjectz habandonna Milan et se retira en Almaigne devers le roy des Rommains Maximilian qui le receut joyeusement : car de tout temps avoient eu grandes aliances ensemble. Incontinent apres son partement ceulx de Milan se rendirent aux Francois, dont nouvelles allerent au roy de France qui a diligence y alla faire son entree Et peu de jours apres fut trouve expedient par foce de deniers et autres promesses davoir le chasteau de celluy qui lavoit en garde du seigneur Ludovic, qui fist ung lasche et meschant tour a son maistre, car par la esproit tousjours ledit seigneur recouvrer la duche. Quant les autres places entendirent le chasteau de Milan estre rendu neurent plus despoir, et se misrent toutes en lobeyssance du roy de France : mesmement ceulx de Gennes ausquelz il bailla pour gouverneur le seigneur de Ravastain son prochain parent du coste maternel. En lannee mesmes et le quatorziesme jour doctobre acoucha la royne de France dune belle fille qui fut nommee Claude. Gueres ne sejourna le roy en la duche de Milan, mais apres y avoir laisse gouverneur le seigneur Jehan Jacques, la garde du chasteau au seigneur Despy, et la Rocquete a ung gentil homme Escossoys prochain parent du seigneur Daubigny sen retourna a Lyon. Si bien fist il en la duche avant son partement quil amoindrit les daxes & impositions de la tierce partie dont tout le peuple le loua merveilleusement, et en attira beaucoup le cueur daucuns. Gueres ne sejourna ledit seigneur a Lyon, mais marcha plus avant en son royaulme, vint jusques a Orleans ou il appoincta certain diffrend entre les ducz de Gueldres et de Julliers pour le blason de leurs armes et les fist amys.
[15r]
¶Comment apres la conqueste de la duche de Milan le bon chevalier demoura en Ytalie, et comment il dressa ung tournoy en la ville de Carignang ou Pyemont dont il emporta le pris.
¶Chapitre .xiiie.
AU retour dytalie que fist le roy de France Loys .xiie. en joye et lyesse pour avoir conqueste sa duche de Milan et rendu son ennemy Ludovic sforze fuytif dedans les Almaignes cherchans secours vers le roy des Rommains demourerent les garnisons des francois en la lombardie en tout plaisir, a faire joustes, tournoys et tous autres passetemps. Le bon chevalier qui en son jeune aage avoit este nourry en la maison de Savoye alla visiter une vaillant dame qui avoit espouse son premier maistre le duc Charles de savoye, Blanche sappelloit la dame et se tenoit ou piemont en une ville de son douaire dicte Carignan. Elle qui de tout courtoysie estoit remplie le receut joyeusement et le fist traicter comme sil eust este parent de la maison. Or fault il entendre que pour lors ny avoit maison de prince ne princesse en France, ytalie ny ailleurs ou tous gentilz hommes feussent mieulx receuz ne ou il y eust plus de passetemps. Leans avoir une fort honneste dame qui lavoit gouvernee de jeunesse et faisoit encores, laquelle se nommoit madame de Fluxas, elle y avoit aussi son mary honneste gentil homme soubz lequel se manyoit toute la maison. Il fault scavoir que quant le bon chevalier fut donne paige au duc Charles de savoye ceste dame de Fluxas estoit jeune damoyselle en la maison avecques sa femme, et ainsi comme jeunes gens frequentent voulentiers ensemble se prisrent en amour lung lautre, voire si grande gardant toute honnestete que silz eussent este en leur simple vouloir ayant peu de regard a ce qui sen feust peu ensuyvre se feussent pris par nom de mariage Mais vous avez entendu par cy devant comme le duc Charles alla a Lyon veoir le roy de France Charles .viiie. et luy donna icelluy bon chevalier pour son paige qui fut occasion dont les deux jeunes amans se perdirent de veue pour long temps, car ce pendant le voyage de Naples se fist et plusieurs autres choses se desmeslerent qui durerent trois ou quatre ans sans eulx veoir sinon par lettre. Durant ce temps fut mariee ceste damoyselle a ce seigneur de Fluxas qui avoit beaucoup de biens, & il la prist pour sa bonne grace, car des biens de fortune non eut pas grandement, mais comme femme vertueuse voulant donner a congnoistre au bon chevalier que lamour honneste quelle luy avoit porte de jeunesse duroit encores a son arrivee a Carignan luy fist toutes les gracieusetez & courtoysies que possible eust este faire a gentil homme, et deviserent longuement de leur jeunesse & plusieurs autres choses. Ceste gente dame de Fluxas estoit autant acomplie en beaulte, doulx et gracieux parler que femme quon eust sceu trouver, en son langaige louoit si tres
[16r]
fort le bon chevalier que possible neust este de plus, elle luy ramentevoit son bien faire quant il sessaya a messire Claude de vaudray, le tournoy quil gaigna a Ayre en picardie, et lhonneur quil receut a la journee de Fournoue dont de tout ce estoit si grant bruit en France et ytalie, et tellement le louoit & blasonnoit que le povre gentil homme en rougissoit de honte, puis en apres luy disoit. Monseigneur de Bayart mon amy, vecy la premiere maison ou avez este nourry, ce vous seroit grant honte si ne vous y daisiez congnoistre aussi bien quavez fait ailleurs. Le bon chevalier respondit. Madame vous scavez bien que des ma jeunesse vous ay aymee, prisee et honnoree, et si vous tien a si sage & bien enseignee que ne voulez mal a personne, et encores a moy moins que a ung autre, dictes moy sil vous plaist que voulez que je face pour donner plaisir a madame ma bonne maistresse, a vous sur toutes, et au reste de la bonne & belle compaignie qui est ceans. La dame de Fluxas luy dist alors. Il me semble monseigneur de Bayart, mais que je ne vous ennuye point que ferez fort bien de faire quelque tournoy en ceste ville pour lhonneur de madame qui vous en scaura tresbon gre, vous avez icy a lentour force de vos compaignons gentilz hommes francois, et autres gentilz hommes de ce pays lesquelz si trouveront de bon cueur & jen suis asseuree. Vrayment dist le bon chevalier puis que le voulez il sera fait, vous estes la dame en ce monde qui a premierement conquis mon cueur a son service par le moyen de vostre bonne grace, je suis tout asseure que je nen auray jamais que la bouche et les mains, cr de vous requerir dautre chose je perdrois ma peine, aussi sur mon ame jaymerois mieulx mourir que vous presser de deshonneur, bien vous pris que vous me vueillez donner ung de voz manchons, car jen ay a besongner. La dame qui ne scavoit qui en vouloit faire le luy bailla, et il le mist en la manche de son pourpoint sans en faire autre bruit. Le soupper fut prest ou chascun dist bonne chere, puis apres commencerent les dances ou tout homme sacquita le mieulx quil peut. Madame Blanche devisa longuement avecques sa nourriture le bon chevalier tant que la minuyt sonna qui fut ttemps de se retirer, mais il fault penser quil ne dormit pas toute la nuyt, caril songea a ce quil avoit a faire, et fut resolu du tout en son entendement, car le matin envoya une trompette a toutes les villes de la a lentour ou il y avoit garnisons signifier aux gentilz hommes que silz se vouloient trouver dedans quatre jours apres qui estoit ung dimenche en la ville de Carignan et en habillement dhomme darmes il donnoit ung pris qui estoit ung menchon de sa dame ou il pendoit ung ruby de lestimation de cent ducatz a celluy qui seroit trouve le mieulx faisant a trois courses de lance sans lice, et a douze coups despee. La trompette fist sont devoir, et rapporta par escript quinze gentilz hommes qui avoient promis eulx y trouver. Cela vint a la congnoissance de madame Blanche qui en fut tresjoyeuse, et fist acoustre son eschauffault sur la place ou se devoient faire les courses et le combat. Le tour
[16v]
assigne environ une heure apres midy se trouva sur les rencs le bon chevalier arme de toutes armes & trois ou quatre de ses compaignons, comme le seigneur de Bonvent, le seigneur de Mondragon et autres, ou gueres ne furent que tous ceulx qui devoient courir ne se presentassent. Premier commenca le bon chevalier, et contre luy vint le seigneur de Rouastre ung gaillart gentil homme qui portoit lenseigne du duc Philbert de savoye fort hardy et adroit chevalier qui donna ung beau coup de lance, car il en fist trois ou quatre pieces, mais le on chevalier luy bailla si grant coup sur le hault de sa grant buffe quil len desarma, la perca a jour & fist voller sa lance en cinq ou six pieces. Ledit seigneur de Rouastres reprist sa grant buffe et courut la seconde lance dont il fist tresbien son devoir, car il la rompit aussi bien ou mieulx que la premier, mais le bon chevalier luy donna dedans la veue et luy emporta de ce coup son pannache et le fist tout chanceler, toutesfois il demoura a cheval. A la tierce lance croysa le seigneur de Rouastre, et le bon chevalier rompit la sienne qui sen alla par esclatz Apres eulx vindrent Mondragon et le seigneur de Chevron qui tant bien firent leurs courses que tout le monde les loua. Deux autres les suyvirent, et finablement tous se porterent si bien que la compaignie sen contenta. Les lances rompues convint venir aux espees, mais le bon chevalier ne frappa que deux coups quil ne rompist la sienne et quil ne fist voller hors des poings celle que tenoit celluy qui commbatoit contre luy. Puis les ungs apres les autres vindrent sur les rencs, et si bien firent tous que possible neust este de lamander et fut fort tard quant chascun eut acheve. Madame fist par le seigneur de Fluxas convoyer tous les gentilz hommes pour aller soupper au chasteau qui ne reffuserent pas la priere, et croyez quilz furent bien traictez, car leans en scavoit on bien la maniere. Apres soupper commencerent a sonner les haulx boys et menestriers, ou avant que jen se mist en train de dancer convint donner le pris a celluy qui par raison lavoit gaigne. Les seigneurs de Grantmont et de Fluxas qui juges en estoient demanderent a tous les assistans tant gentilz hommes, dames que aux combatans mesmes, mais tous furent doppinion que le bon chevalier avoit par le droit des armes gaigne le pris, parquoy lesditz juges le luy vindrent presenter, mais tout rougissant de honte le reffusa en disant que a tort et sans cause luy estoit attribue cest honneur, mais que sil avoit aucune chose bien faicte madame de Fluxas en estoit cause qui luy avoit preste son menchon et que a elle pour luy remectoit de donner le pris ou bon luy sembleroit. Le seigneur de Fluxas qui congnoissoit la grande honnestete du bon chevalier nen entra aucunement en jalousie, et vint droit a sa femme avecques le seigneur de Grantmont qui luy dist. Madame present vostre mary que vecy monseigneur de Bayart a qui on donne le pris du tournoy a dit que cest vous qui lavez gaigne au moyen de vostre menchon que luy donnastes, parquoy il le
[17r]
vous envoye pour en faire ce quil vous plaira. Elle qui tant scavoit dhonneur que merveilles ne sen esfraya aucunement, ains treshumblement remercia le bon chevalier de lhonneur quil luy faisoit, et dist ces motz. Puis quainsi est que monseigneur de Bayart me fait ce bien de dire que mon menchon luy a fait gaigner le pris, je le garderay toute ma vie pour lamour de luy : mais du ruby puis que pour le mieulx faisant ne le veult accepter, je suis dadvis quil soit donne a moseigneur de Mondragon : car on tient que cest celluy qui a mieulx fait apres luy. Ainsi quelle ordonna fut acomply sans ce quon en ouyst aucun murmurer. Si fut madame Blanche bien joyeuse davoir fait telle nourriture que du bon chevalier dont tout le monde disoit bien. Le pris donne les dances commencerent qui durerent jusques apres mynuyt que chascun se retira. Les gentilz hommes francois furent encores cinq ou six jours a Carignan en joye & desduyt faisans grant chere, puis sen retournerent en leurs garnisons. Le bon chevalier print aussi conge de madame sa bonne maistresse, a laquelle il ist quil ny avoit prince ne princesse en ce monde apres son souverain seigneur qui eust plus de commandement sur luy quelle y en avoit, dont il fut remercie grandement. Ce fait convint aller prendre conge de ses premieres amours la dame de Fluxas qui ne fut pas sans tumber larmes de la part delle, et de son coste estoit le cueur bien serre. Lamour honneste a dure entre eulx deux jusques a la mort, et nestoit annee quilz ne senvoyassent presens lung a lautre en la ville de Carignan : ne au chasteau durant ung moys ne fut autre propos tenu que de la prouesse, honneur, doulceur et courtoisie du bon chevalier Et estoit autant prise et ayme leans que sil en eust deu estre heritier. Il y trouva luy estant servant en quelque office Pizou de chenas qui avoit este maistre palefrenier du duc Charles de savoye son maistre, & duquel il avoit eu autresfois du plaisir, ce quil vouloit alors recongnoistre : car apres lavoir mene a son logis & fait bien traicter luy donna ung cheval qui valloit bien cinquante escus, dont le bon homme de bon cueur le remercia. Il luy demanda questoit devenu son escuyer du temps quil estoit en la maison de monseigneur de Savoye. Pizou de chenas luy dist quil se tenoit a Moncallier ou il estoit marye et retire, & quil estoit devenu fort gouteux. Le bon chevalier non ingrat des gracieusetez que par le passe luy avoit faictes, par ledit Pizou mesmes luy envoya une fort bonne et belle mulle & monstroit bien en ce faisant quil navoit pas mi en oubly les biens quon luy avoit faitz en jeunesse.
¶Comment le seigneur Ludovic sforce retourna dalmaigne avecques bon nombre de lansquenetz, et reprint la ville de Milan sur les Francois.
¶Chapitre .xiiiie.
[17v]
VOus avez entendu comment le seigneur Ludovic se retira en Almaigne devers le roy des Rommains. Et fault entendre quil ny alla pas sans porter deniers, car au faict qui vouloit entreprendre en avoit bien a besongner, & le monstra par effect : car peu de temps apres son chassement retourna en Lombardie avecques bon nombre de Lansquenetz et quelques suysses, aucuns hommes darmes Bourgongnons et force chevaulx Dalmaigne. Et le troisiesme jour de Janvier par quelque intelligence reprint la ville de Milan dont furent les Francois chassez, combien que le chasteau demoura tousjours entre les mains du roy. A lexemple de Milan se revolterent plusieurs villes en la duche. Entre les autres toutes celles du chemin de Gennes, comme Tortonne, Vaugayre et plusieurs chasteaulx. Quant le roy de France eut entendu le trouble de sa duche : comme prince magnanime et vertueux dressa une grosse armee pour y envoyer, dont il fist chiefz le seigneur deLigny et le seigneur Jehan jacques qui assemblerent leur armee en Lastizanne & commencerent a marcher. Or durant que le seigneur Ludovic fut dedans Milan & peu apres quil leut repris fault que je vous face ung compte du bon chevalier sans paour et sans reprouche : Il estoit demoure par le conge de son maistre en ytalie quant le ruy de France sen retourna pource quil desiroit sur toutes choses les armes, et ymaginoit bien quil ne povoit demourer longuement que le seigneur Ludovic qui estoit alle chercher secours en allemaigne ne retournarst avecques puissance et par ce moyen y auroit combatu, car a la premiere conqueste de la duche ne sestoit pas fait grans armes. Il estoit en garnison & vingt mille de Milan avecques dautres jeunes gentilz hommes et faisoient chascun jour courses les ungs sur les autres belles a merveilles. Ung jour fut ledit bon chevalier adverty que dedans Binaz y avoit trois cens chevaulx qui seroient bien aysez a deffaire, si pria ses compaignons que leur plaisir feust luy tenir compaignie a les aller visiter. Il estoit tant ayme de tous que facillement luy fut sa requeste accordee. Si sappresterent de bon matin et sen allerent jusques au nombre de quarante ou cinquante hommes darmes pour essayer silz feroient quelque bonne chose. Le cappitaine qui estoit dedans Binaz estoit tresgentil chevalier, sage et advise a la guerre, et sappelloit messire Jehan bernardin cazache. Il avoit bonnes espies par lesquelz entendit comment les francais chevauchoient pour le venir trouver Il ne voulut pas attendre destre pris au nyt. Si se mist de sa part en ordre et se tira hors des barrieres la portee de deux ou trois getz darc, si va adviser ses ennemys qui luy donnerent grant joye, car selon son jugement au peu de nombre quilz estoient pensoit bien quilz ne luy feroient point de deshonneur. Ilz commencerent a approcher les ungs contre les autres crians, france, france, mor, more Et a laborder y eut grosse & perilleuse charge, car de tous les deux costez en fut
[18r]
porte par terre qui remonterent a grant peine. Qui eust veu le bon chevalier faire faictz darmes, entamer testes, coupper bras et jambes eust plustost este pris pour lyon furieux que pour damoisel amoureux. Brief ce combat dura une heure quon neust sceu dire qui avoit du meilleur qui faschoit fort a icelluy bon chevalier, lequel parla a ses compaignons disant. He messeigneurs nous tiendrons tout au jourdhuy ce petit nombre de gens, si ceulx qui sont dedans Milan en estoient advertiz jamais nul de nous ne se sauveroit, acoup prenons courage je vous supplie et poussons cecu par terre. Aux parolles du bon chevalier sesvertuerent ses compaignons, et en cryant tous deune voix france, france livrerent ung aspre et merveilleux assault aux lombars lesquelz commencerent a perdre place et a eulx reculler tousjours eulx deffendans tresbien, mais en ce recullement firent plus de quatre ou cinq mille tirant vers Milan, ou quant ilz se veirent si pres tournerent bride, et a course de cheval a qui mieulx mieulx prindrent la fuyte vers la ville. Les francois chasserent tant quilz en furent bien pres. Alors fut crye par quelcun des plus anciens et qui fort bien entendoit la guerre Tourne homme darmes tourne, a quoy chascun entendit, excepte le bon chevalier qui tout eschauffe tousjours chassoit et poursuyvit ses ennemys, de sorte que pesle mesle parmy eulx entra dedans Milan et les suyvit jusques devant le palais ou estoit loge le seigneur Ludovic. Et pource quil avoit les croix blanches tout le monde cryait apres luy, pille, pille Il fut environne de toutes pars et prins prisonnier du seigneur Jehan bernardin cazache qui le mena a son logis et le fist desarmer. Si le trouva fort jeune gentil homme comme de laage de vingt et deux a vingt et trois ans dont il sesmerveilla, et mesmement comment en tel aage povoit avoir en luy tant de prouesse quil en avoit congneue. Le seigneur Ludovic qui avoit ouy le bruyt demande que cestoit. Aucuns qui avoient entendu laffaire le luy compterent, et comment le seigneur Jehan bernardin estant a Bynas avoit este charge des francois qui en fin lavoient repousse jusques dedans Milan, et parmy eulx a la chasse estoit entre pesle mesle ung desditz francois quon tenoit a merveilles vaillant et hardy gentil homme et nestoit riens si jeune. Alors commanda quon lallast querir et quil luy feust amene, ce qui fut fait incontinent.
¶Comment le seigneur Ludovic voulut veoir le bon chevalier sans paour et sans reprouche, et comment apres avoir devise avecques luy le renvoya et luy fist rendre son cheval et ses armes.
¶Chapitre .xve.
[18v]
ON alla incontinent au logis du seigneur Jehan bernardin chercher son prisonnier pour lamener au seigneur Ludovic qui le demandoit. Il eut paour que en la fureur icelluy seigneur Ludovic luy fist faire quelque desplaisir. Il estoit courtois & gracieux gentil homme, si le voulut mener luy mesmes apres lavoir vestu dune de ses robes & mis en estat de gentil homme : si le vint presenter au seigneur qui sesmerveilla quant il le veit si jeune et on luy donnoit si grant los : toutesfois luy adressa son parler en disant. Venez ca mon gentil homme qui vous a amene en ceste ville. Le bon chevalier qui ne fut de riens esbahy luy respondit. Par ma foy monseigneur je ny pensois pas entrer tout seul, et cuydois bien estre suyvy de mes compaignons, lesquelz ont mieulx entendu la guerre que oy : car silz eussent fait ainsi que jay ilz feussent comme moy prisonniers Toutesfois apres mon inconvenient je me loue de fortune de mavoir fait tumber entre les mains dung si bon maistre que celluy qui me tient, car cest ung tresvaillant & advise chevalier. Apres luy demanda le seigneur Ludovic par sa foy de comnbien estoit larmee du roy de France. Sur mon ame monseigneur a ce que je puis entendre il y a quatorze ou quinze cens hommes darmes & seize ou dixhuyt mille hommes de pied, mais ce sont tous gens deslite qui sont deliberez si bien besongner a ceste fois quilz asseureront lestat de Milan au roy nostre maistre Et me semble monseigneur que seriez bien en aussi grande seurete en Almaigne que vous estes icy : car voz gens ne sont pas pour nous combatre. Tant asseureement parloit le bon chevalier que le seigneur Ludovic y prenoit grant plaisir : ce neantmoins que son dire feust assez pour lestonner. Mais pour monstrer quil ne se soucioit pas grandement du retour des Francois luy dist comme par risee. Sur ma foy mon gentil homme jay belle envie que larmee du roy de France & la mienne se trouvent ensemble A celle fin que par la bataille se puisse congnoistre a qui de droit appartient cest heritage : car je ny voy point dautre moyen. Par mon serment monseigneur dist le bon chevalier je vouldrois que ce feust des demain, pourveu que je feusse hors de pruison. Vrayement a cela ne tiendra pas respondit le seigneur : car je vous en metz dehors presentement & feray a vostre maistre : mais davantage demandez moy ce que vous vouldrez et je le vous donneray. Le bon chevalier qui le genoil en terre (remercia le seigneur des offres quil luy faisoit comme estoit bien raison) luy dist. Monseigneur je ne vous demande autre chose sinon que si vostre courtoisie se vouloit tant estendre que de me faire rendre mon cheval et mes armes que jay apportees dedans ceste ville et men envoyer ainsi devers ma garnison qui est a vingt mille dicy me feriez ung tresgrant bien, dont toute ma vie me sentiroys oblige a vous : et hors le service du roy mon maistre & mon honneur saufve le vouldroys recongnoistre en ce quil vous plairoit me commander. En bonne
[19r]
foy dist le seigneur Ludovic vous aurez presentement ce que demandez. Si dist au seigneur Jehan bernardin. Acoup cappitaine quon luy trouve cheval, armes et tout son cas. Monseigneur dist le cappitaine il est bien aise a trouver tout est a mon logis. Si y envoya incontinent deux ou trois serviteurs qui apporterent ses armes & amenerent son cheval, et le fist armer le seigneur Ludovic devant luy. Quant il faut acoustre monta sur son cheval sans mettre pied a lestrief : puis demanda une lance qui luy fut baillee. Et levant sa veue dist au seigneur. Monseigneur je vous remercie de la courtoysie que mavez faicte : dieu le vous vueille rendre Il estoit en une belle grande court. Si commenca a donner de lesperon au cheval, lequel fist quatre ou cinq faulx tant gaillardement que impossoble seroit de mieulx, & puis luy donna une petite course en laquelle contre terre rompit sa lance en cinq ou six pieces, dont le seigneur Ludovic ne sesjoyt pas trop, et dist tout hault ses parolles. Si tous les hommes darmes de france estoient pareilz a cestuy cy jaurois mauvais party. Ce neantmoins luy fist bailler une trompette pour le conduyre jusques a sa garnison, mais il ne fut pas si avant, car ja estoit larmee des francois a dix ou douze mille de Milan qui estoit toute abreuvee de ce que le bon chevalier estoir pris & par sa hardiesse, toutesfois il y avoit eu de la jeunesse meslee parmy. Quant il fut arrive au camp sen alla incontinent devers son bon maistre le seigneur de Ligny qui en riant luy dist. He comment Picquet qui vous a mis hors de prison, avez vous paye votre rancon, vrayement je voulois envoyer ung de mes trompettes pour vous chercher et la payer. Monseigneur dist le bon chevalier, je vous remercie treshumblement de vostre bon vouloir, le seigneur Ludovic ma delivre par sa grande courtoysie. Si leu compta de point en point comme tout estoit alle de sa prinse et de sa delivrance. Tous ses compaignons le vindrent veoir qui luy firent gfrant chere. Le seigneur Jehan jacques luy demanda sil esperoit a veoir la contenance du seigneur Ludovic, et a louyr parler sil donneroit la bataille, a quoy il respondit. Monseigneur il ne ma pas tant declaire de ses affaires ne si avant. Toutesfois a le veoir il est homme qui pour peu de chose nest pas ayse a estonner, vous verrez que ce pourra estre en peu de jours, de luy ne me scauroye plaindre, car il ma fait tresbon et honneste party, la pluspart de ses gens sont dedans Navarre, il a delibere les faire venir a Milan ou aller a eulx.
¶Comment le seigneur Ludovic se retira dedans Navarre doubtant que les francois entrassent dedans Milan par le chasteau, et comment il fut prins.
¶Chapitre .xvie.
[19v]
QUant le seigneur Ludovic congneut larmee du roy de france si pres de Milan et que le chasteau estoit hors de ses mains il se doubta destre surpris dedans la ville, si se desroba de nuyt avecques ce qui avoit de gens dedans Milan, aumoins peu y en laissa avecques son frere le cardinal Descaigne et sen alla veoir son armee qui estoit dedans Navarre, ou quant il fut sceu au camp du roy de France : ses lieuxtenans ou peu de jours avoit que le seigneur de la Trimoille y estoit arrive delibererent laller assaillier audit lieu de Navarre. Le seigneur Ludovic avoit beaucoup de gens : mais ilz estoient de nations fort differentes, comme Bourgongnons, Lansquenetz et Suysses : et par ce trop plus mal aisez a gouverner : car en quelque sorte que les choses allassent peu de jours apres fut rendue la ville de Navarre es mains des lieuxtenans dudit roy de France. Et pource quon faisoit courir le bruyt que le seigneur Ludovic nestoit pas dedans la ville et quil sestoit retire en Almaigne pour la seconde fois, fut ordonne que les gens de pied passeroient par dessoubz la picque : ce quilz firent Et parmy eulx fut congneu le povre seigneur Ludovic qui se rendit quant il veit que force luy estoit au seigneur de Ligny. Je ne scay qui fist laffaire : mais il fut plus que mal servy. Ce fut le vendredy devant pasques flories oudit an mil cinq cens. Le reste de son armee sen alla, bagues saufves. Je croy bien quilz eurent quelque payement, car on disoit que les Suysses que le seigneur Ludovic avoit avecques luy sestoient mutinez a faulte de payement Mais depuis jay entendu du contraire, et que le bailly de Dyjon qui avoit gros credit avecques eulx les avoit gaignez Joinct aussi quen larmee du roy y en avoit beaucoup plus gros nombre quilz nestoient dedans Navarre, et sexcusoient de ne combatre point les ungs contre les autres. Jay veu advenir plusieurs fois cela qui a porte beaucoup de dommage en France. Or quoy que ce feust le seigneur Ludovic demoura prisonnier, fut mene en France droit a Lyon, depuis au liz sainct George, et en fin au chasteau de Loches ouquel il a fine ses jours. Ce fut une grosse pitie : car il avoit este triumphant prince en sa vie : mais fortune luy monstra au derrenier son rigoureux visage. Le cardinal Descaigne son frere lequel estoit demoure dedans Milan quant il sceut linconvenient feist saulver en Almaigne ses deux nepveux enfans dudit seigneur Ludovic devers le roy des Rommains, et de luy se mist en fuyte bien et grossement acompaigne comme de quatre a cinq cens chevaulx vers Boulongne Mais en chemin par ung cappitaine Venicien nomme Souffin de gonzago fut pris prisonner Et depuis le mist entre les mains des Francois : mais il ne rendit pas les meubles et son cariage apres quant ceulx de la duche de Milan sceurent la prinse de leur seigneur : jentendz ceulx lesquelz a son retour sestoient revoltez,
[20r]
ne se retournassent Francois en grant crainte destre pillez et sacayez, mais ilz y trouverent toute doulceur et amutie, car ilz avoient affaire a bon prince et a vertueux cappitaines.
¶Comme le seigneur de Ligny alla cisiter Vaugayre, Tortonne et autres places en la duche de Milan que le roy luy avoit donnees : et dung gentil tour qui fist le bon chevalier.
¶Chapitre .xviie.
IL faut entendre que quant le roy de france eut fait sa premiere conqueste de la duche de Milan, il voulut recompenser ses bons serviteurs en leur donnant terres & seigneuries oudit duche : mesmement au seigneur de Ligny Tortonne, vaugayre & quelques autres places ou ilz sestoient revoltez quant le seigneur Ludovic revint Damlmaigne qui avoit fort fasche audit seigneur de Ligny. Si se delibera de les aller veoir, & mena en sa compaignie le vertueux cappitaine Loys dars son lieutenant, le bon chevalier sans paour et sans reprouche qui portoit son guydon alors, et plusieurs autres gentilz hommes. Si vint jusques a Alexandrie, et faisoit courir le bruyt quil mettroit Tortonne & Vaugayre a sac : combien quil nen avoit nulle ouvlente : car il estoit de trop bonne nature. Quant ses subgectz sceurent sa venue & le bruyt qui couroit de leur destuction, durent & non sans cause bien estonnez. Si eurent conseil ensemble quilz envoyeroient au devant de leur seigneur le plus humblement quilz pourroient pour impetrer misericorde Ce quilz firent et jusques au nombre de vingt des plus apparens le vindrent trouver a deux mille de Vaugayre pour luy cuyder faire la reverence & aulx escuser : Mais combien quon les monstrast audit seigneur de Ligny et les congneust assez, ne fist pas semblant de les veoir, et tira oultre jusques dedans la ville au logis qui estoit pris pour luy. Les povres gens qui estoient allez au devant furent bien estonnez de si estrange recueil. Si se retirerent en leur ville le plus doulcement quilz peurent, et chercherent moyen de parler au cappitaine Loys dars pour faire leur appoinctement envers le seigneur Ce quil promist a son possible faire : car jamais ne fut gentil homme de meilleur nature. Si leur assigna jour a lendemain. Ce pendant alla faire ses remonstrances au seigneur de Ligny luy suppliant quen sa faveur il les voulsist escouter : qui luy fut accorde. Et le lendemain apres le disner cinquant des plus apparens de la ville vindrent a son logis : et testes nues se geecterent a genouls devant luy en criant misericorde. Puis commencea a parler lung dentre eulx homme fort eloquent, et en langage ytalien profera telles ou semblables parolles. Monseigneur vos treshumbles et resobeyssans subjectz et serviteurs de ceste povre ville vostre, de tout
[20v]
leur cueur se recommandent treshumblement a vostre bonne grace, vous suppliant par vostre gentillesse leur vouloir pardonner loffense quilz ont faicte, tant envers le roy de france leur souverain que vous pour eulx estre revoltez, et ayez a considerer en vostre cueur que la ville nest pas pour tenir contre une puissance, et que quelque chose quilz ayent faicte leur cueur nest jamais mue quil ne soit demoure bon francois, et si par leur povrete desperit ilz ont fait une lourde faulte par vostre grant bonte leur vueille estre appaisee, vous asseurant monseigneur que jamais plus ne les y trouverez, et ou comme de dieux habandonnez une autre gois ilz reourneroient, se mectent eulx, leurs enfans et femmes avecques tous leurs bien pour en disposer ainsi quil vous plaira. Et en signe quilz veullent demourer envers vous telz que je vous dis vous font en toute humilite ung petit present selon leur puissance qui est de trois cens marcs de vaisselle dargent lequel il vous plaira prendre en demonstrant que vostre yre est cessee sur eulx. Alors se teut et fist apparoistre sur deux tables, bassins, tasses, gobeletz et autre maniere de vaisselle dargent que ledit seigneur de Ligny ne daigna regarder, mais en homme courrouce fierement respondit. Comment meschans, lasches & infames estes vous si hardis dentrer en ma presence qui comme failliz de cueur sans cause ny moyen nous estes revoltez, quelle foy desormais pourray je avoir en vous, si on feust venu mettre le siege davant vostre ville, icelle canonner et assailir sceust este autre chose, mais ennemy ne sest jamais monstre qui fait assez apparoistre que de vostre propre voulente estes retournez a lusurpateur de ceste duche, si je faisois mon devoir ne fous ferois je pendre et estrangler comme traytres et desloyaulx aux croysees de voz senestres, allez, fuyez de devant moy que jamais ne vous voye, en disant lesquelles parlles les povres citoyens estoient tousjours a genoulx. Alors le vaillant et prudent cappitaine Loys dars mist le bonnet hors de la teste, et ung genoil en terre dist. Monseigneur pour lhonneur de dieu & de sa passion faictes moy ceste grace que a ma requeste leur vueillez pardonner vostre maltalent, car je leur ay promis, et jamais nauroient fiance en moy si maviez reffuse, jespere monseigneur que toute vostre vie les trouverez bons et vrais subjectz, et les povres gens sans attendre quon replicquast commencerent tous dune voix a crier, monseigneur il sera ainsi que dit le cappitaine au plaisir de mon seigneur. Le bon seigneur de Ligny ouye leur clamer meu de pitie & quasi larmoyant les fist lever, et leur declaira deux propos, lung damytie et lautre de rudesse pour monstrer quilz avoient grandement failly. Quant a lung dist, allez pour lamour du cappitaine Loys dars qui tant ma fait deservices que pour beaucoup plus grosse chose ne le vouldrois reffuser, je vous pardonne et ny retournez plus Mais au regard de vostre present je n le daignerois prendre, car vous ne le vallez pas. Si regarda autour de luy & advisa le bon chevalier, auquel il dist. Picquet, prenez tou
