[1r]
¶Comment le seigneur de Bayart pere du bon chevalier sans paour et sans reproche eut vouloir de scavoir de ses enfans de quel estat ilz vouloient estre.
¶Premier chapitre.
OU paysde Daulphine que possede presentement le roy de France et ont faict ses predecesseurs depuis sept ou huyt vingtz ans que ung Daulphin ymbert qui fut le derrenier leur en fist don ya plusieurs bonnes et grosses maisons de gentilz hommes et dont il est sorty tant de vertueux & nobles chevaliers que le bruyt en court par toute la chrestiente, en sorte que tout ainsi que lescarlate passe en couleur toutes autres tainctures de draps, sans blasmer la noblesse dautre re[gion les] Daulphinoys sont appellez par tous ceulx qui en ont congnoissance lescarlate des gentilz hommes de France Entre lesquelles maisons est celle de Bayart de ancienne & noble extraction, et bien lont ceulx qui en sont saillis monstre, car a la journee de Poictiers le terayeul du bon chevalier sans paour et sans reprouche mourut aux piedz du roy de France Jehan. A la journee de Crecy son bysayeul. A la journee de Montlehery demoura sur le champ son ayeul avecques six playes mortelles sans les autres Et a la journee de Guignegaste fut son pere si fort blesse que oncques puis ne peut gueres partir sa maison ou il mourut aage de bien quatre cingtz ans. Et peu de jours avant son trespas considerant par nature ui ja luy deffailloit, ne povoir pas faire grand sejour en ce mortel estre, appella quatre enfans quil avoit en la presence de sa femme dane tresdevote et toute a dieu, laquelle estoit seur de levesque de Grenoble de la maison des Alemans. Ainsi ses enfans venuz devant luy, a laisne demanda qui estoit en laage de dixhuyt a vingt ans quil vouloit devenir. Lequel respondit quil ne vouloit jamais partir de la maison, et quil le vouloit servir sur la fin de ses jours. Et bien dist le pere. Georges puis que tu aymes la maison tu demoureras icy a combatre les ours. Au second qui a este le bon chevalier sans paour & sans reproche dut demande de quel estat il vouloit estre. Lequel en laage de treize ans ou peu plus, esveille comme ung esmerillon, dung visage riant respondit comme sil eust eu cinquant ans. Monseigneur mon pere combien que amour paternelle me tiengne si grandement oblige que je deusse oublier toutes choses pour vous srvir sur la fin de vostre vie, ce neantmoins ayant enracine dedans mon cueur les bons propos que chascun jour vous recitez des no
[1v]
bles hommes du temps passe, mesmement de ceulx de nostre maison : je seray sil vous plaist de lestat don vous & vos predecesseurs ont este, qui est de suyvre les armes : car cest la chose en ce monde dont jay le plus grant desir, & espere aydant la grace de dieu ne vous faire point de deshonneur. Alors respondist le bon vieillart en larmoyant. Mon enfant dieu ten doint la grace Ja ressembles tu de visage et corsage a ton grant pere qui fut en son temps ung des acomplis chevaliers qui feust en chrestinte Si mettray peine de te bailler le train pour parvenir a ton desir. Au tiers demanda quel moyen il vouloit tenir. Il repsondit quil vouloit estre de lestat de son oncle monseigneur Desnay, ung abbaye pres Lyon. Son pere le luy accorda, et lenvoya par ung sien parent a sondit oncle qui le feit moyne, et depuis a este par le moyen du bon chevalier son frere abbe de Josaphat aux aulxbourgz de Chartres. Le dernier respondit de mesme sorte et dist quil vouloit estre comme son oncle monseigneur de Grenoble a qui il fut pareillement donne, et pau apres le fist chanoyne de leglise nostre dame, et depuis par le mesme moyen que son frere le moyne fut abbe, il fut evesque de Glandesves en Prouvence. Or laissons les autres trois freres la, et retournons a lhistoire du bon chevalier sans paour et sans reprouche, et comment son pere entendit a son affaire.
¶Comment le pere du bon chevalier sans paour et sans reprouche envoya querir son beau frere levesque de Grenoble pour parler a luy par ce quil ne povoit plus partir de la maison.
¶Chapitre .iie.
APres le propos tenu par le pere du bon chevalier a ses quatre enfans, & par ce quil ne povoit plus chevaucher envoya ung de ses serviteurs le lendemain a Grenoble devers levesque son beau frere, a ce queson plaisir feust pour aucunes choses quil avoit a luy dire se vouloir transporter jusques a sa maison de Bayart, distant dudit Grenoble cinq ou six lieues. A quoy le bon evesque qui oncques en sa vie ne fut las de faire plaisir a ung chascun obtempera de tresbon cueur. Si partit incontinent la lettre receue et sen vint au giste en la maison de Bayart ou il trouva son beau frere en une chaire aupres du feu comme gens de son aage fontvoulentiers. Si se saluerent ling lautre et firent le soir la meilleure chere quilz peurent ensemble, et en leur compaignie plusieurs autres gentilz hommes du Daulphine qui estoient la assemblez, puis quant il fut heure chascun se retira en sa chambre ou ilz reposerent a leur aise jusques a lendemain matin quilz se leverent, ouyrent la messe que ledit evesque de Grenoble
[2r]
chanta : car voulentiers disoit tous les jours messe, sil nestoit mal de sa personne. Et pleust a nostre seigneur que les prelatz de present feussent aussi bons serviteurs de dieu & aussi charitables aux povres quil a est en son temps. La messe ouye convint laver les mains et se mettre a table ou de rechief chascun fist tresbonne chiere, & y servoit le bon chevalier tant sagement et honnestement que tout homme en disoit bien. Sur la fin du disner et apres graces dictes le bon vieillart seigneur de Bayart commencea ainsi ces parolles a toute la compaignie Monseigneur et messeigneurs loccasion pourquoy vous ay mandez est temps destre declairee. car tous estes mes parens et amys, et ja voyez vous que je suis par vieillesse si oppresse quil est quasi impossible que sceusse vivre deux ans : Dieu ma donne quatr filz desquelz de chascun ay bien voulu enquerir quel train ilz veullent tenir Et entre autres ma dit mon filz Pierre quil veult suyvre les armes, dont il ma fait ung singulier plaisir : car il ressemble entierement de toutes facons a mon feu seigneur de pere vostre parent, & si de conditions il luy veult aussi bien ressembler, il est impossible quil ne soit en son vivant ung grant homme de bien, dont je croy que ung chascun de vous comme mes bons parens et amys seriez bien aises. Il mest besoing pour son commencement le mettre en la maison de quelque prince ouseigneur affin quil appreigne a se contenir honnestement : et quant il sera ung peu plus grant apprendra le train des armes. Si vous prie tant que je puis que chascun me conseille en son endroit le lieu ou je le pourray mieulx loger. Alors dist lung des plus anciens gentilz hommes Il fault quil soit envoye au roy de France. Ung autre dist quil seroit fort bien en la moison de Bourbon. Et ainsi dung en autre ny eut celluy qui nen dist son advis. Mais levesque de Grenoble parla et dist. Mon frere vous scavez que nous sommes en grosse maytie avecques le duc Charles de Savoye & nous tient du nombre de ses bons serviteurs Je croy quil le prendra voulentiers pour ung de ses paiges. Il est a Chambery cest pres dicy : si bon vous semble & a la compaignie, je le luy meneray demain au matin apres lavoir tresbien mis en ordre et garny dung bas et bon petit roussin que jay depuis trois ou quatre jours enca recouvert du seigneur du Riage. Si fut le propos de levesque de Grenoble tenu a bon de toute la compaignie, et mesmement dudit seigneur de Bayart qui luy livra son filz en luy disant. Tenez monseigneur Je prie a nostre seigneur que si bon present en puissez faire quil vous face honneur en sa vie. Alors tout incontinent envoya ledit evesque a la ville querir son tailleur, auquel il manda apporter veloux, satin & autres choses necessaires pour habiller le bon chevalier. Si vint et besongna toute la nuyt, de sorte que le lendemain matin fut tout prest : et apres avoir desjeune monta sur son roussin et se presenta a toute la compaignie qui estoit en la basse court du chasteau tout ainsi que si on leust voulu presenter des lheure au duc de Savoye. Quant le cheval sentit si
[2v]
petit fes sur luy, joinct aussi que le jeune enfant avoit ses esperons dont il le picquoit commencea a faire trois ou quatre saulx, dequoy la compaignie eut paour quil affolast le garson Mais en lieu de ce quon cuydoit qui deust crier a layde, quant il sentit le cheval si fort remuer soubz luy, dung gentil cueur asseure comme ung luon luy donna trois ou quatre coups despron et une carriere dedans ladicte bassecourt : en sorte quil mena le cheval a la raison comme sil eust eu trente ans. Il ne fault pas demander si le bon vieillart fut aise, & soubzriant de joye demanda a son filz sil avoit point de paour : car pas navoit quinze jous quil estoit sorty de lescolle. Lequel respondit dung visage asseure. Monseigneur jespere a layde de dieu devant quil soit six ans le remuer luy ou autre en plus dangereux lieu : car je suis icy parmy mes amys, & je pourray estre parmy les ennemys du maistre que je serviray. Or sus sus dist le bon evesque de Grenoble qui estoit prest a partir. Mon nepveu mon amy ne descendez point et de toute la compaignie prenez conge. Lors le jeune enfant dune joyeuse contenance sadressa a son pere auquel il dist. Monseigneur mon pere, je prie a nostre seigneur quil vous doint bonne & longue vie : et a moy grace avant quil vous oste de ce monde que puissiez avoir bonnes nouvelles de moy. Mon amy dist le pere, je len supplie : & puis luy donna sa benediction. En apres alla prendre conge de tous les gentilz hommes qui estoient la lung apres lautre qui avoient a grant plaisir sa bonne contenance. La povre dame de mere estoit en une tour du chasteau qui tendrement ploroit : car combien quielle feust joyeuse dont son filz estoit en voye de parvenir, amour de mere ladmonnestoit de larmoyer. Toutesfois apres quon luy fut venu dire Madame si voulez venir veoir vostre filz il est tout a cheval prest a partir. La bonne gentil femme sortit par le derriere de la tour et fist venir son filz vers elle auquel elle dist ces parolles. Pierre mon amy vous allez au service dung gentil prince : dautant que mere peult commander a son enfant, je vous commande trois choses tant que je puis Et si vous les faictes soyez asseure que vous vivrez triumphamment en ce monde. La premiere cest que devant toutes choses vous aymez, craignez et servez dieu sans aucunment loffenser sil vous est possible, car cest celluy qui tous nous a creez, cest luy qui nous fait vivre, cest celuuy qui nous saulvera : et sans luy & sa grace ne scaurions faire une seulle bonne œuvre en ce monde. Tous les matins et tous les soirs recommandez vous a luy, et il vous aydera. La seconde cest que vous soyez doulx et courtois a tous gentilz hommes en ostant de vous tout orgueil. Soyez humble & serviable a toutes gens. Ne soyez maldisant ne menteur. Maintenez vous sobrement quant au boire et au manger. Fuyez envye : car cest ung villain vice. Ne soyez flateur ne raporteur, car telles manieres de gens ne viennent pas voulentiers a grande perfection. Soyez loyal en faictz & dictz. Tenez vostre parolle. Soyez secourable a povres veufves & orphelins, et dieu le vous
[3r]
guerdonnera. La tierce que des biens que dieu vous donnera vous soyez charitable aux povres necessiteux : car donner pour lhonneur de luy napovrit oncques homme Et tenez tant de moy mon enfant que telle aulmosne pourrez vous faire qui grandement vous prouffitera au corps et a lame : vela tout ce que je vous encharge Je croy bien que vostre pere et moy ne vivrons plus gueres : bien nous face la grace a tout le moins tant que serons en vie que tousjours puissons avoir bon rapport de vous. Alors le bon chevalier quelque jeune aage quil eust luy respondit. Madame ma mere de vostre bon enseignement tant humblement quil mest possible vous remercie, et espere si bien lensuyvre que moyennant la grace de celluy en la garde duquel me recommandez en aurez contentement Et au demourant apres mestre treshumblement recommande a vostre bonne grace je voys prendre conge de vous. Alors la bonne dame tira hors de sa manche une petite bourcette en laquelle avoit seulement six escus en or et ung en monnoye quelle donna a son filz : et appella ung desserviteurs de levesque de Grenoble son frer auquel elle bailla une petite malette en laquelle avoit quelque linge pour la necessite de son filz, le priant que quant il seroit presente a monseigneur de Savoye, il voulsist prier le serviteur de lescuyer soubz la charge duquel il seroit quil sen voulsist ung peu donner de garde jusques a ce quil feust en plus grant aage, & luy bailla deux escus pour luy donner. Sur ce propos print levesque de Grenoble conge de la compaignie, & appella son nepveu qui pour se trouver dessus son gentil roussin pensoit estre en ung paradis. Si commencerent a marcher le chemin droit a Chambery ou pour lors estoit le duc Charles de Savoye.
¶Comment levesque de Grenoble presenta son nepveu le bon chevalier sans paour et sans reprouche au duc Charles de Savoye qui le receut joyeusement.
¶Chapitre .iiie.
AU departir du chasteau de Bayart qui fut par ung samedy apres le desjeuner chevaucha ledit evesque de Grenoble de sorte quil arriva au soir en la ville de Chambery ou le clergie alla au devant de luy : car ladicte ville est de toute enciennete de levesche de Grenoble et y a son official & sa court. Il se logea sur ung notable bourgeois. Le duc estoit loge en sa maison avecques bon nombre de seigneurs et gentilz hommes, tant de Savoye que de Pyemont. Le soir demoura ledit evesque de Grenoble a son logis sans se monstrer a la court : combien que le duc feust assez informe quil estoit a la ville dont il fut tresjoyeulx, par ce que
[3v]
icelluy evesque estoit (si ainsi on les peult appeler en ce monde) ung des plus sainctz et devotz personnages que lon sceust. Le lendemain qui fut dimenche bien matin se leva, et sen alla pour faire la reverence au duc de Savoye qui le receut dung riant visage, luy donnant bien a congnoistre que sa venue luy plaisoit tresfort. Si devisa avecques luy tout au long du chemin depuis son logie jusques a leglise ou il alla ouyr messe, a laquelle il servit ledit duc comme a telz princes appartient, a luy bailler a baiser levengille et la paix. Apres la messe dicte le duc le mena par la main disner avecques luy, ou durant icelluy estoit son nepveu le bon chevalier qui le servoit de boire tresbien en ordre et tresmignonnement se contenoit, ce que regarda le duc pour la jeunesse quil voyoit en lenfant. de sorte quil demanda a levesque. Monseigneur de Grenoble, qui est ce jeune enfant qui vous donne a boire. Monseigneur respondit il, cest ung homme darmes que je vous suis venu presenter pour vous servir se il vous plaist, mais il nest pas en lestat que je le vous veulx donner, apres disner si cest vostre plaisir le verrez. Vrayement ce dist le duc qui desja leut pris en amour, il seroit bien estrange qui tel present refuseroit. Or le bon chevalier qui desja avoit lordonnance de son oncle en lentendement ne samusa gueres aux morceaulx apres le disner, ains sen vas au logis faire sceller son roussin, sur lequel apres lavoir bien mis en ordre montra, et sen vint le beau petit pas en la court de la maison dudit duc de Savoye qui desja estoit sorty de sa salle papuye sur une gallerie. Si veit entrer le jeune enfant qui faisoit bondir son cheval, de sorte quil sembloit homme de trente ans et qui toute sa vie eust veu de la guerre. Lors sadressa a levesque de Grenoble, auquel il dist. Monseigneur deGrenoble, je croy que cest votre petit mignon qui si bien chevauche se cheval, qui respondit. Monseigneur cest mon, il est mon nepveu et de bonne rasse ou il ya eu de gentilz chevaliers, son pere qui par les coups quil a receuz es guerres et batailles ou il sest trouve est tant myne de foiblesse et vieillesse quil nest peu venir devers vous se recommande treshumblement a vostre bonne grace et vous en fait ung present. En bonne foy respondit le duc je laccepte voulentiers, le present est beau et honneste, dieu le face preudhomme. Lors commanda a ung sien escuyer descurye en qui plus se fioit quil print en sa garde le jeune bayart et que a son oppinion seroit une fois homme de bien. Ne tarda gueres apres ce propos que levesque de Grenoble qui remercie eut treshumblement le duc de Savoye ne prist conge de luy pour sen retourner a sa maison et ledit duc de Savoye ne prist conge de luy pour sen retourner a sa maison et ledit duc demoura a Chambery jusques a quelque temps apres qui se delibera daller veoir le roy de France Charles huytiesme qui estoit en sa ville de Lyon ou il se donnoit du bon temps a faire joustes, tournois et tous autres passetemps.
[4r]
¶Comment le duc de Savoye se partit de Chambery pour aller veoir le roy de France Charles huytuesme en sa ville de Lyon, et mena avecques luy le bon chevalier sans paour et sans reprouche lors son page.
¶Chapitre .iiiie.
LE bon chevalier demoura page avecques le duc Charles de savoye bien lespace de demy an, ou il se fist tant aymer de grans, moyens et petis quoncques jeune enfant ne le fut plus Il estoit serviable aux seigneurs et dames tant que cestoit merveilles En toutes choses ny avoit jeune page ne seigneur qui feust acomparer a luy : car il saultoit, luytoit, gectoit la barre selon sa grandeur, et entre autres choses chevauchoit ung chevalle possibl : de sorte que son bon maistre le print en aussi grande amour que sil eust este son filz. Ung jour estant le duc de Savoye a Chambery faisant grosse chere se delibera daller veoir le roy de France a Lyon, ou pour lors estoit parmy ses princes et gentilz hommes menant joyeuse vie a faire joustes et tournoys chascun jour, et au soir dancer et baller avecques les dames du lieu, qui sont voulentiers belles et de bonne grace. Et a verite dire ce jeune roy Charles estoit ung des bons princes, des courtois, liberaulx & charitables quon ait jamais veu ne leu Il aymoit & craignoit dieu, ne ne juroit jamais que par la foy de mon corps ou autre petit serment, & fut grant dommage dont mort le print si tost comme en laage de .xxviii. ans : car si longuement eust vescu, acheve eust de grans choses. Ledit roy Charles sceut comment le duc de Savoye le venoit veoir, & que ja estoit a la Verpilliere et sen venoit coucher a Lyon. Si envoya au devant de luy ung gentil prince de la maison de Luxembourg quon appelloit le seigneur de Ligny avecques plusieurs autres gentilz hommes et archiers de sa garde qui le trouverent a deux lieues ou environ dudit Lyon. Si se firent grant chere lesditz duc et seigneur de Ligny : car tous deux estoient assez remplis dhonneur. Ilz vindrent longuement parlans ensemble, & tellement que le seigneur de Ligny gecta son œil sur le jeune Bayart lequel estoit sur son roussin qui trotoit fort mignonnement, et le faisoit merveilleusement bon veoir. Si dist le seigneur de Ligny au duc de Savoye. Monseigneur vous avez la ung page qui chevauche ung gaillart cheval Et davantage il le scet manyer gentement. Sur ma foy dist le duc il nya pas demy an que levesque de Grenobme men fist ung present, & ne faisoit que sortir de lescolle Mais je ne veiz jamais jeune garson qui plus hardiement de son agge se maintint, ny a cheval ny a pied, et y a fort bonne grace. Bien vous advise monseigneur mon cousin quil est dune rasse ou il ya de gaillars et hardiz gentilz hommes Je croy quil les ensuyvra. Si dist au bon chevalier. Bayart picquez, donnez un carriere a vostre cheval. Ce que le jeune
[4v]
enfant qui pas mieulx ne demandoit fist incontinent, et tresbien le sceut faire, et si au bout de la course fist bondir le cheval qui estoit fort gaillard trois ou quatre merveilleux saulx, dont il resjoyt toute la compaignie. Sur ma foy monseigneur dist le seigeur de Ligny, vela une jeune gentil homme qui sera a mon oppinion gentil galant sil veit : et mest advis que ferez bien du page et du cheval faire present au roy : car il en sera bien aise pource que le cheval est fort bel et bon, et le page a mon advis encore meilleur. Sur mon ame dist le duc puis que le me conseillez je le feray. Le jeune enfant pour parvenir ne scauroit apprendre en meilleur escolle que la maison de France, ou de tout temps honneur fait son sejour plus longuement quen toutes autres maisons de princes. Ainsi en propos cheminerent si avant quilz entrerent dedans Lyon, ou les rues estoient pleines de gens et force dames aux fenestres pour les veoir passer Car sans mentir ce duc de Savoye estoit fort beau et bon prince, tresbien acompaigne : et a veoir sa contenance sentoit bien son prince de grosse maison. Si sen alla pour le soir qui funt ung mercredy descendre a son logis ou il retint le seigneur de Ligny, et ung autre appelle monseigneur Davesnes filz du sire Dalbret & frere du roy de Navarre qui estoit alors ung fort honneste et acomply seigneur a soupper avecques luy, et plusieurs autres seigneurs & gentilz hommes : ou durant icelluy y eut force menestriers et chantres du roy qui vindrent resjouyr la compaignie. Le soir ne partit point le duc de Savoye de son logis : ains il fut joue a plusieurs jeux et passetemps, et tant quon apporta vin et espices : lesquelles prises chascun se retira a son logis jusques a lendemain au matin.
¶Comment le duc de Savoye alla faire la reverence au roy de France a son logis, et du grant et honneste recueil qui luy fut faict.
¶Chapitre .ve.
LE jeudy matin se leva le duc de Savoye, & apres soy estre mis en ordre voulut aller trouver le roy : mais aincois son partement arriverent a son logis lesditz seigneurs de Ligny & Davesnes avecques le marschal de Gie qui pour lors avoit gros credit en France, ausquelz il donna le bon jour Et apres marcherent jusques au logis du roy qui desja estoit prest pour aller a la messe en ung convent de cordeliers quil avoit fait construire a la requeste dung devot religieux appelle frere Jehan bourgeois au bout dung faulxbourg de Lyon appelle Veize : et y avoit ledit seigneur beaucoup donne du sien : aussi avoit fait sa bonne et loyalle espouse Anne duchesse de Bretaigne. Si trouva le duc de Savoye le roy ainsi quil vouloit sortir de sa chambre, auquel il fist la reverence telle et si haulte que a si grant & noble prince appartenoit. Mais le
[5r]
bon roy qui filz estoit dhumilite le print et lembrasse, en luy disant. Mon cousin mon amy vous soyez le tresbien venu. Je suis joyeulx de vous veoir, et sur mon ame vous avez bien fait : car si ne feussiez venu, jestois delibere vous aller veoir en voz pays ou je vous eusse porte beaucoup plus de dommage. A quoy respondit le bon duc. Monseigneur il est difficile que a ma voulente sceussiez porter dommage. Tout le regret que jauroye a vostre arrivee en vos pays et miens seroit seulement que ne pourriez estre receu comme appartient a si hault ne magnanime prince que vous estes. Mais bien vous advise que le cueur, le corps, lavour & le scavoir : si dieu y en a aucun mis sont en vostre disposition autant que le moindre de vos subjectz. Dont le roy enrougissant ung peu le remercia. Si monterent sur leurs mulles et allerent ensemble devisans le long de la ville jusques audit convent des cordeliers ou ilz ouyrent devotement la messe, et quant vint a loffrance fut baille par le duc de Savoye au roy lescu pour offrir a nostre seigneur ainsi que chascun jour ont acoustume faire les roys de France, comme au prince a qui on vouloit plus faire dhonneur. Apres la messe ouye remonterent sur leurs mulles pour retourner au logis ou le roy retint le duc de Savoye a disner avecques luy, et pareillemnt lesditz seigneurs de Ligny et Davesnes. Durant le disner y eut plusieurs propos tenuz tant de chiens, doyseaulx, darmes que damours, et entre autres le seigneur de Ligny dist au roy. Sire je vous jure ma foy que monseigneur de Savoye a vouloir de vous donner ung paige qui chevauche un bas roussin fort gaillard aussi bien que jeune garson que je veiz jamais, et si ne pense point qui ait plus de quatorze ans, mais il mene son cheval a la raison comme une homme de trente, sil vous plaist aller ouyr vespres a Esnay en aurez vostre passetemps. Par la foy de mon corps dist le roy je le vueil, et puis regarda le duc de Savoye en luy disant. Mon cousin qui vous a donne ce gentil paige que dit le cousin de Ligny, a quoy respondit ledit duc. Monseigneur, il est de voz subjectz et dune maison en vostre pays du daulphine dont il est sorty de gaillars gentilz hommes, son oncle levesque de Grenoble puis demy an men a fait ung present, monseigneur mon cousin la veu, il en dit du bien tant quil luy plaist, vous verrez a vostre plaisir le paige & le cheval en la prayrie Desnay. Alors nestoit pas le bon chevalier en presence, mais tantost luy fut racompte, et comment le roy le vouloit veoir sur son cheval : et croy que sil eust gaigne la ville de Lyon neust pas este si aise. Il sen alla incontinent au maistre palefrenier du duc de Savoye nomme Pizou de chenas : auquel il dist. Maistre mon amy jentendz que le roy a dit a monseigneur quil veult veoir mon roussin apres disner & moy dessus. Je vous prie tant que je puis que le vueillez faire mettre en ordre & je vous donneray ma courte dacgue de bon cueur. Le maistre palefrenier qui veit la bonne voulente du jeune garson luy dist. Bayart mon amy gardez vostre baston je nen veulx point, et
[5v]
vous mercye : allez vous seulement peigner et nectoyer, car vostre cheval sera bien en ordre, et dieu vous face cest heur mon amy que le roy de France vous preigne en grace, car il vous en peult advenir beaucoup de biens, et quelque fois avecques layde de dieu pourrez estre si grant seigneur que je men sentiray. Sur ma foy maistre dist le bon chavelier, jamais je noublieray les courtoysies que mavez faictes depuis que je suis en la maison de monseigneur, et si dieu me donne jamais des biens vous en apperceverez. Incontinent monta en la chambre de son escuyer ou il nectoya ses habillemens, se peigna et acoustra au plus joliement quil peut en attendant quil eust quelques nouvelles qui ne tarderent gueres : car sur les deux ou trois heures vint lescuyer descurye de monseigneur de Savoye lequel gouvernoit Bayart qui le vint demander, & tout prest le trouva. Si luy dist tout fasche. Bayart mon amy je voy bien que je ne vous garderay gueres : car jentendz que monseigneur a desja fait ung present de vous au roy qui vous veult veoir sur vostre roussin en la prairie Desnay. Je ne suis pas marry de vostre avancement : mais sur ma foy jay grant regret de vous laisser A quoy respondit le jeune Bayart. Monseigneur lescuyer dieu me doint grace de continuer es vertus que mavez monstrees depuis lheure que monseigneur vous bailla charge de moy : si je puis moyennant son ayde naurez jamais reprouche de chose que je face : & si je parviens en lieu pour vous faire service congnoistrez par effect de combien je me sens vostre oblige. Apres ces parolles dictes ny eut plus de dilation, car lheure sapprochoit. Si monta lescuyer sur ung cheval, et fist monter le bon chevalier sur son roussin : lequel estoit si bien peigne et acoustre que riens ny deffailloit, et sen allerent attendre le roy et sa compaignie en la prairie Desnay : car le prince sestoit mis par eaue sur la Sosne. Incontinent quil fut hors du bateau va veoir sur le pree le jeune Bayart sur son roussin avecques son escuyer. Si luy commencea a crier. Page mon amy donnez de lespron a vostre cheval : ce quil fist incontinent, et sembloit a le veoir departir que toute sa vie eust fait ce mestier. Au bout de la course le fist bondir deux ou trois saulx : & puis sans riens dire sen retourna a bride abatue pareillement devers le roy et sarresta tout court devant luy en faisant remuer son cheval : de sorte que non seulement le roy, mais toute la compaignie y print ung singulier plaisir. Si commenca le roy a dire a monseigneur de Savoye. Mon cousin il est impossible de mieulx picquer ung cheval, et puis sadressant au page luy dist. Picque picque encores ung coup. Apres les parolles du roy les pages luy crierent, picquez picquez : de facon que depuis par quelque temps fut surnomme picquet. Vrayement dist encores le roy au duc, je voy devant mes yeulx ce que le cousin de Ligny ma dit a disner Je ne veulx pas attendre que me donniez vostre page ne vostre cheval, mais je le vous demande. Monseigneur respondit le duc de Savoye, le maistre est vostre, le reste y peult bien estre. Dieu
[6r]
luy doint grace de vous faire quelque service agreable. Par la foy de mon corps dist le roy, il est impossible quil ne soit homme de bien. Cousin de Ligny je vous baille le page en garde : mais je ne veulx pas quil perde son cheval Il demourera tousjours en vostre escurye, dont ledit seigneur de Ligny remercia treshumblement le roy, se sentant tresbien satisfait davoir ce present : car il estimoit bien quil en feroit ung homme dont il auroit une fois gros honneur, ce qui fut acomply depuis en maintz lieux. Trois ans seulement fut page le bon chevalier en la maison du seigneur de Ligny, lequel len mit hors sur laage de dixsept ans et lappoincta en sa coompaignie, toutesfois tousjours fut il retenu des gentilz hommes de sa maison.
¶Comment ung gentil homme de Bourgongne nomme messire Claude de Vauldray vint a Lyon par le vouloir du roy de France faire faictz darmes tant a cheval comme a pied, et pendit ses escuz pour par ceulx qui y toucheroient estre par luy receuz au combat. Et comment le bon chevalier trois jours apres quil fut mis hors de page toucha a tous les escus.
¶Chapitre .vie.
QUelque temps demoura le duc de Savoye a Lyon ou il fist fort bonne chere, tant avecques le roy que les princes et seigneurs de france. Si advisa quil estoit saison de retourner en ses pays parquoy demande conge qui luy fut donne bien envis, toutesfois il nest si bonne compaignie quil ne conviengne departir. Le roy luy dist de beaulx et honnorables presens, car de liberalite estoit assez remply : ainsi sen retourna le bon duc Charles de Savoye en ses pays. Le roy de france alla visitant son royaulme, et deux ou trois ans apres se retrouva audit Lyon ou il arriva ung gentil homme de bourgongne quon nommoit messure Claude de Vauldray appert homme darmes et qui desiroit a merveilles de les suyvre. Si fist supplier au roy que pour garder doisivete tous jeunes gentilz hommes luy voulsist permettre de dresser ung pas tant acheval comme a pied a course de lance et coups de hache, ce qui luy fut accorde, car le bon roy ne demandoit apres le service de dieu dont il estoit assez songneux que joyeulx passetemps. Si dressa son affaire icelluy messire Claude de vauldray le mieulx quil peut, et fist prendre ses escuz ou tous gentilz hommes qui avoient desir deulx monstrer venoient toucher, et se faisoient inscripre au roy darmes qui en avoit la charge. Ung jour passoit par devant les escuz le
[6v]
bon chevalier qui desja par le nom que le roy luy donna a Esnay estoit de chascun appelle Picquet, si va penser en soy mesmes. Helas mon dieu si je scavoye comment me mettre en ordre tant voulentiers je toucheroye a ses escuz pour scavoir et apprendre des armes, et sur cela sarresta tout coy & demorra pensif. Avecques luy estoit ung sien compaignon de la nourriture du seigneur de Ligny appelle bellabre qui luy dist. En quoy songez vous compaignon, vous me semblez tout estonne. Sur ma foy respondit il mon amy aussi suis)je, et je vous en diray presentement la raison. Il a pleu a monseigneur me mettre hors de paige, et de sa grace ma acoustre et mis en ordre de gentil homme, vouloir me semondre de toucher aux escuz de messire Claude, mais je ne scay quant je lauroye fait qui me fourniroit apres de harnoys & de chevaulx. Alors respondit Bellabre qui plus estoit aage que luy & fort hardy gentil homme, car dune chose veulx adviser tous lysans ceste hystoire que de la nourriture de ce gentil seigneur de Ligny sont sortiz cinquante gentilz hommes dont les trente ont este tous vaillans et vertueux cappitaines en leur vie. Mon compaignon mon amy, vous souciez vous de cela, navez vous pas vostre oncle ce gros abbe Desnay, je faiz veu a dieu que nous yrons a luy, et sil ne veult fournir deniers nous prendrons crosse et mictre, mais je croy que quant il congnoistra vostre bon vouloir il le fera voulentiers, et sur ces parolles il va toucher aux escuz. Montjoye roy darmes qui estoit la pour escripre les noms luy commenca a dire, comment Picquet mon amy vous navez barbe de trois ans et entreprenez vous a combattre contre messire Claude qui est ung des plus rudes chevaliers quon sache. Lequel luy respondit. Monjoye mon amy, ce que jen faiz nest pas orgueil ne oultrecuydance, ami seullement desir daprendre les armes peu a peu avecques ceulx qui mel les pevent monstrer, et dieu si luy plaist me fera la grace que je pourray faire quelque chose qui plaira aux dames, dequoy Montjoye se prist a rire et sen contenta tresfort. Si courut incontinent par tout Lyon le bruit que Picquet avoit touche aux escuz de messire Claude, et vint jusques aux oreilles dudit seigneur de Ligny qui nen eust pas voulu tenir dix mille escuz. Si sen alla le dire au roy incontinent qui en fut tresjoyeulx, et luy dist. Par la foy de mon corps cousin de Ligny vostre nourriture vous fera une fois de lhonneur, car le cueur le me juge. Nous verrons que ce sera respondit le seigneur de Ligny, il est encores bien jeune pour endurer les coups de messire Claude. Or ne fut ce pas le plusfort pour le bon chevalier davoir touche aux escuz, mais de trouver argent pour avoir chevaulx et acoustremens. Si vint a son compaignon Bellabre auquel il dist. Mon copaignon mon amy, je vous prie estre mon moyen envers monseigneur Desnay mon oncle quil me donne de largent, je scay bien que si mon bon oncle monseigneur de Grenoble estoit icy il ne me laisseroit pour riens, mais il est en son abbaye de sainct Surnyn & Thoulouze,
[7r]
cest bien long jamais ung homme ny seroit alle et venu a temps. Ne vous chaille dist Bellabre, nous yrons vous et moy demain matin parler a luy, et jespere que nous ferons bien nostre cas. Cela resjouyt quelque peu le bon chevalier, toutesfois il ne reposa gueres la nuyt. Bellabre et luy couchoient ensemble, leverent matin et puis se misrent en ung de ses petis bateaux de Lyon et sefirent mener a Esnay. Eulx descenduz le premier homme quilz trouverent dedans le pre ce fut labbe qui disoit ses heures avecques ung de ses religieux. Si lallerent saluer les deux gentilz hommes, mais luy qui desja avoit ouy parler comment son nepveu avoit touche aux escuz de messire Claude & se doubtoit bien quil fauldroit foncer ne leur fist pas grant recueil, mais sadressa a son nepveu et luy dist. He maistre breneux, qui vous adonne ceste hardiesse de toucher aux escuz de messire Claude de vauldray, il nya que trois jours questiez paige et navez pas dixsept ou dixhuyt ans, on vous deust encore donner des verges qui montez en si grant orgueil. A quoy respondit le bon chevalier. Monseigneur je vous asseure ma foy quoncques orgueil ne le le fist faire, mais desir et vouloir de parvenir par faictz vertueux a lhonneur que voz predecesseurs et les myens ont fait men ont donne la hardiesse. Si vous supplie monseigneur tant que je puis veu que je nay parent ny amy a qui je peusse presentement avoir recours sinon a vous que vostre bon plaisir soit mayder de quelques deniers pour recouvrer ce quil mest necessaire. Sur ma foy respondit labbe, vous yrez chercher ailleurs qui vous prestera argent, les bien donnez par les fondateurs de ceste abbaye a este pour y servir dieu et non pas pour despendre en joustes et tournoiz, laquelle parolle dicte par labbe le seigneur de Bellabre reprint, & luy dist Monseigneur neust este les vertuz et les prouesses de vos predecesseurs vous ne feussiez pas abbe Desnay, car par leur moyen et non par autre y estes parvenu, il fault avoir congnoissance des biens quon a receuz par le passe et esperance davoir quelque remuneration de ceulx quon fait, vostre nepveu mon compaignon est de bonne rasse, bien ayme du roy et de monseigneur nostre maistre, il a vouloir de parvenir dont deussiez estre bien joyeulx : si est besoing que luy aydez, car il ne vous scauroit couster deux cens escus pour le mettre en bon ordre, et il vous pourra faire de lhonneur pour plus de dix mille. Si y eut replicque par labbe et plusieurs autres propos tenuz, mais en fin de se condescendit qui ayderoit audit bon chevalier.
¶Comment labbe Desnay bailla cent escus au bon chevalier pour avoir deux chevaulx, & escripvit unes lettres a ung marchant de Lyon pour luy delivrer ce qui luy seroit necessaire.
¶Chapitre .viie.
[7v]
IL y eut plusieurs propos entre labbe et les deux gentilz hommes, mais a la fin il les mena a son logis et fist ouvrir une petite fenestre ou dune bourse qui dedans estoit tira cent escuz lesquelz il bailla a Bellabre, et luy dist. Mon gentil bomme vela cent escus que je vous baille pour achapter deux chevaulx a ce vaillant gendarme, car il a encores la barbe trop jeune pour manyer deniers, je men vois escripre ung mot a Laurencin pour luy bailler les habillemens qui luy seront necessaires. Cest tresbien fait monseigneur dist Bellabre, et je vous asseure que quant chascn le scaura vous ny aurez sinon honneur. Si fut demande incontinent ancre et papier pour escriprea Laurencin, auquel il manda bailler a son nepveu ce qui luy seroit necessaire pour sacoustrer a ce tournoy, ymaginant en soy mesmes quil ne scauroit avoir a besongner pour cent francs de marchandise, mais il alla bien autrement comme vous orrez cy apres. Incontinent que les gentilz hommes eurent leur lettre apres avoir pris conge de labbe et par le bon chevalier lavoir treshumblement remercie de la courtoysie quil luy faisoit sen retournerent dedans leur petit bateau pour revenir a Lyon fort joyeulx de ce quilz avoient si bien besongne. Si commenca a parler Bellabre et a dire. Scavez vous quilya compaignon, quant dieu envoye de bonnes fortunes aux gens il les fault bien et sagement conduyre, ce quon desrobe a moynes est pain beneist, nous avons une lettre a Laurencin pour prendre ce quil vous fauldra, allons vistement a son logis avant que vostre abbe ait pense a ce quil a fait, car il na point limite en sadicte lettre jusques a combien dargent il vous baille dacoustremens. Par la foy de mon corps vous serez acoustre pour le tournoy et pour dicy a ung an, car aussi bien nen aurez vous jamais autre chose. Le bon chevalier qui ne demandoit pas mieulx se print a rire, et luy dist. Par ma foy mon compaignon la chose va bien ainsi, mais je vous prie hastons nous, car jay grant paour que sil sappercoit de ce quil a fait que incontinent nenvoye ung de ses gens declairer pour combien dargent il entend quon me baille dhabillemens. Tresbonne fut leur conception comme vous entendrez. Si firent diligenter la pontonniere qui les rendit jusques aupres des changes ou ilz se misrent a bort, et incontinent marcherent droit au logis de Laurencin qui estoit en sa boutique lequel saluerent, et il qui estoit fort honnestre et bon marchant leur rendit le semblable. Bellabre commenca la parolle, et dist. Par mon ame sire Laurencin mon compaignon et moy venons de veoir ung honneste abbe, cest monseigneur Desnay. Je vous prometz cest mon dist Laurencin, cest ung grant homme de bien et me tiens du nombre de ses bons serviteurs, jay eu en ma vie a faire a luy de vingt mille francs, mais jamais
[8r]
ne trouvay ung plus rond homme Mais ne scavez vous lhonnestete quil a faicte a son nepveu mon compaignon que vecy dist Bellabre. Il a sceu quil avoit touche aux escus de messire Claude de vauldray et quil se vouloit esprouver pour honneur acquerir comme ont fait ses ancestres : et sachant que nous couchions ensemble, tous deux nous a envoyez querir a ce matin : et estre arrivez apres nous avoir fait tresbien desjeuner a donne trois cens beaulx escuz a son nepveu pour avoir des chevaulx Et davantage pour sacouster de sorte quil ny ait homme en la compaignie mieulx en ordre que luy, nous a vaille une lettre a vous adressant pour luy baille ce quil luy sera necessaire. Si luy monstra la lettre, il congneut incontinent le seing de monseigneur labbe. Je vous asseure messeigneurs dist Laurencin quil ny a riens ceans qui ne soit a vostre commandement et monseigneur qui mescript. Regardez seulement quil vous fault. Si firent incontinent desployer draps dor, dargent, satins brochez, veloux et autres soyes dont ilz prindrent pour le bon chevalier jusques a la valleur de sept ou huyt cens francs : et puis prindrent congie de luy pour sen aller a leur logis, et incontinent envoyerent querir tailleurs pour faire leur cas. Or retournons ung petit a labbe qui fut bien aise quant il se veit despesche de son nepveu. Si commanda quon apportast a disner ou il eut de la compaignie, et entre autres propos commencea a dire tout hault. Jay eu une terrible estrayne a ce matin : ce garson mon nepveu de Bayart a est si fol que daller toucher aux escuz de messire Claude, et pour sacoustrer est venu a ce matin demander de largent : je nay este pour cent escus, et encores nesse pas tout : car jay escript a Laurencin luy bailler ce quil luy demandera pour sacouster sur le harnois. A quoy respondit le secretain de leans. Sur ma foy monseigneur vous avez bien fait, il veult suyvre les prouesses de monseigneur vostre grant pere qui fut si vaillant homme et tous ses parens. Je me voy mal en cecy que ung Il est jeune & voluntaire : vous avez escript a Laurencin quil luy baille ce quil luy demandera : je suis seur quil le fera, quant il seroit question de deux mil escus Jay peur quil nen preigne plus que vous nentendez. Labbe va incontinent penser la dessus & respondit. Par sainct Jacques secretain vous dictes vray : car je nay point escript jusques a combien : si dist. Quon mapelle le maistre dhostel, Qui veint sur lheure. Acoup Nicolas dist labbe, ung autre servira bien pour vous : allez a la ville chez Laurencin, & luy dictes que je luy a escript a ce matin bailler quelques habillemens a mon nepveu de Bayart pour le tournoy de messire Claude, quil luy en baille pour cent ou six vingtz francz & non pour plus : et ne faictes que aller et venir. Ledit maistre dohstel alla bien tost, mais il partit bien tard. Quant il fut chez Laurencin il estoit a table : mais
[8v]
pource quil estoit assez prive de leans monta en hault et salua la compaignie, qui luy rendit le semblable. Monseigneur le maistre dist Laurencin vous venez a bonne heure, lavez la main et venez faire comme nous. Je vous mercye respondit il, ce nest pas ce qui me meine : monseigneur menvoye icy par ce quil vous a escript au jourdhuy bailler a son nepveu de Bayart quelques acoustremens. Laurencin nattendit pas quil eust acheve & dist. Monseigneur le maistre jay desja fait tout cela Je vous asseure que je lay bien mis en ordre, cest un treshonneste jeune gentil homme : monseigneur fait bien de luy ayder. Et pour combien luy en avez vous baille dist le maistre dhostel. Je ne scay sur ma foy dist il : si je ne veoye mon papier & son recepisse au dos de la lettre de monseigneur : mais il mest advis quil en ya pour environ huyt cens francz. Ha par nostre dame vous avez tout gaste. Pourquoy dist Laurencin. Pource respondit le maistre dhostel que monseigneur vous mandoit par moy ne luy en bailler que pour cent ou six vingtz francz. Sa lettre ne dit pas cela dist Laurencin, et quant il en eust demande plus largement plus en eust eu : car ainsi me le mandoit monseigneur. Or il nya remede fist le maistre dhostel, a dieu vous command. Si sen retourna a Esnay et trouva encores la compaignie ou il lavoit laissee. Quant labbe veit son maistre dhostel luy dist. Et puis Nicolas, avez vous dit cela a Laurencin. Ouy bien monseigneur : mais je suis alle trop tard, vostre nepveu avoit desja fait sa foyre, et en a seulement pris pour huyt cens francz. Pour huyt cens francz saincte Marie, dist labbe : vela ung mauvais paillardeau. A coup vous scavez bien son logis allez le trouver : & luy dictes que sil ne va vistement rendre sur Laurencin ce quil a pris, que jamaiis de moy namendera dung denier Le maistre dhostel fist le commandement de monseigneur & sen vint a Lyon cuydant trouver son homme qui paravant cestoit bien doubte de lencloueure, & avoit dit a ses serviteurs. Si personne des gens de monseigneur Desnay me viennent demander quon face force excuses, en sorte que je ne parle point a eulx. Et pareillement en fist advertir tous ceulx du logis. Quant le maistre dhostel le vint demander, on luy fist response quil estoit chez monseigneur de Ligny. Il y va & ne le trouva pas, si retourna au logis. On luy dist quil estoit alle essayer des chevaulx dela le Rosne. Bref il y fut plus de dix fois, mais jamais ne le peut trouver, si sen retourna : car il veit bien que cestoit une mocquerie. Quant il fut a Esnay il dist a monseigneur que cestoit temps perdu de chercher son nepveu : car plus de dix fois avoit este a son logis : mais possible nestoit de le trouver : car il se faisoit celer. Si dist labbe. Par mon serment cest ung mauvais garson, mais il sen repentira. Son courroux se passa quant il voulut, mais il nen eut autre chose. Si laisserons a parler de luy, & retournerons au bon chevalier et a son compaignon, et comment ilz exploicterent en leurs affaires.
[9r]
¶Comment le bon chevalier sans paour et sans reprouche et sont compaignon se monterent de chevaulx et garnirent dacoustremens : et comment ledit bon chevalier se porta gentement selon sa puissance contre messire Claude de vaudray.
VOus povez assez entendre que incontinent que le bon chevalier et son compaignon eurent de Laurencin ce quilz demandoient ne firent pas grant sejour en sa maison, doubtant ce qui advint depuis. Ains si bonne diligence mirent en leur affaire quilz furent pourveuz de ce quil leur failloit. Ilz se retirerent en leur logis ou soubdainement envoyerent querir tailleurs pour faire a chascun trois acoustremens sur le harnoys : car le bon chevalier vouloit que son compaoignon feust de sa livree, aussi navoient ilz zriens party ensemble. Apres ce quilz eurent bonne ordre quant aux habillemens Bellabre dist. Compaignon il fault que nous allions veoir des chevaulx Je scay ung gentil homme de Pyemont loge en la grenete qui a ung bas roussin bien releve et bien remuant ce sera bien vostre cas, et il me semble aussi quil a ung petit courserot bay qui est fort adroit. Lon ma dit quil les veult vendre par ce que puis huyt jours en les chevauchant sest rompu une jambe, allons veoir que cest. Cest bien advise respondit le bon chevalier. Si sen allerent passer leaue vers nostre dame de confort : puis se tirerent au logis de ce gentil homme piemontoys quilz trouverent en sa chambre fort mal acoustre de sa jambe. Ilz le saluerent Et il leur rendit le semblable comme courtois chevalier. Bellabre prist la parolle et dist. Mon gentil homme vecy mon compaignon qui a desir de recouvrer une couple de chevaulx que vous avez, par ce quon nous a rapporte que les voulez vendre, au moyen de linconvenient qui vous est advenu : dont il nous desplaist. Sur ma foy messeigneurs respondit le gentil homme il est vray et men fait grant mal : car les chevaulx sont beaulx et bons : mais puis quil plaist a dieu, je voy bien que de trois moys ne scaurois partir ceste ville, les vivres y sont chers, mes chevaulx se mangeroient en lestable : vous me semblez honnestes et gaillars gentilz homes, jayme beaucoup mieulx que mes chevaulx tumbent entre voz mains que ailleurs : montez dessus et les allez veoir hors la ville avecques ung de mes gens, et au retour silz vous plaisent nous en ferons marche. Ilz trouverent le propos honneste, et incontinent furent les chevaulx seellez sur lesquelz le bon chevalier et son compaignon monterent et les menerent jusques a la prairie pres la guillotiere ou ilz les coururent et troterent, de sorte quilz sen tindrent pour contens. SI retournerent au logis du gentil homme pour faire le marche et luy demanderent le pris quil les vouldroit vendre. Par ma
[9v]
foy dist il si jestois sain il nya homme sur la terre si je ne luy en vouloye faire present quil les eust pour deux cens escus, mais pour lamour de vous je suis content de les vous laisser, le roussin pour soixante escus, et le courserot pour inquante, ce sont cent dix escus et nen auray pas moins. Ilz virent bien quil estoit raisonnable, et ne dirent autre parolle sinon. Mon gentil homme vous les aurez, et tout nostre vie deux gentilz hommes a vostre commandement dont il les remercia. Ilz misrent la main a le bourse & luy baillerent ses cent dix escus, et deux pour le vin des serviteurs. Les chevaulx furent menez par leurs gens a leur logis, lesquelz firent tresbien penser et acoutrer, car plus ny avoit que trois jours a commencer lemprise quavoit faicte messire Claude de vaudray parquoy tout homme sappareilloit selon sa puissance. Si ouvrit icelluy messire Claude son pas selon lordonnance quil avoit par le conge du roy de France fait publier, et par ung lundy se mist sur les rencs, ou contre luy sessayerent plusieurs bons & gaillards gentilz hommes de la maison du bon roy Charles telz que le seneschal Galyot pour lors fort gaillart et appert homme darmes Le jeune Bonneval, Saudricourt, Chastillon, Bourdillon qui estoient des plus privez de la personne du roy & plusieurs autres ou chascun comme povez penser fist le mieulx puil peut. Or estoit telle lordonnance que quant chascun avoit fait ce en quoy il estoit tenu convenoit que le long de la lice feust mene veue descouverte affin que lon congneust lequel cestoit qui avoit bien ou malfait, parquoy a ceste raison povez penser quil ny avoit celluy qui ne se mist en son effort de bien faire. Le bon chevalier sur le dixhuytiesme an de son aage qui estoit fort grande jeunesse, car il commencoit encores a croistre, et de sa nature estoit meigre & blesme se mist sur les rencs pour essayer a faire comme les autres, et la faisoit son jeu dessay qui estoit assez rudement commence, car il avoit a faire a ung des plus appers et duytz chevaliers de guerre qui feust au monde. Toutesfois je ne scay comment ce cut ou si dieu luy en couloit donner louenge ou si messire Claude de vaudray prist plaisir avecques luy, mais il ne se trouva homme en tout le combat tant a cheval comme a pied qui fist mieulx ne si bien que luy, et de ce les dames de Lyon luy en donnerent le los, car comme desja a este dit dessus il falloit apres avoir fait son debvoir aller le long de la lice veue descouverte, parquoy quant il convint que le bon chevalier le fist assez honteux les dames en leur langaige lyonnois luy donnerent lhonneur en disant, vey vos cestou malotru il a mieulx fay que le bon roy Charles dist a son soupper pour plus lhonnorer. Par la foy de mon corps Picquet a ung commencement dont a mon oppinion fera saillie a bonne fin, et dist alors au seigneur de Ligny. Mon cousin je ne vous feiz de ma vie si bon present que quant je le vous donnay. A quoy respondit ledit seigneur. Sire sil est homme de bien vous
[10r]
y aurez plusgrant honneur que moy, car le bon los que luy avez donne la fait entreprendre tout cecy dieu vueille quil puisse continuer, mais son oncle labbe Desnay ny prent pas grant plaisir, car il a eu ses escus et ses acoustremens a son credit dont desja estoit le roy assez informe. Si se prent a rire et toute la compaignie.
¶Comment le seigneur de Ligny envoya le bon chevalier en garnison en picardie ou estoit sa compaignie, et fut loge en une jolye petite ville appelle Ayre, et comment a son arrivee ses compagnons allerent au devant de luy.
¶Chapitre .ixe.
APres le tournoy finy le seigneur de Ligny ung matin appella le bon chevalier sans paour et sans reprouche, auquel il dist. Picquet mon amy pour vostre commencement avez assez eu belle & bonne fortune, les armes se veullent continuerr, et encores que je vous retiengne de ma maison a trois cens francs par an et trois chevaulx a livree je vous ay mis de ma compaignie. Si vueil que vous aillez a la garnison veoir voz compaignons, vous advisant que y trouverrez daussi gaillards hommes darmes quil y en ait point en la chrestiente et qui souvent exercent les armes en faisant joustes et tournoys pour lamour des dames et pour honneur acquerre. Si me semble attendant quelque bruyt de guerre que ne pourriez mieulx estre. Le bon chevalier qui autre chose ne demandoit respondit. Monseigneur, de tous les biens et honneurs que mavez faitz et faictes chascun jour ne scauriez pour le present tirer de moy que treshumbles remerciemens et prier nostre seigneur quil le vous vueille tendre, mais cest au jourdhuy le plus grant desir que jaye daller veoir la compaignie que dictes, car je ny scauroye si peu demourer aux biens que jen ay ouy dire que je nen vaille mieulx toute ma vie, et si cest bon plaisir je partiray demain. Le seigneur de Ligny dist, je le vueil bien, mais premier veulx que preniez conge du roy et je vous y meneray apres disner, ce qui fut fait, et trouverent le roy comme il se vouloit lever de table, auquel le seigneur de Ligny dist en telle maniere. Sire vecy vostre Picquet qui sen va veoir ses compaignons en picardie, il vient prendre conge de vous. Si se mist dung asseure visaige le bon chevalier a genoulx, que le roy voulentiers regarda, et en soubzriant luy dist. Picquet mon amy, dieu vueille continuer en vous ce que je ay veu
[10v]
de commencement et vous serez preudhomme, vous allez en ung pays ou il y a belles dames faictes tant que vous acquerez leur grace, et a dieu mon amy (grant mercy sire dist le bon chevalier). Si fut incontinent embrasse de tous les princes et seigneurs au dire a dieu avecques plusieurs grantilz hommes qui avoient grant regret dequoy il laissoit la court, mais non avoit pas luy, ains luy tardoit trop a son advis quil nestoit desja au lieu ou il devoit aller. Le roy fist appeler ung de ses varletz de chambre qui avoit quelques deniers en ses coffres auquel commanda bailler au bon chevalier trois cens escuz, et pareillement luy dist delivrer ung des beaulx coursiers qui feust en son escurye. Il donna au varlet de chambre tentre escuz, et dix a celluy qui luy mena le coursier dont tous ceulx qui le sceurent louerent sa liberalite a merveilles. Le seigneur de Ligny le ramena a son logie, et le soir le prescha comme sil eust este son enfant, luy recommandant sur toutes choses avoir toujours lhonneur devant les yeulx, quant il fut temps daller coucher ledit seugneur de Ligny luy dist. Picquet mon amy je croy que vous partirez demain plus matin que ne seray leve, a dieu vous command. Si lembrasse les larmes aux yeulx, et le bon chevalier le genoil en terre prist conge de luy et sen alla a son logis ou il fut convoye de tous ses compaignons desquelz le conge ne fut pas pris sans grans embrassemens. Il monta en sa chambre ou il trouva le tailleur dudit seigneur deLigny qui avoit deux habillemens competz que son bon maistre luy encoyoit, si luy dist. Mon frere mon amy si jeusse sceu ce beau present jen eusse remercie monseigneur qui ma tant fait dautres biens que jamais vers luy ne le scauroye meriter, vous ferez sil vous plaist cela pour moy. Si tira a sa bourse et luy donna vingt escus. Ung des serviteurs dicelluy bon chevalier luy dist. Monseigneur Guillaume le palefrenier a amene en vostre estable le bon roussin de monseigneur et ma dit que mondit seigneur le vous donnoit, mais il sen retourne par ce quon le demandoit, et dit quil viendra demain matin parler a vous. Il ne me trouvera pas dist il, car je veulx estre a cheval a la pointe du jour. Si regarda le tailleur auquel il bailla dix escus, et luy dist. Mon amy, je vous pri baillez cela a Guillaume le palefrenier, et au demourant sil vous plaist me saluerez toute la belle et noble compaignie de la maison de monseigneur de par moy, ce que promist faire le tailleur, lequel party de sa chambre le bon chealier fist faire ses coffres & acoustrer son cas pour partir de bon matin, puis se mist dedans le lict ou peu reposa, car il estoit pres de minuyt quant il si mist. Leve quil fut, premier fist partir ses grans chevaulx dont il avoit six par excellence avecques son cariage. Luy avecques cinq ou six beaulx et triumphans courtaulx se mect apres quant il eut prins conge de son hoste et de son hostesse et tresbien contentez de ce quil avoit este en leur maison. Son compaignon Bellabre fut aussi tost prest que
