Dit 22 : Treschiers sires et grans amis (MCCCCXV)
Lettres envoiees a Messire Regnault de Dacy[1], Chevalier, par ledit Eustace sur la promesse d’un pourpoint
1 Treschiers sires et grans amis,
2 Vous m’avéz long temps a promis
3 De drap de soye un bon pourpoint,
4 Lequel me venist bien a point
5 Pour moy en vestir cest esté
6 A Cressy ou a la Ferté
7 Et ailleus, qui le m’envoyast
8 Et le don ne me denoyast.
9 Asséz au promettre ot de gent,
10 Et vous estes riche d’argent
11 Pour le don faire proufiter.
12 Si vous en plaise a acquiter
13 Et l’envoier par devers moy,
14 Et je diray en bonne foy
15 Tant de bien de vostre personne
16 Et plus c’une cloche ne sonne.
17 Et n’aiéz en mon corps fiance,
18 Car je vous tieng en deffiance :
19 Se du pouropint ne suis paiéz,
20 Vous seréz batus et plaiéz
21 De coups de langue d’avocas,
22 Et proposera tant de cas
23 Contre vous de tort et de droit
24 Que nous serons en champ estroit.
25 Mais je ne vueil emprandre gaige
26 De fait a vous, fors de langaige, 426c
27 Et je vous tieng a si vaillant
28 Que vous ne seréz pas faillant
29 D’enteriner vostre promesse.
30 Lors me verréz crier « Noblesse
31 Brienson et Douy ! » bien hault,
32 Comme pourroit faire un herault.
33 Il sera de vous grans nouvelles,
34 Quant je vestiray vo[s] cotelles :
35 Se jesuis de vostre livree,
36 Vostre cause vault delivree.
37 Je seray a vous pour jamais.
38 Nostre Sire vous doint sa paix !
39 Escript a Crespy a grant glay,
40 .Xxiiii. jour de may.
Superscripcion
41 Le vostre tout, ou que je soye,
42 Quant j’auray mon pourpoint de soye,
43 De Valoys le povre Bailli,
44 Qui se doubte d’avoir failli.
[1] Raynaud corrige en Douy
