Dit 21 : Noz redoubtees damoiselles (MCCCCXIV)
Autres lettres d’esbatement envoiees par ledit Eustace et aultres a trois damoiselles sur le fait de Paviot qui couchiéz estoit a beauté avecques sa femme
1 Noz redoubtees damoiselles,
2 Au jour d’ui avons eu nouvelles
3 Du grief, du mal et de l’ahan
4 Que la veille de la Saint Jehan
5 Souffrit nostre compaingn[1] et ot
6 Qui est appellé Paviot
7 A Beauté ou il s’embaty,
8 Ou chascune se debaty
9 Moult a lui, quant en sa chambrette
10 Fut enclos avecques Balnchette
11 Bras a bras, couchiéz en un lit.
12 Mais pour empescher son delit
13 Ou afin qu’il ne dormist point,
14 Venistes la trop bien a point
15 Pour Blanchette, non pas pour li,
16 Car l’uis fut de vous assailli,
17 Et meistes toutes grant effort
18 Que vous peussiéz prendre le fort,
19 Com celles qui sont en desir
20 De vouloir avoir leur plaisir,
21 Comme vostre compaingne avoit,
22 Qui asséz bon gré vous sçavoit[2]
23 De l’assault qu’avoit son mari,
24 Afin qu’il ne fust endormi,
25 En ce lieu ou po souvent loge, 425b
26 Pour mieulx attemprer l’oreloge
27 En ouvrant de son contrepois
28 A chascune heure et sur son pois,
29 Dont il avoit six en la nuit.
30 Mais le ferir au martel nuit
31 Trop plus qu’il ne fait a la cloche,
32 Pour ce qu’a ferir trop s’esloche,
33 Et pour ce pas tant ne s’en deult
34 La cloche, qui point ne se muet,
35 Com les contrepois et les roes
36 Qui toudis vont par leurs escroes
37 En tournant jusqu’a chascune heure,
38 Que corde et contrepois labeure,
39 Pour ferir comme temps en est.
40 Tousjours est le marteau tout prest,
41 Qui fiert sur la cloche et desclique
42 Si fort en mi la droitte clique
43 Que lors couvient l’eure sonner.
44 Mais s’il doit plouvoir ou tonner,
45 Il fault les contrepois plus fors.
46 Or en a tant fait ses effors
47 Paviot de les attemprer
48 Par vo crier, par vo hurter[3]
49 Que sont instrument ne vault rien.
50 Tout est rompu, ce sachiéz bien,
51 Et couvient que tout se despiece.
52 Si ne sonnera mais a piece
53 Tant est grevéz, dont il nous poise,
54 Que nous doubtons bien qu’il ne voise
55 Pour atremper ses contrepoys
56 A Beauté de ci a trois moys :
57 Il le nous couvient mettre sus,
58 Car il est ce dessoubz dessus,
59 Et a dormi a son retour 425c
60 Comme las deux nuis et un jour
61 Sane esveillier : encor sommeille
62 Tant que du vir est grant merveille.
63 Mais entendéz bien ceste clause,
64 Car il dit que vous estes cause
65 En ses songes de son tourment,
66 Et nous a compté en dorment
67 Que Babilon et Mabilette
68 Chantoient une chançonnette
69 Et Margueron[4] du Boys Minart,
70 Qui estoit asséz sur le lart
71 Pour faire sonner l’oreloge.
72 Perrette hurtout a la loge
73 Pour ouvrir l’uis s’elle peust,
74 Et Jaqueline disoit : ― Pleust
75 A Dieu et au ber saint Nicaise
76 Que toutes fussiens aussi aise
77 Comme vous deux estes liens !
78 Si partierienmes a voz biens
79 Et aussis a vo bonne vie,
80 De quoy nous avons grant envie !
81 Toute nuit tel vie menerent,
82 Mainte grasse chançon chanterent,
83 Disans : ― Resveille toy, Robin !
84 Ne finerent jusqu’au matin
85 De mou esveillier a toute heure,
86 Chantans : ― Joli fevre, labeure !
87 Or forge, forge, martelet !
88 Puis y ot un petit varlet
89 Qui a maniere d’un erault
90 Ne faisoit que crier en hault
91 A haulte voix de plain pouoir :
92 ― Paviot, faictes vo devoir !
93 Mais il en avoit la telz deux,
94 C’iert madamoiselle de Dreux,
95 Madame des Bordes aussi,
96 Qui conseilloient, Dieu merci,
97 Ma doleur, ma paine et ma perte.
98 Mais quant je vi ma chambre ouverte,
99 Je me deslogay au plus main,
100 Et m’en fuy a Saint Germain
101 En Laye devers Monseigneur[5],
102 Car la nuit me sembla un jour,
103 Voire quatre, tant oy de raige
104 La nuit avec mon mariaige
105 Par le chançons et les reprouches
106 Qu’elles me firent de leurs bouches,
107 Dont tant me[6] fallu traveillier
108 Que je ne me puis esveillier.
109 Ainsis en son dormant raconte
110 Paviot sa paine et sa honte
111 Aussis que ce fust tout v[e]ray,
112 Et disoit : ― Je me vengeray
113 De celles qui tant m’ont grevé.
114 Lors s’est un petit souslevé,
115 Puis chiet arrier [sor] son coissin.
116 Et l’en lui fist mettre un poussin
117 Au feu, s’en a l’eaue humee.
118 Quant il fu fors de sa fumee,
119 Asséz tost aprés s’esveilla,
120 Et se vestit, et s’abilla.
121 Ses songes lui fut recitéz,
122 Si dist que c’estoit veritéz
123 De ce qu’il ot dit en dorment.
124 Pour ce du bon esbatement
125 Vous mercie li bons, li biaus
126 Qui va partout, c’est li toriaux
127 Auquel nulz n’ose faire mal. 426a
128 Cilz qui trait amont et aval,
129 C’est li moriaux, vous en mercie.
130 Et Montigny qui se soussie,
131 Vous gracie cent mille fois,
132 Quant vous avéz le contrepois
133 Fait ouvrer par devers Blanchette,
134 Car qui tant l’aime, tant l’achete.
135 Mais c’est aucune foiz grant mal
136 Aux gens de piet vir a cheval
137 Aller gent et n’y puellent estre,
138 Et aussi de veoir repestre
139 Gens a ceuls qui muerent de faim,
140 Quant avoir ne puelent du pain
141 Aux mangens et sont fameilleux.
142 Se celles en y a et ceulx
143 Qui ont esté en tel parti
144 Maintefoiz povrement parti
145 Des biens que ilz tout desiroient,
146 Si font que saiges qui s’avoient
147 Pour partir aux heures du jour
148 D’avoir oreloge a sejour,
149 Pour sonner comme Paviot ?
150 Atant finera le riot.
151 Mais a vous nous recommendons
152 Humblement, tant com nous pouons,
153 En priant que ci prenéz garde :
154 Dieux[7] vous vueille avoir en sa garde !
155 Escript de nuit la plume ou puing,
156 .Xxiiiie. jour de juing,
157 Ou fort de Saint Germain en Laye,
158 Prés des bois deléz la boulaye.
159 Robert Montigny et Eustace :
160 Que Dieux [les] tiengne en vostre grace, 426b
161 A tel fin que nulle ne die
162 Ce ne soit gieux sanz villenie !
La superscripcion
163 A noz treschieres damoiselles
164 Mabile, Perrette et Belon,
165 Jaqueline, chascune d’elles,
166 Et du Boys Mynart Margueron.
[1] Ms. compaingnon
[2] Vers doublé par le copiste qui ajoute Et tout son cuer letifioit
[3] Ms. hurler
[4] Ms. marguerite
[5] Raynaud corrige en Monseignour
[6] Ms. que
[7] Ms. Et dieux
